Edition: Lepage, Yvan G. L'oeuvre lyrique de Blondel de Nesle. Paris: Honoré Champion, 1994.
Suivent les chansons R110(a), R110(b), R120, R482, R620, R742, R802, R1095, R1227, R1495.
|
D'amors dedans cors; Molt m'angoxe et amaie, Si n'i pert defors. Hé lais! por coi m'an ceus vanteis, Jai ne me puist venir santeis, Se ceu don ceus navreis Ma boche nai rasaie? /171vo/
Dousour et confort Par joie d'amor vraie. Ceus an baixans mors; S'ancor ne m'est autres doneis, Mar fu onkes de li preveis. Kar l'amor ceus livreis, C'elle trop m'i delaie.
Jone a cel mestier, Ains nelui ne vosiste For moi angignier. A morir m'i aveis apris, Se plus n'i ait que g'i ai pris; Don m'est il bien avis; Quant baisans me traïstes.
Mon fin cuer trichier, Kant teil savour meïstes An cel dous baixieir. Je ceus li plus leals amins Qui onkes fust nuns bien promis; Hé lais! tant ai je pix Amor, mar me noristes!
Con je fais celi Por cui poinne et travaille, Mais n'est mie ansi; Amors trop mi faites doloir; Et si vos cers san joie avoir Si me tient an espoir; K'amours neivre et repaise.
|
R120: fol. 134ro-vo
Chanson anonyme, sans mélodie (espace ménagé pour les portées)
S’amors veult ke mes chans
remagnet
Et ma dame lou me defant,
Ke mon cuer angoise et mahagnet,
Ne n'an kier mais avoir talant;
Ans veul bien k'elle mi destrangnet,
C'elle voloit estre conpagne
De la dolour ke por li sant.
Or li proi ke pitié l'an prangnet.
Et ke de moi greveir se taignet.
Ke trop m'avrat peneit sovant,
Mais n'est pais drois ke je m'an plagne,
S'amors fait son conmandemant;
Puis k'elle a li ameir m'ansaingne,
Bien ferait --mais elle ne daignet--
K'elle m'amast si loalmant /134vo/
Con sui oil m'an firent l'ansaigne.
Ne plus, certes, ne li karroie;
C'ansi poroie bien garir
De cest mal, ke si afabloet
Mon cuer, ke nae la pue haïr.
Trop m'est bel k'elle m'i garroiet,
Et se je cest mal refusoie,
Ja pues ne dovroe garir
De ceu dont la dolour est moie.
Et ciaz ki cert de cuer et
proiet,
Voit on molt poc de bien venir;
Mais n'est pais drois ke j'an recroe
Por mal ke m'an peust avenir.
Ses biaz sanblans ne mi fainoiet,
As biaz euz ke ces cuers m'anvoiet,
Ou ne m'i desoit par mantir,
Ja Deus ne donst ke j'an recroie.
Se sai je bien; plus bial mesage
Ne m'i poroit ille anvoier
Ke ciaz ki sont de son linage
Por ma grant dolour aligier.
Dont Blondels mat son cuer an ostage
Ou il n'ait point de voisenage,
Fors bial sanblant por otroer;
Mais n'i clame point d'eritage.
R482: fol. 11vo-12vo
Chanson notée, anonyme
Bien doit chanter cui fine amors adrece
De joie a/12ro/ voir, mais pas ne m'en semont,
N'em moi ne truis ne joie ne leece
Par coi ge chant, ne ne savroie dont.
Et nonporcant, se li mals me semont despont,
K'entre ma dame et fine amor me font,
Bien puis morir, que ja ne lo savront,
Se par mon chant n'en sevent la destrece,
Ou par mon vis, don la colors defont.
Ne me retient faintise ne perece,
Que ma dame ne m'ait navré parfont
D'un dolz regart, don ma dame me blece,
K'ele me fait des biaus euz de son front.
Ne puis garir, se mire ne me sont
A l'aïde de son cuer, qui confont
Moi et les miens, que plus aim en cest mont
Que estre rois de la greignor haltece,
Se Deus me doinst joie ne gueredon.
Ja por dolor que j'aie n'iert
jus mise
Ma volentez d'amer veraiement,
Et sachiez bien que de loing l'a emprise,
N'onques por ceu mains n'amai finement.
Bien sai de voir que faillir a sa gent
Ne doit amors, se droiture ne ment;
Mais plus d'onor en done a un k'a cent.
Et je sui cil qui plus grief sen jostise,
Sel faz alques par mon comencement.
Je n'ai dolor que s'ele fust assise
En cuer d'un cors n'amast trop finement;
De tel leu m'est envoié et tramise,
Don je n'en os refuser le tormant.
Bien fait amors de moi a son talent
Et esperance et ma dame alsiment;
Qui me destran /12vo/gnent
entr'eles malemant;
Mais je ne sai s'il avront covoitise
De moi doner nul asuagemant.
Molt fut l'amors corageuse
et hardie,
Qui vint mon cuer en mon cors assaillir;
Poruec non fu, q'ele n'i venist mie
S'ele cudast qu'ele i deüst faillir;
Mais tant conut volenté et desir
Qui de mon cuer ne se puient partir,
D'un dolz regart fist verge a moi ferir;
Deus, mar la vi de ses bels euz coillie,
Se ma dame nel fist por moi sentir.
Por cui j'ai moi et
tote gent guerpie
Bien me devroit a son oés retenir,
Il n'en est mals dolors n'en altre envie
Qui me peüst veoir de li partir,
Por tant poroie a grant peine venir
Se lealtez valoit meuz que taisir
Et s'amors vuet ses biens a droit partir,
Mais sa pitiez est en li endormie
Si ne me vuet ocire ne garir.
R620: fol. 111vo-112ro
Chanson anonyme, sans mélodie
A1’antrant d’esteit ke li tans s’ajancet
Que j'oi ces osiaz sor la flour tantir,
Sospris seus d'amours, dont /112ro/ mes cuers balanset;
Deus m'an donst joïr tout a mon plaisir,
Ou atremant bien crien morir sans doutanse,
Ke je n'ai d'amors plus ke sostenance,
Amours est la riens ke je plus desir.
N'est pais drois d'amors
ke les biens a sanset
Ceaus ke tous les mals n'an puet sostenir;
Chargiet les mes ait an ma penitance
La belle ke bien l'on me puet merir.
Tous les mals d'un an par une sanblance
M'asowageroit par sa grant vaillance
Celle ki me fait parleir et taisir.
R742: fol. 38vo-39ro
Chanson anonyme, portées vides
Se savoient mon torment
Et auques de mon affaire
Cil qui demandent conment
Je puis tante chançon faire,
Bien diroient voirement
Que nus a chanter n'entent
Qui meuz s'en deüst retraire.
[......................................]
[......................................].
Bien me revient ausiment, /34ro/
Quant de chanter me puis taire,
Que celi pitiez n'en prent,
Qui tel dolor me fait traire;
Mais qank'a l'amor apant
M'estuet faire bonement;
D'un dolz regart debonaire
M'aguise si mon talent,
Par que je muir si sovent.
Qant tuit li bien sont en li,
De tant li ferai proiere
Qu'ele regart son ami
Et qu'ele soit droitureire;
Mais trop sont nostre enemi
De granz mençonges garni
Et de gaber par derriere;
Por ce cuide avoir failli
Guioz, qui tant a servi.
Bien la revoil esgarder;
Cui chaut se j'en muir d'envie?
Et quant j'oi de li parler,
Neïs la ou ele n'est mie,
Ja ne querroie finer
De respondre ou d'escouter.
Beaté, sens et cortoisie
Ne sot unques Deus ovrer
C'on ne puisse en li trover.
R802: fol. 92ro-vo
Chanson anonyme, sans mélodie (espace ménagé pour les portées)
Molt se fesist boin tenir de chanter
Car en chantant ne seit hom mais ke dire;
Ne mot ne chant n'i puet hom mais trover,
Tant i sache hom esgarder ne eslire,
Ke maintes fois ne soit esteit redis;
S'an est chanteirs plus mas et desconfiz,
Ne ja por ce ne sera l'amors pire.
Endroit de moy ne m'an puis consireir,
C'amors m'ocit d'un si plaisant martire
K'elle me fait en aventure ameir
Celle ou ge puis ma dose mort eslire;
Ne ja vers li ne serai si hardiz
Ke mes tormans li soit par moy gehiz
S'an chantant non, por tant me puet ocire.
Certes, dame, bien vos dovez prisier
K'il et en vos plus biauteit et vaillance
K'en nule autre k'amours puist justicier;
En vos n'a rien ke ne vaigne en plaissance.
Dame, en vos sont tuit li bien ke ge di,
Ce m'a amors certes trop esbahit:
Kant a vos pans, n'an /92vo/ fais nulle sanblance.
Mais tant i ait ke bien me puet aidier,
K'en pou d'oure donne Deus grant chëance.
D'un dous regart, d'un rire ou d'un baisier
M'avroit amors torneit a delivrance
Et de mes maus respasseit et garit.
Dame, aidiez moy, ke ge n'i mure ensi,
C'onkes vers vos ne oi fasse esperance.
Li tres gens cors ma dame et si oil cleir,
Ke tant seivent amerousemant rire,
Firent l'amour dedans mon cuer entreir,
Ke nulle atre nou me puet escondire.
K'en ceste amor m'est cist tormans deliz,
Kant plus ai mal, lors cuit estre garis.
Il n'ainme pas k'encontre amor s'aïre.
R1095: fol.40ro-vo
Chanson anonyme, notée
Tant ai en chantant proié
Que bien porroit mais remanoir,
Qant de moi n'en at pitié
Cele qui bien seit mon voloir;
Las je n'en puis avoir congié,
C'a fine amor m'ai outroié,
Tant con j'avrai sens et force et pooir,
Ne lasserai mon chant *mon chant* ne s'amistié.
Coment qu'ele m'ait lassié
En ire et en dolor manoir,
Dolcement m'a engignié,
Se ja plus n'en deüsse avoir.
Qui que m'en tiegne a trechié, /40vo/
Ge di que bien l'ai emploié,
Se ma dame faisoit por moi doloir,
Cest mal qui por li m'a travaillié.
Ja ne quier que nuns
m'ensoint
A issir fors de sa prison;
Ainz voil bien, que s'ele m'ataint
Que vers li face mesprison,
Que ja de moi ne se claint,
Mais si com ele me destraint,
Me destraingne senz avoir guerredon,
Ne ja ses cuers ne li doint qu'ele m'aint.
Douce dame, en vostre cuer maint
Et en vostre clere façon
La joie qui me soffraint;
Et li biens dont j'atent lo don,
Que vostre franchise m'amaint!
Et s'il en vostre cuer remaint,
Que je n'aie de vos se dolor non,
Don ne sai je qui a joie m'amaint.
R1227: fol. 12vo-14ro
Chanson notée, anonyme
Quant je plus sui en paor de ma vie
Et je doi mains par raison estre liez,
Lors me semont ma volentez
et prie
Et fine amors que je soie envoisiez.
S'ele m'ocit, siens en iert li pechiez;
Trop a douz non por faire vilenie;
Et se je sui par mes euz travilliez,
Dont la vi,
Q'en doi je li
Demander fors merci?
Pues que par moi sui de joie esloigniez,
Je ne m'en doi plaindre mie;
Coment c'aie esté /13ro/
iriez,
Dolcemant sui engigniez.
Amors, mar vi cels qui vos ont
traïe,
Quant vos sor moi vostre dolor vangiez;
Je n’en ai pas envers vos desservie
Nule chose dont doie estre empiriez.
Mon cuer avez, piece a n'en fu aidiez,
Ainz m'a guerpi por vostre conpaignie.
Mains, se vos plaist, cruelmant m'ensengnié m'essaiez
A ami,
Que ja de moi
Ne ferez
enemi.
Ainceis vos pri que merci en aiez,
Que se vos auvec la vie
Que je meing me destrangniez,
Mal vi bielté senz pitié.
A droit effort ai la dolor vencue,
Qui me cuda de ceste amor oster;
Je ne di pas qu'ele en soit recreüe,
Ainz lo me fait chascun jor conparer,
La dolce riens por mon cuer esprover,
Si que j’en ai tote altre amor perdue,
Ne je n'ai mais de coi altrui amer
Ne servir.
Ne
desevir
Ne puis par mal soffrir
Que la peine *que la peine* vuelle guerredoner,
Que je ai por li aiie;
Ne sai se merci trover
Porroie en son cuer aver.
Nenil cer certes, ainçeis m'iert chier
vandue;
Que senz morir ne la cuz acheter.
Joie oi de li, si la m'a retolue;
Rien n'i at mis que n'en revuelle oster,
Fors volenté, qu'ele n'en puet geter,
K’el me lassa tres or l’ai bien tenue,
Ne ja mien vuell ne l’en querisse aler.
Tant desir
C'a son plaisir
Pusse de li joïr,
Car altremant ne la quier engener.
Si me soit joie rendue
Et puisse amors recovrer,
Con je di voir senz falser.
Onques mais cuers, en voloir n’en
penseie,
Envers dame si bien ne s’esprova;
Mais je ne sai coment puisse estre amee
Cele d'autrui qui son /13vo/
cuer n'amera.
Ce tieng a sien que por mien me
lassa;
Et nonporcant c'ainz n'i ot dessevree,
Nen autremant auvec l’en porta
Par mon gré.
M’a si grevé,
Et par
ma volenté:
Ja ma dolce dame reproché n'en avra,
S'en sera espoir blasmee,
Mais nului n'en pesera
Plus de moi cant ce
sera.
Chançon, di li tant mar vi assemblee
Tant de bealté con ele me mostra
En sa face vermeille coloreie,
Dont li orgoilz el cuer li avala,
Qui son ami ocire li rova.
S'amors me doinst avoir longe duree,
Ele est la riens en cest mont qui plus tost
A sené
Home navré
De si grant enferté
Las, con je sui --bien ait qui m’en navra!--
Tost m'avra guerredonee
Ma peine, qant li plair
Et qant pitiez l'en prendra.
Bealté, bonté, cler vis a desmesure
A ma dame, vairs euz et simple vis.
Si me destraint et ocit par droiture
Li bels samblanz, par coi je sui sospris;
En li amer sui toz jors ententis.
Ne vuelle Deus c'aillors aie ma cure,
K'en si haut leu ne porroie estre assis.
Par son gré
M'a si grevé
Et par ma volenté.
Tant dolcement m'a ma dame conquis
Que trop l'aim a desmesure;
Siens sui et serai toz dis,
Ja n'en quier estre partiz.
Coment que soit ma joie deffenie,
Ainz de vivre ne fui jor enuiez,
Mais or voi bien que l'amor me defie,
Et si ai bien mes travalz emploiez,
C'a mon voloir ai esté engigniez.
Or sont cil lié qui sor moi ont envie;
Et se par els sui de joie esloigniez,
Je lor pri
Et lor requier
Qu'il prient Deu por mi,
Que je me senz de grant meffait chargiez;
S'en seroit m'erme perie,
Car a boen droit sui jugiez;
Deus prengne vos en pitiez.
Cuenes, en Blondel est neie /14ro/
L'amors, qui ja ne faudra,
Tant de mal ne li fera.
R1495: fol. 95ro-vo
Chanson anonyme, sans mélodie
Li plus se plaint d’amors mais je n’os dire
C'onques nul jor me vosist angingnier.
Mais mes voloirs m'aïde a deconfire,
Si nel doi pas ma dame reprochier;
Ains vuel proier
Qui malit mon martyre,
Car je l'ain tant longement sans trichier,
Que j'en morai si m'an oi escondire.
Deus! je fui ja de si grant joie
sires,
Cant sa biauteit le me fist acointier!
Or trai por li poinne et tormant et ire,
Et nonporcant trop i ait dous mestier.
Forment l'ai chier,
Mais li cors m'en anpire.
Lais, c'ai je dit! ne puet pas anpirier
S'elle voloit de mon cors estre mirres.
Je ne ser pas a mois ne a semainne,
Mais tout adés, si li venoit an gret,
Ausi con cil cui amors trait et moinne
A son plaisir et a sa volanteit.
Trop
longement
M'at durét ceste poinne
Et ceu que j'ai de loial cuer ameit:
Pres sius de li, mais s'amor m'est lontainne.
Tant con je fui siens liges an demoinne
An ai mon cuer maintes fois mercieit
Ceu qu'ele fut ma joie premerainne.
Je ne di pas que n'aie conpareit
Sa grant biauteit
Chescuns jor par estrainne;
Mais ceu m'en ait doucement conforteit,
C'onques ne fut cortesie vilainne.
Deus, je ne sai conmant ma joie alisce,
Puis que par tout me fait s'amor doloir,
Car je l'ain /95vo/ tant leaument
san faintisxe,
Si conme cil qui ne seit decivoir;
Greignor pooir
Doit avoir vers franchise
Ma loiateis que preiers san valor,
S'amors est teis con chescuns le me prise.
Amors, de moi vos est il pitiet prise,
Que tant vos ai servit a mon poioir?
Bien deüssiés ma dame avoir aprise
Ceste dolor, qui me faites avoir;
Autrement, voir,
N'iert ja par moi requise;
Amors, se vos ne li faites savoir,
Ja ne verai la fin de mon servise.