|
Raoul de Soissons
Edition: Emil Winkler, Die Lieder Raouls von Soissons
(Halle: Max Niemeyer Verlag, 1914).
Suivent les chansons R1267,
R1978, R2063, R2107
R1267: fol. 105ro-vo
Attribution du manuscrit: Raoul de Soissons (main moderne)
Sans mélodie
-
Chanson m'estuet et faire et conmancier
Por celle riens dou mont que muez vodroie
Et por mon cuer un pou releecier,
Que bien avroit mestier de plus grant joie.
Et la biauteit que tant vi simple et coie
A ma dame me fait fait* outrecudier
D'un haut panser et d'un dous desirier,
Ou j'ai par droit antandre ne deveroie
Se bone amors et pitiés ne l'an proie.
-
Onques ne vi si saige a l'acointier
Ne si plaisant se regarder l'ozoie,
Mais je ne l'ous esgarder ne proier,
Ainz me faut cuers et la langue me loie
De paour. Las, que refuseis ne soie,
Car s'un petit me faisoit de dongier
De ces biaus eulz et de moi esloingnier,
Bien sai de voir que la mort santiroie
Si pres dou cuer qu'eschaper n'an poroie.
-
E se por li m'estuet la mort soffrir
De l'angoisse dont sa biauteit me blece,
La puist amors par mi lou cors ferir,
C'iert conpaigne de ma douce destresse.
Lais, c'ai je dit? Ce sans ne sa hautesse
Ne daigneroit a la moie partir,
Si me convient tous seus ces mas sofrir
Dont bone amor done joie et leese
Celz qui de cuer l'ont servie an tristece.
-
Muelz ain ma dame an tristece servir
Que jai i truis faintise ne perece.
Ainz l'amerai tous jors sans repantir
Que bone amor tout mon cuer i adresse.
Onques ne vi dame de sa jonesce
Si saigement se saiche maintenir,
S'an croixent tant mi amerous desir /105vo/
Que, cant recor sa tres douce simplece,
Autre joie ne quier n'atre leece.
-
Joie si fais mais elle est si tres grant
Que nus par droit n'i deveroit antaindre.
Mais sor tos suix de s'amor desirans,
Si me covient sovant palir et taindre.
Por ceu devroit ma douce estaindre
La grant dolor que m'est a cuer ardant,
D'un feu qui m'est si dous et si plaisans
Que, cant plus m'art, moins puet l'amors remaindre.
S'an doit pitiés faire ma joie graindre.
-
Dame, et s'an vos est pitiés defaillans,
Je ne sai mais ou foïr ne remaindre,
Fors c'a franc cuer qui vos est consillans
Et qui bien seit que je ne me sai faindre.
La me convient dolozer et conplaindre
Et, si vos plaist, bone et saige et vaillans
Par lui savrois conmant je suis sofrans
El dous dezir que ne me lait refraindre
De vos servir, d'acoler et d'estraindre.
Retour à l'index
R1978: fol. 137ro-vo
Chanson anonyme, sans mélodie
Qant je voi et fuelle et flor,
Colour mueir,
C'oselet /137 vo/ por la froidour
N'osent chanteir,
Adonkes sospir et plour,
Ne conforteir
Ne m'i puet aidier, tant ai dolour
Por bien ameir.
Car soffrir
Ne puet sans merir,
Cuers ke sant
Teis mas longuemant.
Kar la nut, cant m'i despuel,
Et dormir veuil,
Sovant muel
Mon viz, tant plourent mi oil.
-
Trop mi plaist et nut et jor
A remireir
La fasson et la colour
De son viz cleir.
E lais, je cuida en li
Mersit troveir
Por s'antrepris la folour
Ke je conpeirs
Cant i osa jehir
Mon desir
Soulemant
Et son bial cor gent
Or me heit et monstre orguel
A son apuiel,
Car voir suiel
Perdut ai, dont trop me duel.
Son gent cors mar acoentai
Ou fat mersis.
Son cleir viz mar remira,
Por cui languis.
Grief poinne et dolour en ai,
Et douz don pix.
Bien sai je n'an garra ja
C'adés m'es viz,
C'an pansant
Ensi an dormant,
Davant moi
Nut et jor la voi.
Li tres bel oil de son front
An mon cuer sont
Et seront,
Je croi, tant c'ansis m'avront.
Retour à l'index
R2063: fol. 122vo-123ro
Attribution du manuscrit: Raoul de Soisson (main moderne)
Sans mélodie (espace ménagé pour les portées)
-
Rois de Navaire, sire de vertus,
Vos nos dittes c'amors ait grant pousance.
Certes, c'est voirs, je l'a bien deseut,
Plus ait de poir ke n'ait li rois de France.
Car de tous mals puet doneir aligense
Et de la mort confort et garison.
Sou ne poroit faire nus morteis /123ro/ hons,
C'amors fait bien lou riche doloseir
Et les povres de joie keroleir.
Retour à l'index
R2107: fol. 128ro-vo-129ro
Attribution du manuscrit: Raoul de Soissons (main moderne)
Sans mélodie (espace ménagé pour les portées)
Cant voi la glaie meüre
Et lou rosier espanir /128vo/
Desour la belle verdure
La rousee respandir,
Lors sospir
Por celi cui tant desir,
Lais, cui j'ains outre mesure.
Tot asi conme l'arsure
Fait cant k'elle atent bruïr,
Fait mon viz tindre et paillir
Sa simple regardeüre
Ke me vient a cuer ferir,
Por fare la mort santir.
-
Molt fait douce bleseüre
Bone amor et sovenir,
Mais miez vadroit la pointure
D'un escorpion santir
Et morir,
Ke de ma dolour languir.
E lais, ma dame est si dure
Ke de ma dolour n'ait cure,
Ne de mes griez mals santir.
Ans me fait vivre et morir,
Et c'est adés m'avanture,
C'a dame ne poi servir
Ke lou me dignaist merir
-
Douce dame desiree,
C'onke dame ne fut si,
Se vos m'aveis davee
L'amor dont je vos pri si,
Anrichi
Sont mi morteil anemin,
S'avez lor joie doublee
Et a moi la mort donnee.
Se ne l'a pais deservit
C'onkes home ne transit
De mort si desesperee,
Et bien voil estre peris,
Puis k'a s'amor ai faillit.
-
E Deus! je l'ai tant amee
De lors ke premiers la vi,
C'onke puis d'atre rien nee,
Nes de mon /129ro/ cuer ne
joït.
Ains m'ait si
Laisiet por l'amor de li
Ke je ne ains atre nee.
Mais se ma dame honoree
Seit k'elle ait loial amin,
Bien dovroit avoir mersit,
Se loalteit li agree.
Mais sovant avient ensi
Ke se sont li plus haït.
-
Chanson va t'an sans atandre
A m'amie droitemant,
Prie li ke sans mesprandre
Me diet tout son talant.
Car sovant
Vif plus malerousemant
Ke cil cui mors fait atandre.
Mais sa belle faice tandre
Ou fine biateit resplant
Mon cors alume et esprant,
Li charbons desoz la cendre
N'airt pas si covertemant
Con je fas cant a li pans.
-
E lais, je ne m'ois defandre
De la mort ke por li sant,
Nes ke cil c'on moinent pandre
Ancontre son jugemant;
Ans atant
Mersit debonaremant,
Et ci vos fas ai antandre:
Se vos m'osïez puis prandre,
Blame i avreis de la gent,
Car cil ki ne se defant
Et a mersit se veult randre
Doit avoir ligieremant
Mersit cant s'espee rant.
|