UNIVERSITÉ D'OTTAWA Faculté des Arts

Laboratoire de français ancien

 

XVIII. Comment Nostre Dame descendi en l'iglise de Chartres au semadi a seir

1. Miracles de meinte maniere

2. Ouvra Dex por sa mere chiere,

3. Au tens que l'en ouvreit s'iglise

4. A Chartres, si con le devise

5. Li livres et le tesmoignie,

6. Dom dit vos ai une partie.

7. Mes les escriz ici devisent

8. Qu'ainz que ci miracle avenissent,

9. Avint un signe merveilleus

10. En l'iglise, non pas ailleus.

11. Cil qui fist le latin reconte

12. Que il et meint autre, sanz conte,

13. I estoient presentement

14. Et qu'il virent apertement

15. Un semadi, enprés complie,

16. Que l'iglise fu raemplie

17. D'une clarté, d'une lumiere

18. - Ne sei par voste ou par verriere.

19. Dedans l'iglise descendi,

20. Dom l'iglise si resplendi

21. Que tuit en furent esbahi

22. Et li oil de cels esbloï

23. Qui celle clarté regardoient,

24. Et li cierge, qui cler ardoient,

25. Toute leur clarté en perdirent.

26. Et ovec un escrois oïrent

27. Qu'avis leur fu qu'eüst tonné.

28. Nus tonnairres n'eüst donné

29. Si grant escrois ne si grant ton!

30. De verté dire nos venton,

31. Car croire devon, sanz faintise,

32. Que la douce dame en s'iglise

33. Entra et la seintefia,

34. Et son filz requist et pria

35. Que por s'iglise tost ouvrer

36. Volsist miracles demostrer.

37. Par cest signe que vos ai dit,

38. Tuit li miracle devant dit

39. Et cels que je vos ai a dire,

40. Si cum ge truis en ma matire,

41. Avindrent a l'enneur de celle

42. Qui de Deu est mere et ancelle.


Page d'accueil


Dernière mise à jour : 09.11.1999
Pour toute question au sujet de ce site, veuillez vous adresser à :
E-maillabo@francaisancien.net