XIX. D'un effant naié qui fu resuscité

1. De verité dire me vant!

2. Quant cil miracle que devant

3. Vos ai conté orent esté,

4. Que Dex, li rais de majesté,

5. Ot fet por l'enneur de sa mere,

6. Cil Dex, que reclamons a pere,

7. Fist en cel tens, en cel deteire,

8. A un chatel qui siet sus Leire,

9. Qui par non est Soilli nommé,

10. Un biau miracle et renommé

11. Que vos porrois par nos aprendre

12. Se un poi me volez entendre.

13. Une dame de haut parage,

14. Gentil de cors et de lignage,

15. Preude dame et relegieuse

16. Et vers le monde gracieuse,

17. Tint de Soilli la seignorie.

18. Celle dame d'oneste vie

19. O sei norrisseit un effant

20. Qui esteit filz d'un sen sergent.

21. La dame l'ot sus fonz tenu.

22. A l'enfant fu bien avenu,

23. Que einsint l'amoit de norreture

24. Com s'il fust son filz de nature.

25. Son filleul estoit de baptesme.

26. Mes une aventure moult pesme

27. Li avint par grant mesestance.

28. Si comme le portoit s'enfance,

29. Li enfant seuls joer s'ala.

30. Un jor, vers l'eive s'avala

31. Cum cil qui n'estoit guieres sage,

32. Qu'i n'avoit pas doze ans d'aage.

33. Un fossé ot illec ou l'onde

34. De Leire estoit grant et parfonde.

35. Cil se trest la com desvoié,

36. Dedenz chaï, si fu naié,

37. Si com Dex le vout destiner.

38. Atant fu l'eure de digner,

39. Que la dame mengier voloit.

40. Li enfant, si com il souloit,

41. Ne vint pas au mangier sa dame:

42. En toute la meson n'ot ame

43. Qui l'enfant moult ne demandast

44. Et a querre nel commandast.

45. L'en le hucha et apela,

46. L'en le quist deça et dela,

47. Mes ne fu pas trové por querre.

48. Son pere et sa mere en terre,

49. Qui de leur filz cremeteus erent,

50. Parmi la ville le cercherent

51. Par toz les leus que il cuidaient

52. Ou li autre enfant reperaient,

53. Mes n'en porent oïr novelle.

54. Le cuer leur deult soz la memelle

55. N'il ne sevent qu'il puissent feire.

56. Vers l'eive se pristrent a treire.

57. Dedens l'eive gardent atant,

58. Si voient la robe flotant

59. De leur enffant, que bien quennurent.

60. Si grant duel et si haut cri murent

61. Que la ville en fut esmeüe.

62. L'aventure est par tost seüe:

63. Tuit i vienent, tuit i acorent,

64. Tuit por l'amor de l'enfant plorent.

65. L'enfant traient de l'eive hors,

66. Qui d'esve avoit plein le cors,

67. Et bien pareit qu'i n'ert pas vis,

68. Aus ielz clos et au pale vis,

69. Et que nul membre ne mouvoit:

70. Tuit[l. Tot] a estre mort le provoit.

71. La dame qui ert sa marraine

72. La novelle sot darraine,

73. Car ne li ousoient noncier,

74. Qu'il la doutoient correcier.

75. Toutevois li covint savoir,

76. Et quant la dame sot le voir

77. Et la mort sot de son filleul,

78. Autel pleint fist et autel duel

79. De son filz esperituel

80. Com s'il fust son filz naturel.

81. La dame, qui grant amitié

82. Ot vers l'enfant et de pitié

83. Avoit le cuer atendraié,

84. Corut voier l'enfant naié.

85. Quant le voit, son duel renovelle.

86. La dame de Chartres apelle

87. Qu'a cest besoing secors li face.

88. Moillee ot de lermes sa face

89. Et ot oncore contricion;

90. Si pria o devocion,

91. Come de cuer douce et piteuse:

92. " Dame de Chartres glorieuse,

93. Ma priere, dame, entendés

94. Et mon filluel vif me rendés.

95. Dame a cui ge me dement,

96. Ge veu et promet fermement,

97. Tant com vivrai mes par aage,

98. Chacun an fere un vaage

99. A Chartres, ou estes servie,

100. S'a mon filluel rendés la vie,

101. Que ge aing come filz ou neveu.

102. Quant la dame ot fet son veu,

103. Maintenant comanda a prendre

104. L'enfant par les deus piés et pendre,

105. Et lier les piés a un fust

106. Si que la teste desoz fust.

107. Si come el dit, ainsint le firent:

108. L'enfant par les deus piés pendirent,

109. Si que la teste aval pendi.

110. Meintenant li enfant rendi

111. D'esve une trop grant gorgiee

112. Par la ou i l'ot engorgiee:

113. C'est par la bouche qu'ot ouverte.

114. Nus ne creüst pas chose certe

115. Que d'esve fust si grant ventree

116. Dedenz si petit ventre entree.

117. Quant l'eive fu de cors eissue,

118. La parole et la veüe

119. Li revint par vertu devine,

120. Car la haute Virge raïne,

121. Qui d'autres raïnes est gemme,

122. I ovra por la bonne dame,

123. Qui avoit en lé sa fiance.

124. Moult li valut foi et creance,

125. Humblesce et devocion,

126. Si come au centurion

127. Qui por son sergant tant pria

128. Que Dieu de mal le deslia.

129. Par tel semblant, par tel maniere,

130. Par la dame et par sa priere,

131. Li enfant qui esteit peris

132. Revesqui et li esperis

133. Li fu arriere ou cors rendus:

134. Vif, seins et saus fu despendus.

135. La dame en fu moult esjoïe,

136. Le veu qu'ot fet n'oblia mie:

137. Chacun an des lors, par usage,

138. Fist a Chartres pelerignage.

139. Tant com ou sicle demora,

140. A Chartres la dame aora,

141. Qui nos gart et qui nos deffende;

142. Chacun an porta son offrende.

143. Cest usage einseint meintint