XXII. Du chevalier que Nostre Dame garda de noyer et le delivra de ses ennemis

1. Un autre miracle semblable,

2. Bel et cortais et mervoillable,

3. Ne vous vuil mie trespasser,

4. Car ne me porroie lasser

5. De fere a la dame servise

6. En cui j'ai m'esperance mise.

7. Le fet vous conterai briement.

8. Il avint qu'un tornaiement

9. Fu, si comme le dit l'estoire,

10. Entre Lavardin et Montoire.

11. Un chevalier i ot de pris

12. Qui fu seurmené et seurpris,

13. Qu'uns suens anemis le vout prendre,

14. Et se prist cil moult a deffendre.

15. Li autre au poinz le prenoit

16. Si que pres qu'il nel retenoit.

17. Au darrean tant le sacha

18. Qu'au cheval le frein aracha

19. Hors de la teste et de la bouche,

20. Et li chevalier tantout touche

21. Les esperons au bon destrier

22. Que il chevaucheit fort et fier,

23. Grant et inel et tout saillant,

24. Et cil dessus, preus et vaillant,

25. Qui s'estort de ses anemis.

26. Et li chevaus, tout a devis,

27. Qui senti que fu desfrené,

28. Ansint com oisel empené,

29. S'en vint ou cours inelement

30. Et tout hors dou tournaiement

31. Porta le chevalier fuiant

32. Vers une eive reide et bruiant,

33. Perilleuse, grant et parfonde.

34. Prist a corre plus tout qu'aronde

35. N'autre oiseau ne porroit voler.

36. Li chevalier a acoler

37. Prist son cheval pour retenir,

38. Mes ce ne pot pas avenir

39. Par nul engin ne par nul art

40. Qu'aler le feïst autre part

41. Ne que retenir le peüst.

42. Or voussist il mieulz qu'il eüst

43. Esté pris au bien tournaier,

44. Car il voit qu'il est au naier

45. Se le cheval dedens l'eive entre.

46. Tout le cuer li fremist ou ventre

47. De la poour qu'il ot de mort,

48. Quar le cheval voit fier et fort,

49. Qui tous jorz vers l'eive s'aproche.

50. Sans que d'esporons ne li touche,

51. Court ansint con fust enragié.

52. Se cil desus descoragié

53. Fu, ne fet pas a merveillier,

54. Car poour a de perillier

55. Et voit le peril tout present.

56. Lors li vient en remembrement

57. De la haute dame ennoree

58. Qui a Chartres est aouree.

59. Tout meintenant en haut s'escrie

60. " Ha, dame de Chartres, aïe!

61. Vostre chevalier regardés:

62. M'ame et mon cors gardés!

63. A vous me veu, dame, et commant:

64. Aïe et secors vous demant,

65. Que de peril soie gité.

66. Si veu qu'a Chartres la cité

67. Vous requerré en voustre iglise

68. Se me montrez tant de franchise

69. Que me sauvez, dame, ma vie. "

70. N'ot pas sa parole fenie

71. Que la dame que il pria

72. Au cheval courant envoia

73. Un frein de devine poissance,

74. Par quoi cil vit tel demonstrance

75. Comme Balaam de sa beste,

76. C'ansint com eüst en la teste

77. Li chevaus un fort frein, s'estut,

78. Que force fere n'i estut:

79. Ausint com se la beste mue

80. Eüst la parole entendue,

81. De l'eive ou aloit retorna

82. Ne au tornei pas ne torna

83. De la part a ses averssierres:

84. Li chevaus l'enporta arieres

85. Au lices devers sa partie.

86. Ainsint la dame que l'en prie,

87. Qui ot oïes se prieres,

88. En delivra en deus manieres,

89. Qu'en l'eive ne fu pas naié

90. Ne la ou il ot tornaié

91. Ne fu pas pris ne retenu.