UNIVERSITÉ D'OTTAWA Faculté des Arts

Laboratoire de français ancien

 

III. De l'arsure de l'iglise de Chartres et comment li legas sarmona aus gens de la ville

 

1. Qui veult conter ou rimoier,

2. Ne doit pas son sen emploier

3. A conter mensonges ne fables:

4. N'est pas tel contes profitables.

5. Mes en voire estoire treitier,

6. Qui puet valleir et profitier,

7. Doit l'en bien mettre poine et cure;

8. Boen fet lere voire escripture,

9. Bien doit estre chose amembree

10. Qui sus verité est fondee,

11. Car de voire chouse conter

12. Puet l'en en pris et lous monter.

13. Por ce ai ge esleü tel matire

14. Que ge voill treitier et escrire,

15. Ou il n'a riens fors verité

16. Par le tesmoign d'antiquité.

17. Cil qui fist, en latin, le livre

18. Dit qu'o ses iaulz vit a delivre

19. Les miracles certeinement

20. Que Dieu ovra apertement

21. A l'enneur de sa douce mere,

22. A cui il est et fiz et pere,

23. En Chartres, en sa mestre iglise,

24. Puis qu'elle fu dou feu esprise

25. Et arse et tornee en cendre,

26. Si com emprés porrois entendre.

27. Cil qui ce mist en escriture

28. Vit les miracles et l'arsure:

29. Bien doit li homs estre creüz

30. De ce qu'o ses eaulz ot veüz;

31. Cil qui le latin en escrit

32. Vit quant qu'il mist en son escrit,

33. Donques en fest il bien a croire

34. Que ce qu'il dit est chouse voire.

35. Par lonc tens a esté teü

36. Li livres, qui n'ert pas seü,

37. Ne il n'estoit pas en memoire,

38. Car il ert enclous en l'aumoire,

39. Ou tresor de l'iglise, a Chartres,

40. Ou il a moult lestres et chartres,

41. Previleges de seignories

42. Et livres de toutes clergies

43. Qui melz vallent qu'argent ne qu'or.

44. En une huche, en ce tresor,

45. Fu trové, par quaiers, li livres

46. Qu'en prise plus que d'or mil livres

47. Ne que richesces ne qu'avoir.

48. Trové fu, ce devez savoir,

49. Au tens a l'esveque Mahé,

50. A cui il a moult agreé

51. Que cest oevre fut commenciee

52. Et achevee et avanciee,

53. Et dou latin en roumans mise

54. Et de la laie gent aprise,

55. Qui le latin mie n'entendent.

56. Li loi, par droit, au clers s'atendent,

57. Qu'i leur exposent l'escriture,

58. Qui leur est a entendre ocure.

59. Por ce voil ge m'entente mestre

60. Que ge leur expose la lestre

61. Et les miracles leur apreigne.

62. Parfere me doint ceste ouvraigne

63. Cil Dieu qui par mort ot victoire,

64. A sa loenge et a sa gloire

65. Et de sa mere glorieuse,

66. Qui porta la fleur precieuse

67. Qui aporta le fruit de vie.

68. Des deux requier force et aïe,

69. Qu'il me doignent poair et sen

70. De parfeire ceste oevre. Amen !

 

71. Puis que Dieux incarnacion

72. Prist por nostre redempcion,

73. Puis celui tens, en l'an milieme

74. Et joint le nombre de vintiesme,

75. La voille de la Nostre Dame,

76. En septembre, o grant diffame,

77. Par la volenté Jhesu Crist,

78. Celle nuit, si com truis escrist

79. Ou livre fet d'autorité,

80. A Chartres prist, en la cité,

81. Un feu qui ne fu pas a geus,

82. Car trop fu grant et domageus.

83. La ville ardi, dou feu esprise

84. Dom arse fu toute l'iglise,

85. Dom il fu merveilleus domage:

86. N'i remest voste n'autre estage,

87. Tres et soulives confundi

88. L'ardeur dou feu, le plon fundi;

89. Trebuchierent murs et mesieres,

90. Briserent cloches et verrieres,

91. Tretout torna a decepline,

92. Ou par arson ou par ruine.

93. Moult fu grant douleur dou veoir

94. Telle iglise ardoir et cheoir.

95. La douce dame debonneire

96. Sauva dou feu son seintuaire,

97. Qui autre seintuaire passe:

98. Sa sainte chemise, en la chasse,

99. Fu en une crote portee

100. Qui delez l'autel est fondee,

101. Que li encien i fonderent,

102. Qui sages et providenz erent.

 

103. La fu la sainte chasse mise

104. Ou est cele seinte chemise

105. Que la haute dame vestoit

106. Quant dedens son ventre estoit

107. Enclous le filz Dieu, Jhesu Crit.

108. Et truis encor ou livre escrit

109. Par le tesmoign d'antiquité

110. Qui tesmoigne por verité,

111. Que en meesmes l'enfantement

112. La dame ce seint vestement

113. Avoit vestu, celui meïsmes,

114. Si haut, si precieus, si seintimes,

115. Quant le verai filz Dieu enfanta.

116. Domques di ge qu'a l'enfant a

117. Touchié celle seinte chemise,

118. Croire le devez sans faintise;

119. Que la chemise, ce me semble,

120. Toucha a l'un et l'autre ensemble.

121. Donc c'est arguement necessaire

122. Que c'est le plus haut saintuaire

123. Qu'en nul leu puise estre trovez;

124. Par miracles est esprouvez.

 

125. Par droit doit donc estre creü

126. Qu'en terre a ce leu esleü

127. La dame et que sus touz l'ayme

128. Et dame de Chartres se clayme,

129. Quant ell i a tresor si chier.

130. Donc je puis, por voir, afichier

131. Et prouver, par droite raison,

132. Que c'est sa plus mestre maison

133. Et sa chambre plus deliteuse,

134. Quant sa chemise precieuse

135. I a mise la dame en garde.

136. Ce leu, par droit, en honeur garde

137. Et la cité a honoree,

138. Quant el s'en tient dame clamee.

 

139. Reperier voil a ma matire:

140. Einsy com m'avés oï dire,

141. Fu l'iglise arse et esbrasee.

142. Or convint qu'el fust amendee,

143. Ou failloit moult grant coustement,

144. Qu'il convint dusqu'au fondement

145. Tretout abatre et depecier,

146. Et oevre noveille drecier

147. Et l'eglise fere nouvelle,

148. Quar einsi le voust la pucelle

149. Qui dou leu a la seignorie

150. Et, nuit et jor, i est servie.

151. Par celui feu dom nos lisons,

152. Perdirent muebles et mesons

153. Cil de la ville, clerc et lei,

154. Si comme en l'escrit trové l'ei,

155. Et leur avoirs et leur richesces,

156. Dom leur cuers furent en detresces.

157. Moult se doulurent de leur pertes,

158. Mes ne fu pas douleur a certes

159. Envers la douleur de l'iglise

160. Qui si ert destruite et maumise.

161. Celui domage tant pleignoient

162. Que leur domages oblioient;

163. Nul son domage ne reproche,

164. Car grant doulour au cuer leur toche

165. De leur iglise qui ert arse.

166. Quant ne virent la sainte chasse,

167. Lors par fuerent il esperdu

168. Plus que de quant qu'orent perdu

169. Dou leur ne de leur mancion.

170. L'arson et la destrucion

171. Pristrent a regreter et plaindre

172. De l'iglise dom estoit graindre

173. Domages que de leur avoirs.

174. Il n'est mie sens ne savoirs

175. D'estre trop dolent pour avoir

176. Qu'en puet recovrer et ravoir,

177. Mes d'iglise et de saintuaire

178. Dom la perte doit moult desplaire,

179. Car perte de tele maniere

180. N'est pas a recouvrer ligiere.

 

181. Car celle perte fort plaignoient

182. Et cler et lai, et si disoient:

183. " Ha, Dieux! Ceste desconvenue

184. Est par nos peschiés avenue,

185. Quant la haute Virge real

186. Sa mestre sale especial

187. A perdue par nous pechiez

188. Dom nous estions entechiez.

189. Conquis avons, par nous meffez,

190. Que li sainz vessiaus est deffez

191. Ou le haut seintuaire estoit

192. Qui desconfortez confortoit.

193. C'ert la gloire et la dignité

194. Et l'enneur de nostre cité,

195. La lumiere et le miroer

196. De Chartres et dou terroer

197. Et de toute la region.

198. Coment si troublés vivrion ?

199. Certez, se sages estien,

200. Jamés a pais ne vivrien !

201. Quant le vessel si precieus,

202. Si vaillant et si glorieus,

203. Si noble pierre precieuse

204. Qui de sa presence joieuse

205. Nostre cité enluminoit

206. Et en sa virtu la tenoit,

207. Puis qu'avon perdu tel tresor,

208. Qui valoit plus qu'argent ne qu'or,

209. Jamés n'iert ne leus ne mestier

210. Que nous refassien le moutier.

211. Puisque est periz le saintuaire,

212. Ne nous porroit soair ne plaire.

213. Aussi ce n'est mie resons

214. Que nous refacien nous maysons;

215. Mais en releisson la cité,

216. Qui a perdu sa dignité

217. Et l'enneur et la seignorie

218. Par quoi el estoit embellie.

 

219. Ainsint fesoient leur compleinte,

220. Qui prochienement fu esteinte;

221. Car Dieu leur donna adjutoire,

222. C'un legat de par l'apostoire,

223. Sages clers et de grant renon,

224. Qui mestre Meilleur avoit non,

225. Si comme le livre le nomme,

226. Et si ert cardinal de Romme,

227. Ert a Chartres presentement

228. Et le feu et l'esbrasement,

229. O ses propres ialz, ot veü,

230. Dom il estoit plus esmeü

231. A mestre conseil en l'afeire

232. Comme de l'iglise refeire.

233. L'esveque et les clers a semons;

234. Preschement a feit et sermons

235. Et meinte parole retreite

236. Comment l'iglise fust refeite;

237. Et dist: " Biaus seigneurs, par venchance

238. De Dieu est ceste meschance

239. Avenue, moult aspre et moult dure.

240. Iceste grant mesaventure

241. Est par vous pichiez avenue.

242. Quant votre iglise avez perdue,

243. En jeunes et en oroisons

244. Devon estre, qu'or est sesons

245. Que nos soion en penitance:

246. C'est une chose qui moult avance

247. A commencier toute oevre humeine

248. Et a perfection la meine.

249. Prion Dieu et sa chiere mere

250. Que la leur sainte aïe apere,

251. Que puisse estre apareilliee

252. L'iglise qui est domagiee.

253. Bien veez la necessité;

254. Ne convient treire autorité

255. Ne vos longuement sermonner.

256. Boene essample devez donner

257. Au lais de commencier ceste oevre.

258. Bon loier atant qui bien oevre.

259. En tel oevre redefier

260. Convient les borses deslier

261. Et voidier poches et saçons

262. Por loer ovriers et maçons

263. Qui sache bien et tout ovrer

264. Por ceste perte recovrer.

265. Nus ne s'en doit arriere treire;

266. Ainz doit chacun, por cest afeire,

267. Abandonner et mueble et rente

268. Et argent et vessellemente,

269. Por achever ceste besoigne,

270. Tretout abandonner besoigne.

271. Quant li legat ot sarmonné,

272. Lors furent tuit abandonné

273. Et li evesques et li chanoine,

274. Sans alonge querre n'aloigne,

275. De eidier i efforcieement

276. Et s'otroierent bonnement

277. Que il mestroient volentiers,

278. Dusqu'a trois ans tretous entiers,

279. De leur rentes bien grant parties,

280. Mes qu'i retenissent leur vies.

281. A ce tretuit se consentirent

282. Et, si com promistrent, le firent.

283. Emprés cel establissement

284. Ne demora pas longuement

285. Qu'a un jor de sollempnité

286. Tout le pueple de la cité

287. Fist assembler mestre Meilleurs,

288. En la place, non pas ailleurs,

289. Ou l'iglise avoit esté.

290. Moult les a bien amonesté,

291. Comme clerc bien fondé en lestre,

292. De bien et de largement mestre

293. De leur biens et de leur chatex

294. A fere un monstier que ja tex

295. Ne puisse estre trové ou monde,

296. Si que la Vierge pure et monde

297. Soit illec dignement servie.

298. Quant dou leu cleime seignorie,

299. Il est bien et droit et reson

300. Qu'en li face riche meson.

301. Quant la gent enssemble ert toute,

302. La sainte chasse de la croute

303. Fut hors mise et aportee

304. La ou dou pueple ert l'asemblee.

305. Li evesques et le deien,

306. L'un premier, l'autre darrien,

307. En leur cous, en haut, la portoient;

308. Grant devocion i avoient.

309. Quant celle seinte chasse virent,

310. Cleir et lei se il s'esjoïrent,

311. Ce ne fet pas a demander.

312. L'en ne leur seüst commander

313. Chose qui ja fust contredite.

314. Ne porroit pas estre descrite

315. La grant joie que tretuit firent.

316. A Dieu grez et graces rendirent

317. Et a la glorieuse dame

318. Qui leur avoit sauvé la gemme

319. Et la gloire de leur cité,

320. Le mireour de verité

321. Et le haut tresor precieus

322. Qui les a fez liez et joieus.

323. Tout a terre s'agenoillerent;

324. De joie et pitié plorerent

325. Et loerent, o vois joieuse,

326. Dieu et sa mere glorieuse

327. Qui la seinte chasse ennoree

328. Avoient dou feu delivree.

329. Lors pristrent trestuit a promestre

330. Dou leur agent donner et mestre

331. En feire riche iglise et noble;

332. Clers et borjois et rente et mueble

333. Abandonerent en aïe,

334. Chascun selonc sa menantie.

335. A trespasser ne refet pas

336. N'il n'est pas droit que jou trepas

337. Un miracle qui autres passe,

338. Qui avint quant la sainte chasse

339. Fu portee aval en la crote,

340. Que l'iglise ert esprise tote.

341. Si n'avoit leu qui ne fust espris

342. De feu. Si furent si surpris

343. Cil qui la chasse aval porterent,

344. Que l'uis de fer sus aus fermerent,

345. Car il ne poient arrere

346. Retorner en nulle maniere.

347. Deux jors ou trais, la aval furent,

348. C'onques n'i mengerent ne burent,

349. Car la dame les soustenoit

350. Dom leur sostenance venoit,

351. Et li haut rois de majesté

352. Qui sauva, par sa poesté,

353. Trois jors entiers de la semaine,

354. Jonas ou ventre de la balaine,

355. Les trois enfans de la forneise

356. C'onques n'i sentirent meseise,

357. Noé en l'arche et sa meinaiee*

358. Qu'ou deluge ne fu naiee,

359. Et Daniel o les lions.

360. Icil Dieu que glorifions

361. Et bien devon glorefier,

362. Qui se lessa crucifier

363. Por nous pechiez, par sa franchise,

364. Cels qui avoient fet servise

365. A sa mere sauva de mort,

366. Que ne furent grevé ne mort,

367. Ne a l'eissue ne a l'entree.

368. Ne de chaleur, ne de fumee,

369. Ne de jeüner la aval,

370. N'orent il onc ne mort ne mal.

371. Si cuidoit l'en certenement

372. Que il fussent mort a torment

373. Et a martire et douleur,

374. Ou de fumee ou de chaleur,

375. Ou d'estre trop aval tenus.

376. Mes onques ne fu grevé nus,

377. Car la dame et son chier fil

378. Les garderent de tot peril.

379. De l'uis de fer n'obli ge mie

380. C'onques n'y maumist huisserie.

381. Tres ardans cheoient d'amont,

382. Quarriaus et pierres en un mont.

383. Sus l'uis de la crote chaïrent,

384. Mes onques riens ne li meffirent.

385. Onques, por riens qui cheü fust,

386. Por fes de pierre ne de fust,

387. Ne fu quassée ne depeciee

388. Ne de plon boillant tresperciee

389. Qui fondoit de sus a granz goutez.

390. Fermeüres ne furent routes,

391. Ne gon cassé ne vertevelle,

392. Car tot est en la garde a celle

393. Qui toz pecheeurs sauve et garde,

394. Que seint Johan prist en sa garde.

395. Si com est ci devant treitié,

396. Liez et joieus, sein et heitié

397. Cil qui estoient de par Dé,

398. Que Nostre Dame avoit gardé

399. Dedens la crote et soutenu,

400. Furent entre la gent venu

401. Et durement se merveillerent

402. Cil qui les virent, qui cuiderent

403. Qu'il fussent mort, sans nulle dote.

404. Quant il essirent de la crote

405. Cels que Dieux avoit visité,

406. Se il fussent resuscité,

407. Il n'i eüst pas greigneur joie.

408. Chacun de pitié en lermoiee*,

409. Nus ne se tenist de plorer.

410. Dieux et Nostre Dame a orer

411. En pristrent et a gracier

412. Et dou miracle a mercier

413. Qu'avoient a leur ialz veü,

414. Qui ne doit pas estre teü.

415. Emprés le deul et la tristeice

416. Revint le pueple en grant leesse,

417. Et quant furent lié et joieus,

418. Lors furent forment curieus

419. Des* refeire l'iglise arrieres.

420. Mes quant les murs et les mesieres

421. Et le pié qui la soustenoit

422. Furent cheü, il convenoit

423. Qu'elle ne fu pas rapareilliee,

424. Mes tout de noef edefiee.

425. A commencier l'oevre se pristrent

426. Et quant qu'il fu mestier i quistrent.

427. Chars firent charpenter et feire

428. Por les pierres porter et treire,

429. Qu'il en ert bosoing et mestiers.

430. Li meneterex de mestiers

431. De treire au chars si s'esmovoient,

432. Tretoz les jors, et si treioient

433. Tuit de boen gré et volentiers.

434. L'en quist maçons et charpentiers

435. Por ouvrer de pierre et de fust.

436. Mes ja riens soffisant ne fust

437. N'aïde que li lei feïssent,

438. Se dusqu'a trois ans n'i meïssent

439. L'esvesque et li clers en aïe

440. De leur rentes une partie

441. Bien largement, bien convenant,

442. Si com ge vos ai dit devant.

443. Quant ces trois ans furent passez,

444. Ne porent pas paier assez

445. Li mestre de l'oevre aus ouvriers;

446. Car ja faillaient les deniers

447. Si qu'il n'avoient que despendre,

448. N'il ne savoient mes ou prendre

449. Deniers ne ce qu'il despendoient,

450. Dom moult desconfortés estoient.

451. Uns, ne sai qui, lors s'escria,

452. Ge ne sai s'il prohecia*:

453. " Ne soiez pas d'ouvrer lenniers!

454. Einz faudront borses que deniers:

455. De Dieu sera tost avanciee

456. Cest oevre qui est commenciee. "

457. Ne sai que plus die sans doute.

458. Humaine aïde y failli toute;

459. De par Dieu convint que venist

460. Aïde qui le soustenist.

461. La haute dame glorieuse,

462. Qui voloit avoir merveilleuse

463. Iglise et haute et longue et lee,

464. Si que sa per ne fust trovee,

465. Son douz fils pria doucement

466. Que miracles apertement,

467. En son iglise, a Chartres, feist,

468. Que touz li puesples le veïst,

469. Si que de toutes pars venissent

470. Gens qui offerendes tant feissent

471. Que achevee fust s'iglise

472. Qui estoit a feire emprise.

473. Li rois des rois, li tous poissans

474. Fu a sa mere obeïssans,

475. Doucement oï ses prieres:

476. Miracles de meintes manieres

477. Fist por sa mere apertement.

478. Mes un en fist premierement

479. - Tel ne fu oï ne veü -

480. Qui ne doit pas estre teü,

481. Car les autres passe et seurmonte,

482. Si com vos orrois en mon conte.


Page d'accueil


Dernière mise à jour : 09.11.1999
Pour toute question au sujet de ce site, veuillez vous adresser à :
E-maillabo@francaisancien.net