XXX. De Robert de Joï

1. Qui velt oïr vers moi se traie!

2. Talent m'est pris qu'encor retraie

3. De la soustil fisiciane,

4. De la sage cirurgiane

5. De Chartres une belle cure.

6. Nostre Dame plus d'enfers cure

7. Que tuit li grant fisicien

8. Ne tuit li bon cyrurgien

9. De Montpellier ne de Salerne.

10. Malx, tant soit griés, ne feu d'enferne

11. Ne puet durer, por riens qu'aviegne,

12. En leu n'en place ou ele viegne.

13. Il n'est nul mals, tant enragiez,

14. Qui tost ne soit assoagiez,

15. Qu'el daigne neis dou doi taster.

16. Moult se fet certes bon haster

17. Et moult est sages qui se paine

18. Et qui met cuer, entente et paine

19. En acointer dame si sage.

20. Ne doit douter nul grief malage

21. D'enfermeté de cors ne d'ame

22. Nul qui bien soit de Nostre Dame.

23. De belles cures parfet tantes

24. Nul ne sauroit a dire quantes.

25. Curez est lors, de cors et d'ame,

26. Cil et celle qui Nostre Dame

27. Daigne atochier neis de son doit;

28. Cil bien curés tout estre doit,

29. Et si est il, c'est or dou mains,

30. Qui chiet entre ses blanches mains.

31. La mere Dieu a si sains dois,

32. Si biax, si blans, si lons, si drois

33. Que gueris est tout maintenant

34. Cil qu'elle en thoce tant ne quant.

35. Tost garist ame de pechié

36. Et sane tost cors entechié.

37. Quant saner daigne le las cors,

38. Qui muert aussi com fet uns pors

39. Et qui tout va en porreture,

40. Sachiez qu'a l'ame met grant cure,

41. Qui durra sans definement.

42. Or entendés, por Dieu, comment

43. La douce dame resjoï

44. Icest preudome de Joï.

45. Aporter se fist il a Chartres.

46. Ses vendenges et ses dessertes

47. Et sa gaaigne avoit perdue,

48. Por ce qu'avoit ou pié eüe,

49. Lonc tens, ne sai quel maladie.

50. Se vos volez que je la die,

51. Venir je n'en sauroie a chief!

52. Le pié avoit a tel meschief

53. Et la jambe si borsouflee,

54. Si vessieuse et si enflee,

55. Si plaine de trous et de plaies

56. Qu'il i avoit, ce croi, de naies

57. Et d'estopes demi giron.

58. Boe et venim, tot environ,

59. De toutes pars, en sailloit hors.

60. En grant martyre estoit son cors,

61. Et jambe et pié avoit porri.

62. Qui li donast tout Mont Horri

63. Ne toute France n'Engleterre,

64. Ne marchast il deus piés de terre.

65. Robert cil hom ert apelez.

66. Ses piez ert bien endrapelez,

67. Mes nequedent si fort puoit

68. Que de pueur les gens tuoit.

69. Quant ou moustier fu aportez,

70. Assés i trueve de amortez

71. Et de malades qui se plaignent:

72. Li un ardent, li autre estaignent,

73. Li un pleure, li autre crie.

74. Robert, qui a grief maladie,

75. Moult durement pleure et gemist.

76. Mes de son pié salt fors et ist,

77. Qui de corre oncques ne fine,

78. Une puente puazine

79. Que trestuit cil dou moustier crïent

80. Et aus gardes en plorant prïent

81. Qu'aucun d'els hors, pour Dieu, le meite,

82. Quar il put plus que ne fet seite.

83. Robert adonc est hors boutez.

84. Aus huis de fors est acoutez;

85. La pleure et bret, la huche et crie:

86. " Douce dame sainte Marie,

87. Fors de t'yglise me boute on,

88. Et si sui tes sers et tes hom,

89. Et de Joï, ta vile, nez!

90. Seigneurs, fet il, vous vilenez

91. Quant me boutez hors com un chien.

92. Las! Las! Las! Las! Or puis je bien

93. Dire que privez mal achate! "

94. A l'uis de fors sur une nate,

95. Par pluseurs fois, moult se demente:

96. " Ahi! fet il, pucelle gente,

97. Vierge sacree, debonere,

98. Que porrai ge dire ne fere?

99. Que porrai dire, douce dame,

100. Quant je ne voi home ne fame,

101. Tant soit de malage surpris,

102. Broïr de feu d'enfer n'espris

103. Quant tu veux que tost ne garisse?

104. Et il te plest que je languisse

105. A grant doleur et ici muire.

106. Com un torel m'oz ja muire

107. Et com un ors crier et brere!

108. Et tu n'es pas tant debonere

109. Que tu me daignes escouter,

110. Quant de ceiens me vois bouter,

111. Com un gaignon, hors et chacier!

112. Et n'as tu cuer plus dur d'acier

113. Quant de santé tant ne m'envoies

114. K'aler me puisse toutes voies?

115. Ja n'est il, dame, nul consaus,

116. En ciel n'en terre, tant soit hauz,

117. Com est li toens, aprés ton fil.

118. Cil povre saint, que feront il

119. Se prier les vois et requerre,

120. Quant tu, qui dou ciel et de terre

121. Roÿne es et empereriz,

122. Sueffrez que ainsi soie periz,

123. Qui t'ai requise a grant meschief

124. Et qui tes homs sui de mon chief,

125. Qui demoré ai ci tel piece

126. Que mes las piés tot me despiece?

127. Se fail a toi en ceste vile

128. Ou ardans as estains dis mile

129. Et ou tu fes tant haut miracle

130. A saint Eloy, a saint Romacle,

131. A saint Fiacre n'a saint Gile,

132. Que querroie, dame, di le! "

133. Ainsint li las, sans nul sejor,

134. Aus huis de fors, et nuit et jor,

135. A Nostre Dame se demente.

136. Mes ses piés l'air tant enpullente

137. Qu'a pluseurs semble et est avis

138. Que trestot soit plains li parvis

139. De pullentie et charoigne.

140. Lors li dist on, sans nule aloigne,

141. Que, se en la vile plus demore,

142. Ne tant ne quant, ne jor ne hore,

143. Que aussi traïner, par saint Gile,

144. Le fera l'en hors de la vile

145. Com un chevax mors de morille.

146. Quant voit li las qu'einsi l'avile

147. Que traïner fors le velt on,

148. Lors crie et bret a moult grant ton:

149. " E ! mere au roy de paradis,

150. J'é ci esté nuef jors ou dis,

151. Si comme cil qui esperoie

152. Qu'a Joï m'en ralasse, a joie,

153. Par ton conseil et par t'aïe;

154. Mes onc ne fist ma maladie

155. S'agregier non, ma douce dame.

156. A mes enfans et a ma fame

157. Reporterai povres noveles.

158. Des soulerés et des coteles

159. Leur gaaignasse a grant plenté

160. Si tu m'anvoiasses santé.

161. Mes, douce dame, totes voies,

162. Por ce, se santé ne m'envoies,

163. Desesperer ne me voil pas.

164. Comment qu'il voist mes cuers, li las,

165. En ta douceur encor espoire;

166. Douce mere au doz roy de gloire,

167. Encor en tai ai grant fiance;

168. Dame, encor gist grant esperance

169. Et respouse dedenz mon sain:

170. Quant toi plera, et fort et sain,

171. Ou que je soie, fet m'auras;

172. Et loing et pres, bien en sauras

173. A chief venir, ou que je soie.

174. D'une coignie me feroie

175. Couper le pié, sans demorance,

176. Se n'ert la tres ferme esperance

177. Qui en mon cuer est aoncree.

178. Puis qu'est ainsi, vierge sacree,

179. Que la vile vuider m'estuet

180. Et autrement estre ne puet,

181. A toi congié praing, douce dame,

182. Et te comant mon cors et m'ame.

183. Porter m'en ferai ennevois,

184. Monter lais et je m'envois. "

185. Ainsi li las, moult longuement,

186. S'est dementés moult doucement

187. A ma dame sainte Marie.

188. Ne say s'en le porte ou charie,

189. Mes tant fet qu'il ert a Joï.

190. Sa fame un pou l'a conjoï,

191. La nuit primiere que la vint;

192. Mes ains que jors passassent vint,

193. De lui fut moult lasse et tanee:

194. Moult fust or pure et bien vanee

195. Fame qui n'ennuiast tiex hom!

196. A ce tot de fi le set on

197. Que, quant les ont et biax et nez,

198. Lors leur font el mauvés chevez,

199. Assés sovent, teles i a.

200. Robert forment s'umilia

201. A sa fame et a ses enfans.

202. Bien set que la pueur est grans

203. Qui de lui chiet, sourt et degoute;

204. Par pou sa fame hors nel boute

205. De sa meson, assez sovent.

206. " Je vos metray, fet ele, au vent,

207. Sire vilains, ors, conchiés,

208. S'estes neis tiex q'un mot diés! "

209. Ne set le las que devenir.

210. Ne puet aler, ne puet venir.

211. Sa fame a grant dangier le couche;

212. Plus le despit que une viez çouche!

213. Ne fet riens nule qu'il commant:

214. De tot velt fere a son commant.

215. Se talent a d'aucune chose

216. Et demander ne rover l'ose,

217. Le pas jure que Diex passa,

218. Que mar fu tiex qu'il le pensa.

219. Quant qu'elle fet, fet sur son pois:

220. Quant velt poree, lors a pois;

221. Quant velt pois, lors a la poree.

222. Moult est dolente, en sa coree,

223. Quant il tant vit et il tant dure;

224. Vie li maine pesme et dure.

225. A grant plenté en est de teles

226. Qui ne prisent pas deus ceneles

227. Leur barons puis qu'il sunt malade;

228. Moult tost leur sunt correus et fade,

229. Et des mesons, lors, les barnesses

230. Sur leur barons se font metresses.

231. Mes Salomons dit vraiement

232. Que la meson put ledement

233. Et trop va mal, puis que la fame

234. Sur l'ome en est metresse et dame.

235. De la Robert ne sai que dire

236. Quant ele voit que adés empire,

237. Si le despit, si le desdeigne

238. Que neis tochier a lui ne deigne.

239. Se Nostre Dame, a qui tant pense,

240. De lui aider ne se porpense,

241. Trop me vendra a grant merveille

242. Et si dirai qu'elle sommeille,

243. Quar esperance et bone foiz

244. Au ciel li fet plus de cent fois,

245. Chascune nuit, lever ses mains:

246. " A! mere Dieu, fet il, au mains,

247. Quant ne te plest que je repas,

248. Bon finement et bon trespas

249. Prochainement, dame, m'envoie

250. Et si me moine, droite voie,

251. A ce que tu as porveü.

252. Tant ai langui, tant ai geü

253. Que jambe et pié ai tot porri.

254. Je n'ai enfant, je n'ai norri

255. Qui mes i daint meitre la main;

256. Chascun d'aux a le cuer tout vain!

257. Tant par sui ors, pucele monde,

258. Que flere et pu a tout le monde.

259. Une nuit ot assez oré,

260. Et tant gemi et tant ploré

261. Qu'il s'endormi tot en plorant.

262. Cele que truevent secorant

263. Et cil et cele, qui que il soient,

264. Qui, doucement, souvent la proient,

265. Adonc atendre n'i velt plus.

266. La grant reÿne de la sus,

267. Qui dou ciel et de terre est dame,

268. Quant voit que filz et fille et fame

269. Dou tot en tot l'ont adossé

270. Et, com charoigne en un fossé,

271. Dou tot l'ont mis en nonchaloir,

272. Aider li velt lors et valoir;

273. Lors velt monstrer qu'elle scet fere;

274. Lors devenir la debonere

275. Velt volentiers cirurgiane.

276. La tres douce fisiciane

277. Qui tant parest de franche orine,

278. Qui trestouz cels sane et orine

279. Qui ont en lui bone fiance,

280. Quant voit la grant perseverance

281. Que li las a et a eüe,

282. De pitié est toute meüe;

283. Dou las telx pitié li est prise

284. Qu'endurer ne puet sa franchise,

285. Ne por le plus ne por le mains,

286. Qu'elle meismes, de ses deus mains

287. Qui tant par sunt belles et sades

288. Et saines por taster malades,

289. Taster et saner ne le viegne,

290. Ne ne velt por rien qui aviegne

291. Que nul fors ele i meite main.

292. Si m'aïst Diex, hui et demain,

293. Il n'a si merveilleuse fame

294. En tot le mont cum Nostre Dame:

295. Merveilleuse, certes, est elle,

296. La sainte Virge, la pucelle;

297. Si tres douce est et si tres pleine

298. Que nulle doceur a la siene

299. Comparer ne se puet ne prendre;

300. La mere Dieu parest si tendre,

301. Si piteuse, si debonere

302. Que ne li put ne ne li flere

303. Enfers, tant soit plains d'aposture,

304. Puis que ait pensee nete et pure.

305. Ou est qui osast neis penser

306. Que taster daignast n'adeser

307. Ne manoier, por nule chose,

308. La naite fleur, la naite rose,

309. La natetez de tot le monde,

310. Home tant ort ne tant immonde,

311. Si plain de bendiaus et de naies,

312. Si plain de trous, si plain de plaies,

313. Si plain de roigne et de poacre?

314. Ou saint Eloi ou saint Fiacre

315. I deust elle bien envoier,

316. Qui tiex gens sevent manoier;

317. Mes bien savoit, c'est or dou mains,

318. N'avoient pas si soés mains

319. Com ele avoit, ne si tres sades

320. Por bien saner tels griés malades,

321. Et en savoit assez plus que il,

322. Voire plus que milante mil.

323. E! mere Dieu, qu'est or de dames,

324. De pucelles, de hautes fames

325. Qui les leur nes n'en estoppassent

326. Et qui tot porrir le lessassent

327. Ainz qu'il daignassent atouchier ?

328. Lever nel daignoit ne coschier

329. Neis sa moillier, dame Terree.

330. Mes tu, dame, qui es la ree

331. Dom sourt toute doceur et ist,

332. Por ce que de cuer te requist,

333. Moult le daignas bien aprochier

334. Et ses griés plaies atochier.

335. La grant dame de tot le monde,

336. Qui tote sorrit et suronde

337. De grant doceur, de grant pitié,

338. Quant voit li las si degetié

339. Que neis sa fame le degete,

340. N'i a mes nul qui main i mette,

341. Adonc primes s'en entremet,

342. Adonc sa sainte main i met.

343. Li las Robert, li languereus,

344. Qui tant ert las et dolereus

345. Qu'i n'atendoit se la mort non,

346. En reclamant Dieu et son non

347. Et en priant sa douce mere

348. Que eüst pitié de sa misere,

349. Une nuit, endormi se fu.

350. La douce mere au roi Jhesu,

351. Qui reïne est de tout le mont,

352. De paradis, la sus, amont,

353. Ce li semble, descendre vit

354. En sa meson et en son lit.

355. Tant par fu belle, c'est la some,

356. Qu'il n'est boche ne langue d'ome

357. Qui raconter le vous seüst,

358. Ne n'est ielz d'ome qui peüst

359. Esgarder son vis ne veoir,

360. Tant par est clers, de grant pooir.

361. Moult doucement, par grant delit,

362. Le malade assiet en son lit;

363. D'une main le chief li sostient

364. Et o l'autre le pié li tient.

365. Lors qu'o sa main, polie et sade,

366. Touchié li a le pié malade,

367. Tous est sanez, ce li est vis.

368. Ne sai que plus vous en devis.

369. De fine joie lors s'esveille;

370. Moult s'esbaïst, moult se merveille

371. Quant son pié sent guari et sain.

372. Le las de cuer, dedenz son sain,

373. De joie li sautele et vole;

374. Li las son pié bese et acole,

375. Et tant est liez ne set que dire:

376. Il ne trovast en piece mire

377. Qui li sanast si doucement.

378. Dou lit saut sus isnelement,

379. Si cort et saut par sa meson;

380. Plus grant joie ne fist mes hon!

381. Croire poez, quant sain le virent,

382. Que grant feste et grant joie firent

383. Si voisin, si enfant, sa fame.

384. A Chartres, a la bele dame,

385. L'endemain, s'en vient tot corant.

386. Le mestre autel, tot en plorant,

387. Besié a tant et enbracié

388. Qu'a grant paine l'en ont chacié

389. Les gardes qui nou connoissoient;

390. Desconneü por ce l'avoient

391. Que durement ert enpiriez,

392. Amegriz et mal atiriez.

393. Robert, qui sains est et delivres,

394. Trestot aussi com s'il fust yvres,

395. Entour l'autel sovent coroit,

396. Dou pié sané sovent feroit

397. Grans cops desus le pavement

398. Et si crioit moult hautement:

399. " Veci le pié la belle dame,

400. Veci le pié la belle dame! "

401. Lors dïent clerc et chapelain:

402. " Botés la hors ce fol vilain,

403. Cel vilain yvre, cel anchoistre.

404. Oïr le puet l'en jusqu'au cloistre!

405. Tel feste fet et tel criee

406. Com se la feive eüst trovee.

407. Botés le hors, se vous poez,

408. C'est un robert, un soz noez.

409. - Seignors, seignors, ce dit Roberz,

410. Je ne sui pas vilains roberz,

411. Ainceis sui Robert de Joï,

412. Que Nostre Dame a esjoï.

413. Vilains roberz ne sui je mie,

414. Ainz sui, ainz sui Roberz joïe.

415. Robers, Robers sui, porte joie;

416. N'aurai mes duel de rien que j'oie.

417. A Joï, joiaus m'en riré.

418. Qui que en pleure, je m'en riré,

419. Quant joie a moi ja afiert. "

420. Lors fiert dou pié, fiert et refiert,

421. Cinq foiz ou sis, moult lieement,

422. Dou pié desus le pavement

423. Et, plorant, dit a chascune ame:

424. " Vez ci le biau pié Nostre Dame,

425. Vez ci le pié, ici, ici,

426. Qu'elle m'a fet, soe merci. "

427. Adonc l'ont tuit reconneü.

428. Quar lienz ot assez geü.

429. Neïs les fames le connoissent,

430. Qui de demander moult s'angoissent

431. En quel maniere et en quel guise

432. La mere au roi qui tot justise

433. Santé rendue li avoit.

434. Cil, qui parler moult bien savoit,

435. Tot mot a mot et tot a tret,

436. En plorant, leur conte et retret

437. Tot ce qu'avez devant oï.

438. Par le moustier sunt esjoï

439. Et clerc et lai, homes et fames.

440. Les cloistrieres et bones dames

441. De chanz firent grant melodie.

442. Es clochiers fu la sonerie

443. Et longue et grant et merveilleuse.

444. A la chemise glorieuse,

445. A Chartres, la riche montaigne,

446. Telle allee et telle empaigne

447. Ot, si com truis, en cel tempoire

448. Que feite en fut moult belle estoire.

449. Ce pri je a la douce dame

450. Que feu d'enfer, n'en cors n'en ame,

451. Nul de vos tos puist atochier.

452. Por ce au lever et au coschier

453. Nous commandons tuit en sa main.

454. S'ele servons, et soir et main,

455. De vrai corage, de cuer fin,

456. Ja a la vie n'a la fin

457. De feu d'enfer n'aurons nous garde.

458. Feu d'enfer n'a pooir qu'il arde

459. Celui ne cele qui s'aart

460. A lui servir de bonne part.

461. Ou feu d'enfer n'ert ja cil ars

462. Qui a s'amor s'ert bien aars.

463. Por Dieu, por Dieu, que n'i ardons!

464. A lui amer nous aardons !

465. A lui se fet bon aardoir,

466. De lui amer devons ardoir.

467. Por Dieu, chacun si se aarde