VI. D'un enfant de Chanblé que Nostre Dame resoucita de mot a vie

1. Ou livre lui, ce m'a semblé,

2. Un fet qui avint a Chamblé,

3. Une vile qui est l'esvesque.

4. Jamés ne cuit que nus hom vesque

5. Qui nul miracle plus biau voie,

6. Et por ce veu ge que l'en l'oie,

7. Car il ce fet moult bien a creire;

8. Si nou voil pas celer ne tere,

9. Car bien doit estre en remembrance.

10. Sans fere longue deleiance

11. Le vos raconterai briement.

12. En icel tens communement

13. Qu'a Chartres la vertu devine

14. Qui la Vierge essaucier aime*

15. Fesoit ces miracles seintismes,

16. Avint ce miracle meïsmes,

17. Que vous orrés conter et dire,

18. A Chamblé, dom l'esvesque est sire.

19. Une fame ot, en celle ville,

20. Qui avoit une soe fille

21. Petit enfant qui alestoit

22. Et en berçuel gesant estoit.

23. De cele fame avint einsi

24. Que hors de sa meson essi

25. Por aler en un sien afere

26. Qu'el alloit ou avoit a fere.

27. Si ne cuida guieres tarder;

28. Son anfant lessa a garder

29. A une garce genvre et nice,

30. Qu'il n'i avoit autre norrice.

31. L'anfant, ou bers, breist et cria;

32. A la garce moult ennoia

33. Quant el oï crier et breire,

34. Que ne la poet fere teire

35. N'el ne la poet apaier

36. Ne por huer ne por bercier.

37. Lors regarda la garce a terre,

38. Si vit une piece d'un veirre

39. Qui avoit esté despecié.

40. Quant l'anfant ot assés bercié,

41. Qui avoit crié moult grant piece

42. Et uncore criot, la piece

43. Dou veirre ala la garce prendre:

44. L'anfant y voloit feire entendre

45. Por lui soulacier et deduire

46. Quant le voirre verroit reluire,

47. Si que de breire se tardast

48. Quant le voirre cler regardast.

49. Plus cuidoit l'anfant soulacier

50. Par le voirre que par bercier,

51. Si que par le voirre lessast

52. Son pleur et de breire cessast.

53. La garce einsint le voirre prist,

54. A l'enfant en la mein le mist.

55. L'enfant tint le voirre en sa mein;

56. Ainsint con ce fust char ou pein,

57. Mist le voirre dedens sa bouche

58. Com enfant qui, cele part, touche

59. Quant qu'il tient, par coutumance.

60. Ainsint li enfes, par anfance,

61. Le voirre en sa boiche bouta,

62. Et mein et voirre tretout a

63. L'enfant mis en sa boiche ensemble.

64. Le voirre, qui glace resemble

65. Et, esclingdant souef et plein,

66. Li escoulourja de la mein,

67. Si li coula en la gorgete

68. Qui ert estrete et petiteste.

69. La gorge ert petite et estreite;

70. L'enfançonneite en fut destreite

71. Formant et plus la molesta

72. Quant le voirre s'i aresta

73. Estoupés fu si esperiz

74. Comme se l'enfant fust periz:

75. Il n'en issoit ne fun n'aleine

76. Ne ne se mouvoit ners ne voine;

77. Les elz ot clous, la bouche mue

78. Et la couleur dou vis perdue.

79. Bien paroit, au signe de hors,

80. Qu'i n'avoit point de vie ou cors.

81. La garce qui la dut garder

82. Commença ce a esgarder.

83. A la bouche li prist a corre,

84. Qu'aider li cuidoit et secorre.

85. Quant aïdier li ot failli,

86. De paour toute tressailli,

87. Que commença grant duel a feire,

88. A plorer, a crier, a breire

89. Si haut que li voisin l'oïrent,

90. Qui au cri effraé saillierent

91. Et corrurent a la criee,

92. Et la mere, toute effraée,

93. Cui de poor tremblent li membre

94. Quant de sa fille se remenbre

95. Que lessié ot comme musarde

96. A la nice garce en garde,

97. Y acorut hativement

98. Plorant et criant hautement:

99. " Dame de Chartres, mon enfant

100. Qu'en meson lessié vos comant.

101. Virge pucelle, pure et neite,

102. A vos comman ge ma fillete,

103. Douce dame, sainte Marie. "

104. Einsint dolente, einsi marrie,

105. Entra la fame en son ostel.

106. Ou berz trova son enfant tel

107. Comme par devant vos devis:

108. Sanc ne couleur n'avoit ou vis,

109. Riens ne sentoit ne n'alenoit,

110. La boche et les iauz clos tenoit

111. Comme chose qui est perie.

112. Et la mere qui breit et crie

113. Et ses cheveux ront et descire,

114. Son vis esgratine et empire,

115. A sa fille entre ses bras prise

116. Et aqueult sa voie a l'iglise

117. De Chartres celle o l'esperance,

118. O la foi et o la creance

119. Qu'el avoit devant conceüe

120. Quant par lé fu amenteüe

121. La dame de Chartres sentisme.

122. O celle fiance meïsme

123. Qu'el avoit en la haute dame,

124. S'esmust de sa meson la fame

125. Vers Chartres, ou son cors ot mis.

126. Mes ses voisins et ses amis

127. Entor lé s'asemblent et vienent

128. Et par paroles la detienent

129. Et la blasment et la chatïent

130. Et par chatiement li dïent:

131. " Ou veulz aler, folle chaitive?

132. Bien voiz ta fille n'est pas vive.

133. Autre conseill n'i a mestier:

134. Fé te la portier[l. porter] au motier

135. Et enprés la messe enterrer.

136. Ne te vaudroit rien ton errer,

137. Croi nous, et si ne t'esmué pas,

138. Car tu gasteroies tes pas.

139. Fei a ton enfant sepulture

140. Et soeffre en pes cest'aventure. "

141. Celle desdist quant qu'il li dïent

142. Et dist que por neient la prïent,

143. Car riens ne lé vaut leur prier.

144. Tout meintenant, sans deleier,

145. S'est vers Chartres acheminee,

146. Criant comme desesperee:

147. " Dame de Chartres debonaire,

148. Desus vos met tout mon afeire.

149. Dame, a mon cri entendés

150. Et ma fillete me rendés. "

151. La fame einsint son duel menoit

152. Et toz jors son chemin tenoit

153. Entalentee en son corage

154. De fere son pelerinage.

155. Si comme el erroit, si avint

156. Que son enfant, qu'en ses bras tint,

157. Qui a verité estoit mort,

158. Gita parmi la boche un gort

159. De sanc qui dou cors li eissi

160. Et puis li segont autresi,

161. Qui fu plus fort que li primiers,

162. Car 1i gors de sanc darreniers

163. Lança hors la piece de voirre

164. De la gorge a l'enfant a terre.

165. La mere vit son anfant vivre

166. Quant il dou voirre fu delivre,

167. Et la bouche et les eulz ovrir

168. Et le vis de couleur covrir.

169. S'elle ot joie, nus nou demant!

170. La mere Dieu vet reclamant:

171. " Dame de Chartres ennoree,

172. Dame, vos soiés aouree

173. Qui m'avés telle bonté feite

174. Que rendu m'avés ma filleite

175. Qu'avoie par pechié perdue.

176. A Chartres vois, ou sui meüe;

177. Mon enfant vos presentarei

178. Et illuec vos aourerei

179. Et rendré graces et servise.

180. La voie qu'el avoit enprise

181. O plor, o douleur, o tristesce,

182. Parfist o joie et o leesce.

183. A son enfant se deporta.

184. La piece dou voire porta

185. O sei a Chartres, a l'iglise.

186. Sur l'autel a s'offrande mise:

187. A Nostre Dame son enfant

188. Presenta hetié et vivant,

189. Qui sanz vie ot esté grant piece,

190. Et dou voirre monstra la piece

191. A pluseurs, qui n'ert pas petite,

192. Si com la verté truis escrite

193. Par celui qui escrit cest conte,

194. Qui ou latin dou livre conte

195. Qu'il vit la fame et l'enfant sein

196. Et le voirre tint en sa mein.

197. Je ne conte pas chouse d'auvoirre,

198. Car il dist c'oncore est li voirre

199. En l'iglise, a Chartres, gardé,

200. Que cest miracle, de par Dé,

201. Qu'i soit meulz remenbré et seu

202. Et de ceus qui l'orrunt creü.

203. Foi est haute chouse et nobile,

204. Si com tesmoigne l'esvangile;

205. Foi hautement esploite et oevre,

206. Si com i1 apert en cest oevre,

207. Car foi en celle fame ovra:

208. Par sa foi l'enfant recovra.

209. Quant Nostre Dame ot merciee

210. Et de son veu fu aquitee,

211. A Chamblé s'en retorna liee