VIII. D'un enfant de Blevi qui fu naié

1. Un autre miracle esprové

2. Ai dedenz le livre trové,

3. Que g'ei leü et reveschié.

4. A Bleve avint, en l'esvechié

5. Dou Mans, si com le dit la leitre.

6. Por ce le voill en roumans mestre

7. Que bien fet a amentevoir,

8. Car il est tout estroit de voir.

9. En celle ville qu'ei nommee,

10. Qui Bleve est par non apellee,

11. Une fame illuec habitot

12. Qui un filz genvre et petit ot;

13. De petit aage estoit assés,

14. Qu'il n'avoit pas quatre ans passés.

15. Un jor avint, si com lison,

16. Que son filz seul en sa meson

17. Lessa la mere et ala hors,

18. Qu'en la ville ot a fere lors,

19. Et, quant el ot fet son afeire,

20. Meintenant se mist au repeire.

21. Par la rive d'une riviere

22. Raloit en sa meson arriere.

23. Illuec s'areta un petit;

24. En l'eive regarda et vit

25. Drapiaus qui arrestés estoient

26. Et par desus l'eive flotaient.

27. Un baston que tenoit tendi

28. En l'eive et si entendi

29. A ce qu'a soi peüst atreire

30. Les drapiaus; mes nou pot pas fere,

31. Tant seüst son bras esteser,

32. Car les drapiaus senti peser

33. Si que par soi nes pot movoir.

34. Merveilla soi que pot avoir

35. Entre ses dras estapissant,

36. Par quoi li drap erent pesant.

37. Gens apela qui li aiderent;

38. Les drapiaus arriere bouterent.

39. Quant a la rive furent tret,

40. La fame a leisir et a treit

41. Desvelopa touz les drapiaus,

42. Qui ansint comme en tropiaus

43. Erent ensemble amoncelé;

44. Regarda qu'ert dedenz celé.

45. Le voult quenut de son enfant

46. Qu'elle ot lessié sein et vivant;

47. Or l'a trové mort et naié,

48. Dom el a le cuer esmaié,

49. Qu'el ne set par quel meschance

50. Li est sorse certe pesance.

51. L'enfant plus et plus avisa

52. Que requeneü au vis a

53. Et, quant a son filz l'encercha[l. entercha],

54. Grant douleur le cuer l'en percha,

55. L'angoisse la point dusqu'a l'ame.

56. Lor li remenbre de la dame

57. Qui a Chartres vertus fesoit

58. Si com a son chier filz pleisoit,

59. Dom grant estoit la renommee

60. Ou païs et en la contree.

61. A icelle dame cria

62. Merci et o pleur la pria

63. Que son enfant vif li rendist,

64. Et ovesques voa et dist

65. Que tant ne quant ne sejorroit

66. Ne vers sa meson ne corroit

67. Devant qu'a Chartres, en s'iglise,

68. La haute dame eüst requise.

69. Ainsi la fame se voa

70. A la douce dame voa[l. ou a]

71. Plus de pitié qu'eive en fonteine.

72. La dame qui de grace est pleine

73. Et de misericorde mere,

74. L'angoise et la douleur enmere

75. Que de son filz la mere avoit,

76. Qui dusques ou cuer la grevoit,

77. Li fist alegier par sa grace,

78. Car li enfes, enmi la place,

79. Rendi parmi la boche hors

80. L'eive qui li estoit ou cors,

81. Qui entree ert par tele enpeinte

82. Que l'ame li ert esteinte.

83. L'eive issi hors a grant ruisuau

84. Que point n'en remeint ou vessiau

85. Dou ventre, mes tretout voida,

86. Car Nostre Dame li aida,

87. Qui ot de la mere pitié,

88. Et li fist si grant amitié

89. Et doucement la visita

90. Que l'enfant mort resuscita,

91. Si qu'ensenble santé et vie.

92. Mult fu la mere resjoïe

93. Quant il vit le miracle espert.

94. Por le veu qu'el avoit offert

95. Acomplir, se mist a la voie

96. Portant o soi son filz a joie.

97. Droit vers Chartres s'achemina;

98. Onques jor d'errer ne fina

99. Dusqu'a Chartres la cité vint.

100. Le miracle qui li avint

101. De son filz a partout conté.

102. Graces rendi de la bonté

103. A la haute dame, en s'iglise;

104. Puis se rest a la voie mise

105. Portant son filz sein et hetié.

106. Si a tant d'errer esploitié

107. Qu'a son otel est retornee