IX. D'un enfant de Berchieres que Nostre Dame resuscita de mort a vie

1. La dame qu'en a Chartres prie,

2. Dom tot bien vient et toute aïe,

3. Qui de toute ennor est doctrine

4. Et de cortaisie corine,

5. Me donne cortoise matire

6. D'un suen miracle cortois dire

7. Que la dame fist a Berchieres,

8. Une de ses viles qu'a chieres.

9. Celle ville ot bien en chierté

10. Quant son poeir et sa fierté

11. I monstra comme poissant dame.

12. En celle ville ot une fame

13. Qui avoit deus filles petites,

14. Mes l'une de ces filles distes

15. Gesoit en un bers, petiteste,

16. Et l'autre estoit auques grandeste.

17. La mere en la garde a l'einee

18. Leissa la genvre enmaillolee

19. A garder et se elessa;

20. L'enfant et l'ostel li lessa.

21. A aler hors en sa besoigne,

22. Un poi de la ville s'esloigne;

23. S'ot leissiez ses anfans andeus.

24. Estes vous uns hom trop hideus,

25. Trop lez et trop espoentable;

26. Croire devez que c'ert deable

27. Qui en forme d'ome s'ert mis.

28. Comme home s'en vint l'ennemis

29. Devant les anfans en l'otel;

30. Mes onques nus hom ne fu tel

31. Ne ne fu de tele estature,

32. Car trop ert grant a desmesure,

33. Dou voult et des cheveus horrible;

34. Ne poiz n'arrement que l'en trible

35. N'est si noir com il ot le vis,

36. Segont l'escrit le vous devis,

37. Qu'il ot les dens noires ytans

38. Que le vis et longues et grans;

39. Pleins ert de grant horribleté.

40. Pres des anfans s'est arreté

41. Et quant le vit la garce einz nee,

42. Durement fu espoentee;

43. De poor s'en ala criant,

44. Loing de la meson hors fuiant,

45. Car la poor tant l'enpressa

46. Que meson et enfant lessa

47. Et fist son duel enmi la rue.

48. Este vous la mere venue,

49. Droit vers son ostel acorant.

50. En sa voie trova plorant

51. Sa fille et mult esbahie

52. Et trenblant et espouentie.

53. Enquist li et l'areisona

54. Por quoi seule sa meson a

55. Et sa petite seur lessiee.

56. Celle qui tint chiere beissiee

57. L'aventure li reconta.

58. La mere moult s'espoenta

59. Dom[l. Dou] dist et mult fu effraée;

60. Vers l'otel vest criant: " Ahee,

61. Dame de Chartres, sauvés moi

62. Ma fillete dom ge m'esmoi.

63. Dame, a vos la commant et veu

64. Et vos promet que de mon veu

65. M'aquiterai tost sanz demoure,

66. Qu'a Chartres ou l'en vos aoure

67. Vos porterei en vostre eglise

68. Ma fille se d'estre maumise

69. La gardez, que sauve la truise. "

70. En tel duel et en tel angoisse

71. Entra la fame en sa meson.

72. Dedens trova moult grant arson

73. De feu, qu'il mal ot espletié.

74. Dou bers fu arse la moitié

75. Ou sa fille estoit couchiee,

76. Mes dou feu n'ert point atouchiee.

77. Tout ert ars l'estrein dou berceul

78. Et li drap ars et li linceul

79. Que l'enfant ot entor ses naches,

80. Mes d'arsure signes ne taches

81. Ou cors de l'enfant ne parurent.

82. L'estrein et li drapel ars furent,

83. Mes onques le feu ne pot prendre

84. A la char qui est mole et tendre,

85. Car la dame l'avoit gardee

86. A cui elle estoit commandee,

87. A cui la mere la voa.

88. Li feu entor l'enfant trova

89. Et, quant a la char aprocha,

90. Si esteint que ne la toucha.

91. Ci ot miracle apertement;

92. Ja mostra cortoisement

93. La dame sa grant cortoise[l. cortoisie],

94. Sa poissance, sa seignorie.

95. Quant ceste aventure ot veü,

96. La mere grant joie a eü.

97. Quant sa fille a trovee seine,

98. Sans querre terme ne essoine,

99. Vers Chartres se mist a la voie

100. Et assés de gens la convoie

101. De ses voisins, de ses amis

102. Por fere ce qu'avoit promis.

103. Sa fille, o tout le bers, porta

104. De qui santé se conforta.

105. A Chartres, a l'iglise vint.

106. L'aventure qui li avint

107. Conta a qui la vost entendre.

108. Son veu et sa promesse rendre

109. Ala, a l'autel, simplement:

110. Sa fille i offri humblement;

111. A la dame graces rendi,

112. Qui l'enfant du feu deffendi

113. C'onques sa char n'i fu brulee,

114. Et sauvement l'ot delivree

115. Des meins aus felon anemi.

116. Li bers, qui estoit ars demi,

117. Lessa en l'iglise, en memoire

118. Dou miracle, c'est chouse voire,

119. Si com ou latin le retreit

120. Icil dom j'ei le romanz treit,

121. Qui tesmoigne en son livre et dit

122. Qu'en l'iglise de Chartres vit

123. Le bers demi ars, par meint jor.

124. A Chartres ne fist plus sejor

125. La fame, eins retorna arreres,