I

Mere, douce creature,
Ou li fils Dieu volt venir
Et prendre humainne nature

4. Por sa deïtet couvrir
             Et morir
   Por l'anemi retolir
   La proie de sa pasture,
   
8. K'en hidouse fosse obscure
   Les menoit painne sentir.
   Plus ne le vaut consentir
   Vostres fiex plains de droiture,
   
12. Ains vint le sien cors offrir
    Pour nous et la mort souffrir.

II

Aussi com sour la verdure
Descent rousee des cieux

16. Vint en vo cors, virge pure,
    De paradys vos doux fiex,
              Vo cors piex,
    Ki plus est dous ke n'est miex
    
20. Ainc n'en senti bleceüre,
    Mais ce nonce l'escripture
    K'il en devint plus gentiex;
    [....................................]
    
24. Est avoec or en jointure,
    Je di bien, se m'aït Diex,
    Ke li argens en vaut miex.

III

Dame vos estes la pree,

28. Veritaulement le di,
    U la trés douce rousee
    De paradys descendi,
              Dont issi
    
32. Li dous fruis ki nous rendi
    Vie, santé aduree,
    K'Adans nous avoit reubee
    Par le los de l'anemi
    
36. Mais li sires ki nasqui
    De vous, pucele honouree,
    Paia par un venredi
    Kanck'Adans i despendi.

IV

40. Ha! loiaus virge honouree,
    Fontaine sour douc gravier,
    Sourgons de miel et de ree
    Pour les durs cuers restancier
    
44.           De pechier,
    Ki se veut en vous ploncier
    Par repentance enbrasee,
    Vostre amours li est dounee,
    
48. Ki bien le puet avancier
    Et en paradys lancier
    Et la joie desiree
    U Diex nous vaut tous hucier,
    
52. Quant se fist en crois drechier.

V

Trés douce loiaus roïne,
Deseur toutes es li fleurs,
De tous maus es medecine

56. Et de pechié crimineus.
              Li hideus,
    Ki tant est fel et morteus
    Et plains de male querine,
    
60. Dame, ne fera saisine
    Ki vous sert, cors prescïeus;
    Mais la sus ert ses osteus
    U joie est ki ne define;
    
64. S'il vous plaist, faites nous teus
    Ke ce soit vostre cateus.