I

Aussi com l'eschaufeüre
Du fu fet l'iaue boulir,
Me fet la douce pointure

4. De fine Amour resjoïr
             Et fremir.
   Remenbrance, sanz mentir,
   Ai touz jorz de l'aventure
   
8. Qui navra sanz perceüre
   Ma car; par l'ueil assaillir
   Me vint et mon cuer sesir
   Amours, qui outre mesure
   
12. Me fet ses assaus sentir
    Et atendre sanz merir.

II

Douz est li chaus de l'arsure
Dont je me sent si benir.

16. Bontez et bele estature,
    Granz senz et biau maintenir           Font emplir
    Mon corage et enrichir
    
20. D'une couvoitise pure,
    Qu'ausement com la nature
    Du douz tenz fet fruit florir
    Fet ma penssee espanir
    
24. Bon espoirs, qui m'asseüre;
    Mes, encontre ce, soupir
    Por doutance de faillir.

III

Hé! simple regardeüre

28. Qui si me fetes gemir,
    N'os dire que mespresure
    Feïssiez de moi traïr,
              Se servir
    
32. Me fetes et obeïr
    A la plus bele figure
    Qui ainz vestist de vesture.
    Je ne m'en doi repentir,
    
36. Que tieus biens et puet venir
    Que cil qui plus maus endure
    Ne porroit mes por morir
    Le guerredon deservir.

IV

40. Lis souz vermeille tainture,
    Ieus vairs en front d'ecremir
    Portanz en desconfiture
    Mon orgueil sanz revertir,
    
44.           Qu'esbahir
    Me font ma dame d'oïr
    Sa tres doce palleüre
    Mout m'est grief la teneüre
    
48. De tout ensemble sosfrir,
    Quant sanz plus me fet languir
    De sa bouche une ouverture
    Que j'en riant vi ouvrir,
    
52. Dont l'odor me vint sesir.

V

Chançon, a cele ou ma cure
Ai mise, va tost jehir
Que, s'il li plest, mort oscure

56. A brief tenz m'estelt sousfrir;
              Son plesir
    En face, que departir
    N'en vueil por nule ledure.
    
60. Tant me soit douce ne sure
    S'amour, ja n'en quier issir;
    Car, se loiauté venir
    Puet jamés a sa droiture,
    
64. Ne me dout pas que guerir
    Ne me face et resjoïr.