I

Virge des ciels clere et pure
Dont Deus se vout espanir
Et nestre selonc nature

8. Sanz virginité maumir
             Mout desir
   Vostre amor a deservir
   Car d'autre amie n'ai cure
   
8. Que grant joie m'asseüre
   De vos amer et servir;
   Por ce me convient guerpir
   La mauvaise voie oscure
   
12. Et touz les pechiés hair
    Qui font a joie faillir.
    

II

Roïne de grant mesure,
Por Dieu, doint vos souvenir

16. De ma lasse creature,
    Qui sanz vos ne puet garir,
              Car morir,
    Doi et en terre porir,
    
20. Las, et ma mort ert si dure,
    Se de pechié et d'ordure
    Ne puis m'ame resclarsir.
    Mes qui sert sans repentir
    
24. Par raison et par ... dure
    Le fait pitiés esjoïr
    Et a bone fin venir.

III

Dame des ciels coronée,

28. Dolens et plorans vos di
    Qu'en vie desordenée
    Ai mon las cors envielli,
              Si vos pri,
    
32. Se trop tart vos cri merci,
    Que penitanc doublée
    Me soit enjointe et donée,
    Tant que j'aie deservi
    
36. Que cil qui de vos nasqui
    L'ait en pitié regardée,
    Si que li angre esbaudi
    Soient de m'ame sesi.

IV

40. Virge de gloire honorée,
    Ou tant bien sont aconpli,
    Fontaine si savorée
    Que tuit en sont repleni
    
44.           Vostre ami,
    Et pecheor autresi,
    Qui Dex a grace donée,
    Que leur ame en a lavée
    
48. En lermes plaines de cri,
    Ne metez, dame, en oubli,
    Ma volenté esplorée,
    Si qu'a m'ame aient failli,
    
52. Et par vos, li anemi.

V

Chançon, va moi sanz atendre
A la rose de jovent
Qui puet et doner et prendre

56. Toute joie a son talent,
              Di briement
    ......................................[ent]
    Qu'ailleurs ne puis mes entendre,
    
60. Ainz me fait s'amor desfendre
    Touz maus et les biens m'aprent.
    Por ce li proi doucement
    Qu'ele soit a m'ame rendre,
    
64. Car mes cuers grant doleur sent,
    Tant redout mon jugement.