UNIVERSITÉ D'OTTAWA Faculté des Arts
Laboratoire de français ancien
Jean le Conte
Miracles de Notre-Dame
XXXI-XL
XXXI
De sept femmes qui trouverent la pieche qui parla.
Sept creatures devotes a la Vierge Marie alerent en pelerinage a Nostre Dame de Roche Amadour. Et quant ilz furent au lieu, ilz achatoirent pour leur disner sept pieches de char et les mirent au feu, puis alerent a l'eglise pour ouir messe. Maiz quant ilz retournerent, ilz trahirent leur char du pot et ne troverent
21a
que six pieches; de quoy moult grant noise se meut entre eulx. Et adonc l'ung d'eulx retourna a la Virge Marie et dist *: « Douce Virge Marie, mere de Dieu, nous partismes en tresgrant joye de nostre cité; je te pry que tu nous donnes grace de retorner ensemble et que nous soions amis; et nous rens la pieche de char pour quoy ceste noise est mené entre nous. » Et adonc parla la pieche de char et dist: « Voiz moy cy, soubz ces drapialx, la ou la meschine de ciens m'a mucee. » Et de ce furent les pelerins moult merveilliez et joieux; Et prindrent la pieche de char et la porterent au moustier, et la pendirent devant la Virge Marie, en signe de sa noble puissance.
XXXII
Du moygne qui se genoilloit a terre quant il ouoit nommer la Virge Marie.
En une abbaie de Nostre Dame qui est a cloistre en Angleterre, avoit ung moygne qui de tout son ceur aimmoit la Virge Marie et, toutes foiz qu'il ouoit son nom reciter en sainte eglise, il se agenoilloit et baisoit la terre en reverence de Nostre Dame. Si advint ung jour de semmedi, quant on dit l'oraison de Nostre Dame, que il ouyt le nom de Marie et tantost il se lessa choir a terre pour la baiser. Maiz, pour la grant flebesse de luy, il ne se pout relever, car deux moygnes qui le servoint estoint alés ailleurs et occupés. Et comme
21b
l'en deust dire l'euvangille, le moygne estoit moult dolent que il ne se pouvoit drecier. Si commencha a plourer et deprier la Virge Marie qu'elle luy vousist aidier. Et tantost vint a luy la Virge Marie, qui le prinst par le bras dextre et le leva et le mena au grant autel, en disant que il le baisast. Adonc la regarda le moygne ou visage et la vit tant excellente que nul ne le pourroit racompter .Et le moygne, qui estoit de cent ans, fut aussi fort de corps et de vertus, en tous ses sens, comme il avoit esté en l'age de .xxx. ans. Et vescut aprés longuement ou service de la Virge Marie.
XXXIII
De la femme qui fut jalouse de son mary.
En Bretaigne out ung chevalier qui moult aimmoit et honnouroit la Virge Marie, qui espousa ugne moult belle dame et noble, laquelle conceupt de luy ung enfant. Si advint ugne nuit que le chevalier c'esveilla pour aler a matines, comme il avoit acoustumé. Et la dame se esveilla et ne trouva pas son mary de coste soy; si fut embrasee de jalousie, tant qu'elle chercha tous les litz de sa maison. Et quant elle ne trova pas son signor, elle perdit toute joye et devint toute merveilleuse et plainne de grant noise, et ne pouvoit ne boire ne mengier, et perdit le dormir. Et le chevalier, bien mervveillié
22a
de ce, enquist pour quoy c'estoit. Et il trouva, par ceulx qui savoint le fait de la dame, que ce estoit par la jalousie, car elle cudoit que son mari aimmast ugne aultre. Pour quoy il appella la dame et luy dist qu'elle l'eust pour excusé, car en verité elle n'avoit pas cause de tel oppignion tenir. Et ce fist le chevalier par trois ou par quatre foiz, mais il perdit son langage. De quoy le chevalier se couroucha et luy dist qu'elle fust toute certainne que plus noble, plus gracieuse, belle et riche il avoit qu'elle n'estoit, et de qui, sans comparaison, plus grant bien et honneur il pouvoit avoir, laquelle, tant que il vivroit, il ne lesroit a aimmer et servir pour aultre femne. Et ces mos finés, la dame se desespoira et trait ung glaive qui pendoit a sa sainture et occist son enfant et elle, quar l'enfant estoit en son ventre. Pour quoy le chevalier fut tresdolent. Si ala en ugne eglise de Nostre Dame que il avoit fait faire et y veilla toute la nuit, en la priant devotement qu'elle luy vousist donner confort et aide. Si advint au matin, quant on voulut porter le corps de la dame en la fosse et mettre dedens, devant le peuple qui present estoit, la dame se leva et vint a son mari, qui estoit a genoulx devant l'ymage de la Virge Marie, et luy dist: « Sire, levés vous, car je soy maintenant que vous avés amye plus noble, plus aimable, plus honnourable de moy et de toutes
22b
femmes qui oncques furent, sont ne qui jamaiz seront, par la grace de laquelle je suis ressucitée. » Et tantost sa femme enfanta. Et quant l'enfant out trois ou quatre ans, le bon chevalier amena la mere et l'enfant en l'eglise de Nostre Dame de Roche Amadour, qui a l'onneur de la Virge Marie ce fait raconterent. Et fut bien tesmoignié par ceulx qui l'avoint veu. Et la mere et l'enfant, toute leur vie, portoirent la plaie du glaive duquel tous deux avoint esté occis.
XXXIV
Du prestre qui ne croyoit pas fermement le sacrement de l'autel.
Il fu ung prestre en Alemaigne qui doubta du sacrement et de eucharistie. Pour quoy pria moult humblement la Virge Marie, par sa grace, que elle l'en vousist rendre certain. Si advint que, ung semmedi qu'il disoit messe en l'onneur de Nostre Dame, quant il out consacré et vint pres de la pater nostre, il ne seut que l'ostie estoit devenue que il avoit consacree, et commencha a estre esbahy et regarder entour l'autel. Il vit la Virge Marie, qui tenoit son filz entre ses bras, laquelle luy dist: « Veez cy celuy que j'ay enfanté et celuy que tu as consacré. » Et ces parolles dites, la Virge luy bailla son enfant en ses mains et luy dist que il le prenist et que il parfeist la messe et que jamaiz il n'en doubtast, maiz creust
23a
ou sacrement. Et le prestre prinst l'enfant de la Virge Marie et coucha sur les corporialx. Et quant vint a faire la fraction du sacrement, il trouva l'ostie qu'il avoit consacree ou devant et ne vit plus ne la mere ne l'enfant, et ne doubta oncquez puis du sacrement. Si en merchia moult la tres glorieuse royne de paradis.
XXXV
De la bonne femme qui aprinst a son enfant a saluer la Virge Marie.
Une noble dame fut qui avoit ung tout seul enfant qu'elle amoit moult tendrement, et luy aprinst a aler chascun jour a l'eglise et saluer la Virge Marie. Si advint que il s'en ala baignier avecquez ses compaignons et se noya. De quoy tout le peuple du païs fut tout esbahy et dolent, et nulluy ne luy osoit dire fors seullement de ses amis, qui ourent grant contrainte de luy racompter l'aventure; de quoy elle fut moult esmervillie et dist: « Je ne croy pas que la Virge Marie ait enduré que son petit enfant se soit ainssi perillié. » Et le fist par deux jours querre en l'eaue, maiz il ne fut point trouvé. Puis au tiers jour la mere vint a l'eglise Nostre Dame et se agenouilla devant et dist: « Glorieuse Dame, c'estoit bien raison que je querisse mon enfant par trois jours, car tu queris par trois jour ton enfant, que tu avoiz adiré. Si te pry, par la grant joye que tu
23b
receus quant tu trouvas ton doulx enfant, que par ta grace tu me rendes le mien, ou aultrement je ne pourroye * vivre. » Et tantost son oraison finee, vindrent les pescheurs qui aportoirent l'enfant sain net et en bon point, que ilz avoint prins en ugne raiz, et le rendirent a sa mere, qui ploroit moult fort, et luy dist le filz: « Mere pour quoy plourés vous? Si vous apaisiés a la dame gracieuse qui tresdoulcement m'y a receu et gardé entre ses bras! » De quoy la mere et tous les aultres gracierent et glorifierent la Virge Marie.
De deux personnes conjoints en mariage qui vouerent chasteté.
En mariage estoint deux personnes qui de commun acord vouoirent chasteté. Et en la nuit de Pasques, quant ilz doibvoint aler a matines, rompirent leur veu, contre la voulenté de la femme, qui contredisoit a son mary. Maiz l'omme si fut plus fort, si acomplit son vouloir et rompit le veu; de quoy la femme fut tresmarrye et donna a l'ennemy tout ce qu'elle concepvoiroit pour celle foiz. Laquelle conceupt ung filx moult gracieux, qui ala a l'escolle et aprint tant que il seut bien la lectre. Et quant il out l'aage de .xii. ans, l'ennemy vint a la mere et luy dist que dedens trois ans il vendroit querir l'enfant qu'elle luy avoit donné la nuit de Pasques. De quoy la femme fut treseffroye
24a
et mena moult grant douleur et ,chascun jour, ploroit en regardant l'enfant, qui estoit tout bel et si bien entendant. Si se merveilla l'enfant pour quoy sa mere ploroit et menoit si forte fin; lors demanda a sa mere la cause; laquelle luy en compta toute la verité. Si s'en ala du consentement sa mere, faingnant qu'il alast a l'escolle, et vint par devers le pape et luy compta tout le cas comme sa mere luy avoit compté. Et le pape conforta l'enfant le mielx qu'il peut et le absoulut de tous ses pechiés et l'envoya au patriarche de Jherusalem, qui estoit ung tressaint homme, a ce que il priast Nostre Signour pour l'enfant. Lequel le conforta moult doucement et pria moult devotement pour luy, et l'envoya a ung hermite qui demeuroit pres d'Antioche, pour lequel Dieu faisoit de grans miracles. Et quant le hermite out le cas entendu, il se enforma d'avoir grant espoirance en la misericorde Nostre Signour; par especial il luy dist que il appellast la Virge Marie en son aide et y mist son espoirance. Et ainssi le fist. Et quant vint le jour de Pasques, que l'ennemy doibvoit venir querir l'enfant, l'enfant fut effroyé et couroucié et commencha a plourer fort. Adonc le prinst le hermite a le reconforter et le amonnesta mettre toute son espoirance en Dieu et en la Virge Marie. Et se revesti pour dire sa messe et mist l'enfant entre luy et l'autel, pour estre plus seurement. Et quant il
24b
fut ou sacrement, l'ennemy vint et prinst l'enfant et le porta en enfer; et la consecracion faite, le hermite fut tresdolent et commencha amerement a plourer. Et requist treshumblement a la Virge Marie qu'elle luy vousist rendre l'enfant; et sans attente, l'ennemy retourna et raporta l'enfant et restitua ou lieu ou il l'avoit prins. Et quant l'ermite vint a la Pater Nostre et il dist Per omnia secula seculorum, l'enfant, o grant leesse pour ce que il se voioit delivré, respondit Amen. Et la messe finee, l'enfant raconta a l'ermite comme la Virge Marie l'avoit gardé et delivré de l'ennemy par sa doulce misericorde. Et prinst congié a l'ermite et * vint a son pere et a sa mere et leur conta tout le fait et comment il estoit advenu, qui tous ensemble glorifierent et merchioirent la glorieuse royne de paradis. Et vescurent le pere et la mere chastement le demeurant de leurs vies Et l'enfant servit devotement a la Virge Marie.
XXXVII
Du clerc qui donna l'anel a ugne femme, laquelle il espousa.
Ung clerc si fut qui aimma ugne femme, laquelle par amours luy donna ung anel et il le prinst, et tantost se appensa de son sauvement et entra en ugne eglise. La il trouva ugne ymage de la Virge Marie. Si luy tendit ung anel en luy prometant
25a
que il la retenoit pour sa loyale amye et en toute sa vie ne vouloit autre avoir; et sans attente, l'ymage tendit le doy et le clerc y mist l'anel. Et l'ymage clouy tantost la main; pour quoy le clerc aima la Virge Marie et y mist plus ferme espoirance. Maiz aprés il mentit sa foy a la glorieuse Virge Marie et prinst celle qui l'anel luy avoit donné pour sa femme. Et quant il fu au soir couchié avec elle, devant toutes choses il s'endormy. Et out telle vision que la Virge Marie le reprenoit de son mariage et de sa foy, que il avoit mentie, en luy disant que par nulle voye il ne touchast a celle qui avec luy gesoit; et le menassoit moult grandement ou cas que il feroit le contraire. Si out le clerc paour et se esveilla et trouva entre luy et sa femme l'ymage de la Virge Marie, qui avoit en son doit l'anel de quoy il l'avoit espousee. Si lessa la femme gesant ou lit et ala en ugne abbaye, ou il fut moygne et servit tout le temps de sa vie a la Virge Marie.
XXXVIII
De l'abbé qui passoit la mer, que la Virge Marie sauva.
Mariniers en leurs barges estoient, qui passoint ung abbé et son convent. Si advint que par ugne nuit il leva ugne tresgrant tempeste en la mer, en telle menniere que tous ceulx qui estoint en vaissel cudoirent estre noyés. Par quoy chascun moult devotement recourut aux sains de paradis, et appelloit l'ung en
25b
son aide saint Nicolas et l'autre saint Pierre et l'autre saint Jaquez. Et ainssy chascun appelloit celuy a qui il avoit la plus grant devocion. Maiz il ne se apperchevoint point que la tempeste se cessast; mais tousjours croissoit; et adonc dist l'abbé: « Appellés tous ensemble la Virge Marie devotement en vostre aide et moy et mes moygnes chanteron ung respons en l'onneur d'elle ». Si commenchoirent a haulte voix a chanter Felix namque es, sacra, etc. et puis chantoirent le verset Ora pro populo, etc. Et quant ilz finerent leur chant, toute la tempeste cessa; et leur apparut ugne grant clerté, de quoy ilz furent tous confortés et loerent la glorieuse Virge Marie, royne de paradis.
XXXIX
De l'omme qui estoit excommunié, a qui les ennemis vindrent chanter a sa mort.
A Nostre Dame du Puy advint que il avoit ung homme qui pour ses deffautes estoit excommunié, pour ce qu'il haioit et desprisoit les prestres et clers; et quant ilz chantoint et servoint la Virge Marie, il disoit: « Or chantent les asnes du païs! » Si advint finalement que il mourut en sentence et sans absolucion. Et adonc tous les asnes du païs si se assembloirent et vindrent en sa maison; par toute la journee rechinoirent devant son huys, et ne les pouvoit faire taire le peuple ne partir de devant son huys jusquez a tant que la charoigne de luy fust partie
26a
de l'ostel et getee en ugne fosse.
XL
Du clerc qui portoit honneur a la Virge Marie.
Grant honneur faisoit ung clerc a Nostre Dame, maiz il estoit pecheur. Si advint que il voulut aler a Romme, pour certainnes causes qui le touchoint. Si se confessa a ung pretre de tous ses pechiés; maiz il ne voulut pas recevoir la penitance que le pretre luy donna. Et comme il aloit son chemin, il luy print grant voulenté de dormir, tant que il ne se pouvoit soubstenir sur son cheval; pour quoy il descendi de desus et s'endormit. Et luy vint en advision que il se mourroit et estoint a son costé dextre les angres de paradis et au costé senestre estoint les ennemis d'enfer, lesquelx estoint en grant descord pour l'ame de luy avoir. Adonc vint la Virge Marie aidier aux bons angres et demanda aux ennemis qu'ilz querroint, qui luy respondirent: « Dame, vous estes juste et doivés justement jugier. Cest homme pour qui nous sommes venus a tousjours vescu contre l'onneur de vostre filz, en pechié mortel, et en tel estat est il mort; pour quoy l'ame de luy nous appartient et doit estre nostre. » Et la Virge Marie demanda aux ennemis: « Avés vous point ses pechiés en escrit? » Et tantost ilz aportoirent ugne grant chartre ou tous ses pechiés estoint en escript. Et la Virge Marie dist: « Vous dites que je doy justement jugier. Si
26b
juge que justice requert que cestuy, pour le bon honneur que il m'a fait, soit remuneré, et je luy rendroy ceste chartre pour son paiment. » Et tantost la Virge Marie luy mist celle chartre en sa main. Et quant il se esveilla, il la trouva et la leut. Et hastivement il ala a confession de tous ses pechiés, bien contrit, et merchia et servit toute sa vie Dieu et la Virge Marie.
Pour toute question au sujet de ce site, veuillez vous adresser à :
labo@francaisancien.net