Miracle VII

Cy conmence un miracle de Nostre Dame d' une nonne
qui laissa son abbaie pour s' en aler avec un chevalier
qui l' espousa, et depuis qu' ilz orent eu de biaux enfans,
Nostre Dame s' apparut a elle, dont elle retourna en
s' abbaie et le chevalier se rendi moinne.

PREMIER TABLEAU
( À l’abbaye )
L' ABBESSE. Mes suers, dites moy sanz sejour,
Il est hui grant feste et bon jour,
Avez vous point fait assavoir
Aux fréres qu' un sermon avoir
Peussions hui ?
PREMIéRE NONNE. Dame, se Dieu me gart d' annui,
G' y envoiay dès devant hier,
Et m' a mandé frére Gautier
Que sanz faillir icy venra.
Je ne say si me mentira
De sa promesse.
DEUXIESME NONNE. Nanil voir : espoir qu' il confesse,
Ou qu' il chante ou qu' il estudie ;
Je ne doubt point, conment c' on die,
Que ci ne viengne.
L' ABBESSE. Alons donc, aviengne qu' aviengne,
Noz places prendre et nous seons,
Et noz heures tout bas disons
En l' attendant.
PREMIéRE NONNE. Dame, alons ; j' ay le cuer tendant
A faire vostre voulenté.

Elles entrent dans la chapelle

Or sa, de par la trinité
Seez vous ci.

L'abbesse s'assied

L' ABBESSE. C' est fait ;
( Se tournant vers la seconde nonne ) or vous seez aussi
Decoste moy.
DEUXIESME NONNE. Dame, voulentiers ; ( Elle s'assied ) quant a moy,
Je sui assise.

La première nonne s'assied aussi

PREMIéRE NONNE. Et vezcy pour moy place prise.
Je lo qu' ataingnons noz sautiers
Et disons prime endementiers
Que l' attendons.
L' ABBESSE. C' est bien dit ; a prier tendons
Devotement.

Elles récitent leurs heures

DEUXIEME TABLEAU

Dans la demeure du chevalier

LE CHEVALIER. Perrotin, vas sus, alons ment :
Vers l' abbaie me fault traire,
Car devers l' abbesse ay a faire,
Qui est m' antin.
L' ESCUIER. Sire, je croy miex pour certain
Que l' amour de la nonne belle,
Qui tant est sainte damoiselle,
Laiens vous maine.
LE CHEVALIER. Perrotin, c' est chose certaine ;
Certes, je l' ains tant que mon cuer
Ne puis d' elle oster a nul fuer,
Et si ne puis avoir sa grace
Pour priére que je li face :
Tu t' en peuz bien appercevoir.
Nonpourquant vueil j' aler savoir
Se je parler a lui pourray,
Ne se grace en lui trouveray
Qu' aie s' amour.
L' ESCUIER. Prest sui, sire ; alons sanz demour
Ou vous plaira.

Arrivés à l’abbaye

LE CHEVALIER. Perrotin, par foy mal me va :
Vez la l' abbesse et la prieuse
Et la tresbelle gracieuse
Qui veulent oir le sermon.
Je vueil ci faire arrestoison
Pour l' escouter.

Il se tient à l'extérieur, au seuil de la chapelle

L' ESCUIER. Dont puis j' a l' ostel bien aler
Savoir qui vous demandera,
Et revenir quant vous plaira
Icy vous querre.
LE CHEVALIER. Tu diz verité ; va bonne erre
Et reviens ja.

L'écuyer retourne au manoir du chevalier

TROISIEME TABLEAU

Dans la chapelle

LE PRESCHEUR.
Cum audisset, turbata est in sermone ejus, et cogitabat
qualis esset ista salutacio. Luce p^o. Doulce
gent, au conmencement de nostre sermon nous recourrons
a la glorieuse vierge Marie, et lui prierons
que elle nous vueille donner grace a moy de dire et a
vous de oir chose qui soit a l' onneur de toute la court
de paradis et a aucun prouffit de noz ames et a la confusion
de l' annemi. Et pour plus briefment ceste grace
empetrer, chascun et chascune, si vous plaist, la saluera
en disant : Ave Maria. Cum audisset turbata est, etc..,
ubi supra. Doulce gent, il est de conmun cours que
celles qui pour l' amour de Dieu vivent en estat de
virginité, a ce que elle soient dites vraies vierges, que
touzjours sont paoureuses et doubteuses, et si que pour
eschiver les choses qui sont a doubter elles craingnent
a la foiz les choses seures ; et qui fait ce ? ce qu' elles
scévent qu' en un trop feible et fresle vaissiau, c' est
assavoir en leur corps qui ne sont que terre, elles portent
un tresor precieux : quoy ? l' ame d' eulx, qui est faite a
l' image de la benoite trinité. Et de ce avient que quant
a telles vierges aucune chose vient de nouvel et soudainement,
il machinent et souspeçonnent tantost que ce
ne soit contre eulz. Doulce gent, je le di pour tant que
quant Dieu li péres ot envoié son ange a la glorieuse
vierge Marie annoncier que elle seroit mére du fil de
Dieu par qui la redempcion de l' umain lignage seroit
faite, a celle heure que li ange lui ot dit " Diex te saut,
plaine de grace, nostre sires est avecques toy," l' evangeliste
saint Luc dit que la glorieuse vierge fu troublée et
pensa quelle estoit ceste salutacion, et c' est la sentence
de la parole que je prononçay au conmencement de mon
sermon. Cum audisset, etc. : Conme la glorieuse vierge
eust oy le salut de l' ange, elle fut troublée, ce dit l' evangeliste.
Il ne dit pas partroublée, mais troublée simplement,
et ce vint de ce que elle estoit vierge vergondeuse
et honteuse. Ce qu' elle ne fu pas partroublée fu de la
vertu de force qu' elle avoit en soy ; ce qu' elle se tut et
pensa fu de la vertu de prudence. Elle pensa donc quelle
estoit ceste salutacion, dont il avint que quant li anges
vit qu' elle pensoit, il la conmença a conforter et a confermer
ce dont elle doubtoit en disant : " Marie, ne te
doubte pas, car en ce que je di n' a point de falace, n' y aies
nule suspeçon ; je ne suis pas homme, mais esperit et
ange de Dieu. Or ne doubtes donques point, car tu as
trouvé grace en Dieu. Ou se tu savoies combien ton
humilité plaist au treshault Dieu, tu ne jugeroies pas
que tu ne soies bien digne de estre servie et de oir la
parole des anges. Pourquoy te diras tu non digne de la
grace des anges, qui as trouvé grace a Dieu, laquelle
grace est la paix des hommes, la destruccion de mort,
la reparacion de vie ? C' est dont grace que tu as trouvé
a Dieu, et en signe de ce vezcy que tu concevras et enfanteras
un filz, qui sera appellé Jhesus." Sur ce dit
saint Bernart : O glorieuse vierge, entens par le nom
du fil qui te est promis con grant et conme espicial grace
tu as trouvé a Dieu : l' ange dit qu' il sera appellez Jhesus ;
la raison pour quoy mett un autre evangeliste qui dit :
Ipse enim salvum faciet populum suum a peccatis eorum.
Il sera appellez Jhesus ; pour quoy ? pour ce que c' est
celui qui sauvera son peuple de touz leurs pechiez.
Donques la glorieuse vierge trouva bien grace a Dieu ?
Certes voire. Car elle est ou plus seur lieu de paradis
par sa tresferme foy ; elle est ou plus hault par sa tresgrant
humilité ; elle est ou plus pur par sa tresgrant
chaasté et par sa nette virginité ; elle est ou plus glorieux
par sa vraie purté, par sa vraie amour et par l' excellence
de sa grant charité. Du quel glorieux lieu elle fait participans
touz ceulx et toutes celles qui devotement en ce
siécle la veulent servir et amer. Ou nombre desquelx
nous vueille par sa tresgrant misericorde acompaignier
Dieu le pére et le filz et le saint esperit, qui en trinité
regne et vit et regnera sanz fin. Amen.
( Au seuil de la chapelle )
LE CHEVALIER. De passion chiet cil en hen
Par qui me sui ci tant tenuz !
Egar ! je fusse puis venuz
Quatre liues qu' il ne fina.
Je me merveil se grant mal n' a
En sa cervelle.

Dans la chapelle

L' ABBESSE. Ha ! tresdoulce vierge pucelle,
De pitié, de grace et d' amour,
Moult fait en terre bon labour
Qui vous aime, sert et honneure,
Et cilz est nez de moult male heure
Qui de cuer vous servir n' entent,
Car a la perdicion tent
De sa povre ame.
PREMIéRE NONNE. Certes, vous dites voir, ma dame,
Bon la fait servir et amer.
Car de doulceur est sanz amer
La tresoriére.
L' ABBESSE. Et vous, ma doulce amie chiére,
Avez bien oy ce preudomme ?
S' il estoit cardinal de Romme,
S' a il dit de belles raisons.
Benoist soit le jour q' un telz homs
De femme naist.
DEUXIESME NONNE. Oil, ma dame : Diex li laist
Parfaire le bien qu' a empris ;
Car d' amer Dieu est moult espris,
Selon m' entente.
L' ABBESSE. Prieure, venez sanz attente
A moy en ma chambre parler,
Ainçoys qu' ailleurs pensez d' aler.
Je vois devant.
PREMIéRE NONNE. Dame, après vous m' en vois suivant
Sanz plus ci estre.

L'abbesse et la première nonne se retirent

DEUXIESME NONNE. Et je me vois a genouz mettre
Devant l' image nostre dame
A qui j' ay donné corps et ame
A lui servir, et mon pensé.

S’adressant à la Vierge

Dame par qui fumes tensé
De la mort d' enfer perdurable
Quant Dieu le pére esperitable
Fist son filz des haulx cieulx descendre
En vous et humanité prendre
Pour nous mener en paradis,
Dame qui en faiz et en dis
Plus qu' autre par prerogative
Futes a Dieu contemplative
En sainte conversacion,
Dame, toute m' afeccion,
Ma plaisance et tout mi desir
Sont en faire vostre plaisir.
Or m' en donnez, s' il vous plaist, grace,
Dame, et tandis que j' ay espace,
Voz heures cy recorderay
Et en disant accorderay
La bouche au cuer.
( À part )
LE CHEVALIER. Certes or ne say j' a nul fuer
Quelle contenance ait en moy,
Quant maintenant la endroit voy
Ce qu' ay desiré si long temps,
C' est ma dame noble et plaisans,
Courtoise, amoureuse et fetice.
Par le saint baron de Galice,
Se je devoie tout despendre
Quanque j' ay, si vouldray je tendre
A avoir s' amour maintenant.
( Il s’avance vers la nonne )
E ! tresgracieuse avenant,
Diex vous doint tresbonne aventure
Conme a ycelle creature
Qui plus est de mon cuer amée.
Or me soit vostre amour donnée,
Tresdoulce amie.
DEUXIESME NONNE. Sire, d' amer n' ay nulle envie
Fors que Dieu et sa doulce mére.
Certes l' amour est trop amére
Dont ci endroit me requerez.
Ce n' est pas ce que vous querez,
Sire, pour voir.
LE CHEVALIER. E ! belle, plaine de savoir,
Vers vous ne vueil de riens mesprendre.
Plaise vous cest anel a prendre
Que par fine amistié vous tens
Et qu' avec vous hui mais seans
Me puisse esbatre.
DEUXIESME NONNE. Folie vous feroit embatre
La ou l' en n' a cure de vous.
Par foy, miex vouldroie avoir roupz
Touz les deux braz.
LE CHEVALIER. Cuer doulx, ne me refusez pas.
Se vous faites ma voulenté,
Je vous feray par verité
Bien riche dame.
DEUXIESME NONNE. A Dieu me rens de corps et d' ame,
Biau sire : laissiez moy en paiz.
Je ne pris voz diz ne voz faiz,
Si m' aist Diex, ce festu ci.
Pour Dieu, alez vous ent de cy.
Laissiez m' ester.
( Le chevalier s’éloigne )
LE CHEVALIER. Elas ! bien me doy dementer :
J' ay du tout failly a ma proye.
A chose que ma bouche proie
Ne veult celle que j' ains entendre.
( Il aperçoit son écuyer )
Et dont viens tu ? c' on te puist pendre !
M' as tu bien fait icy muser ?
Sui je homme qui doye ruser
Seul enmy voie ?
L' ESCUIER. E ! mon seigneur, que Dieu vous voie !
Combien a que je sui venuz
Et que je me sui ci tenuz
Pour ce qu' a vous n' osoie aler ?
Je vous regardoie parler
A celle dame.
LE CHEVALIER. Haro ! c' est la plus dure fame
C' onques mais vi et la plus fiére.
Un seul tantait de belle chiére
Ne puis de lui traire n' avoir
Par priére ne pour avoir.
Briefment c' est le court et le lonc :
Autres femmes ont cuer de plonc,
Mais elle l' a de fer trop fort ;
Quant je n' y puis trouver confort,
Ne say que face.
L' ESCUIER. Sire, avant que de celle place
S' en voit arriére, a li alez
Et doulcement a li parlez ;
Et s' elle vous fait des refus
N' en soiez ja pour ce confus,
Maiz s' amour touzjours requerez,
Et certainement vous l' arez
Par ceste guise.
LE CHEVALIER. Tu m' as ci bonne voie apprise,
Perrotin, certes g' y revois.
Or m' atens. ( Il revient auprès de la nonne ) E ! gent corps courtois
Pour cuer d' ami faire esjoir,
Vueillez vostre amant vray oir
Qui se complaint.
DEUXIESME NONNE. Sire, de vous ay eu maint
Tel parler, dont petit me chaut :
Il ne me font ne froit ne chaut,
N' en doubtez mie.
LE CHEVALIER. E ! cuer doulx, devenez m' amie :
Humblement de cuer vous em proy,
Et je vous promet de ma foy
Quanqu' il vous plaira je feray,
Ne ja riens ne contrediray
Que vueillez dire.
DEUXIESME NONNE. Je n' aray mie paix, biau sire,
S' a vous amer ne me consens.
Ore pour ce que voi et sens
A voz maintiens que vous m' amez,
Et je ne vueil que diffamez
Soit mon corps par delit charnel,
Je vous fas ce jeu parti tel :
Je sai bien que nobles homs estes,
Et je de nobles gens honnestes
Sui estraitte aussi, qui sui femme :
Se pour miex garder de diffame
Mon honneur et mon pucellage
Vous me voulez par mariage
Prendre et le plevir par la foy,
Mon corps et m' amour vous ottroy ;
Autrement non.
LE CHEVALIER. Dame, pour vostre bon renom
Garder, et je le vous promet
De ma main qu' en la vostre met
Trestoute nue.
DEUXIESME NONNE. Or n' en soit plus raison tenue
Quant a ore, ains vous en alez,
Et ja quant nuit sera venez
Et m' atendez en ce lieu la,
Et quant le convent dormira
Tout coiement m' en ysteray
Et a vous tout droit m' en venray :
N' en doubtez mie.
LE CHEVALIER. C' est bien dit, belle doulce amie.
A Dieu dont vous conmanderay,
Et je vous y attenderay
Certainement.
DEUXIESME NONNE. Je ne vous faudray nullement,
N' en doubtez point.
( Le chevalier se retire et se dirige vers son écuyer )
LE CHEVALIER. Certes, or me va bien a point :
J' ay trouvé en ma dame grace.
Qui me tenroit que ne chantasse ?
Nulz, car j' ay le cuer plain de joie.
" Il n' est vivant qui me doie
Blamer de celle servir
Dont tout bien me peut venir."
Venir ? certes, voire a largesce
Quant seulement de sa promesse
M' a fait si lié.
( L’écuyer l’aperçoit )
L' ESCUIER. Mon seigneur, gay et esveillié
Vous voi plus que ne fis pieça.
Dites, s' il vous plaist, conment va
Vostre besongne.
LE CHEVALIER. Bien, par la dame de Bouloingne,
Perrotin : j' ay quanque je vueil.
La belle qui tant a ver oeil
M' a fait present de son gent corps,
Et sommes en certains accors.
Alons men boire sanz delay.
Sachiez assez tost revenray
Yci la querre.
L' ESCUIER. Or alons, mon seigneur, bonne erre,
Qu' il est ja tart.
( Ils s'éloignent, regagnant probablement la demeure du chevalier.
La fin du jour est venue. )
L' ABBESSE. ( Revenant avec la première nonne près de la chapelle )
Prieure, se Jhesus vous gart,
Trop me merveil de nostre suer
Conment peut durer a nul fuer
Tant en l' eglise.
PREMIéRE NONNE. Dame, elle est toute en Dieu esprise :
Touzjours est devant nostre dame.
Certes c' est une sainte femme,
A mon cuidier.
L' ABBESSE. Prieure, ce n' est d' ui ne d' yer,
Mais dès lors que ceens entra.
Alez la faire venir ça,
S' irons couchier.
PREMIéRE NONNE. Voulentiers : je la vois huchier.
( Elle va vers la seconde nonne )
Suer, l' abbesse vous mande ainsi
Qu' a li vous en venez de ci
Sanz demourée.
DEUXIESME NONNE. Suer, je vois, puis qu' il li agrée :
Plus ne vueil ci faire demour.
( Rendue auprès de l’abbesse )
Ma dame, Dieu vous doint s' amour
Par son plaisir.
L' ABBESSE. Et il vous doint vostre plaisir.
Suer, il nous fault aler couchier :
Pensons d' en dortoir nous fichier ;
Il est saisons.
PREMIéRE NONNE. C' est mon, car jours avons moult longs
Et courtes nuiz.
DEUXIESME NONNE. Alons, dame, je vueil cest huis
Fermer, puis que sommes dedans,
Afin que nul ame ceens
Ne puist entrer.
( Elle ferme la porte extérieure de la chapelle et les trois religieuses s'en vont au dortoir )

QUATRIEME TABLEAU
( Chez le chevalier )
LE CHEVALIER. Perrotin, sanz nous plus monstrer,
Alons men la la belle attendre,
Car il m' est bien mestier d' entendre
Quant elle ystra.
L' ESCUIER. Mon seigneur, ou il vous plaira
Tantost alons.
( S’approchant de l’abbaye )
LE CHEVALIER. Ho ! Perrotin, ci nous tenons
Sanz dire mot chascun tout coy.
Seoir me vueil en ce recoy :
Siez toy aussi.
L' ESCUIER. Sire, voulentiers : ( Ils s'asseyent ) vez me cy
Lez vous assis.

CINQUIEME TABLEAU
( Au ciel )
NOSTRE DAME. Or sus, mi ange et mes amis,
Alons nous en celle abbaye.
G' i voy de pechier envaie
Une nonne que de cuer ainz :
Monstrer li vueil sa foleur ains
Qu' elle y enchiée.
GABRIEL. Dame, alons ; folz est qui ne bée
A faire vostre voulenté.
( Se tournant vers Michel )
Or nous fault estre entalenté,
Michiel, de chanter, en alant
Devant no dame, aucun biau chant.
Il appartient.
MICHIEL. Puis que chanter nous esconvient,
Gabriel, disons ce rondel
Qu' apris avons tout de nouvel,
Sanz riens retraire.
( Ils arrivent à la chapelle en chantant. )
RONDEL. Tresdoulce vierge debonnaire,
De vraie humilité sejour
Et d' amour parfaicte exemplaire,
Tresdoulce vierge debonnaire,
A tout cuer embelir et plaire
Doit qu' il vous serve nuit et jour,
Tresdoulce vierge debonnaire
De vraie humilité sejour.
NOSTRE DAME. My ange, un petit de demour
Ici endroit nous troi ferons.
Assez briément nous en irons
En paradis.
( Notre-Dame prend la place de sa statue )

SIXIEME TABLEAU
( Dans le dortoir )
DEUXIESME NONNE. Puis que convent est endormiz,
Il esconvient que je m' en aille :
Ce n' est pas raison que je faille
D' aler ou j' ay convenancié
Par grant amour et fiancié
Au doulx a qui le mien cuer tent,
Car trop annuie a qui atent,
Je le sçay bien, n' est pas nouvelle ;
( Pénétrant dans la chapelle et s'approchant de la statue de Notre-Dame )
Mais avant par ceste chappelle,
Ou passer parmy me convient,
La doulce vierge par qui vient
Grace aux humains des cieulx ça jus
A mains jointes, a genouz nuz,
Humblement saluer m' en vois
De cuer devot a basse vois.
Vierge qui tant nous as valu
Contre Sathan, je vous salu
En disant : Ave Maria,

Gracia plena, dominus tecum, benedicta tu in mulieribus

Et benedictus fructus ventris tui.

Dame, a Dieu ! je m' en vois maishui :
Plus ne vous vueil ore aourer.
( La statue de la Vierge vient barrer la porte et interdire le passage )
Egar ! me fault il demourer ?
Mére Dieu, que peut ce ci estre ?
Vostre ymage s' est venu mettre
Si droit au travers de cest huis
Que nullement passer ne puis.
E ! doulx amis, vous muserez,
Vostre amie huimais pas n' arez,
Dont moult forment au cuer me poise.
C' est nient, il fault que je me voise
En mon dortoir.

SEPTIEME TABLEAU
( À l’extérieur de l’abbaye )
LE CHEVALIER. Haro ! je croy que le pouoir
De Dieu est du tout mis au nient
Quant celle que j' atens ne vient,
Ou je ne say s' elle me ruse
Pour moy faire paier la muse
Ci toute nuit.
L' ESCUIER. Vraiement, mon seigneur, je cuit
Qu' elle se soit de vous moquée :
Mienuit est ja plus que passée,
Je vous promet.
LE CHEVALIER. Voirement qui en femme met
Son cuer, bien le doit on blasmer,
Car on y treuve moult d' amer
Ainçois que l' en en viengne au bout.
Et, par Dieu, combien qu' il me coust,
Encore ci l' attenderay
Jusques a tant que je verray
Le jour crevé.
( Ils attendent le point du jour, puis s'en retournent vers la demeure du chevalier )

HUITIEME TABLEAU
( Le jour passe, la nuit arrive. À l’intérieur du couvent )
DEUXIESME NONNE. Que peut c' estre ? Ay je sens desvé
Ou j' ay esté enfantosmée,
Qui ne puis estre oultre passée
Celle chappelle ou ore entray ?
Par Dieu, encore me mettray
En essai se pourray passer.
Pener me doy bien et lasser
Afin d' acomplir ma promesse,
Car je seray chevaleresse
Se de ceens puis estre yssue.
Je m' en revois sanz attendue,
Si saray qui m' en avenra.
( Elle revient à la porte de la chapelle et salue Notre-Dame )
Doulce dame, ave Maria,

Gracia plena, dominus tecum, benedicta tu in mulieribus
Et benedictus fructus ventris tui.
( La statue lui barre à nouveau la porte )

Or doi j' avoir bien plain d' annui
Le cuer, et de courrouz et d' ire,
Quant ceste ymage contredire
Deux foiz m' est venue a passer,
Et je n' ay plus par ou aler
Puisse, se n' est par ci endroit.
Aussi con sur moy clamast droit
L' issue par cy me devée ;
( Elle fait demi-tour et se dirige vers le dortoir )
Je voy bien qu' en vain muse et bée :
Retourner en dortoir me fault,
Mais le cuer de douleur me fault
Quant g' y revois.
( La statue reprend sa place. Notre-Dame s'adresse aux anges )
NOSTRE DAME. Ralons nous en entre nous trois,
Mi ange, en la gloire infinie,
Et si chantez a voiz serie
Aucun rondel.
GABRIEL. Nous en dirons un tout nouvel,
Dame, quant vous le conmandez.
( Se tournant vers Michel )
Michiel, avecques moy chantez
Et sanz decort.
MICHIEL. Disons donc ce rondel d' accort,
Bel est a dire.
( En retournant au ciel )
RONDEL. Dame du royal empire
Des cieulz, mére au roy des roys,
Mains vous sert homs, plus empire,
Dame du royal empire,
Car par vous de Dieu s' espire
Grace es cuers plains de desrois,
Dame du royal empire
Des cieulx, mére au roy des roys.

NEUVIEME TABLEAU
( Après le lever du jour )
L' ESCUIER. Mon seigneur, j' ay oy la vois
De l' aloete. Il est grant jour.
Alons men de cy sanz sejour,
C' on ne nous truisse.
LE CHEVALIER. Las ! je ne say conment je puisse
Durer, tant ay au cuer courrouz.
Perrotin, va t' en, ami doulz,
Et revien assez tost a moy,
Car je te jur en bonne foy
Jamais bien ayse ne seray
Tant qu' a elle parlé aray ;
N' en doubtes point.
L' ESCUIER. Je venray donc cy bien a point :
Je m' en vois, sire.
( Il s'éloigne )

DIXIEME TABLEAU
( Dans le dortoir )
PREMIéRE NONNE. Ma dame, encore avons a dire
Noz heures, et le jour est hault.
Trop avons dormy : il nous fault
De ci lever.
L' ABBESSE. Hau ! Diex, je prenoie a resver.
Egardez conme il est haulte heure !
Or sus, alons men sanz demeure
En cuer nous trois.
DEUXIESME NONNE. Ma chiére dame, alons, c' est droiz,
Et temps en est.
( Sortant du dortoir, elles pénètrent dans la chapelle )
L' ABBESSE. A chascune son livre prest ?
Je lo que tout bas versillons.
Mettons nous ci a genoillons
En Dieu priant.
PREMIéRE NONNE. Ce ne vueil j' estre detriant,
Ma chiére dame ; or conmanciez :
Diner sera bien avanciez
Ains qu' aions dit.
L' ABBESSE. Conmencier vueil sanz contredit.

Domine, labia mea apperies.
LES SEURS.     Et os meum annunciabit laudem tuam.
L' ABBESSE.     Deus, in adjutorium meum intende.
LES SEURS.     Domine, ad adjuvendum me festina.
L' ABBESSE.     Benedicamus Domino.
LES SEURS.     Deo gracias.
( Se redressant )

L' ABBESSE. Alons diner ysnel le pas,
Puiz que noz heures dit avons,
Et après en dortoir yrons
Sus la vesprée.
DEUXIESME NONNE. Chiére dame, s' il vous agrée,
Un petit ici demourray,
Car uncore un po a dire ay
De mon service.
L' ABBESSE. M' amie, je seroie nice
Se dire ne le vous laissoie.
( Se tournant vers la première nonne )
Nous en irons par ceste voie
Nous deux devant.
( L'abbesse et la première nonne s'en vont au réfectoire.
Le chevalier s'introduit dans la chapelle. )
LE CHEVALIER. E ! doulce amie, en convenant
M' aviez d' estre a moy venue :
Par deux nuiz vous ay attendue
Et a toutes deux musé ay,
Dont j' ay esté en grant esmay,
En grant courrouz et a malayse.
Pour Dieu, a moy dire vous playse
Qui m' a ce fait que ne venistes
Dès le convenant que me fistes
Premiére foiz.
DEUXIESME NONNE. Doulx sire, se conte de Foiz
Feussiez, n' en peusse je faire
Plus ; ne vous vueille pas desplaire ;
Je l' amenderay bonnement,
Car ennuit tout certainement
Venray a vous entour mienuit,
Sire, et pour Dieu ne vous ennuit
De mon demour.
LE CHEVALIER. Doulce amie, pour vostre amour
Ne m' en vueil je pas courroucier,
Mais je vous pri, dame, et requier
Ennuit venez.
DEUXIESME NONNE. Sire, pour tout certain tenez
Que a vous vers mienuit iray :
Pour nulle riens ne le lairay,
Soiez en seur.
LE CHEVALIER. Dame, ce soit a bon eur.
A Dieu ! moult bien me prendray garde
De vous, car moult forment me tarde
Vostre venue.
( Il quitte la chapelle et s'en retourne chez lui )
DEUXIESME NONNE. Bien sui fole quant tant tenue
Me sui a servir ceste ymage
Qui deux foiz m' a fait tel hontage
Que le passer m' a deffendu
Par cy, dont le cuer ay fondu
Tout en douleur, c' est bien droiture.
Mais pour nient prent ci de moy cure,
Car de touz poins certes lairay
Son service ; plus n' en feray.
Trop long temps en cloistre ay musé
Et mon corps en penance usé :
Plus n' en feray ; j' en sui a fin.
Ains qu' il soit demain au matin
Pense j' estre en autre harnoys.
Avecques l' abbesse m' en vois
Qui m' atent la.
( Elle passe de la chapelle au réfectoire )
PREMIéRE NONNE. Bien veigniez, belle suer ; or sa,
Avez dit tout ?
DEUXIESME NONNE. Oil, j' ay tout mis sus le bout
Jusqu' a demain.
L' ABBESSE. C' est bien fait ; mettez ci la main,
Belle suer, avec nous mengiez.
Tenez : ceste cuisse rungiez
De ce poucin.
DEUXIESME NONNE. Voulentiers, dame, de cuer fin
Quant le voulez.
( Elles prennent leur repas )
PREMIéRE NONNE. Ma chiére dame, or m' entendez.
Nous avons mengié a foison.
Il est d' aler couchier saison,
Si com me semble.
L' ABBESSE. C' est voirs ; alons nous trois ensemble.
Demain lever nous convenra
Matin, pour ce que l' en tenra
Ceens chapitre.
DEUXIESME NONNE. Alons donc : je ne vueil pas istre
De vostre accort.
( Elles s'en vont au dortoit )

ONZIEME TABLEAU
( Dans la demeure du chevalier )
LE CHEVALIER. Perrotin, il m' est moult a fort
De ce qu' estre autrement ne peut :
Grant chose a en " faire l' esteut".
Doulz amis, a toy me complaing.
Je vieng de celle que tant aing,
A qui j' ay parlé longuement
Et si li ay monstré conment
Deux nuiz elle m' a fait attendre ;
Et elle d' umble cuer et tendre
M' a prié que je li pardoingne,
Car il li sourdi une essoine
Par quoy a moy ne pot venir,
Mais que ja venra sanz faillir ;
Que m' en diz tu ?
L' ESCUIER. Mon seigneur, par le roy Jhesu,
Sachiez s' en vostre point estoie
Qu' a ceste foiz encore yroie
Elle gaittier.
LE CHEVALIER. Pense donc de toy affaittier,
Car maintenant nous en yrons
La endroit, et la gueterons
Tant qu' elle viengne.
L' ESCUIER. Sire, ne dites plus qu' il tiengne
A moy : prest sui.
LE CHEVALIER. Alons men, il est temps maishui,
Tout bellement.
( Ils partent pour l'abbaye )

DOUZIEME TABLEAU
( La seconde nonne s'apprête à passer par la chapelle )
DEUXIESME NONNE. Or ne vueil je plus longuement
Demourer que je ne m' en voise
De ci endroit sanz faire noise.
Convent dort, que je bien le say,
Et si me mettray en essay
De passer par my la chappelle
Sanz dire ave, ne kyrielle
Devant l' image de Marie ;
Trop m' a fait estre en cuer marrie,
Dont plus saluer ne la vueil,
Ne tourner devers li mon oeil.
Dame, dame, tenez vous la.
( Elle passe le seuil et aperçoit le chevalier, qui l'attend )
Puis que passée suis de ça,
Je ne retourneray mais huy
Ne des mois, car je vois celuy
Que j' aim de cuer et que je quier
Qui m' atent la. Doulz ami chier,
A vous m' en vien.
LE CHEVALIER. Doulce amie, puis que vous tieng,
Je sui hors de toute tristesce
Et plain de joie et de leesce.
Vous soiez la tresbien venue,
N' y ait plus parole tenue ;
Cy endroit plus ne demouron.
Or tost mettez ce chapperon
Et puis ce mantellet vestez.
Pour Dieu, dame, que vous hastez,
Car pour voir espouser vous vueil
Ains que je dorme mais de l' ueil ;
N' en doubtez point.
( La nonne pose la coiffe et revêt le manteau )
DEUXIESME NONNE. Sire, je suis preste et a point :
Avant mouvez.
LE CHEVALIER. Escuier, devant nous alez :
Passez tantost.
L' ESCUIER. Sire, voulentiers a brief mot :
Je vois devant.

Ils s'en vont, tous les trois, vers la demeure du chevalier

TREIZIEME TABLEAU

Le lendemain matin, au dortoir

L' ABBESSE. Prieure, grant desavenant
Faisons de dormir a ceste heure.
Levez sus tantost sanz demeure,
S' alons chanter.
PREMIéRE NONNE. Ma dame, je vois sanz tarder.
( Se tournant vers le lit de la seconde nonne )
Or sus, ma suer, sus sanz respit.
Egar ! pas n' est dedanz son lit.
Ou peut elle estre ?
L' ABBESSE. Je ne say, par le roy celestre,
S' elle n' est en l' eglise alée.
Alons y voir sanz demourée
S' elle y seroit.
PREMIéRE NONNE. Dame, alons : de par Dieu ce soit ;
Il me plaist bien.
( Elles entrent dans la chapelle )
L' ABBESSE. Prieure, icy ne voy je rien.
Je croy que ceens ne soit pas.
Gardons partout ysnel le pas
Pour l' amour Dieu.
( Après avoir cherché dans tous les coins )
PREMIéRE NONNE. J' ay gardé partout, mais en lieu
De ceens ne la puis trouver.
Je n' en say mais ou recouvrer
Nouvelle vraie.
L' ABBESSE. Lasse ! le cuer pour li m' esmaie.
Aucuns hons si l' a deceue
Pour ce qu' il l' a belle veue,
Et ainsi l' en maine a diffame.
Lasse ! et c' estoit si sainte femme !
Com grant damage !
PREMIéRE NONNE. Voirement, plus a saint courage
Une personne, et plus temptée
Est du Sathan, afin qu' ostée
Soit de sa bonne voulenté.
Quel part qu' el voit, par sa bonté
Dieu la deffende.
L' ABBESSE. Amen, m' amie, et la nous rende
Briément la doulce mére Dieu,
Qui mener la vueille en tel lieu
Que mal ne face.
PREMIéRE NONNE. Dame, sanz plus terme n' espace,
Je lo qu' en vostre chambre entrons,
Et illecques regarderons
Qu' en pourrons faire.
L' ABBESSE. Vous dites bien ; c' est bon a faire.
Prieure, alons.
( Elles entrent dans la chambre de l'abbesse )

QUATORZIEME TABLEAU
( Les années ont passé. Au manoir du chevalier )
LE CHEVALIER. Doulce amie, espousé avons
Et esté si lonc temps ensemble
Que deux enfans, si com me semble,
Avez de moy qui sont ja grans.
Nonpourquant sui bien recordans,
Je ne say se vous le savez,
Qu' encore demouré n' avez
Qu' en un de mes petiz hostieulx ;
Mais je vous vueil mener ou mieulx
Que vous n' avez eu arez,
Et plus honnourée y serez
Cent mile temps.
DEUXIESME NONNE. Mon treschier seigneur, je m' assens
A tout ce qui vous plaist a faire.
Se Dieu plaist, je ne quier meffaire
Vers vous en rien.
LE CHEVALIER. Dame, de ce vous croy je bien ;
Et je vous seray vraiz amis,
Si com je le vous ay promis,
Jusqu' en la fin.
LA DAMOISELLE. Amer devez bien de cuer fin,
Ma dame, certes, mon seigneur.
Car il vous a fait la grengneur
Dame qui soit ici entour.
Jamais ne devez a nul tour
A sa voulenté contredire,
N' a chose qui lui plaise a dire
Mettre encombrier.
DEUXIESME NONNE. Damoiselle, ne je ne quier,
Par saint Martin.
LE CHEVALIER. Va t' en devant nous, Perrotin,
D' aprester l' ostel entremettre
Et de faire les tables mettre
Pour le diner.
L' ESCUIER. Mon seigneur, je ne quier finer
S' aray fait, je vous convenant,
Vostre vouloir : je vois devant
Tout aprester.
( L'écuyer se dirige vers une autre demeure, plus grande, du chevalier )
LE CHEVALIER. Dame, alons men sanz arrester
Par ci aval.
DEUXIESME NONNE. Alons, que Dieu vous gart de mal,
Mon chier seigneur.
LA DAMOISELLE. Dieu vous ottroit paix et honneur
Ensemble et longue et bonne vie,
Et deffende de male envie
Par sa doulceur.
( Les trois personnages partent pour le nouveau manoir )

QUINZIEME TABLEAU
( Arrivés au manoir )
LE CHEVALIER. M' amie, vezci la meilleur
Maison que j' aie, sanz mentir.
Entrez ens ; bien puissez venir :
Que Dieu le vueille !
DEUXIESME NONNE. Sire, Dieux a honneur recueille
Es cieulx vostre ame !
( Ils entrent dans la demeure )
L' ESCUIER. Or tost a table alez, ma dame,
Et vous, mon seigneur : temps en est.
Je vous serviray ; tout est prest,
Moult grant piéce a.
LE CHEVALIER. Dame, vous serrez par dela
Et j' emprès vous.
DEUXIESME NONNE. Voulentiers, mon chier seigneur doulz,
Quant vous aggrée.
( La dame et le chevalier prennent place à table ; la demoiselle se joint à l'écuyer pour servir )
LA DAMOISELLE. Et vez me ci toute aprestée
D' aidier a faire le service,
Car de ce ne suis je pas nice
Ny esgarée.
LE CHEVALIER. Or tost, met cy sanz demourée,
Perrotin, se menger devons,
De telz biens con ceens avons :
Delivre toy.
L' ESCUIER. Voulentiers, mon seigneur, par foy.
( Il apporte un plat )
Tenez, chier sire.
( Des jongleurs apparaissent à la porte )
LE CHEVALIER. Or me vas a ces jeugleurs dire
Qu' ilz viengnent ci sanz demourée.
Je vueil que soiez honnorée,
Dame, seyens.
L' ESCUIER. Je vois. ( Allant vers les jongleurs ) Seigneurs, venez leyens
Faire mestier.
( Les jongleurs entrent et se mettent à jouer.
Quelques instants après, arrive un messager )
LE MESSAGIER. Diex gart de mal et d' encombrier
Ma dame et mon seigneur aussi
Et toute la gent autressy
Que ceens voy.
LE CHEVALIER. Messagier, bien veigniez par foy.
Quelles nouvelles ?
MESSAGIER. Sire, ilz ne sont mie trop belles.
Le conte de qui vous tenez
Vous mande ainsi qu' a li venez
Sus quanque vous pouez meffaire,
Car il a moult de vous affaire.
Plus ci endroit ne vous tenez,
Mais faites, si vous en venez,
Sire, a lui tost sanz demourée ;
Car le prince de la Mourée,
Sire, l' est venu assaillir,
Et il se doubte de faillir
A soy contre lui revengier
Il voit ja les bestes mengier
A ses gens, s' en a grant deffault ;
Avec ce touz les jours assault
A grans et a petiz moult fort,
Si que s' il n' a briément confort
De vous et de ses autres gens,
Et que chascun soit diligens
A son pouoir de li aidier,
Je doubt bien, sire, que vuidier
Sa terre ne li esconviengne,
Et que le prince ne la tiengne
Conme seue acquise en sa main ;
Si que, pour Dieu, et soir et main
Vueillez penser de chevauchier
Tant qu' a li soiez, sire chier.
Autre chose ne vous diray
Fors qu' a Dieu vous conmanderay.
Tout ce pais m' en vois cerchier
Et a touz ses hommes chargier
Autel conme je vous ay dit,
Et qu' il n' y facent contredit.
Pour Dieu, mettez vous tost a voie
Vezci lettres qu' il vous envoie ;
Lisez les, sire.
LE CHEVALIER. Maintenant les me verras lire.
( Il lit la lettre )
Je voi assez son mandement.
Dame, sanz plus delaiement
Faire, au conte m' en fault aler
Mon seigneur ; sanz plus demourer.
A Dieu vous di.
DEUXIESME NONNE. Mon seigneur, alez a celi
Dieu qui vous fist, qui vous conduie
Et qui briément vous raconduie
Sain et haittié.
LA DAMOISELLE. Dieu vous vueille par sa pitié,
Mon seigneur, en tel lieu mener
Que riens ne vous puisse grever,
Mais par tout la ou vous irez
Soiez des dames honnourez.
Je pri Dieu qu' il li en souviengne
Et qu' en santé il vous maintiengne
Par son plaisir.
( Départ du chevalier pour la guerre )

SEIZIEME TABLEAU
( Dix ans après, le chevalier revient de guerre, avec son écuyer )
LE CHEVALIER. Dame, Diex yst, si grant desir
N' oi, je croy, passé a dis ans,
Com de vous estre cy veans,
M' amie chiére.
DEUXIESME NONNE. Et j' ay vostre venue chiére
Sur toute riens, mon seigneur doulx.
Pour Dieu, conment le faites vous ?
Que bien veigniez !
LE CHEVALIER. Dame, je suis sains et haitiez.
Et conment le font noz enfans ?
J' ay esté lonc temps desirans
D' estre avec eulz.
DEUXIESME NONNE. Bien, sire ;
( Se tournant vers ses enfants ) enfans, alez touz deux
A genouz devant vostre pére ;
Saluez le de haulte chiére ;
Delivrez vous.
LES ENFANS. Mon frére, or sus, delivrons nous
De no pére aler saluer :
Ce ne nous doit en riens grever,
Je sçay bien qu' aussi lui plaira.
Mon seigneur, vous soiez deça
Le bien venuz.
LE CHEVALIER. C' est assez, mes enfans, or suz.
( S'adressant à sa femme )
Dame, de chevauchier me dueil
Trop malement ; sachiez je vueil
Aler couchier.
( Il se retire dans sa chambre )
DEUXIESME NONNE. De par Dieu soit, mon seigneur chier
Le lit est tout prest, Dieu mercy.
( Se tournant vers l'écuyer )
Escuier, sanz plus estre cy,
Prenez en l' estable un cheval
Et s' alez au giste a Loncval :
Vous avez assez heure et temps ;
Et demain reçoif le chier cens
C' on nous y doit.
L' ESCUIER. Ma dame, g' y vois bon esploit,
Quant le voulez.
( Il part à Longval )
DEUXIESME NONNE. Damoiselle, et vous en alez
Sanz noise, et je couchier m' en vois
Delez mon seigneur ; il est droiz.
( Elle entre dans la chambre et s'allonge à côté du chevalier )
Qu' est ce la, mon seigneur ? veilliez ?
Il pert bien qu' il est traveilliez
Quant ja se dort.
( Elle s'endort )

DIX-SEPTIEME TABLEAU
( Au ciel )
NOSTRE DAME. Venez avec moy par deport,
My ange, car je vueil aler
Une moie amie appeller
De l' estat de pechié a grace.
Trop s' i est enlacie et lace.
Alons briefment.
GABRIEL. A vostre doulx conmandement,
Dame des cieulx, obeirons,
Et devant vous chantant yrons :
C' est bien droiture.
MICHIEL. Mouvons devant bonne aleure,
Gabriel amis, et chantons
Ce rondel cy que nous savons
Bien sanz discorde.
( Ils arrivent, en chantant, à la chambre conjugale )
RONDEL. Royne de misericorde,
Quant vostre grace a touz offrez,
Homs qui vostre doulceur recorde,
Royne de misericorde,
Sent qu' a Dieu par vous se racorde
Et que nul perir ne souffrez,
Royne de misericorde,
Quant vostre grace a touz offrez.
( Ils arrivent dans la chambre et la Vierge interpelle la femme endormie )
NOSTRE DAME. Or sus, or sus, de pechiez orde,
Or sus, or sus ysnellement :
Trop as mespris vilainement,
Qui si longuement m' as laissié
Pour un homme a qui adrecié
As t' amour et ton cuer du tout,
Qui te sera de trop chier coust
Se bien tost tu ne t' i prens garde.
Or sus, fole, plus ne te tarde,
Mes saluz tantost me rapportes,
Ou du ciel te clorray les portes.
L' anemi t' a bien deceu,
Quant en pechié as tant geu.
Vien, si me sers con tu seulz faire,
Ou trop mal ira ton affaire,
Je te promet, en brief tempoire.
( Se tournant vers ses compagnons )
Ralons nous ent, my ange, en gloire,
Car je le vueil.
GABRIEL. Dame, vostre conmant recueil
A faire en gré. Michiel amis,
Puis qu' a voye nous sommes mis,
Chantons, c' est droiz.
MICHIEL. Je m' y accors en touz endroiz.
Vueillons nostre rondel pardire,
Gabriel, en alant sanz ire.
Faisons que l' un a l' autre accorde.
( Ils remontent au ciel, en chantant )
RONDEL. Sent qu' a Dieu par vous se racorde
Et que nul perir ne souffrez,
Royne de misericorde,
Quant vostre grace a touz offrez.
( La dame se réveille brusquement )
DEUXIESME NONNE. Lasse ! bien doit estre effraez
Mon las de cuer, quant j' ay meffait
Contre Dieu si vilain meffait
Que de s' amour m' ame descorde.
E ! dame de misericorde,
A la mort d' enfer vois le cours
Se ne me prenez en secours,
Vierge Marie.
LE CHEVALIER. Qu' est ce la, ma tresdoulce amie ?
Qu' avez vous qui cy lamentez
Et qui si fort vous dementez
A vous meismes ?
DEUXIESME NONNE. Ha ! sire, le doulx roy haultismes
Me het, et il a bien raison,
Car male et mortel traison
Ly ay fait pour la vostre amour.
S' en cest estat fas plus demour,
Je suis perdue.
LE CHEVALIER. Egar ! conme estes esperdue,
Belle dame ! ou mains dites moy
Que vous avez, je vous em proy.
Il a bien trente ans, ce me semble,
Que nous assemblames ensemble ;
Onques mais je ne vous vi mettre
En tel meschief con vous voi estre,
N' en tel tristesce.
DEUXIESME NONNE. Vous souvient il de la promesse
Que vous fis pieça, sire doulx,
Quant premier deu venir a vous ?
Dites moy voir.
LE CHEVALIER. Oil, dame, par estouvoir,
Et que je musay par deux nuiz
Pour vous : ce me fu grant ennuiz
Certainement.
DEUXIESME NONNE. Dès lors ouvray je folement,
Mon seigneur, certes, ne doubtez ;
Vezci pour quoy. Or m' escoutez.
Ces deux nuiz, con je vous avoie
Convenant, je me mis a voie
De venir a vous, biau doulx sire,
Mais la mére Dieu contredire
Me vint ces deux jours le passage
Pour ce que j' avoie en usage
De lui saluer humblement,
Et l' avoie fait longuement.
Dont quant je cuiday la chappelle
Passer, l' ymage a la pucelle
Trouvay de l' autel descendue
Et encontre l' uis estendue ;
Lors contre lui me courrouçay,
Qu' a la tierce nuit ne daignay
Au passer saluer la dame ;
Et nonpourquant pour sauver m' ame
Se part de cy, se m' a semblé ;
A cuer de courrouz enflambé
M' a dit que se tost sanz demour
Ne laisse la mondaine amour
Et que d' elle servir me paine,
Jugie sui a le grief paine
D' enfer sanz fin.
LE CHEVALIER. Elle vous aime de cuer fin,
Dame, a ce que je puis veoir.
Par amour or me dites voir
Que vouldrez faire.
DEUXIESME NONNE. Mon treschier seigneur debonnaire,
Par aage avons bien passé nonne :
Pour Dieu, que je ressoie nonne ;
Car desoresmais vueil beter
Mon corps par penance et mater
Si que, se Dieu plaist, j' aquerray
L' amour de Dieu que perdu ay
Par ma folie.
LE CHEVALIER. Dame, grant dueil en moy s' alie
Quant ainsi laissier me voulez ;
Et nonpourquant vous le ferez,
Car a l' abbesse vous menray,
Qui est m' antain, et vous feray
Vostre paiz, ne vous doubtez mie.
Mais je vous dy bien, doulce amie,
Pour ce que pour m' amour yssistes
De cloistre et avec moy venistes,
Cloistrier pour vostre amour seray
Si tost qu' apaisié vous aray :
Telle est m' entente.
DEUXIESME NONNE. Sanz plus faire cy longue attente,
Sire, pour Dieu, alons bonne erre
A l' abbesse mercy requerre.
( Elle montre leurs enfants endormis )
A ces enfans bien revenrez
Et, s' il vous plaist, vous leur ferez
Bien, conme aux vostres.
LE CHEVALIER. Dame, je sçay bien qu' ilz sont nostres.
En la garde Dieu les lairay,
Car ja mais ne retourneray
Cy endroit pour biens que g' y aie.
La paour de Dieu trop m' esmaie,
Que griefment m' ame ne pugnisse
Pour les pechiez qu' ay faiz con nice.
Alons men tost, mouvez devant.
( Se tournant vers ses enfants endormis )
Mi enfant, a Dieu vous conmant
Qui vous soit pére.
( Ils partent pour l'abbaye. Les enfants se réveillent et cherchent leurs parents )
PREMIER FIL. Venez ça, ma dame ma mére.
Ma dame ! Egar ! respondez moy.
Ou est elle ? pas ne la voy,
Ne mon pére. Ou sont il alé ?
Je croy qu' ilz nous ont cy laissé.
Je me vueil lever ; si saray
Se ceens trouver les pourray.
Egar ! Je ne les treuve mie.
Haro ! doulce vierge Marie,
Ou est ma mére ?
DEUXIESME FIL. Qu' as tu, mon frére ? Est ce mon pére
Qui t' a batu ?
PREMIER FIL. Nanil, mais nous avons perdu
Ma mére ; je le te promet :
Je ne puis savoir ou elle est,
Ne mon pére ceens n' est pas.
Halas ! ma dame, halas ! halas !
Que ferons nous ?
DEUXIESME FIL. Halas ! ma dame, ou estes vous ?
Ma dame, venez a nous ça.
Egar ! elle n' est mie la.
Halas ! ma dame !
PREMIER FIL. Or te tais, mon frére, et par m' ame
Je te doinray ja une noiz.
Las ! encore po me congnoiz
Pour nous deux savoir gouverner,
Ne conment me doy demener,
N' en quel affaire.
( L'écuyer arrive au manoir )
L' ESCUIER. Enfans, qu' avez a ainsi braire
Entre vous deux ?
PREMIER FIL. Escuier, nous sommes touz seulz
Laissié ceens conme esperdu,
Car pére et mére avons perdu,
Si com me semble.
L' ESCUIER. Je vous menray touz deux ensemble
Chiez vostre oncle. Y voulez venir ?
De plourer vous faulra tenir
Se vous y maine.
DEUXIESME FIL. Quant g' i alay, l' autre sepmaine,
Il me donnit de son blanc pain
Et des pommes dedanz mon sain,
Se m' aist Diex.
L' ESCUIER. Tu diz voir. Or torche tes yex ;
Encore t' en donrra il ja.
Ne plourez plus vous deux, or ça ;
Avecques moy vous en venez.
Espoir que vous y trouverez
Vostre mére qui s' y dejeune,
Qui alée y est pour aucune
Besongne faire.
( L'écuyer s'éloigne, emmenant les enfants )

DIX-HUITIEME TABLEAU
( Dans la chapelle du couvent )
LE CHEVALIER. Belle seur, bien va nostre affaire.
Se Dieu plaist, je voy la l' abbesse
Et avec lui la prieuresse :
Alons a genouz devant lui.
( Ils avancent et s'agenouillent devant l'abbesse )
Chiére dame, je sui celui
Qui requier estre a merci pris
De ce que j' ay vers vous mespris.
Car de ceens fortrais la nonne
Que vous teniez a tant bonne,
Et li ay fait rompre son veu.
D' estre nommé vostre nepveu
Ne sui mais digne, bien le say,
Pour le grant pechié que fait ay ;
Nonpourquant je la vous ramaine,
Et vous requier, pour la haultaine
Amour qu' a nous monstra li roys
Des cieulx quant voult morir en croiz,
Qu' elle a mercy soit receue
Et des draps de ceens vestue
Aussi qu' autre foiz a esté ;
Et je vous jure en verité
Que se la voulez recevoir
Je devenray moine pour voir
Sanz demourée.
DEUXIESME NONNE. Conme honteuse et esgarée,
Ma dame, merci vous requier
Et desoresmais je ne quier
A vivre que d' yaue et de pain ;
C' est droiz, car onques mais nonnain
Ne meffist tant.
( L'abbesse reste muette )
PREMIéRE NONNE. Dame, soiez leur respondant
Aucune chose ; mot ne dites,
Ce meffait leur soit clamez quittes,
S' il vous agrée.
L' ABBESSE. Il me font si estre esplourée
Que le cuer en lermes me font,
Pour la grant pitié qu' il me font,
Combien qu' a Dieu ont trop forfait.
Niez, puis que de vostre meffait
Vous repentez, et vous, m' amie,
Je ne vous refuseray mie
Pardon que vous me demandez,
Mais que voz viez amendez
Et que vous chastiez voz corps ;
Car Diex est plus misericors
Que pechier ne pouons d' assez.
Or pensez qu' en vous amassez
Planté de vertuz par bonne euvre,
Car il ne fault pas qui recuevre,
N' en doubtez, non.
LE CHEVALIER. Ma belle ante, ce ne fait mon ;
Et pour ce que g' y puisse entendre,
Je me vois moine cloistrier rendre.
A Dieu vous dy.
( Il se retire )
PREMIéRE NONNE. Dame, certainement vezci
Euvre de Dieu. Il y pert bien,
Quant tout son avoir terrien
Veult delaissier ce chevalier
Pour devenir moine cloistrier
Et pour bien faire.
L' ABBESSE. C' est voirs, m' amie debonnaire,
Car il a esté trop mondains ;
Et si ne prise je pas mains
De notre suer la repentance,
Si que pour loer la puissance
De Dieu de cy nous en irons
Ou de nouvel la vestirons
De nostre habit, c' est bien droiture ;
Et en alant mettrons no cure
De bien chanter pour ces vertuz :
Veni, creator spiritus.
( Les trois religieuses quittent la chapelle en chantant )
Explicit.