UNIVERSITÉ D'OTTAWA Faculté des Arts

Laboratoire de français ancien

Rosarius, Miracle III


MIRACLE III (livre1, chapitre 25)

 
6 v° b
De l'escolier qui aloit au bordel, retrait par les merites Nostre Dame.
7 v° a
A Paris ot un escolier.
La sont clerc pour estudier,
Assamblé de diverse terre
Pour sens et science aquerre.
Molt en y a qui leur tans perdent 5
Et as delis mauvés s'aherdent,
Et qui vieut du tout entendre
Petit ou nient puet aprendre.
Les delis charnex doit fuir
Qui vieut science aconsuir. 10
Ele n'areste point en ciaus
Qui lopinent les bons morciaus
Ne qui boivent vin de garnache;
Trop fort est que tiex clers rien sache.
Ne ne faut pas que cil soit ivre 15
Qui vieut estudier en livre,
L'entendement faut qu'aist delivre;
Boive a mesure et a livre,
Quar ce qui est fait par mesure
Bien est fait et por ce plus dure. 20
Escolier vive sobrement
Se vieut savoir l'entendement
De la divine escripture;
De personne gloute n'a cure.
Escolier boive pou de vin, 25
S'avera plus agu engin.
[S]'il en boit trop et a outrage,
[F]ort est que il soit ja sage.
Fort est qu'a estude se doigne
Clerc ou autre qui est ivrongne. 30
[S]e tu vieus aquerre science,
Purge premiers ta conscience.
Ainsi le fist cest escolier.
Il aloit souvent au monstier,
A l'eglise de Nostre Dame, 35
Pour le salut prioit de s'ame,
Qu'ele le vousist adrecier
Si comme il estoit mestier,
En estat metre profitable
[E]t qui li estoit plus plaisable. 40
[Sou]vent l'eglise visitoit
7 v° b
Et molt de larmes i getoit;
Presque tous les jours a l'eglise
Aloit, tele estoit sa guise.
Tel guise fait bien a loer. 45
Au monstier va pour Dieu loer,
Non pour trufer, non pour gengler
- C'est son tans perdre et embler.
Quant tu iez mis en oroison,
Geter dois larmes a foison; 50
Quar oroison Jhesu Crist oint
Quant larme i est, ele le point.
Anesse pointe va plus tot
Et personne quant pleure, Diex l'ost.
Oroison est molt bonne afaire, 55
Par lui nous poons a Dieu plaire.
Jhesu Crist commanda priere
Et si nous monstra la maniere.
8 v° b
Cest escolier souvent ouroit
La pucele virge Marie, 60
Et pour ce de sa courtoisie
De corruption le gardoit.
Mes Sathanas, qui grain ne dort,
Qu'aucune fois nomme le tort,
Li envoie temptacion 65
De charnele corruption.
Molt l'a tempté li anemis,
A pou que n'est a pechié mis.
Son chemin s'en va et sa voie,
Merveilleusement se forvoie. 70
A l'anemi fera grant joie
Se ne l'ajust dame Maroie.
Par l'endit d'un sien compaignon
Et par le souf du mau gaignon
Est cheü en male brerele 75
Se ne l'en garde la pucele
Qui par jour et par nuit ceus garde
Qui se conmandent a sa garde.
Ome garde, pucele Marie,
Que ne chiee en tele furie. 80
Furie bien est dite luxure
Quant sans fraing est et sans mesure.
Je te pri que de tel ordure
N'ait ta discrecion cure.
9 r°a
Cis chiet en grant mal aventure
Qui pour ce laisse vie pure.
Le temptement fort bien endure!
Se ribaus ies, c'est grant laidure.
Fi, fi, fi, fi de tel merdaile!
Com cul de perdris ou de quaile 90
Puent. Mains valent ne fait paile.
Bon est qu'au bordel point je n'aile.
Cis qui a le frain de raison
Perdu, quant vint devant la meson,
Ne pout aler avant n'arriere. 95
Qui a ce fait? La Jhesu mere.
Comme montaigne ne se muet,
Autre chose faire ne puet.
Ne vole pas si bien com puce,
Mes ne se muet com sainte Luce. 100
Quant voit que Diex ainsi le tient,
Il a son cuer tantost revient
Et aferme en son courage
Que ne fera point cel folage.
Folage est trop grant tel voité, 105
Mez outrageuse iniquité.
Tort fait a autrui et a soy
Et si fait contre la Dieu loy.
Diex vieut bien que on en ait une,
Mes il deffent fame commune. 110
Fort est que te puisses chevir
Se tel fumier vieus ensievir.
Fumier est tel fame apelee,
Souvent en ist maise fumee;
Plain de pueur est cest fumier, 115
Pour ce le dois tu eschiver.
Chascun doit estre en grant effroy
Quant li souvient de ce grant roy
Qui jugera bons et mauvais,
Prestres, clers, nobles et lais, 120
Chardinaus et pape de Romme.
Que fera l'asne a tout sa somme?
Buerf [l. Buer] fu né qui sera preudomme
Trouvé, soit fame, soit homme.
Quant a promis nostre escolier 125
Que ne fera point tel mestier,
Mez plus il a dit a Marie:
«Je voy que il ne te plait mie
Que fole fame me conchie.
A t'esglise, ma chiere amie, 130
Irai de cuer, sans fiction.
Gardé m'as de corruption
Et je te fais promission
Par grant deliberacion:
D'or en avant me garderay 135
Et en tel lieu jamais n'iray.»
Adonc se muet legierement,
A l'eglise devotement
Va; Dieu et sa mere mercie
Et sa promesse point n'oublie. 140
Aprés ce en l'ordre se mist
Des prescheurs; la son pourfist fist,
La servi Dieu et Nostre Dame,
Qui sauvé li eut cors et ame.


Page d'accueil


Dernière mise à jour : 08.11.1999
Pour toute question au sujet de ce site, veuillez vous adresser à :
E-maillabo@francaisancien.net