UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XXXV
MIRACLE XXXV (livre 2, chapitre 19)
172 v° b
[D]u moigne a cui Nostre Dame monstra le [cr]ucefis senglant et par ce il fu
recon[f]orté et garis de sa maladie.
174 v° a
En Engleterre un frere estoit
Qui maladie grief avoit.
Point ne demouroit de complie.
Ceus d'orendroit ce ne font mie,
Qui a petite achoison 5
Lessent a estre en oroison.
En nule guise ne demeure
De complie, quar c'est une heure
Ou maintes fois la bele dame
174 v° b
S'est monstree en cors et en ame 10
A ceus qui li devotement
Saluent et joieusement.
A homme qui murmure et grouce
Point ne s'apert la bele rouce.
S'a l'esglise iés, grain ne murmure; 15
De ceus qui murmurent n' a cure.
Qui tout en pacience porte,
A tel gent son fil ele aporte.
En lui servir bien te deporte
Se vieus entrer du ciel la porte. 20
A une complie avint
Que ciz freres malades vint.
Avec les autres chante miex
Qu'il puet; molt bien l'oit Damediex.
Il oit miex ceus qui de cuer prient 25
Que ceus qui a haute vois crient,
N'en haute vois n'exauce mie
Dame Diex ce que on li prie.
Viex tu ta priere oie Diex?
Aies le cuer net et piteus. 30
Ne Diex ne la bele Marie
Cuer qui est plain de felenie
Ne orront ne exauceront.
Pecheeurs donques que feront?
Amendent soy de leur folie, 35
Si les orront Diex et Marie.
Que que saluoient la pucele
Par l'anthene qui tant est bele
Salve regina misericordie
-Tu maintenant trouble a [l. as] fait lié -
Quant li souvient de sa pitié 40
Et de sa grant misericorde
Qui les pecheurs souvent racorde,
De cuer devot li a prié
Qu'ele le weille faire lié
Et sa maladie oster. 45
[...]
Ravis est tost en esperit.
Or oiés que la dame fist:
Son fil en la crois li demonstre
Et tout ensanglanté li monstre 50
Et li a dit: «Ici regarde
Et a ces plaies te pren garde
Que mon fil a pour toy souffert.
175 r° a
En la crois c'est [l. s'est] pour toy offert,
Que en pacience tout portes 55
Ne de rien ne te desconfortes.
Il est a mort habandonné
Et t'a examplaire donné
Que ne perçeus ne negligent
Soies, mes sueffres doucement; 60
S'aras la coronne de vie.»
Plus: la piteuse Marie
L'a gari de sa maladie.
La vision evanuie,
Graces rendi a la grant dame 65
Qui sauvé li a cors et ame
Et au vrai Dieu, le dous seigneur;
Plus devot devint et meilleur.
Pour toute question au sujet de ce site, veuillez vous adresser à :
labo@francaisancien.net