UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XXXVIII
MIRACLE XXXVIII (livre 2, chapitre 22)
184 v° b
De la fame qui par les merites Nostre Dame mit hors de soy trois pierres et puis enfanta.
186 v° a
Une vile a en Soissonnois,
Chiele a non, pres est d'un bois;
Possession de saint Gervais
Est de l'esglise et saint Prothais.
Grant rente i a la dicte esglise, 5
Si comme Hues le devise.
En cele vile out une fame
Qui quant au cors et quant a l'ame
Out a ssouffrir molt longuement.
Trois septmainnes entierement 10
Pour avoir enfant traveilla;
Petit dormi, assez weilla.
En doulereuse sepmainne entre
Fame quant li emfle le ventre
Et chose fait a merveillier 15
Comment avec homme couchier
Oze fame aprés tel [douleur];
Molt est grant, ce dit le Sauveur.
186 v° b
Non l'angoisse, mes le delit pense;
Pour ce sueffre a remplir sa pance, 20
Quar s'a l'angoisse bien pensoit,
Fame ja ne se marieroit:
Jheronimus. Mulier presencia cupit imme-
mor futurorum.
Volenté de fame n'est droite:
«Ce qu'el voit en present convoite;
Que li avint l'autre sepmainne 25
De remenbrer point ne se painne.»
Fame le temps futur dispense
Si com ostruce a ses uez pense.
La bonne dame traveilloit
Et grant angoisse soustenoit 30
Et estoit en peril de mort:
L'enfant ne puet venir a port.
Conseil i metera la dame,
Que ne muire la bonne fame.
Les voisinnes amonnestee 35
L'ont et a ce enhortee
Que promete aler nus piez
A Soissons, a la glorieuse,
Pour ce qu'elle li soit piteuse.
Combien que ce li fust molt griés, 40
Ele i ala a painne grant
Et la tantost ele eut enfant.
Mes merveilleuse fu la guise;
Li livres [ . . ] a devise.
Trois pierres a devant getees, 45
En tele [fourme] amesurees:
L'une a un oef d'oue sambloit,
L'autre a geline, l'autre a nois.
Issi li sont par[ . . ] dois.
Aprés ce li enfes issoit; 50
Baptesme eut, mes courte vie.
Cest bien li procura Marie.
Pucele, pren donc de toy garde
Et ta fragilité regarde,
Que ne te metes en la main 55
Ne de gentil ne de villain.
Tu te mes en trop grant servage
Quant tu te mes en mariage;
Trop plus y a assez mesaises
Que il n'i a soulas ne aises. 60
187 r° a
Li homs aussi que fame mainne
Jamés il ne sera sans painne
Ne sans tençon ne sans riote;
Descordant ara souvent note
Se fame n'a de son acort. 65
Souvent ont ensamble descort
Et li gentil et li villain,
Couroucié au soir et au main.
Pour toute question au sujet de ce site, veuillez vous adresser à :
labo@francaisancien.net