UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XLI
MIRACLE XLI (livre 2, chapitre 26)
194 v° b
Pour quel cause on dit Salve regina misericordie aprés complie en l'ordre des
freres preescheurs.
197 r° a
Sathenas, qui est envieus
Contre les bons et ennuieus,
Neïs a Damedieu le roy,
Qui a Moÿse escrit la loy,
En la crois ennui li vint faire, 5
A nos freres molt fu contraire
Au conmencement de nostre ordre;
Molt s'efforça d'eus poindre et mordre,
Especiaument a Paris
Et a Bonvoigne. Esbaris 10
Li frere souvent estoient:
Dyable trouble grief leur faisoient;
Et quant il dorment et quant veillent,
Anemi griement les traveillent.
Autre que n'ont selonc nature 15
Prenoient fourme et figure.
Quatruple fourme, triple et double
Ont pris pour faire as freres trouble:
A l'un en guise de fournaise
Ardant se monstrent pour mesaize 20
Donner a ceus qui les veoient;
Les freres souvent desreoient.
A l'autre en figure se monstre
D'asne cornu, l'orrible monstre.
L'autre a de serpent figure. 25
En chascun monstre sa laidure.
[...] figure de fame:
197 r° b
Bele est la fourme et gracieus[e]
Et samble bien delicieuse,
Tout pour decevoir d'omme [l'ame]. 30
Li autre batu et rouilé
Des dyables sont mal aouil[é].
Tant affliction leur faisoien[t]
Que li frere constraint estoient
Les uns sus les dormans v[eiller] 35
Pour eulz des anemis g[arder].
Tant eurent horreur et fant[ome]
Que le veoir est grant abome.
Aucun cheoient en frenesie,
Li autre en grief maladie. 40
Li frere, com mal a tourné,
A Nostre Dame sont tourné
Com a leur patrone et mere,
Qu'el les sequeure en leur mi[sere].
La prient molt devotement 45
Qu'el les voie piteusement;
Ele est vaillant et le puet fair[e],
Voulans, piteuse et debonna[ire].
Establi ont qu'aprés complie
[...] 50
[...]
Le couvent sollempnelment
En chantant a procession
Et en humble devocion
Salve regina misericordie . 55
A bon apouail sont apuié,
Non a rosel ne a aronde,
Mes a la dame du monde
Qui faire leur puet leur vouloir
Mes que il facent leur devoir. 60
Concedé nos fu l'oroison.
Devocion ont a foison.
Tantost ce fait, s'en sont fui
Dyable, fantosme esvanui.
Curé sont li frere malade 65
Par les merites de la sade.
La sade, c'est la glorieuse;
Plus que mauve est precieuse
Marie, ma dame, ma mie,
Ma vie sans felenie. 70
Je li prie que son aïe
Ele ne me refuse mie.
[...]
197 v° a
Que dyables molt tourmentoit,
A Paris uns de son sens hors, 75
Que molt vexoit li cruez tors,
Freres et filz estoit de roy;
En lui n'avoit ne sens ne loy.
Garis les a dame Marie
De leur cruele maladie. 80
Vois tu donc comment nostre mauve
De plurieurs cors et ame sauve?
En meilleur prosperité l'ordre
Fu puis que la laissa a mordre
Dyables, qui homme mist a mort 85
Pour ce que la pomme avoit mort.
A la dicte procession
Ou maint frere out devocion,
Qui encore se continue
Ne ne croy point que ja se mue, 90
La dame du ciel descendue
Est et des freres veüe.
Et quant ce devot pas chantoient
Li frere et bas s'enclinoient,
O pia, o dulcis Maria , 95
Ele esté veüe i a:
Avec les freres s'enclinoit,
Aprés ou ciel s'en retournoit
Quant li couvens se departoit,
El sa beneisson leur donnoit. 100
Li devot frere qui ce virent
As autres freres puis le dirent.
La dame donques honnourer
Devons et de cuer aourer,
Quar qui de devot cuer la sert 105
Perpetuel louier dessert.
O, loons donc dame Marie
A ce qu'aions sa compaignie!
Pour toute question au sujet de ce site, veuillez vous adresser à :
labo@francaisancien.net