UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XLII
MIRACLE XLII (livre 2, chapitre 28)
204 v° a
De l'enfant que Nostre dame garda en son bersuel, que il ne fust ars, la meson ou il
estoit arse.
206 v° b
J'oi dire que fu une fame,
Veve estoit la noble dame,
Un fil avoit tant seulement
En berseil. La li feus se prent
Et toute la maison ardoit. 5
Hors l'enfant trahire on ne p[ooit].
Ele refuit a la pucele
Qui u bersueil, de sa mamele,
Nourri Jhesum, j'entens Marie;
De cuer li requist son aïe. 10
Veu li a fait tout erraument,
En depriant devotement,
Que se son chier fil li sauvoit,
Chascun an ele juneroit,
Sa vegile, en yaue et en pain, 15
Mes qu'avoir puist son fil tout sa[in],
Et un pain aussi de cire
A la dame et a Nostre Sire,
La veille de l'Assumpcion,
Offerroit par devocion, 20
Chascun an, par toute sa vie,
207 r° a
Mes qu'a l'enfant fust en aÿe.
La piteuse, la douce Marie
L'enfant ou biers n'oublia mie:
Toute fu arse la maison, 25
Trouvé fu l'enfant sans blessure
Ne n'i seut nus trouver reson
Fors que la dame eut de li cure.
La dame son veu a paié,
Quar Marie li a aidié. 30
Ton veu dois acomplir et faire
Et de jeuner ou de porter haire
Ou, se tu fais autre promesse,
D'aumosne faire ou d'oïr messe,
Paier le dois, que Damediex 35
Un'autre fois te face miex.
Veu ne fai nul s'il ne te plaist,
Mes paier le faut quant est fait
Ou querir dispensacion
Se grieve est l'obligacion 40
Ou se fait sans discrecion
Le veu est et la promission.
Voer est chose perileuse,
Combien qu'ele soit vertueuse;
Promesse ne fait nul s'il ne vieut, 45
Mes tiex la fait qui puis s'en dieut.
Pour ce ne fay veu sans conseil:
Miex te vaurroit a crever l'ueil
Que s'as fait veu que ne le paies,
Mes que tu le povoir en aies. 50
Se ne pues, dispensacion
Tu quier ou relaxacion!
Qui a Dieu ne paie son veu,
Autant vaut com s'il li disoit «beu».
Li enfes crust et grans devint. 55
Une aventure li ravint,
Qu'en la maison ou demouroit
Li feus si prist, forment ardoit.
Li et un autre entrerent ens
Pour mettre hors ce de dedens. 60
Une huge avoit ou celier;
Hors s'efforcerent du sachier.
Un traib ardant cheï sur lui,
Qui fait leur a molt grant ennuy.
Fouy s'en est tost ses compains 65
207 r° b
Et ciz a petit n'est estains.
Il est demourez ou celier.
La dame commence a prier
Secourir li veulle et aidier.
La mere prinst fort a crier 70
Et deprie la bele dame
Qu'a son fil gart et cors et ame.
Son veu qu'a fait fort ramento[it]
Et promet qu'adez le paieroit.
La meson fu arse et brulee. 75
Ou celier est la gent entree
Pour l'enfant mettre et sachi[er hors];
Molt se doutoient ne fust mors.
L'enfant trouverent en tel point
Que fourme n'i apperoit point 80
De homme. La mere brait et cri[e]
Et regrete sainte Marie.
Molt cuiderent que il fust mort.
La mere fu a desconfort,
Mes tant pria dame Marie 85
Qu'ele monstré ly a s'aïe.
Par les oroisons de la mere,
Qu'a faites a la debonnaire,
Premiers a souspirer prist;
Joie eut la mere quant ce vit. 90
Puis est sa char renouvelee
Et bien et bele toute sanee.
Ciz garis fu parfaitement;
Dieu en loerent grandement.
Un autre miracle il y a 95
Que fist la bele Maria .
Quar quant le dit celier ardoit,
La cire dont la dame fesoit
Chascun an son offrande a Die[u]
Mise sus un traib en un lieu 100
Estoit par especialité;
Ciz a cui ce avint pour vrité
Dit la cire arse ne fu mie
Par les merites de Marie.
Le traib fu ars dusqu'a la cire, 105
Grain le feu la cire n'empire.
Tout ce a procuré Marie,
Qui gart hui ceste compaignie
De perillieus feu et d'arsure
207 v° a
Et d'autre grief mal aventure. 110
Ciz, pour la grace especial
Que li ont fait Dieu et Marie,
Son estat mua et sa vie:
Chevalier fu de l'Hospital.
Pour toute question au sujet de ce site, veuillez vous adresser à :
labo@francaisancien.net