UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XLIX
MIRACLE XLIX (livre 2, chapitre 41)
226 v° a
De Nostre Dame, qui dessous son mantel gardoit par especial les freres prescheurs.
238 v° b
Saint Dominiques fu preudons,
Du Saint-Esprit eut les .vii. dons,
Molt ama charité et pais,
En aucuns trouvons de ses fais.
Une fois dusques a mie nuit 5
Weillié, ouré eut en l'esglise;
C'estoit sa coustume et sa guise,
En ce prenoit molt grant deduit.
Monta ou li frere dormoient,
Aprés labeur se reposoient; 10
De dortoer s'en va a un chief,
A ourer se met de rechief.
Quant il eut fait ce que queroit
Et pour coy la montez estoit,
A l'autre chief a resgardé: 15
La voit trois dames de par Dé,
Qui toutes trois estoient tres beles,
Vierges et netes puceles.
Cele qui en mi lieu estoit
Reverent matrone apparoit; 20
Des autres iert plus gracieuse
Et apparoit plus merveilleuse.
Un vessiau tient une des deus,
Resplendissant et prec[ieus];
L'autre aspersorium portoit 25
Et a la dame le bailloit.
Molt sembloit bien noble personne.
De l'yaue benoite as freres donne,
239 r° a
Puis les seigne benignement;
Faire ne saroit autrement. 30
Un frere i eut que trespassa
Quant par devant son lit passa:
Yaue ne li donne ne crois fait;
Aucune chose avoit meffait.
Saint Dominiques bien prent garde 35
Que cele point ne le regarde,
Note qui puet estre le frere
A cui n'a pas fait bele chiere.
Li sains se lieve d'oroison,
Contreval s'en va la maison. 40
Les trois dames a encontrees;
Devant la lampe arrestees
Sont. Aus piez chiet de la pucele
Qui sambloit plus noble et plus bele,
Et hunblement li requeroit 45
Qu'ele li deist cui elle estoit;
Nequedent bien la quenoissoit,
A sa maniere bien la voit.
En ce temps l'antenne tant bele
La quele Salve on apele, 50
A Romme point n'estoit chantee,
Mes en lisant estoit contee
A genuflection devote,
Mes point ne disoient la note
Ne frere ne suer en couvent, 55
Combien que la deissent souvent.
Le saint homme a bien entendu
La dame et li a respondu;
Et la pucele Marion,
En cui il sont protection: 60
«Je sui cele que tous les jours
Apelez en vostre secours.»
Li frere ont souvent grant estours,
Mes Dieu leur est refuge et tours.
Encor adjouta Maria: 65
«Quar quant vous dites eya
Ergo, advocata nostra,
Devant mon filz ge m'agenoille
Et procure vostre besoingne,
Conservacion de ceste ordre.» 70
Molt temptent de luy poindre et mordre;
Mes mort seront de male mort
239 r° b
Qui mordre la weulent a tort.
De mon temps de male mort po[int]
Sont aucuns que ne nomme poi[nt]. 75
Bonne chose est de garder pais
Et entre clers et entre lais,
Quar au jour d'ui qui voir vieut [dire],
On dit qu'il ne fait que mesdire;
Voir disant sont dit mesdisan[t], 80
Bien ce voient nostre païsant.
Dominiques, que que parloit
A la dame, li demandoit
Qui celes de sa compaignie
Sont. Respondu li a Marie: 85
«L'une est la vierge Cecile,
Qui ne seut ne barat ne guile,
Et l'autre si est Katherine,
Qui fu vierge sainte et enterine.»
Demandé li a derechief 90
Pour quel cause et pour quel mesch[ief]
Ce frere n'a arrousé mie.
Li respont la bele Marie:
«Il ne s'est pas por[té] honnestement.»
Cy aprés vous orrez comment. 95
Quant partout eut l'yaue donnee,
La dame ou ciel est retournee.
Dominiques retourne e[...]
En cel lieu ou estoit devant.
En oroysons tost est ravis 100
A Dieu et si li est avis
Dieu et Marie regardoit,
Qui a sa destre se seoit.
Et d'une chape estoit vestue
De couleur de saphir la drue. 105
Drue vaut autant comme amie,
Par coy j'enten dame Marie.
Dominiques, qui tout ce regarde,
De maintes choses se prent ga[rde].
Devant, derriere et environ 110
Ne vist ne fame ne virum
Qui de sa religion soit.
Des autres toutes il y avoit
Aucuns, aucunes, hommes, fame[s],
Desquiex estoient sauvez les am[es]. 115
A plourer commence trop fort;
239 v° a
Sembloit qu'il fust navrez a mort.
Loing se tient de Dieu, de Marie;
Euz aprochier il n'ose mie.
[L]a dame de la main li guigne 120
Qu'il aproche d'eulz et pres vigne.
Aprochier n'ose de la bele
Ne de Dieu, tant que Dieus l'apele;
Puis vient, a leur piez chiet humblement
Et pleure molt amerement. 125
Damedieu si le fist lever
Et cis ne cesse de plourer.
Diex li demande sans demeure
Pourcoy si amerement pleure.
Cil qui grant douleur au cuer ot, 130
Si li a respondu tantost:
«De toutes religion et ordre
Je voy ici ester par ordre
Aucuns, aucunes, des miens nus.
Je ne scé qu'il sont devenus. 135
- Vieus tu veoir ta religion?
Dist Jhesus, le filz Marion. -
Oïl, dist il, molt grant vouloir
En ai et ou sont de savoir.»
Adonc Jhesus a mis sa main 140
Sus l'espaule de la pucele
Et li a dit: «Vois tu la bele?
Tu ne scez qu'a dedens son sain.
Mes a certes vieus tu veoir
Ton ordre et savoir le voir? 145
- Oïl, dist il, biau sire Diex,
Je vous [pri] que voient mes iex
Que devenu sont mi frere.»
Adonc sa glorieuse mere
Sa chape lieve apertement, 150
Estendue l'a lieement,
La quiex chape si grant estoit
Que a Dominique sembloit
Que tout paradis deust comprendre.
Molt fu soigneus a ce entendre. 155
Multitude copieuse,
Sous la chape la glorieuse,
Des freres Dominique estoit,
Que la bele Marie gardoit.
Quant li sains homs a ce veü, 160
239 v° b
As piez dame Dieu est cheü;
Graces a Dieu et a Marie
Rendi de ceste courtoisie.
Je te pri, dame, sous ta chape
Me met, que Sathan ne me hape, 165
Qui n'entent mes qu'a nous haper.
Preus est qui li puet eschaper.
Maintes personnes il atrape,
Li quiex, s'estoient sous ta chape,
Il ne les pourroit atraper 170
Ne en ta presence haper.
De toute male haperie
Nous deffende dame Marie!
Cele vision departie,
Que li sains homs vist de Marie 175
Et de Dieu, a soy revenus
Est. Rien de ce ne savoit nus.
Tantost matines sont sonnees,
Les queles dites et finees,
Les freres apele en chapitre; 180
D'eus apeler avoit bon titre.
Il leur a fait un grant sermon
Ediffiant et bel et bon,
Et leur conte la vision
Si com estoit, sans fiction. 185
Molt leur amonneste et prie
Qu'il honneurent dame Marie
Et l'aient en grant reverence,
Servent de pure conscience;
Quar la pure, la bele Marie 190
Vieut estre purement servie.
El n'a cure de fiction,
De vilz ne d'orde entencion
El n'a cure de renardie
Ne d'aparance qui n'est mie. 195
Le frere non aspers de Marie,
Il a apelé a partie
Et l'amonneste doucement
Que li die vritablement
Se en sa conscience enclose 200
Il a aucune male chose
Pour coy seigniez il ne fu mie,
Com li autre, de dame Marie.
De ses pechiés toute la somme
240 r° a
Ciz freres avoit au saint homme, 205
Par confession general, dist;
A son povoir rien ne mucit.
Humblement respondi le frere
A Dominique, le saint pere,
Qu'en conscience ne savoit 210
Rien, mes que tant y avoit
Quant s'esveilla soy trouva nu;
D'aventure li est avenu.
Pour cause de ceste aventure,
Une ordenance fist meüre 215
Qu'en tous lieus ou gisent li frere,
Que il tiegnent ceste maniere
Que en chauces gisent et ceint,
Non pas fort, mes petit estraint,
Que le coteron puist tenir, 220
Que du cors hors ne puist issir.
Li preudons ceste vision
As suers de sa religion,
De saint Sixte, a racontee;
Molt volentiers l'ont escoutee. 225
Li preudons pas ne se nommoit,
Mes si com d'un autre parloit.
Cure n'avoit de vainne gloire;
C'est un mauvés buvrage a boire:
Ne papelart ne glorieus 230
Ja ne monteront es sains ciels.
La gloire soit a Jhesu Crist,
Qui tele grace au monde fist
Qui nostre humanité volt prendre
En Marie, la virge tendre. 235
Pour toute question au sujet de ce site, veuillez vous adresser à :
labo@francaisancien.net