UNIVERSITÉ D'OTTAWA Faculté des Arts

Laboratoire de français ancien

Rosarius, Miracle LII


MIRACLE LII (livre 2, chapitre 46)

 
266 r° b
De Nostre Dame, qui par trois [en]fans innocens fist lever les [co]lumpnes en son esglise.
262 r° b
Li grans Costentins une esglise
Qui fu de merveilleuse guise
Fist jadis, bele et gracieuse,
A l'onneur de la glorieuse.
Columpnes grans la amenees 5
Furent; mes estre haut levees
Ne pourent onques par nul art.
Non pas que li ouvrier fetart
Fussent, mes fors et vertueus.
Le deffaut n'estoit pas en eus, 10
Mes Diex ce souffroit pour gregnie[ur]
Miracle apparoir a l'onneur
De la vierge, dame Marie,
Qui, quant Dieu plaist, monstre s'aïe;
Quant li plait, les fors asbomit 15
[Et li] floives el enforcist.

262 v° a

Des columpnes en droit lieu mettre
S'efforcent li ouvrier et maistre,
Mais en vain; faire ne pueent rien.
Chascuns si s'en merveille bien. 20
Les columpnes molt grandes furent
Ne en haut lever ne les peurent,
Combien qu'il meïssent grant painne
Et sachassent a grant alainne.
La dame en cui tout confort 25
Est trouvé et qui grain ne dort,
Qui a conforter s'estudie
Ceus qui pour lui en agonie
Sont, au maistre ouvrier se demonstra
En vision et li monstra 30
Comment les columpnes pourroit
Eslever et mettre a leur droit.
«A l'escole, dit elle, iras
Et trois effans tu esliras
Qui soient pur, net, innocent. 35
Si troy feront plus que homme cent.»
Les columpnes ont haut levees,
Les vertus la dame monstrees.
Ce que ne peurent plusieurs faire,
Par la vertu la debonnaire 40
Ont fait li troi petit enfant.
Tenu fu le miracle a grant.
Qui est si nices qui ne doie
Honnourer la bele Maroie,
Qui as innocens donne force 45
Et des grans loudiers ne fait force?
Enfant la doivent honnourer,
Amer, chierir et aourer
Et li et son fil Jhesu Crist.


Page d'accueil


Dernière mise à jour : 08.11.1999
Pour toute question au sujet de ce site, veuillez vous adresser à :
E-maillabo@francaisancien.net