retour

UNIVERSITÉ D'OTTAWA Faculté des Arts

Laboratoire de français ancien

Jean Miélot, Miracles de Nostre Dame, XXIII, ms. BNF fr. 9199

D'ung jeusne filz qui fut donné de sa mere au dyable a l'heure de sa concepcion et depuis delivrés des mains du dyable par l'ayde de la vierge Marie.

        Ung noble homme et une noble dame conjoincs ensemble par mariaige, qui furent riches et puissans, vesquirent longuement ensamble en faisant adez bonnes oeuvres et eurent de beaulx enfans.
        Advint qu'ilz proposerent une fois d'un commun accord de vivre chastement des lors en avant pour l'amour de Dieu; ainsi le feirent longuement si comme ilz l'eurent proposé. Mais aulcun temps aprez, par temptacion du dyable, qui tousjours a doeil et envie des bonnes oeuvres que les gens font, l'homme fut tellement tempté, en une nuit de Pasques, de la concupiscence charnelle que souffrir ne s'en povoit, si comme il lui sembloit. Il requist sa femme de faire celle oeuvre. Elle lui pria, le plus doulcement qu'elle poult, qu'il s'en voulsist cesser et qu'il voulsist considerer ce qu'ilz s'en estoyent longuement tenuz et comment il estoit si haulte nuit et si solempnelle; mais, certes, ses remonstrances n'y valurent ne ses prieres, tant fut son homme eschauffé. Quant la dame veit que faire lui couvenoit le plaisir de son mary, elle fut tant courrouciee que plus ne povoit, si qu'elle dist par grant yre et felonnie que, s'elle concepvoit a celle fois, qu'elle donnoit son fruit au dyable.
        Toutesvoyes il advint qu'elle conceupt voirement et qu'elle enfanta ung beau filz et a bon terme. Le filz creut et amenda et fut ung tres bel enfant et de bon ensengnement. Quant vint que l'enfant eut .xii. ans d'eaige, le dyable s'apparut ung jour a sa mere et lui dist qu'elle fust appareillee, au chief de trois ans aprés, de lui delivrer son enfant, aisni comme elle lui avoit promis et donné quant elle le conceupt.
        Oncques puis celle vision la dame n'eust joye a son coeur; tousjours pleuroit et gemissoit; con plus son filz regardoit, de tant plus elle ploroit. L'enfant, qui avoit grant merveilles de veoir sa mere ainsi plourer sans remede, lui demanda une fois pour quoy ele demenoit si grant doeul et si grant doleur. La mere ne lui voult pas si tost dire, ains differa longuement a lui en dire la verité; mais finablement, a l'instance et priere de son filz, elle lui racompta comment elle l'avoit donné au dyable a l'heure qu'elle le conceupt et comment le dyable lui estoit venu repeter.
         Le jeusne filz, qui fu bien esbahy, non pas sans cause, ne cessa oncques puis de demander conseil aux plus saiges clercs qu'il povoit trouver, pour savoir quel remede il pourroit trouver en son affaire; mais il ne trouva homme en leur pays qui l'en sceust conseillier a son gré. A Romme s'en ala; mais il n'y trouva aussi homme qui l'eust sceu conseillier.
         Finablement il s'en ala en Jherusalem et recita tout son cas a ung evesque que il trouva. L'evesque lui conseilla qu'il alast en ung desert qu'il lui enseigna, la ou ung saint homme demouroit et qui estoit de si sainte vie que les angels de paradis lui apportoyent chascun jour ung pain blanc comme nesge pour sa refection, et ne mengoit aultre chose. Or doncques, pour ce que cest evesque estoit bien famillier a ce saint homme, il bailla certaines enseignes au jeusne homme, adfin que le saint homme l'eust plus pour recommandé.
         Le jeusne filz s'en ala tout seul au desert. Et advint, ainsi comme il aproucha l'ermitaige du saint homme, l'ange apporta, ce jour, deux pains blans au saint homme; par quoy le saint homme pensa que, ce jour, lui viendroit ung oste. Il en rendit a Dieu graces et louanges.
          Ung pou aprez le jeusne homme se vint apparoir devant le saint homme et bailla les lettres que lui avoit baillees l'evesque de Jherusalem. Quant le saint homme eust les lettres veues, il conseilla au jeusne homme qu'il se retournaist de tout son povoir a deprier la glorieuse vierge Marie, mere de Dieu, qui a la puissance sur tous malvais esperis et qui les peult despoullier de leur proye. «Tant qu'est a moy, dist il, j'en prieray toute ceste nuit sans cesser».
          Ne tarda gaires aprés quant ilz se mirent tous deux en devotes prieres et oroisons, prians la vierge Marie, comme a la mere de pitié et de misericorde, qu'elle voulsist avoir pitié du jeusne filz.
          Or estoit il lendemain le jour et le terme que le dyable a son compte devoit avoir celle proye, et estoit le jour de Pasques. Le saint homme se leva bien matin et commencha a celebrer sa messe pour la delivrance du jeusne filz. Ce fist il en larmes et en pleurs, le plus devotement qu'il poult. Il mist l'enfant entre luy et l'autel, pour ce que l'enfant estoit en doubte tres grant.
         Si tost comme la paternostre fut dicte de celle messe, le dyable vint illecques tout soudainement et prist et ravist le jeusnes filz malgré le saint homme, et l'emporta avecques lui pour le porter en enfer. Le saint homme, qui en eust si grant doeul a son coeur que plus ne povoit, ne cessa de supplier la vierge Marie adfin qu'elle voulsist le jeusne homme secourir; si comme elle fist, car elle s'apparut au dyable tout soudainement et lui tollut le jeusne filz et le remist en celle mesmes place entre le saint homme et l'autel, la ou le dyable l'avoit pris. Si que, quant le saint homme dist en la messe Pax Domini sit semper vobiscum, le jeusne filz respondit Et cum spiritu tuo.
          Le saint homme, qui fut tout resjoy, donna au jeusne filz la sainte communion du corps de Nostre Seigneur, laquelle il receut en grant devocion. Aprés la messe, il raconta au saint homme comment la vierge Marie l'avoit traict hors d'enfer, la ou le dyable l'avoit porté soudainement; et lui dist que en enfer il y avoit tant veu de gens que l'on ne les pourroit nombrer.
          Aprez toutes ces choses, le jeusne filz print congié du saint homme et s'en retourna remercier l'evesque de Jherusalem, auquel il recita tout ce qui lui avoit advenu. Puis s'en ala reconforter ses amis et leur recita tout ainsi qu'il l'avoit veu et ouy, dont tous eurent grant joye et en rendirent graces et louanges a Dieu et a la vierge Marie.
         Par cest exemple appert comment c'est grant peril aux peres et aux meres de donner leurs enfans au dyable et comment c'est grant chose et seure de retourner, au besoing, a secours, a la vierge Marie, car elle a voirement pleniere puissance de delivrer ses amis de la puissance et seignourie du dyable.

 Pour toute question au sujet de ce site, veuillez vous adresser à:
labo@francaisancien.net