1. 95d/Entendez tuit, faites sillence.
2. N' i a si fol que, s' il en ce
3. Que je dirai bien se remire,
4. Por verité ne puist bien dire
5. Que cil n' aime son cors ne s' ame
6. Qui n' oneure et sert Nostre Dame.
7. En escrit truis qu' il fu uns hom
8. De grant affaire et de grant non.
9. Fame eut vaillant, cortoise et sage.
10. Ou saint ordre de mariage
11. Mout loyaument andui veschirent.
12. Maint bien et mainte aumosne firent.
13. 96a/Quant leur enfans asez[l. assenez] eurent
14. Au mielz et au plus bel qu' il porent,
15. Tant amenderent leur affaire
16. Que d' un seul lit firent .ii. faire.
17. Li preudom et la preudefame
18. Voërent Dieu et Nostre Dame
19. Et continence et chasteé:
20. Dieu promisent qu' en lor aé
21. N' assanbleroient en un lit
22. Por deliter en fol delit.
23. Ce saintisme proposement
24. Tindrent andui mout longuement,
25. Mais ly diables envïeus,
26. Qui de mal faire est curïeus
27. Et qui toz jors a grant envie
28. De toz les biens c' on fait en vie,
29. Tele envie eut de ceste chose
30. Qu' i les deciut a la parclose.
31. Le preudome tant taria
32. Que tout son cuer li varia.
33. Tant li ala entor et vint
34. Q' une nuit de Paskes avint
35. Qu' enflamez fu d' une tel flame
36. Son lit laissa por le sa fame.
37. Quant la dame vit cest affaire,
38. Dolante fu, ne set que faire.
39. Merci li crie assez sovent.
40. « Le veu, fait ele, et le covent
41. Que vos avez a Dieu pramis
42. Ne brisiez pas, biaus doz amis.
43. Saigniez vos bien, s' alez gesir,
44. Si refraigniez vo fol desir.
45. Plus bestïaulz seroit que beste
46. Qui en tel nuit et en tel feste
47. 96b/Feroit si grant ennormité. »
48. Cilz qu' anemis eut escité
49. Quanqu' ele dit mout prisa peu.
50. Quant vit la dame que son veu,
51. Estre son gré, brisoit se[l. ses] sire,
52. Toute aïree prist a dire:
53. « Cui qu' il soit bel ne cui qu' anuit,
54. S' enfant concevomes anuit,
55. L' anemi le doig et otroi ! »
56. Mout fu joians de cest otroi
57. Li dyables quant il oï.
58. Li uns l' autre tant conjoï
59. Que bel enfant la nuit conciurent.
60. Quant li .ix. mois acompli furent,
61. La dame acoucha de .i. bel fil.
62. Nel haï pas ne ne tint vil
63. Por la promesse, ainz l' ama tant
64. Con mere doit amer enfant.
65. Tant par fu biaus, et tant ert gens
66. Que clerc et lai et toutes gens
67. A merveilles le regardoient,
68. Mais entre aus toz ne se gardoient
69. De la promesse que la mere
70. Fist a l' anemi tant amere.
71. Mais bien le seut li anemis.
72. As lettres fu li enfes mis.
73. Ne trovast on de son aage
74. Enfant si soutil ne si sage.
75. Mout par estoit biaus et bien fais,
76. Sages en dis et plus en fais.
77. A toutes gens estoit seans,
78. Mais en ce ert trop mescheans
79. Qu' a l' anemi pramis l' avoit
80. La mere, qui sovent lavoit
81. 96c/De chaudes larmes son cler vis,
82. Car il li ert adez avis
83. Qu' anemis l' en deüst porter.
84. Ne s' en pooit reconforter,
85. Mais en son cuer si le cela
86. C' onques nului nel revela.
87. Mais cilz qui nul pechié n' oblie
88. Sa promesse n' oblia mie.
89. A la dame vint li dyables,
90. Mout lais et mout espoëntables,
91. Au jor dou douzime an tou[l. tout] droit.
92. « Dame, fait il, faites me droit.
93. Tenez me bien ma convenance.
94. Ne l' ai pas mis en oubliance:
95. D' ui en .iii. ans la veil avoir,
96. Nel lairoie por nul avoir. »
97. Li dyables atant s' en part.
98. Por un petit d' ire ne part
99. La dame quant ot ces noveles.
100.Son pis debat et ses mameles,
101. Et a tel duel et tel contraire
102. Que grans anuis est dou retraire.
103. Chascune nuit, quant de l' escole
104. Vient li clerçons, plorant l' acole
105. Et tot le moilloit de ses larmes,
106. Car tost aproche et vient li termes
107. Qu' il iert perdus par son mesfait
108. Se Diex et sa mere nel fait.
109. Tel duel en a et tel anui
110. Ne pot oïr parler de lui
111. Qu' ele ne pleure isnelement
112. Et souspire si tenrement
113. Que toz ses cuers remet et font.
114. Ele souspire si parfont
115. 96d/Que li enfes s' en est pris garde.
116. En souspirant sovent l' esgarde
117. Et se li dit piteusement:
118. « Mere, li cuers toz me desment
119. De ce grant duel que vos voi faire.
120. Veez vos riens en mon affaire
121. Qui vos messiece ne mesplaise?
122. N' iere jamais nul jor aaise
123. Devant que m' arez dit por quoi
124. Vos plorés tant tout en recoi.
125. Le me dites, ma douce mere.
126. Tot adez joe a moi mes pere
127. Et rit et gabe et esbanoie.
128. Totes les gens font de moi joie,
129. Mere, sanz vos tant seulement.
130. Vos souspirés si tenrement
131. Toutes les fois que me veés
132. Mes cuers en est toz esfreés.
133. Si sui dolans et espris d' ire
134. Ne sai que faire ne que dire.
135. Por un petit mes cuers ne crieve.
136. Douce mere, forment me grieve
137. Quant vo cler vis voi tant plorer.
138. Dites me tost sanz demorer
139. Por quoi vos cuers est si destrois. »
140. Sa mere ensi par maintes fois
141. Asraisne assez ains que li die.
142. Tant le tient corte et tant li prie
143. Qu' ausi li dit com a confesse
144. Comment de lui fist la promesse
145. Et l' otroiance a l' anemi.
146. Assez plora, assez gemi
147. Quant il oï ceste novele.
148. A jointes mains sovent apele
149. 97a/La mere Dieu qui la consaut.
150. Pres est de faire un malvais saut
151. Se sa douceurs ne le conseille.
152. S' il est dolans, n' est pas merveille,
153. Car l' aventure est mout amere.
154. La nuit guerpist et pere et mere,
155. Leur grant avoir et leur richece;
156. Plains de dolor, plains de tristrece
157. S' en est emblez a mienuit;
158. Toz seuz sanz compaignon s' en fuit.
159. Ne seit sage home en nule terre
160. Ou il ne voist conseil requerre.
161. Chascuns li dist, c' en est la some,
162. Que consillier s' en voist a Rome.
163. A Rome en vient a l' apostoile;
164. Tout li conte, riens ne li çoile.
165. L' apoisteles n' en seit que dire.
166. Unes letres li fait escrire,
167. Le josne clerc les done et charche.
168. « Biaus fius, fait il, au patriarche
169. De Jherusalem t' en iras,
170. Tout ton affaire li diras.
171. Ne sai nul plus saige home en terre.
172. Passe la mer, va le requerre.
173. Qu' il te consaut par toi li mant
174. Et par ces lettres li commant. »
175. Li clerçons prent le parchemin.
176. Mout se dolouse par chemin,
177. Mout se complaint, mout se demente,
178. Mout doute en mer le grant tormente.
179. Le vis en a taint et noirci.
180. A Dieu crie sovent merci.
181. Maint pessme jor et maint amer
182. Eut ainz qu' il fust outre la mer.
183. 97b/Au patriarche en vint tout droit,
184. Qui maint sage home fist luez droit
185. Assambler por lui consillier.
186. Il les fait toz esmervillier
187. Quant il lor conte l' aventure,
188. Qui tant par est orrible et dure.
189. Tenrement pleurent et souspirent,
190. Car onques mais enfant ne virent
191. Qui tant fust biaus ne gracïeus.
192. « Trop par seroit Diex oublïeus,
193. Ce dist chascuns, s' il t' entroblie.
194. Nostre Dame sainte Marie
195. Prïer l' en daint par sa merci.
196. Bien doit avoir le cuer noirci
197. La dolante qui tant mesfist
198. Que l' anemi si bel don fist. »
199. Li patriarches se porpensse
200.Mout longuement tant qu' il s' apensse,
201. Si com Dieu plot, d' un saint hermite,
202.Qui menoit vie si parfite
203.Que li angele le visetoient
204.Et bouche a bouche a lui parloient.
205.Tot em plorant l' enfant apele,
206.Qui plus est doz d' une pucele.
207. « Biaus fius, fait il, a .i. hermite,
208.En cui Sainz Esperis habite,
209.Par mon conseil tost t' en iras.
210. Ceste merveille li diras.
211. Il par est tant de haute vie,
212. Se Dieu por toi de bon cuer prie,
213. Je sai certainnement et croi
214. Que Diex ara merci de toi.
215. Mais la voie est forment douteuse,
216. Longue, grevainne et perilleuse.
217. 97c/Il est manans en un bosquaige
218. Si perilleus et si salvaige
219. Qu' a deus jornees en toz sens
220.N' a nul recé si com je pens.
221. — Las ! fait li enfes, que ferai ?
222. Jamais nului ne troverai
223. Qui me consaut a mon voloir.
224. Bien doit celi li cuers doloir
225. Qui en si grant painne m' a mis.
226. — Confortés vos, biaus doz amis,
227. Fait li preudom. Diex, qui avoie
228. Les desvoiés et met en voie,
229. Bon conseil et tel vos envoit
230.Qu' au saint home tost vos avoit. »
231. Unes lettres li baille et livre.
232. En tel maniere s' en delivre.
233. Atant li enfes s' en depart.
234. Por peu que li cuers ne li part.
235. Ne seit qu' il die ne qu' il face.
236. Corant li vont aval la face
237. Les chaudes larmes dusqu' au saim,
238. Car nul conseil loial ne sain
239. Ne puet trover ne ça ne la.
240.Nostre Signeur mout apela
241. Et ma dame sainte Marie.
242. Li cuers de ce toz li fremie
243. Que si peu dusqu' au termine a
244. Que dyables atermina:
245. N' i a c' un jor ne plus ne mains.
246. Sovent deprie a jointes mains
247. Le roi dou ciel qu' il la le maint
248. Ou li sainz hom converse et maint,
249. Et Diex, qui bien l' enfant porvit,
250.Tant le mena le recet vit
251. 97d/Ou manans estoit li sains hom,
252. Qui ne vivoit se dou pain non
253. Que Diex li envoioit a nonne.
254. N' avoit autre blé n' autre aumosne.
255. Un pain avoit de rente ou ciel
256. Plus blanc de noif, plus doz de miel.
257. Diex, qui tout seit et qui tot voit,
258. Por l' enfant qui venir devoit
259. Sa provende li a doublee.
260..II. pains assez plus blans d' oublee
261. Par un saint angele li envoie.
262. Li sainz hermites eut grant joie,
263. Que bien seit que chose est certainne
264. Qu' aucun hoste Diex li amainne.
265. A jointes mains Dieu en mercie
266. Et ma dame sainte Marie.
267. Li clerçonés dont je vos di
268. A l' ermite le samedi
269. De la sainte Paske assena,
270. Si com Diex volt, qui le mena.
271. Mais mout fu las et mesmenés.
272. Salué l' a comme senez,
273. Tout em plorant, a basse vois,
274. Del doz signeur qui en la crois
275. Por nos ses menbres estendi,
276. Et puis ses lettres li tendi.
277. Li sains hermites les desploie.
278. Li cuers luez droit li atenroie
279. Que les lettres comence a lire.
280.Esbahis est, ne seit que dire.
281. Assez pleure des iex dou chief
282. Quant de l' enfant voit le meschief;
283. Maint souspir jete et mainte larme.
284. Bien voit que n' a li enfes terme
285. 98a/Fors seulement dusqu' a demain.
286. Tout plorant le prist par la main,
287. En sa chapele l' a mené.
288. De ce qu' il le voit si sené,
289. Si symple, si bel et si doz
290.S' esmerveille li sainz hom toz.
291. « Biaus fius, fait il, Diex gart ton cors.
292. Il par est tant misericors
293. Ja ne querrai qu' il te get puer
294. S' en lui t' affies de bon cuer.
295. Et bien saiches, biaus tres doz frere,
296. S' en sa tres douce, sade mere
297. Fiches ton cuer et t' esperance,
298. Ne pués avoir nule doutance
299. De dyable ne d' anemi.
300.— Sire, por Dieu ! proiez por mi,
301. Fait li enfes. J' ai tel freeur
302.Et tel doutance et tel peeur
303.Que m' en fremïent tout li menbre.
304.— Biaus fius, fait il, s' il te remenbre
305.De la puissant mere celestre,
306.Toz liez et toz seürs pués estre.
307. Conchïez est li anemis.
308.S' il t' avoit voir en enfer mis,
309.En cep, en buies et en fers,
310. Ne seroit si hardis enfers,
311. Por rien qui poïst avenir,
312. Qu' il t' osast mie detenir.
313. Dame est dou ciel, dame est d' enfer.
314. N' i a si fort porte de fer
315. Qu' ele n' eüst tost depichie.
316. Quant un petit est corceïe,
317. Si viguereuse est et si fiere
318. Que d' un regart ou d' une chiere
319. 98b/Fait tout dou tot enfer tranbler.
320.Riens ne li puet tolir n' embler
321. Li dyables ne ses esfors.
322. La mere Dieu par est si fors
323. Et de si tres puissant pooir
324. Qu' anemi ne l' osent veoir.
325. La riens qu' il plus heent c' est ele.
326. La mere Dieu par est tant bele,
327. Resplendissans, luisans et clere
328. Que ja en liu ou ele apere
329. Li dyable ne verront goute.
330.Biaus tres doz fius, or n' aies doute,
331. Fait a l' enfant li sainz hermites,
332. Ja se Dieu plaist, maus esperites
333. En toi n' ara ne plus ne mains. »
334. Lors l' a saignié a ses .ii. mains.
335. Quant dusqu' au vespre ont geüné,
336. Des .ii. pains se sont desgeüné
337. Que li angeles lor aporta.
338. Le josne clerc reconforta
339. Au mielz qu' il peut li sainz hermites.
340.Quant leur matines eurent dites
341. Devotement, si com il durent,
342. En orison dusqu' au jor furent
343. A nus genolz et a nus coutes.
344. Li sainz hermites maintes goutes,
345. Ainz qu' il fust jors, des ielz plora,
346. Car mout devotement ora.
347. Quant li sainz jors fu ajornez,
348. Revestus est et atornez
349. Por faire l' office devin
350.C' on fait de pain, d' aigue et de vin.
351. Car au plus tost que il porra
352. Commenïer l' enfant vaurra
353. 98c/Et commander au Sauveür,
354. Car grant hysde a et grant peür
355. Que li dyables ne le prengne
356. Et par sa guille nel sousprengne
357. Ainz qu' il le puist commenïer.
358. Li dyables, qui espïer
359. Seit bien son jor et son termine,
360.Le jor voloit estre en saissine
361. De son don et de sa promesse.
362. Si tost com conmença sa messe,
363. Li bons preudom, li Diu amis,
364. Entre lui et l' autel a mis
365. L' enfanchonnet mout doucement,
366. Mais quant ce vint au sacrement,
367. Ainz n' en seut mot li sainz hermites
368. Devant que malvais esperites
369. Tolut li eut l' enfant a force.
370. « Ha ! Diex, fait il, et qu' est or ce ?
371. ...
372. ...
373. Or par iez tu trop endormie,
374. Douce dame sainte Marie ! »
375. Fait li preudom toz esperdus.
376. « Ne sueffre pas qu' il soit perdus,
377. Cilz qu' en ta garde avoie mis. »
378. Mout fu dolans li Dieu amis.
379. Assez gemi et lamenta
380.Et durement se dementa
381. A Dieu et a sa douce mere,
382. Et mainte larme chaude et clere
383. Aval la face li corut.
384. Mais erramment le secorut
385. La mere au roi qui tot cria.
386. Si tost com dist: « Per omnia, »
387. L' enfant oï, qui par biau sen
388. Li respondi mout tost: « Amen. »
389. 98d/Quant li sainz hom l' enfant oï,
390.Mout durement s' en esjoï.
391. Dieu en mercie en son corage.
392. Plorant li torne son visage;
393. La pais li done, et cil la prent
394. Cui Diex a son service aprent.
395. Et ciuz cui Diex eut bien apris
396. Le cors Nostre Signeur a pris,
397. Mout doucement le commenie.
398. Quant la messe fu defenie,
399. Au sainte hermite a tot conté
400.Comment vainchu eut et donté
401. Nostre Dame sainte Marie
402.Le dyable et sa compaignie,
403.Qui l' emportoient tout peestre.
404.Si tost com la dame celestre
405.Por lui rescorre venir virent,
406.D' entor lui tout se depardirent
407. Et se tornerent tout en fuie
408.Plus tost que vens ne chace pluie.
409.Mout hautement en mercia
410. La mere au roy qui tot cria
411. A jointes mains li sains hermites.
412. « Biaus fius, fait il, Sainz Esperites
413. Par sa douceur t' a regardé.
414. Cele qui t' a si bien gardé,
415. Ou que soies, soit de toi garde.
416. D' or en avant, biaus amis, garde,
417. Se sauver veilz ton cors et t' ame,
418. Que de bon cuer serves la dame
419. Qui gardé t' a de l' anemi.
420.— Sire, fait il, Diex mete em mi
421. Tel volenté de li servir
422. Que s' amor puisse deservir. »
423. 99a/Mout doucement le doctrina
424. Por ce qu' enfes qui doctrine a
425. Toz jors en est mielz doctrinez.
426. De bonne estrine est estrinez
427. Enfes qui a bone doctrine.
428. Por ce fait bien qui le doctrine.
429. Assez plorerent et gemirent
430.Andui quant il se departirent;
431. Mout fu piteus li departirs.
432. Cilz qui estoit plus que martyrs
433. Laissier nel volt en l' ermitage,
434. Car trop estoit de josne aage.
435. Droit s' en revint au patriarche.
436. De raconter seroit grant charche
437. La grant feste que de lui firent
438. Il et li clerc quant il le virent.
439. Mout furent lié de s' aventure.
440.Cil qui ama sa norreture
441. Au mains qu' il peut i sejorna.
442. Mout volentiers s' en retorna
443. En son païs et en sa terre,
444. Car il n' est nus, tant sache querre,
445. Qui puist trover, ce sachiez bien,
446. Si doz païs comme le sien.
447. N' est nus qui ja demander doie
448. Se la mere eut au cuer grant joie
449. Quant son enfant vit repairier.
450.Li cuers li dut bien esclairier,
451. Rire et jüer dedenz le saym
452. Quant son enfant vit sauf et sain,
453. Que ne cuida jamais veoir.
454. La mere Dieu et son pooir
455. Loërent tuit petit et grant.
456. Li clers s' en vit forment engrant
457. 99b/De li servir toute sa vie.
458. Nostre Dame sainte Marie
459. De li amer si l' enflamma
460.Que si tres sadement l' ama
461. Que toute amors li seut l' amer
462. Por li tres sadement amer.
463. La douce dame glorïeuse
464. A amer est si savoureuse
465. Que qui un peu i met son cuer
466. Humaine amor jete luez puer.
467. Humaine amors ses amis fausse,
468. Mais Nostre Dame n' est pas fausse.
469. Mauvais amans et faus seroit
470. Qui Nostre Dame fausseroit,
471. Car ja nului ne faussera.
472. Qui la faussera faus sera.
473. Devant Dieu ou ciel faus seront
474. Qui l' ont faussee et fausseront.
475. Or doinst Diex nos ne la faussomes
476. Et bons nos face se faus somes.