XII TORTUE, livre II, chapitre XLV

Dessus sa char la couverture;

La se requieut quant adversaire

Faire li vieut aucun contraire.

Tortue est de double maniere:

Terrestre et l'autre de riviere.

Cele d'yaue est venimeuse

Et a mengier trop perilieuse;

Cele qui es mesons habite

Ou es bois ou sont li hermite,

Ele est nete et pourfitable

Et a mengier medecinable;

Mes li regarder est horreur,

Mainte gent en ont grant hydeur.

Ueez comme geline pont,

Mes plus pale et mendre sont.

Quatre piez Damediex li fist.

Le chief com serpent a petit.

Qui du cors sont anienté

Et gasté comme sont tisique

Et cilz aussi qui sont ethique,

Tortue leur rent la santé.

Et qu'entens j'ore par tortue

Mes que Marie, la Dieu drue?

Tortue dite, non de tort,

Quar a nul ne fist onques tort,

Ne ne fu torte ne bouiteuse

Et pour ce fu plus gracieuse.

Qui est tortus de cors et d'ame,

Tiex n'est preudons, ne preude fame.

Ne soit donc hons ne fame tort

S'il ne vieut encourre la mort

Perpetuele ou cil vont

Qui en cest siecle tortu sont

Et cil qui a autrui tort font.

Quar contre Dieu trop se meffont

Tuit cil qui mainnent torte vie:

N'ensievent point dame Marie,

Qui ne fu torte ne tortue

Par pechié, mes droite tortue.

Sa char couvri de couverture

De abstinence grief et dure;

C'est ce qui la fait nete et pure.

Mes mainte gent hui n'en ont cure;

256 r^o a

Tuit quierent soulas et delis,

Roses, soucies, fleurs de lis.

Encor i a assez trop pis:

Desnuer son ventre et son pis.

Chierement leur sera vendu

Quant jugement sera rendu.

Les delices et les honneurs

Tourné leur seront lors a pleurs.

Je leur prie pour leur profist

256 v^o a

A no tortue retournon Rosarius

Et a bien faire nous tournon.

Mes nous avons maint adversaire

Qui nous empechent a bien faire:

Le monde, la char, et le tort;

Chascuns nos fait boiteus et tort.

Li mondes nous atrait a soy,

La char nous est de male foy

Et li anemis nous deçoit.

Chascuns de nous donc sages soit,

Que li mondes ne le sousplante,

Que les delis de char ne hante

Et que Sathenas ne l'enchante.

Hons enroez pas bien ne chante.

Se si troi enroez nous ont

Et enchantez, souvent le font,

Devant lui devons tant chanter

Qu'el nous weille desenchanter;

Quar chanter a droit ne poons

Tant que desenchanté soions.

De ces trois enchanteurs Marie

Enchantee ne fu mie.

[S']asalli sommes de ces trois,

[S]i comm il avient mainte fois,

[R]equeillons nous en no closture;

[R]ecourons a la couverture:

[P]enante[l. Penance]; qui en est couvert,

[S']ame sauve, point ne la pert.

256 v^o b

Et aussi est veoir[l. voir] le contraire:

Pechëur qui penance faire

De ses pechiez ci ne wieut point,

En l'autre siecle sera point

Et d'une pointure si grief

Onques ne senti tel meschief.

Penance donc fai en cest monde;

Ele fait l'ame bele et monde.

Penance cuevre le pechié,

Et par penance est adrecié

Hons ou fame se se desvoie;

Penance remet en la voie.

Penance est la table seconde

Par quoy puet estre sauf le monde.

Et quiconquez pechié a fait,

S'il se repent de son meffait

Avant que part de ceste vie,

Va en joieuse compaignie

Ou il n'a point de departie;

La voit Dieu et dame Marie.

Penance face le pecheur

Se monter vieut a celle honneur

Ou nus ne monte se penance

Ne fait et aplatit sa pance.

Cy aprés en orrez un dit

D'un qui grief penance fist.

Double espece y a de tortue;

L'une, non l'autre, j'ai veüe.

L'une tortue est terrestre,

L'autre en yaues sieut estre.

Fames voions de deus manieres:

Unes humbles, les autres fieres.

Les unes en delis conversent,

Souvent bon vin en henap versent.

Les humbles terrestres sont dites,

Quar il se reputent petites.

Celles qui es yaues demeurent,

Qui par soulas et delis queurent,

Oiseuses sont, petit labeurent,

Et qui grain leur pechiez ne pleurent,

Sont d'envenimee nature,

Plainnes de pechié et d'ordure,

Tortes en dit, tortes en fait

Et grain ne pleurent leur meffait.

257 r^o a

Gré ne scevent se bien on leur fait,

Et deffont ce que Diex refait.

Mes plus: les drois elles font tors,

Ordoient et ames et cors.

Tele tortue est molt perilleuse

Quant en atour est curieuse.

Homme doit fuir tel tortue

Se il ne vieut qu'ele le tue.

Homme qui de tortue est mort

Tele, de legier vient a mort.

De ceste tortue te garde,

De toy aies songneuse garde.

Qui la vieut souvent regarder,

Fort est qu'el se puisse garder.

Fame qui est de venim plaine,

Nice, de vie fole et vainne,

Par son regart homme deçoit

Et tort, tortue, fait du droit.

De tortue parlon terrestre,

C'est fame qui est de bon estre,

Si com fu la bele Marie.

Torte ne fu point en sa vie;

Mes plus: les tors el redreçoit,

Quar les mais a Dieu radreçoit.

Ceste avec les sains habite

Et qui vieut vivre com hermite,

Aveques li la debonnaire

Souvente fois fait son repaire.

Ele visite ses amis,

Que ne les trouble li anemis,

Qui des sains troubler ne fait force;

La bele a rapaisier s'efforce.

Molt est dame a nous pourfitable,

A noz mehains medecinable.

Nete est et plainne de purté;

En li n'a venim ne durté.

Plaine est de pitié Marie;

Tout le monde sent son aïe.

Mes cilz qui le monde desvoient,

Molt volentiers pas ne la voient.

A regarder leur est hydeuse,

Cumbien qu'en soy soit gracieuse.

Ce sont li anemi, li tort,

Qui a maint preudomme font tort.

257 r^o b

Mes nostre tortue, que fait?

Quanqu'il font hui, demain def[fait]

Et se le mal procure a faire,

La dame pense de refaire,

Qu'en fourme ramené soit deu[e].

Cy a gracieuse tortue;

Delitable est a regarder

A tous qui se weulent garder.

Mes hideuse samble as hydeus,

Les anemis; n'a cure d'eus,

En tous leur fais les contrarie.

Pour ce seur li ont grant envie;

Plus volentiers tortueroient

Ceste tortue, s'il povoient,

Qu'il ne feroient autre chose;

Mes en trop haut lieu est enclo[se].

La ne pueent mettre la main

Dont descendirent sans poula[in].

La dame en mansion seure

Est: aveques son fil demeure;

N'a garde de vent, ne de pluie,

Ne de chose qui li annuie.

Et qui fu l'uef de la pucele

Qui avoit lait en sa mamele?

Jhesus, lequel une fois pont,

Aprés ne vint point de secont.

Et vidimus gloriam ejus quasi unigenit[i]

Diex a un filz et n'en a plus,

Hons est au monde devenus,

Maindres pour l'incarnacion;

Pales fu en sa passion . Ps'.

gelis et cetera.

Avesques nous est Damediex

Quant descendi pour nous des cieu[x],

Mendre des angres un petit;

Iceste merveille Diex fist.

Quatre piez quatre vertus sont

Qui les preudommes parfais font.

Sans ces quatre piez ne puet e[stre]

Sauvé bourgois, ne clerc, ne p[restre],

Ne autre gent, quiconques soient.

Facent donc quatre vertus ai[ent]:

257 v^o a

Force, justize et prudence,

Et la quarte est atrempance.

Force en toute adversité

Qui vient pour nostre iniquité.

Juste soions sans faire tort;

Qui ne l'est, dignes est de mort.

Sage du temps a avenir,

A quele fin tu pues venir;

Du temps passé se tu as fait

Ce que tu dois et riens meffait;

Se bien ordenné le present

Est, quar qui bien riglé se sent

En pensee, en fait, en dit,

Sages et caus puet estre dit.

[A]trempance rest necessaire

[S]e a Damedieu voulons plaire,

Et a celui paradis donne

Qui est atrempee personne.

Et inhabitabunt in seculum seculi super eam.

[C]il averont terre celestre

Qui si atrempé vourront estre.

[T]outes ces vertus ot Marie

Tant cum vesqui en ceste vie.

[E]n cest char ou ciel fu portee,

De quatre vertus aournee,

Et si cum quatre roes sont

Qui la personne digne font

A ce qu'el soit el ciel menee.

Soit donques de vertus paree.

Le serpent si est Jhesu Crist

Que Moÿses ou desert fist

Pour garir les filz d'Israel

Quant les batoit le Dieu flael.

Se serpent vif aucun mordoit,

Le serpent d'arain le curoit,

Par regarder, de la morsure.

Cest serpent n'estoit que figure

Que Jhesu Crist les entechiez

De pechié grief, mors et bleciez,

[C]ure parfaite devoit faire

Quant souffri ou mont d'Escauvaire.

[L]e chief de ce serpent est Diex

257 v^o b

Qui, par s'umilité, des cielx,

Pour nous, descendi en cest monde

Et nasqui de la virge monde.

Si com Diex donc s'umilia,

Si fist la bele Maria.

Pour ce petite est apelee

Et de vouloir et de pensee.

Petite est com chief de serpent,

N'eut cure du boben present.

Miex vaut avoir humilité

Que du monde la vanité,

Quar le monde n'est mes que vent.

Fui et culuevre et serpent.

Ciz, celes, chief de serpent ont

Qui de cuer, de cors humble sont.

Tizique, ethique, pacient

Des quiex li cors vont a nient,

Segnefient adversitez

De chans, de mer et de citez;

Quar peril a par tout le monde.

Mes de ce la pucele monde

Garde et de mal'aventure,

Quant la personne prent en cure.

Presquez estoit anientez

Uns qui en mer fu tempestez.

Il requist la bele Marie;

A rrive l'arriva en vie.

De ce un conte especial