VII SALAMANDRE (HARENG, CAMELEON, TAUPE), livre II, chapitre XVIII

- Cuider devons que dïent bien -

Quatre choses sont qui leur vie

Soustiennent de pur element.

De ce ne t'esbahi mie,

Diex fait plus grant merveillement.

Salamandre, haren sont deus,

Cameleon aveques eus,

Taupe l'autre; qui bien les conte,

Quatre en trouvera par droit conte.

Alec unda fovet flamme pascunt salamandram.

Salemandre de feu, en terre

La talpe sa vie sieut querre

Et cameleon de l'air vit,

Harenc d'yaue si com on dit.

De salemandre vous dirai

Et des autres je me tairai.

168 r^o a

Quant de pluie est habundance

Adonques est sa demonstrance;

En temps bel et sezon serie,

Salemandre ne verrez mie.

Une liqueur ist de sa bouche,

Laquel se fame ou homme touche,

Li poil qui sont sur eus tuit chieent,

Si com no naturien dïent;

La liqueur est semblabe a lait.

Molt de merveilles a Dieu fait!

Feu aime singulerement,

Delit li est et non tourment.

Dicitur quasi sola amans pir id est ignem

En feu vit sans corrupcion,

Merveileuse condicion.

N'i est ne arse, ne brulee;

Neïs robe de li ouvree

N'art en feu se dedens est mise.

Tele vesture bien je prise:

Flamme et chaleur de feu refraint;

Mes plus: comme glace l'estaint.

Par salemandre enten Marie.

Chascuns preudoms ne la voit mie,

Combien qu'ait nete et serie

La conscience en ceste vie.

En oroison faut que il veille,

Ainçois qu'a nul monstrer se veile,

Et que larmes a planté gete,

Quar ele est si digne et si nete

Que si n'i a grant planté pluie

Fort est de veoir dame Marie.

Quant bon eurez qui ceste dame

Pourroit veoir en cors et en ame!

Miex l'en seroit toute sa vie.

Dame, qui vesquis sans poutie

De pechié et de felenie,

Plainne de toute courtoise[courtoisie],

J'ai en toy mise m'esperance.

De larmes me donne habundance,

Que de toy veïr digne soie;

Au mains une fois que te voie

Ainçois que parte de cest monde!

Ta pitié dame en moy redonde.

168 r^o b

Planté larmes devons avo[ir]

Se la dame a nous aparoir

Voulons, quar qui a li devocion

N'a de cuer et affection,

Ne la verra n'a mort n'a vie.

Ta conscience purefie

Et gete larmes a copie,

Veoir pourras dame Marie.

La liqueur qui ist de sa bouc[he],

Quant el par sa pitié nous touche,

Nous oste superfluitez;

Ce sont ordures et viltez

Qui par les peus sont entendues.

Molt en y a grans et menues;

Toute no vie n'est mes que ord[ure];

Habundent rapine, usure,

Barat, tricherie, luxure;

Gloutonnie regne sans mesur[e]

Et autres pechiez tant font.

Merveiles est Diex ne confont

Tout le monde pour la vilté,

Pour l'orreur, pour l'iniquité

Que font contre Dieu et sa mere

Homme felon de mal affaire.

Nul ne se vieut de mal retraire,

Ne vers Dieu tourner soy et traire:

Nul ne garde mes la Dieu loy.

En nul n'a loiauté ne foy,

Et un voisin l'autre conchie;

L'un sur l'autre a grant envie,

L'un de l'autre la marchandise

Blasme, c'est envieuse guise.

Loiauté ne foy mes n'i a,

Et s'ele i est, pou en i a.

Je te pri que ne t'ennuit mie

De oïr Dieu par Jheremie: .V.

"De Jherusalem par les rues

Alez, par grans et par menues,

Et encerchiez diligemment

Se trouverez un seulement

Qui jugement face vritable

En foy, en loiauté estable;

Je li serai dous et courtois,"

Ce dit Diex, li souverains Rois.

168 v^o a

"Je li seray douz et propice

Se il est trouvé sans tel vice.

Se dïent trouvez est, en jurent,

Je di faucement se parjurent."

Sire, vous savez quiex il sont:

Foy et loiauté petit ont.

Plus les batez et plus sont dur

Cum pierres sont qui sont en mur.

Il n'ont cure de decipline

Que leur doigne la main divine;

A Dieu ne weulent retourner;

A droit les puez mal atourner!

Se tu me dis, par aventure,

Gent sont de petite valure,

Pour ce nice sont en la loy;

Comment i trouveroit on foy?

De Dieu petite ont quenoissance,

De bien jugier sens et poissance;

En pais les lai, as grans m'en vois

Qui scevent les drois et les loys.

Et j'ai trouvé appertement,

Plus que li povre, effronteement

La loi Dieu a terre ont mis jus

Et les lieus tous derrompus.

En tous estas vous trouverez,

Se a droit les considerez,

Que li greigneur sont li poieur.

Diex face du poieur meilieur!

Li prelat font les estatus,

Vous veés qu'il n'en tiennent nus!

Il dïent: "Alez au moustier"

Et il s'en vont esbanoier!

Il dïent: "Vivez sobrement",

Il menjuent plantureusement!

Il dïent: "Robes humbles sont bonnes";

En ce plus qu'autres passent bonnes!

A leur subgiez cherchent grans fais,

Plus grans qu'autres sont leur meffaiz!

Il dïent et nient ne font,

Plus que leur subget se meffont.

Princeps ou prelas se confont

Quant leur soget meilleur d'eus sont.

Il ont a Dieu tourné le dos

Et dïent souvent les grans mos

168 v^o b

De ceus qui mainnent vie fine;

D'eus deschaucier ne sont pas digne.

Que puis je par le feu entendre

Qui dure chose met en cendre,

Mes que le seigneur Damedieu

Que l'escripture apele feu?

consumens est.

Nostre Dieu est feu degastant

Pechié en homme repentant.

Cest Dieu ama sur toute rien

La dame plainne de tout bien.

Ele son chier fil tant amoit

De li partir ne se povoit.

Que Diex estoit, bien le savoit,

Mes nulement ne s'en vantoit,

Si com de Mahomet faisoient Exemplum

Les fames qui de li se vantoient.

Une juive entre elles estoit

Qui en non Zaphia avoit.

Plus que les autres l'avoit chier,

L'enseigna a glorifier

Et qu'el desist apertement

Parole de tel vantement:

"Aaron fu jadis mon pere,

Sains hons fu et de bon affaire.

Moÿses mes oncles estoit,

Qui face a face a Dieu parloit,

Et Mahommet mon mari voi,

Qui est li maistres de no loy".

Cy a molt nice vanterie;

Ce n'est pas gloire, mes folie.

Mahommet fu maise personne,

Et maise fesoit de la bonne.

Une loy fist de deus et d'as,

Le dur laissa, prinst le soulas,

Pour toute gent atraire a soy

Et pour laissier la vraie foy.

Ce li enseigna Sathenas;

Maintenant en enfer le bas

Gist comme pourciaus vilz et ors,

Tiex avoit il et ame et cors.

Vanterie est mauvese chose;

Garde que soit ta bouche close,

169 r^o a

Que de lui n'isse vanterie

Ne parole de vilennie.

Ne se vanta grain le pucele

Quant de l'angre oï la nouvele

Que le fil Dieu conceveroit,

Mes plus et plus s'umilioit

Et dit: "De Dieu sui chamberiere".

Ne dit pas: "Je sui a Dieu mere",

Combien qu'ele le pouist dire.

Ne vout meffaire ne mesdire,

Quar trop miex vaut humilité

Que glorieuse vanité.

Se tu te vieus glorifier,

Ce doit estre en toy mesprisier,

Mes gloire vraie en ce gist

Que tu connoisses Jhesum Crist,

N'en rchesses[l. richesses] n'en sapience.

Se tu ies ors de conscience,

Tu ne te dois glorifier;

A Dieu te dois tous apuier,

Quar hons n'est riens mes vanité,

Remplis d'ordure et de vilté. Ps'

In ymagine pertransit homo et cetera

Hons trespasse com fait ymage

Quant se mire sus le rivage

Ou quant par la riviere nage.

Pour ce ciz est nices, non sage,

Qui assamble en terre tresor

De blé, de vin, d'argent ou d'or.

Molt de biaus biens i met ensemble

Et ne scet a cui les assamble:

A un sot ou a une sote,

Qui sera si petit devote

C'une .abc. n'en diroit mie

Quans hors sera de ceste vie.

Se tresor vieus faire en sauf lieu,

Fai le ou ciel, ou est Damedieu.

Ou ciel sera en sauve garde,

Diex le gardera qui tout garde.

Il est seür et bon gardien;

Nul larron ne li emble rien.

Ou ciel nul larron n'a pooir,

La donc assamble ton avoir.

169 r^o b

Et ce fais tu quant tu le donnes

As povres, honteuses personnes,

As povres freres qui mendïe[nt]

Et qui la parole Dieu dïent

Par le païs faiticement,

Des ames pour le sauvement.

Trop me merveil qui a de quoy

Refuse as prescheurs de la foy

Son ostel. Tel ne scevent mie

Comment tel chose iert punie. Luce

Erit Sodomis quam civitate illi.

Sodome sera mains punie

Que tele male vilenie.

Mesmement ce sont clerc et prestre,

Il monstrent bien de quel sont est[re];

Li aucun d'eus sont mains court[ois]

Que ne sont villain ou bourgois.

En feu vivre que segnefie?

C'est que la pucele Marie

En cest monde maling demour[oit]

Et point par pechié n'i ardoit.

De mal feu est cest monde plai[n],

A painne i a nul qui soit sain.

Des la teste jusques au pié

De vilté sont tuit entechié,

L'un de boben, l'autre d'orgueil,

L'autre ne voit goute d'un oeil;

L'un convoiteus, l'autre envieu[s],

L'autre glout et delicieus;

Li aucun prestent a usure.

Commune est dame luxure;

Ele est mariee a chascun;

Vierges a painnes en est un.

Boivent, mengüent au mat[inet];

Joli sont comm un robinet.

Pour ce souvent ne sont pas net,

Tel le seigneur com son soufflet.

N'i a vallet, ne chamberiere

Qui n'ait mal devant ou derriere.

Souvent avient dame et seign[eur]

Sont de leur maigniee poieur.

De ceste mauvese arsure

Et de cest feu dist l'escripture:

169 v^o a

maligno positus est id est in malo igne.

De mais feu est rempli le monde,

Iniquité partout habunde.

Par pechié ne fu point Marie

Arse, ne noire, ne bruie.

Ou feu estoit et grain n'ardoit,

Quar entre les pecheurs vivoit

Et pechiez point ne contraoit.

C'est li biaus buissons que veoit

Moÿses quant fu ou desert.

Pres ala pour veoir en apert.

Se bien regardez ceste dame,

Nete fu et de cors et d'ame.

Et tu qui es? Toute brullee,

Noire et arse et encendree.

Tu n'as net ne ame, ne cors;

Ainsi t'a noircie li tors

Qui beles ames enfumees

Fait noires et encendrees.

Ceste cendre curent par cendre

Cil qui veulent leur vie reprendre

Et amender par penitance;

Bon est soy garder des s'enfance.

Retourne bele fille a Dieu,

Estain qui est en toy le feu.

Salemandre le feu estaint,

Purté sourmonte ordure et vaint

Quant la personne vieut refraindre

Passions et vouloirs estaindre.

Violence faire te faut

En toy se vieus monter en haut.

Et violenti rapiunt illud

Il te faut violence faire

Se vieus c'ou ciel soit ton repaire.

Qui violence se fera,

Le regne du ciel avera.

Donc violence me faut faire

Se je weil a Damedieu plaire.

Donc mais vouloirs en soy refraindre,

C'est feu nuisable en soy estaindre.

Glaçons estoit dame Marie,

Qui dedens le feu n'ardoit mie.

169 v^o b

Mes plus: le feu de purgatoire

Estaint la dame debonnaire,

Quar el hors en trait ses amis,