Eustache le Peintre

Edition: A. Långfors, "Mélange de poésie lyrique française" dans Romania LVIII (1932): 353-74.

R1892: fol. 6r^o - v^o
Portées vides
[Eustache le Peintre]

image du manuscrit

1. Ne plus que drois puet estre sans raison
   Ne que raison puet estre sanz droiture,
   Ne porroit nus, selonc m'entention,
   Estre vaillans ne co / fol. 6v^o / *, a mesure,    image du manuscrit
   De son cuer n'a fait a amours don;
   Et cuit qu'amours destraingne en sa prison,
   Lors puet voloir, quant amours le maistroie.
   Rois, sanz amour, pas estre ne voudroie.

2. Douce dame, bien est lieus et saisons,
   S'il vous plaist, que de moi preignes cure;
   Car servi ai lonc tans, sanz guerredon,
   D'un cuer si fin et d'une amour si pure,
   Qu'a mon povoir n'ai autre cuisançon
   Fors bien servir; se met a abandon
   Cuer et cors tout, et du tout m'i otroie;
   N'en requerrai, que qu'avenir m'en doie.

3. N'est pas amis qui oste son penser
   De bone amour, pour riens qui en aveigne.
   Mon cuer n'en veil partir ne desevrer,
   Ains veil adés que touz jours m'en souveigne,
   Ja, sanz merci, ne l'envoie tourner
   Par devers moi; n'aroit il ou entrer;
   Cors li faudroit, dame, se Dieus me voie,
   Con je di voir; mes poi croi qui m'en croie.

4. Dame, merci! que je sui au finer,
   Se de vous n'ai secours pour chant qui de vous veigne; [+2]
   Trop haut pensai, dame, de vous amer,
   Ne talent n'ai que repentent m'en teingne;
   Qui m'en reprent, moult en fet a blasmer,
   Quant je ne puis en vous merci trover.
   Se fu Amours qui m'a mis en tel voie,
   Dont je me plain, s'ele ne me ravoie.

5. Dame et Amours, se j'ai de riens mespris,
   Pour Dieu vous proi que me soit pardonnee
   La folie, dont doi estre reprins
   Par bone amour, quant de riens l'ai blasmee.
   Je pens a vous nuit et jour et touz dis,
   N'a rien autre n'est mes cuers ententis;
   Et s'il vous plaist que pour vous morir doie,
   Onc ne fu mors si plaisans con la moie.

6. Certe^s, dame, moult est cil entreprins
   Qui, sanz amours, cuide monter en pris;
   Estre ne puet, ne croire non porroie;
   Et qui le cuer croit, n'a droit en avoir joie.

Retour à l'index