Edition: Emil Winkler, Die Lieder Raouls von Soissons (Halle: Max Niemeyer Verlag, 1914).
Suivent les chansons R363, R1204.
R363: fol. 7vo- 8ro
Portées vides
[Raoul de Soissons]
-
A la plus sage et a la mieus vaillant
Ma bone amour done si finement
Que je ne pens a autre riens vivant,
Tant me sovient de son tres biau cors gent.
Que seur totes sa grant biauté resplant,
Qui tot adés croist en abelissant:
Pour ce li veil biau prier en chantant
Et amer sanz cuer volage,
Qu'el est tant bone et tant bele et douce et sage,
Et simple et plaisans et courtoise en parler,
Qu'ele se fet au mesdisans loer. Je ne me puis tenir de lui amer
Quant si bele ne voi ne si plaisant:
Pour ce la veil seur totes honorer
Et mains jointes proier en soupirant
Qu'el ait pitié du plus leal amant
C'onques Amours pëust joie doner.
Et se g'i fail, assez ai a plourer
De les jours de mon aage,
Car maus d'amours qui onques n'asouage
Et volenté c'on ne puet acomplir
Fait plus sovent veillier qu'assez dormir.Quant je la voi si noblement venir,
Mes cuers ne puet la grant amour celer,
Ains fet ma face merveillier et palir
Si que, s'ele mi daingnoit regarder
A ses biaus ieuls, li porroie moustrer
La grant dolour qu'ele mi fet sentir;
Mais ne mi veult conforter ne garir
De mon forsant malage.
Las! c'ai je dit? ains sent douce rage
Qu'i n'est joie sanz lui n'autre douçours
Qui me plëust tant con fait mes dolours.Dame, ou biauté, bonté et valeur
Sont tant que Dieus vous fait a touz plaisir,
Et dit chascuns que vous estes la flours
De courtoisie et bone a Dieu servir
Et vostre cors, amer et chier tenir,
Si que vous croist adés pris et honeurs,
Dame loiaus, noble et de biaus atours,
Sanz orgueil et sanz folage. /fol. 8ro image du manuscrit
Se je vous aim, n'i doi avoir domage,
Qu'a son ami fait dame mesproison,
S'ele l'ocist en leu de guerredon.-
Dame, ou Dieus mist par bone entention
Les meillouirs biens c'on puist trover aillourz,
Pour ce vous pri merci en ma chançon,
Que vous estes la mieudre des meillours
Et s'en vous faut pitiez et douce amours,
Je ne sai mes ou trover garison.
Car je n'aour ne pris rien, se vous non,
Tant aim vostre seignorage.
Car tant avez au siecle d'aventage
Que vous passez de sens et de bonté
Totes celles de la crestienté. -
Si voirement con je di verité
Et je vous aim de cuer sanz traïson
Me doingne Dieus, par vostre volenté,
Joie et merci et sa beneiçon.
Et mesdisans, traïtours et felons
Soient maudit, confondu et dampné,
Car il ont tout le siecle envenimé
Par leur desloial langage.
Dame, merci, noble, de haut parage,
Eschivez les, qu'il portent le venin
Dont joie muert et amours trait a fin! - Et Dieus otroit aus loiaus de cuer fin
Joie et honeur, richesse et bone fin!
R1204: fol. 8vo
Portées vides
[Raoul de Soissons?]
-
Se j'ai lonc tans esté en Romenie
Et outre mer fet mon pelerinage
Sousfert i ai moult dolereus domage
Et enduré mainte grant maladie
Mes or ai pis c'onques n'oi en Surie
Que bone amour m'a doné tel malage
Dont nule foiz la dolour n'asouage
Ains croist adés et double et monteplie
Si que la face en ai toute enpalie. -
Car jone dame et cointe et envoisie
Douce et plaisant, belle et courtoise et sage
M'a mis ou cuer une si douce rage
Que j'en oubli le veoir et la joie
Si conme sil qui dort en letargie
Dont nus ne puet esveillier son coraige
Car quant je pens a son tres dous visage
De mon penser aim mielz la conpeignie
C'onques Tristans ne fist d'Yseu s'amie. -
Bien m'a Amours feru en droite voine
Par .i. resgart plain de douce esperance
Dont navré m'a la plus sage de France
Et de biauté la rose soverainne.
Si me merveil que la plaie ne sainne
Car navré m'a de si douce sanblance
C'onques ne vi si tranchant fer de lance
Mes sanblant au chant de la seraine
Dont la douçours a tant dolours et paine. -
Si puisse je sentir sa douce alaine
Et retenir sa simple contenance
Que je desir s'amour et s'acointance
Plus que Paris ne fist onques Elaine
Et s'amour n'est en moi trop vilainne
Ja sanz merci n'em ferai penitance
Car sa biauté et sa tres grant vaillance
Et li biaus vis ou la vi prumeraine
M'ont .c. soupirs le jour doné d'estraine. -
Car sa face qui tant est douce et bele
Ne m'a laissié c'une douce pensee
Et celle m'est au cuer si enbrasee
Que je la sent plus chaude et plus isnele
C'onques ne fu ne brese n'estincele
Si ne puis pas avoir longue duree
Se de pitié n'ai ma dame navree
Quant ma chançon li dira la nouvele
De la dolour qui pour lui me flaele. -
Chançon va t'en a Archier qui vielle
Et a Raoul de Soissons qui m'agree
Di leur c'Amours est trop tranchant espee.