Roger d'Andeli

Edition: Jean Beck. Anthologie de cent chansons de trouvères et de troubadours des XIIIe et XIIIe siècles. Philadelphia: 1937. P. 46.

R997: fol. 223r^o - v^o
.xxviiii.

^{image du manuscrit}

1.   Ja por ce, se d’amer me doel,
        Ne laisserai que je ne chant;
        Qar plus hai mal qe je ne soel
        E bien me confort en chantant.
        Qar maintes foiz faz bel semblant
        Que je sui dolens e mariz;
                 Si c’a mes diz
        Puet l’en bien can sui esbaïz,
           Conoistre par usaige
   C’une dolors s’est mise en mon coratge
   D’un pensament, dont maintes foiz m'avient,
   Que je di ce dont al cor me sovient.

2.     Cis mals et cis pensers me vient
        De lai ou je morrai soffrant;
        Mais a soffrir le me covient,
        Quar ma dame n’a nul talant
        De moi aider mien escïant,
        Se por moi ne la veint merciz.
                Mais uns respiz
        Me conforte, dont soi traïz,
           Qu’en tant est preus e satge,
   E tant conoist e set de mon coratge:
   Quant delaiant me dist ce qe je voel,
   Mort m’a ses sens et traï m’ont mi oel.

3.     Tant eu de mal qu’encor m’en doel,
        Qant al partir li ving devant:
        E jo quidai si cun jo soel,
        Merci proier, mais en plorant
        Ne peu dire: "A Deu vos comant."
        Si me fu li parlers failliz,
                 Pois qe partiz
        Me sui, ne su /fol. 223v^o/mes chans oïz.
            Ne ne plains mon damatge
   Ains ai amé ensi, sanz cuer volatge,
   Et amerai e se mals m’en avient,
   N’est pas amors dont adés me sovient

4.     De li nuls confors ne me vient,
        Ne d’aillors mie nel demant;
        Bien voi que morir me covient
        Sans oie avoir en atentant.
        Qe al mals que joi porte tant
        Ne puet estra sanz mort feniz.
                 Mais se gariz
        Estoie, plus fusse enrichiz,
             Que nuls de mon parage
   De lui amer saz folie et oltrage
   Por que l’am tant por ce c’amer la voel,
   Je n’en puis mais, cho me firent mi oiz.

5.     De trop longe atende me doel
        E plus de ce qu’en mon vivant
        Ne veirai, ja si cum jo soel
        Son bel vis cler, fres et riant.
        Hé las! trop la voi resloignant,
        N’ainc rien ne fis si a enuiz.
                N’iert als travals*,
        Quar nuls deliz [-4]
            Ma dolor n’asoatge;
   Si me merveil, s’en trestot mon aage
   Entre tans mals alcuns biens ne m’avient;
   Hé las, coment puis que li non sovient.

6. Cum esbaïz par de bon seignoratge
   E fui mon bien e mon damatge voel:
   Hé las, ja mais ne la veront mi oel.

retour à l'index

haut de page