Chansons anonymes

Edition: H. Petersen Dyggve, Moniot d'Arras et Moniot de Paris. Edition des chansons et étude historique. 
MSNH XIII (1938) [HPD]

Suivent les chansons R13, R23, R449, R516=518, R559, R640, R752, R892, R919, R1196, R1452, R1632, R1729, R1793, R1835, R1897a, et R1916.

R13: fol. 217v^o-218r^o
.iiii.
HPD p.128

^{image du manuscrit}

1. Quant li douz tens s'asoage,
   Deu douz mois d'avril entrant,
   Chevauche [........................]
   [..................] rive resbruiant.
   Si com j’aloie pensant
   Oï dedenz un boscage
   Une voiz qui son damage
   Plaint et regrete en chantant
   Et disoit si doucement:
   « Amors m’ocit et tue.
   Aprenez a valoir, amis,
   Ou vos m'avez perdue. »

2. Droit vers la forest ramage
   M’en vois, quant j’oï le chant,
   Plein de joie en mon courage
   Et de bon apensament,
   S'entroï de maintenant
   Une dame simple et sage
   Et une vielle d’aage,
   Qui la chastie et reprent.
   Cele respont maintenant:
   « Deus, qu’en ferai?
   Vos diroiz quanqe vos diroiz,
   Mes j’amerai. »

3. Trop dout que ne face outrage
   Por quoi n’ose aler avant,
   Descendi desoz l’ombrage
   D’un ramé pin verdoiant.
   La bele disoit sovent:
   « Certes, ja por mon lignage
   Ne por mon mari sauvage
   Ne por nul chastoiement
   Ne lairai mon ami gent,
   Qe Deu tot a li m’otroi;
   Ja ne partirai d’amors / fol.218r^o
   Ne bone amor de moi. »

4. En pré sor l’erbe menue,
   Lé l’arbre ou j’estoie assis,
   Est la tres bele venue,
   C’onques garde ne m’en pris.
   Salue la, plus ne dis.
   Elle respont irascue:
   « Sire, joie m’ont tolue
   Felun de mauvés païs,
   Mais il n’ont pas mon cuer pris,
   Qu’amors l’a en sa baillie:
   Mon cuer a bone amor quise
   Tant q’il l’a a sa devise. »

5. « Sire, la vostre venue, »
   Ce dit la bele au cler vis,
   « A ma dolor descreüe,
   Lealment le vos plevis. »
   D’un doz penser li enquis
   Dun sovent palist et mue.
   E vos la vielle chanue,
   Don je fui si entrepris
   Que seur mon pors congié pris
   E dis: « Dame, a Deu soiez vos.
   Je n’os parler devant la gent a vos,
   Car cil qui rien n’i ont en sunt jalos. »

6. « Lasse, or sui je deceue, »
   Ce dist la vielle, « or vaut pis.
   Il [...] bien pene perdue 
   De .ii. amanz fere eschis.
   Dites, fu ce vostre amis? »
   « Oïl, voir, il m’a veüe
   Et si m’eüst retenue,
   S’il ne cuidast que mon pris
   Fust par vos ariere mis. »
   « I1 est droiz, je m’en repent.
   Oniz soit qui changera
   Bone amor a son vivant. »

Retour à l'index

R23: fol. 230v^o (unicum)
[LXIII]
HPD p.173

^{image du manuscrit}

1. Bien emploie son cuer et son corage
   Qui bien vos sert, douce virge Marie,
   Car il n’a pas en vos servir servage,
   Ainz est plus haut qui plus se humelie;
   Et quant est plus de servir volentis,
   Doce dame debonaire et gentis,
   Tant li sera mieus sa painne merie,
   Lors quant chascuns avra mestier d'aïe.

2. Douce dame, dou dozime lignage,
   La cui doçors tout le mont rassassie,
   Par vos nos pert la regions ombrage
   Ou plus part cil qui plus s'i humelie.
   Par vos vivons, par vos faut noz essius,
   Par vos somes geté de toz perius,
   Car vostre filz, clere estoile, nos guie
   A la feste dont l'en ne se part mie.

3. Douce dame, ploree en l'ermitage,
   Vos estés molt signoriment florie,
   Qant Deus nasqui de vos en pucelage,
   Dont lui et vos toz li mondes mercie:
   Lui, quant il fu si debonaire et piz
   Que por nos vost devenir vostre fiz;
   Et vos de ce humile et aparillie
   Fustes por estre et sa mere et s'amie.

4. Roïne, a cui li angeli ont fait homage, 
   Et coronee de corone de vie,
   A jointes mains, plorant, vos rent mon gage
   De ce que ge si pou vos ai servie.
   Trop ai esté vers le munde bahiz
   Et il de moi trop a esté bailliz.
   Or voill oissir fors de sa main burnie:
   Recevez moi, gloriose Marie.

Retour à l'index

R449: fol. 225r^o (unicum)
xxxviiii.
HPD p.159

^{image du manuscrit}

1. Quant jo voi le dolç tans d'esté
   Venir, che cantent roscenaus,
   Adonc a Amors poesté
   Plus seur bons che seurs desloiaus:
   Molt par ont ceste siecle amusé;
   Nus ne se puet tenir a aus.
   Dame, si vos gardez de çaus!

2. Tant a en vos sens e belté:
   Por Deu, ne soiés comunaus
   A tel gent com vos ai nomé;
   Vostre ami jetés de travaus.
   Trop ai lonc tans cest fais porté
   D'ensi vivre, que m'est noaus;
   Si par vos mor, donc serai saus.

3. A ço pert que j’ai tant amé:
   Dame, si jo fusse des faus
   Jo eüsse ma volonté,
   Mais miels aem vivre con loiaus
   E mel voil vos recovrer,
   Por plus alegier de mes maus,
   Che gahagner por estre baus.

[Suivi d’un blanc]

1. Bien mostre Diex apertement
   Que n’ovron mie a son plaison* plaisir, [+2]
   Quant si vilment nos lait honir
   En Albigois ou a tel gent
   Qui de nului ne se defent
   Qui en chanp les puisse tenir.
   Or i sunt mort nostre parent,
   Et nos font la terre gerpir.

2. Trop vit clergiez desloiaument;
   Par tot lo mont voi Deu traïr.
   Sa grant besogne fist perir
   Outre mer, n’a pas longement,
   Que nostre haut conquierement
   Fist tot en perte revertir.
   Encor m’en met ou jugement
   Au boen roi qui n’en doit mentir.

3. D'umilité n’i a noient;
   Lor orguel ne puet nus sofrir.
   Tot vuelent lo monde saisir
   Par lor escomenïementz.
   Tant ont avoir et tienementz
   Qe par rober, que par tolir,
   Que chascuns vuet ce qu’il enprent, / fol. 219v^o
   Soit torz, suit drois, faire fornir.

4. E Dieus! tant metent malement
   Ce c’unt des morz ensevelir
   En lor garces paistre et vestir,
   En boivre et en maingier trop sovent. [+1]
   Il deüssent tant seulement
   Lor lase vie sostenir,
   Et le sorplus par boen talant
   Au besogneus Deu departir.

5. Rome, don nostre loi descent,
   Nos par fait del tot esbaïr,
   C’a son hués veaut tot retenir
   Ce que por pechié nos deffent:
   Par loier asot et asopent*, [+1]
   Et vant ce que Deus rove ofrir
   Et Marie si pres parent
   Que la loi no doit consentir.

6. Deus les tut toz ou les ament,
   Si qu’il nos puisse garantir;
   Ou se ce non, percheinement
   Nos convendra sanz loi morir.

Retour à l'index

R752: fol. 225v^o
.xli.
HPD p.160

^{image du manuscrit}

1. Je ne cant pas por goie che jo sente,
   Mais en cantant voel ma dolor covrir.
   Car des or mais no voil metre m'entente
   En joie avoir, mais en dolor sofrir,
   Tros c'a cel tens che verrai raverdir
   En altre estré l'aiglestier e la mente:
   Ne sai s'adonc m'oserai resjoïr.

2. Jo servirai, ne cuit pas que me mente,
   Celi cui voel son guererdon servir,
   En cui n'ai mais esperance n'atente
   Che ma dolor me doie ja merir;
   Assés sem* se jo la puis venir
   Che me pardoine ço dont la fait dolente;
   Adonc voudrai ma grant dolor fenir.

3. En li ne sai nule descovenance,
   N'ainc nus en mal ne m'en oï parler;
   Mais cil qui l'ont mis en si grant pesance
   Volent altrui que els a li meler;
   Mais s'a nul jorn me puis a li tenser,
   Saciés de fi que for false grevance
   Poent moi aidier et els poent agrever.

          [Suivi d’un blanc]

Retour à l'index

R892: fol. 223r^o(unicum)
.xxviii.
HPD p.150

^{image du manuscrit}

1. Quant je voi renoveler
   Iver contre la froidure,
   Talanz me pris de chanter;
   Ce soit par bone aventure
   Que Deux nos puise doner.
   Doi je donc a force amer
   Celi qui n’a de moi cure?
   Toz li monz m’en doit blamer.

2. Amors, qar me conseigliez
   Que je ferai de m’amie,
   Qe je l’aim de cuer verai
   Et ele ne m’aime mie;
   Ainz a fait ami aillors,
   Trop a le cuer orgeleus.
   L’amors n’est pas droit partie
   Qui s’et mise entre nos deus.

3. Tu qui consoill quiers d’amer,
   Trai tun cuer un poi arriere,
   Fai samblant d'une autre amer,
   S'en sera vers toi moins chiere
   [...................................er]
   S’ele estoit outre la mer,
   Si revendroit ele arriere
   Por faire tes volentez.

4. Qui cet consoil m’a doné
   [Li seus consaus ............]
   [.....................................]
   Ne vaut droit mes affaires [-1]
   Qu’il mi convendroit aler
   Por sun gent cors remirer,
   Les iauz vers, la boche bele,
   Le poli front, le vis cler.

5. Je chante et chanterai,
   Qar je viau bien que l’en l’oie;
   Gent qui aiment par amors
   Ount perdu solaz et joie.
   Ce font malparliere gent
   Qui nos getent si forment,
   Mais, se Dui plait, ele iert moie,
   Cele a cui mes cuers s'atent.

6. Chançoneta, qar t'en va
   [... lacune marquée par un blanc ...]

Retour à l'index

R919: fol. 229v^o - 230r^o (unicum)
[LIX]
HPD p.170

^{image du manuscrit}

1. Oez com je sui bestornez
   Por joie d’Amors que je n’ai;
   Entre sages sui fous [..... ] [-2]
   Et entre les fous assez j'ai.

2. Onques ne fis que faire dui;
   Qant plus m’aïre, plus m’apai.
   Je sui menaz et riens ne puis
   Avoir; mauvés sui et cortois.

3. Je sui müez por bien parler
   Et sorz por clerement oïr,
   Contraiz en lit por tost aler
   Et coliers por toz tens gesir.

4. Je muir de faim qant sui saous,
   Et de noient faire sui las;
   De ma prode feme sui cous,
   Et en gastant lo mien amas.

5. Qant je cheval lez mon cheval,
   De mon aler faz mon venir;
   Je n'ai ne maison ne ostal,
   Si i porroit uns rois gesir.

6. Aigue m'enivre plus que vins,
   Miel / 230r^o / me fait boivre plus que seus;  
   Prodom sui et lechierres fins,
   Et si vos dirai briement queus:
   Alemanz sui et Poitevins,
   Ne l'un tie l'autre, ce set Dⁱeus.

7. La rotroange finerai
   Qui maintes foiz sera chatee;
   A la pucele s'en ira
   Par cui Amors m'ont bestorné.
   Se li plaist, si la chantera
   Por moi qui la fis en esté.
   Et Dieus! se ja se sentira
   Mes cors de la soe bonté!

Retour à l'index

R1196: fol. 225r^o
.xxxviii.
HPD p.170

^{image du manuscrit}

1.    Amors me semont et prie
                 Che je cant,
   Mais ma dolors le ma defant.
         Si me covient che jo die
                 Son talant
   De ço dont j'ai mon cuer dolant
         Por celi che j'ai gerpie;
         E si ne cuidoie mie
         Que por nule rien vivant
         Laissasse sa compaignie.

2.      Bien me font morir d'envie
                 Li samblant
   Che si bel oël vair riant 
         Me fissent par jalosie
                 D'un covant
   C' un altre m'ot eü devant
         E dist que qrant truandie
         Fait cil qui a bele amie
         Et altre vau assaiant,
         Mains en vain* sa cortesie.

3.      Grant mister avroit d'aïe
                 Qui ço sant
   Che j'oi senti si lonjemant;
         N'encor ne me repent mie,
                 Ains atant
   Et atendrai tot mun vivant
         Por li false professie
         Che dist, cil qui merci prie
         Et onques ne s'en repant,
         Che mercis ne la faut mie.

4.      Bien est mercis oblïee
                 S'a tos jors
   Est vers moi ses merci Amors
         Che ja me fu si privee
                 Che d'aillors
   N'atendoie bien ne secors.
         Or m'est tolue et emblee
         Et a grant tort desevree
         La belle che de plusors
         Est requise et demandee.

5.      Dame, la plus onouree
                 Des meillors,
   En cui est mise tote honors,
         Bien est raisons che je hee
                 Vos valors
   Por coi de ci sui es retors
         E partis de la contree
         U la riens qui plus m'agree
         Trait les mals e les dolors
         E remaint desconfortee.

6.      Biels Confors, mal le vi nee.
         Cierement l'ai conparee;
         Tote m'est tornee en plors
         La joie qu'en ai menee.

Retour à l'index

R1452: fol. 218r^o (unicum)
.vi.
HPD p.131

^{image du manuscrit}

1. Quant voi bois e prez reverdir
   Et j’oi ces oiseauis resjoïr
        Par soir et por matinee,
        Lores me vuil esbaudar
        Por la douce savoree
        A cui n’os mun cuer joïr.

2. Ne sai se ja le vos dirai
   Le maus que nuit e jor en trai
        Por vos, blonde et acemee;
        Ja autrui ne l’apandrai
        Por nulle riens qi soi nee,
        Tant com celer le porai.

3. Dame, coment savroiz vos dunc
   Que je sui en vostre prisun?
        Ne sai, doce desiree!
        Qe Deux, que ferai je dunc?
        Morz sui, n’i voi recovree,
        Se no di* dirai li non.

4. Cuers, que ferai? Vos m’ocïez,
   Qui si tres autement amez,
        La ou je n'en os rien dire,
        N’encore ne puis parler.
        Qe ferai? Negun consire
        Ne confort ne puis trover.

5. Ma dame, qel confort prandrai?
   Morrai por vos? Si no ferai.
        Se savoiez ma pansee
        Et la grant dolont* que j’a,
        J’avroie merci trover,
        Ce croi, n’i faudroie ja.

Retour à l'index

R1632: fol. 224v^o - 225r^o
.xxxviii.* [= .xxxvii.]
HPD p.131

^{image du manuscrit}

1. Amors m’a en sa justise
   Tant m’estraint de ses liiens
   Che mes cuers en nulle gise
   Ne puet estre liges miens,
   Mais ne fera pas francise,
   Puis che jo del tot sui siens,
   Si par li de mon servise
   Lonc les mals ne me vient biens.

2. France, dolce, de bone aire
   En cui vivent tuit li bien,
   A vos seule m’estuet plaire
   Del tot et sor tote rien.
   Vostres sui, n’en puis el faire,
   Vo cuer avés e le mien,
   Par force me covient traire
   La u jo del tot me tien.

3. Coment avrai d’altra envie,
   Quant cele do tot me plaist
   A cui fine amors m’envie?
   S’amors me sostient et paist,
   Elle est ma mors e ma vie,
   Ma valors en li remaist
   Qui par la dolor devie
   Qui en li define et mainst.

4. Dame de tote onour plaine,
   Quant jo doi a vos parler
   Li sans s’en fuit de la vaine
   Qui le cuer fait tresalier;
   Voloirs al parler m’amaine,
   Mais dolors me fait cesser,
   E si me sort doble paine
   Quant mon bien m’estuet celer. / fol. 225r^o

5. Celer a la definaille
   Ne puis mie ma dolor:
   Morir me covient sans faille,
   Dame, se n’ai vostre amor.
   Vos fui a la començaille,
   Vostres serai al sejor;
   Vostre amors me done et baille
   Anui, joie, cant et plor.

Retour à l'index

R1729: fol. 220r^o - v^o (unicum)
.xvi.
HPD p.138

^{image du manuscrit}

1. Un serventés plait* de deduit, de joie,
   Comencerai au Dieu comandement,
   Qu’il nos enseint le chemin et la voie
   A li aler sanz nul encombrement.
   Alun i tuit senz et tres isnelement [+1]
   Aveoc celi qui nos apele / 220v^o/ et proie, 
   Aviauli* a sun asenblement:
   En geudun* paradis nos otroie
   A toz jorz mais por nostre salvement.

2. Jerusalem, tant es desconfortee!
   Sur toi en est le domage venu.
   Cretïentez t’a trop abandonee,
   Et le sepulcre et tenple domini
   Qui fu jadis en grant chierté tenu.
   Dieux fu en toi servie et onoree:
   Il fu en toi cloffichez et penduz.
   Or t’unt paien esillⁱe et gastee:
   Mal geredun lor en sera rendu.

3. France, doiz avoir grant seignorie; [-1]
   Sur totes riens te doit en enorer.
   Dieus terre quiert et secors et aïe
   Por sun païs de paiens delivrer:
   Por ceu a fait le roi resociter.
   Pris a la croiz por amender sa vie,
   Si s’en ira, se Deu plet, outre mer.
   Tuit si baron li feront conpaignie;
   Li cuens d’Artois ira ses oz gier.

4. Au riche roi qui France a en baillie
   Va, serventois, tun message conter,
   Quis n’oblit pas la terre de Sorie:
   Ne puet pas si lungement demorer.
   Paris lu veut en bone foi loer
   Qu’il maint ses oz par terre Romanie.
   Legierement la pora conqester
   Et baticer le sodant de Turquie;
   Poi li porra tot se monde aquiter.

5. L'emperaor face au pape acorder,
   Puis passera la mer a grant navie;
   Ne le porrunt li paien endurer.
   Tot conquerra e Turquie et Persie;
   En Babilonie ira por coroner.

6. Quant le roi de Paris fu esperdu,
   Qu’il cuidoient que larme en fut alee,
   Et quant il fu en vie revenu,
   La croiz reqit et cil li a donee
   Qui tesmoinz est de si bele vertuz.

Retour à l'index

R1793: fol. 226v^o (unicum)
.xlv.
HPD p.162

^{image du manuscrit}

1. A vos m'atent de tote goie avoir, 
   Dolce dame, sans nul altre devise,
   Ne ja nul jor n'avra altre voloir.
   Tes est mes cuers que tant vos auce et prise,
   Qu'onques ne seu amer por decevoir,
   Ains amerai tos jors en bon espoir.
   Puis que valors est tote en li asise,
   Bien me devroit mes services valoir.

2. Si m'a sospris que ne m'en puis movoir,
   Ains me sui mis del tot en sa francise.
   Or me doinst Deus que je face savoir,
   Car molt par ai alte chose entreprise.
   Grans honors m'est que me face doloir:
   Jo ne puis pas par li trop mal avoir,
   Puis qu'a li plaist qu'ele ensi m’a justise,
   Car tos sui siens, bien le sace de voir.

3. Jo n’en puis mais, si ge plaing et sospir
   Quant je ne puis veïr ma delivrance,
   Ne ne m'en sai enquor a coi tenir
   De ceste amor vers cui je n'ai poisance.
   Or me laist Deus tant amer et servir
   Q'ancor soie sire de mon desir,
   A son voloir, sans altre covenance,
   Car altrement n’en voldroie goïr.

4. Onques n'i seu ni tricer ni mentir,
   Tant prent Amors de moi greignor vengance,
   E puis q'a fait de moi tot son plaisir,
   Bien me devroit un poi estre en aidance
   Envers celi dont ne me puis partir,
   Ains en morrai, quar ne puis plus sofrir,
   Si ne sai mais en cui n'aie fiance,
   Puis qu'el m'ocit quant plus l'aim e desir.

5. *Cançons, va t'en la ou je n'os aler, *[lettrine manque]
   Qar tant redot cels qui ne m'aiment mie,
   Ne jo ne voel qu'il sacent deviner
   Ço que jo pens, qu'il morroinz d'envie.
   Se ma dame me volt goie doner,
   Ja ne m'enquier de son service oster,
   Ains l'amerai tos les jors de ma vie,
   Car trop i a por c'om li doit amer.

Retour à l'index

R1835: fol. 220v^o (unicum)
.xvii.
HPD p.141

^{image du manuscrit}

1. Molt lieement dirai mon serventois,
   Cai* j’en truis bien en mun cuer l’achoisun.
   Li Poitevin, li Gascun, li Anglois,
   Li cuens Raimunz et li rois d’Aragun
   Unt mal joü de leur enprisiun.
   Par devers aus est tornez li sordois.
   Diux, gardez nos le seignor des François,
   Charle et Anfor et le Conte d’Artois.

2. Molt fist li Cuens de la Marche que fos
   Qui mit sun cors et sa terre a bandon
   Contre le roi: ce fist il por le los
   De sa femme, qui ne quiert se mal non.
   Mes l’on li a si pelé le grenun
   K’a toz jorz mes en iert pis a ses oir.
   Diux, gardez nos.

3. Li Poitevin, li Gascon, li Anglois,
   Garderent mal le pont de Tailleborc,
   Que malgré aus i passerent François
   Et chacerent et mitrent en retor:
   Dusq’en Seintes n’i firent huncq estor.
   Et sachoiz bien, la fu pris li Barois.
   Diux, gardez nos.

4. La bataigle le Conte Boloigneus
   Vint premieren a cel assemblement.
   Molt i fu prués Raos de Clarmontois;
   Cil de Pontis i conqist los molt grant.
   Dusqu’a portes les menerent batant.
   A mie nuit s’en foï li lor rois.
   Diux, gardez nos.

5. Aprés çaus vint Ansiau de Triaigniel
   Et ses conpainz Heraz de Valeri,
   - Bien fu armez chascun sur un morel -
   Cil de Beaujeu et Uges d’Antegni.
   Lors furent bien b* Anglois envaï:
   En la vile les mistrent suer lor pois.
   Diux, gardez nos.

6. Molt fist li rois que pruez et que vaigllanz,
   Li Cuens d’Artois et li Cuens de Poitiers,
   Qui monterent por seqeurre lor gent
   Armé de fer sur les corranz detriers.
   Li messagier avrunt mauvés loiers
   Qi le dirunt le Conte d’Aubigois.
   Diux, gardez.

7. Mum serventois envoi au Chanpenois
   Et Archabaut, aus Seignor de Borbun,
   Et au Flamanz et au Conte de Blois
   Et a celi qui tient Biaune et Digun,
   Q’envers le roi ne pensent se bien non;
   Loial soient, si ferunt que cortois.
   Diux, gardez nos.

Retour à l'index

R1897a: fol. 224v^o (unicum)
.xxxvi.
HPD p.153

^{image du manuscrit}

1.   A l'entré de la saison, 
        Che li tans soés s’esclaire,
        Che cantent cist oiselon
        E pensent a joie faire,
        Donc voill que la moie paire.
   Cele ch’est bele oltre raison
   Me comande a faire cançon.

2.     Si n'en puet mentir nus hon
        Qui sa belté vuelt retraire.
        Bele boce, bel menton,
        Oëls rians, de bon aire,
        Si bels cum Deus les sot faire,
   E si mist s’entention
   Ch’en un an ne fist s’ele non.

3.     En par ço sin sui joians
        Che ja por mal que jo sante
        De li amer loialmans
        N’ai valoir que m’en rapante.
        Car tant doit Amor par rame*
   Qui vuelt estre verais amans,
   C’a nul jor ne soit repetans.

4.     Dame, cant je plus remir
        *(Loialmans n’ai valoir)* [vers suppl.]
        Vos vairs oels e vos samblance,
        Che jo plus aim e desir,
        Mais tant redot la faillance
        Dont sui en cele esperance.
   Car maint home ai veü goïr
   En bon espoir de [...] s[er]vir. [-1]

Retour à l'index

R1916: fol. 218v^o (unicum)
.viii.
HPD p.133

^{image du manuscrit}

1. Quant noif remaint et glace funt, 
   Qe resclarcisent cil ruissel
   Et cil oisiel grant joie funt
   Por la doçor des tens novel,
   Et florissent cil arboisiel
   Et tuit cil pré plain de fluer sunt,
   Et fine Amor re* mi semunt
   Que je face un sonet novel.

2. Un main suer mon palefroi munt,
   En mai quant chante cil oisiel,
   Si ai trové au pié d’un munt,
   Chapel faisant en i. prael,
   La fille au seignor d’un chastel,
   La tres plus belle riens del munt
   De cors e de vis et de front,
   En blanc chainse et en ver mantel.

3. Je la salue. Ele respont
   Et1aisse a faire sun chapel:
   « Sire, Deux grant joie vos doint
   De la riens dun plus vos est bel;
   Et a çaus doint Deux lor avel
   Qui vers dames leiaus cuers unt,
   Et cil qui bone amor defont
   Soient oni, Deu en apel. »

4. « Ma doce dame, je le croi,
   Qar maint mal m’unt fait gileoz,
   Et sachoiz bien que de lor loz [loi]**
   Ne sui je mie, ne des lor; [-1]
   Je n’amai unques tricheor.
   Mais faites vostre ami de moi,
   S’avreiz trové en bone foi
   Dedenz fin cuer leial amor. »

5. « Danz chevalier, parler vos oi,
   Ce m’et avis de grant folor,
   Qar en tot cet païs ne voi
   Pucele de tant bel ator
   Ne dame de si grant valor
   Qui mieuz amee soit de moi.
   Por ce celi fausser ne doi
   Qui m’aime senz cuer gileor. »

6. Ja de celi que mon cuer a
   Ne partirai mai a nul jor.

7. A mes premieres amors me tendrai,
   Et quant eses* me faudrunt, si morai."

   ** ajouté par une autre main

Retour à l'index

haut de page