Edition: A. Pinguet. Les Chansons et pastourelles de Thibaut de Blason. Angers, 1930.
R584: fol. 228vo - 229ro
[LV]
-
Quant se resjoïssent oisel
Au doz tens q’il voient venir,
Vi dos dames soz un chastel
En un pré floretes coillir.
La plus joenere se plaingnoit
Et a sa compaigne disoit:
« Dame, consau vos quier et pri
De mon mari qui me mescroit,
Et si n'i a encor de quoi,
Q'onques d'amors n'oi /fol. 229ro/ fors le cri. /
A tort sui d'amors blamee,
He Deus ! si n'ai point d'ami. » -
« Consel vos donrai bon et bel
Por le jalos faire morir,
Qe vos faciez ami novel:
Jonc dame ne se doit tenir
Nule dame qui joene soit,
Por son mari laissier ne doit
(Poi riens q’ele ne face ami)* [vers suppl.]
Et vos avez cors soignori,
Et gras et graisle et lonc et droit:
S'uns bachelers de vostre androit
Vos prioit, s'en aiez merci.
Mal ait qui por mari
Lait son loial ami ». -
« Or m'avez bien consel doné
Selonc mon cuer, se Deus me saut.
Or ne me tendroie a nul fuer,
Car qui n'aime mout petit vaut,
[...........................................]
[...........................................]
[...........................................]
Uns biaus bacheliers me prioit,
Or le desir, or le covoit,
Or li otroi m'amor des ci.
Toz li mons ne mi garderoit
De faire ami. -
A tant ez vos un chevalier
Maintenant par les prez venir
Sor un palefroi chevauchoit
Et si venoit de grant aïr
Qui joenes et mout biaus estoit.
Qant andos les dames connoist
A pié do cheval descendi,
Et cele qui s’amie estoit,
De tant loing com ele le voit
Andos ses biaus braz li tendi:
Ensi doit en aler a son ami
Et plus mignotement que je ne di.. -
S'onques li fist mal et dangier
La bele, bien li sot merir
Et de baisier et d'acoler
De solacier, de conjoïr,
Cele qui toz les biens savoit,
Petit et petit l'esloignoit
[..................................]
Et cil avoit qanqu’il voloit
Q’entre s'amie estoit [-2]
[...................................].
[refrain]