|
Retour à l'index
Blondel de Nesle
Edition: Lepage, Yvan G. L'oeuvre lyrique de Blondel de Nesle. Paris:
Honoré Champion, 1994.
Suivent les chansons R120,
R482, R1227.
R120: fol. 224ro .xxxiii.
image
du manuscrit
-
S'Amors veult que mes chans remaigne
E la bele le me deffent,
Qui mon cor anguisse et mahaigne,
Si ne quier mais avoir talent;
Mais bien voel qu’ele me destraigne,
S’ele voloit estre conpaigne
De la grant dolor que je sent;
Or li proi que pitiés l’en praigne.
-
E que de moi grever se fraigne,
Car trop m’ire et paine sovent,
Si n’est pas droiz qe m’en plaingne
S'amors fait son comandemenz;
Puis que li a amer m’ensaigne,
Bien feroit - mais ele ne daigne -
Se tant m’aftiast* veraiement
Com sil me firent ensaigne. [-1]
-
Certes, ja plus ne l’en queroie;
Car a tant porroie garir
Del grant mal que si m’afebloie
Che mes cuers n'en puet plus soffrir;
Si m’est bel qu’ele me gerroie,
E se de tel mal refusoie,
Ja mais ne devroie joïr
De [.. blanc..] la dolors che moie. [-2]
-
Can de re q’eu sofreiz de cuer e proie, [+2]
Veit ore dont poi de bien venir; [+1]
Ja Deus ne doinst que je recroie
Qels mals que m’en doie avenir.
D’un dolz regart me fist la voie,
Des vaus cels que ses cuers menoie;
Si m’ont deçeü par mentir,
Trop fent semblant, que je les croie.
Retour à l'index
R482: fol. 217ro-vo
.ii.
image
du manuscrit
-
Bien doit chanter cui fine amors adrece
De joie avoir, mes pas ne m’en semont,
N’en moi ne truis ne joie ne leece
Por quoi je chant, ne ne sai dire dunt.
Et ne porquant, se le mal ne despont,
Qu’entre ma dame et fine amors me font,
Bien puis morir, ja ne le savesont,
Se par mon chant ne sevent la destrece,
Ou par mon vis, don la color me font.
-
Ne m’a rescous faintise ne perece,
Que ma dame ne m’ait navré parfont
D’un douz regart, don la plaie me blece,
Qu’ele me fist des biaus euz de son front.
Ne puis guerir, se mire ne m’en sunt
A l’aïde de sun cuer, qui confont
Moi et le mien, qui plus l’aim en cest mont
Que estre rois de la plus grant hautece,
Se Deus joie ne guerredon m’en dont
-
Ja por dolor que j’aie n’iert jus mise
Ma volentez d’amer veraiement,
Car j’ai un cuer qui de loing l’a enpris
E n’onques por ce n’amai meins lealment, [+1]
Car je sai bien que faillir a sa gent
Ne doit amors, se droiture ne ment;
Mes plus done dolor a un qu’a cent.
Las! je sui cil qui plus grieve et jostise,
Mes c’est auques per mon commencement.
-
Que j’ai dolor! mes pas ne fust asise
En car ou cuer aime tant finement;
Mais de tel leu m’est venue o tramise,
Dont je ne doi refuser le torment.
Bien funt amors de moi tot leur talent
E esperance a ma dame ensement;
Tant m’engignent entr’eles dout*ement;
Mes je ne sai s’il avront couvoitise
De rendre m’en nul guerredonement.
-
Molt fu amors corageuse et ardie,
Qui en mon cors vint ni que cuer assaillir; [+1]
Et si ne fu, qu’ele n’i venist mie
S’ele cuidast qu’ele i deüst faillir;
Mes tant conoist volenté et desir
Qui de mon cuer ne se puet departir,
D’un doz re / 217vo/
gart fist verge a moi ferir;
Las, mar la vi de si biaus euz garnie,
Se ma dame nel fist por moi guerir.
-
Por coi j’ai si tote autre rien haïe,
Bien li devroit de moi resovenir,
Car il n’est maus dolors ne vilenie
Qui ja mais jor m’en doie departir.
Por ce devroie a grant joie venir
Se lealté valoit mieuz de traïr,
Et s’amor veut ses biens a droit partir;
Mes en li est pitié si endormie
Qu’ele ne veut ocirre ne gerir.
Retour à l'index
R1227: fol. 227vo -228ro
[L]
image
du manuscrit
-
Qant je plus sui em paor de ma vie
Et je mains doi par raison estre liez,
Lors me semont ma volentez et prie
Et fine amors que je soie envoisiez.
S'ele m'ocit, siens en iert li pechiez;
Trop a douz nom por faire vilonie;
Et se g’i sui par mes ieuz travilliez,
Dont la vi,
Q'en doi je li
Demander fors merci?
Puis que par moi sui de joie esloingiez,
Je ne ne m' en doi plaindre mie; [+1]
Coment qu'aie esté iriez,
Docement sui engingniez.
-
Amors, mar vi ceaus qui vos ont traïe,
Qant vos vert moi vostre duel en vengiez;
Je ne cuidai envers vos deservie
Nule chose dont deüsse estre iriez.
Mon cuer avez, pieça n’en fui aidiez,
Ainz m'a laissié pour vostre compaignie.
Mais, s'il vos plaist, cruelment m'essaiez
A ami,
Car ja de mi
Ne ferez enemi.
Et, s’il vos plaist, de moi merci aiez,
Et se vos avez anvie
Que si fort me destraingniez,
Mar vi biautez sanz pitiez.
-
Amors, di li que mar vi assemblee
Tant de biauté com ele me mostra
En sa face et bele et coloree,
Dont li orguels en son cuer s’en ala,
Qui son ami ocire li fera.
S'amor m’i doint avoir longue duree,
Car c'est la riens en cest mont qui plus tost
A sané
Home navré
De si grant anferté
Com je sui plains - bien ait qui me navra!
Tost m'avra guerredonee
La dolor, qant li plaira
Et pitiez l’en prendera.
-
Unques mais cuers, en voloir n’en pensee,
Envers dame si bien ne se prova;
Si ne sai pas coment puist estre amee
Cele d'autrui qui son cuer n'amera.
De mon cuer l'aim, qui por li me lessa;
Et nomporquant ainc n'i ot dessevree,
Q'entierement avoec li s’en ala
De sen gré.
S'ele m'a grevé, [+1]
C'est a ma volenté:
Que ja ma dame reprové ne sera, [+1]
S’en sera espoir blasmee,
Mais nelui n’en pesera
Plus de moi, qant ce sera.
-
Par grant esforz ai la dolor vaincue,
Qui me quida de ceste amor torner;
Si ne di pas qu'ele en soit recreüe,
Que chascun jor ne m’i face grever,
Ma doce dame, et por moi esprover,
Si que g’en ai toute joie perdue,
Si que g’en ai nul cuer d’autrui amer
Ne servir.
Ne deservir
Ne puis par mal soffrir
Que la paine voeille guerredoner,
Que j’ai tant por li eüe;
Ne sai se merci trover
Porrai en son cuer aver.
-
Merci non voir trop m’est chiere vendue;
Qant per morir la m’estuet achater.
Joie or de li, si la m'a retolue;
Riens n'i a mis q'ele n’en voeille oster,
Fors volenté, q'ele n’em puet geter,
Q’el me dona, ancor ne l’ai perdue,
Ne ne ferai tant com puisse durer.
Ainz desir
Q'a mon plaisir
Puisse de li joïr,
[............................................]
[...................................]
Et puisse amors recovrer,
Com je di voir sanz fausser.
-
Coment que
soit ma joie defenie, /
fol. 228ro
Anc do vivre ne fai jor anuiez,
Mais or voi bien que la morz me maistrie,
Mout i a bien ses travaus emploiez,
Q’a mon voloir ai esté angigniez.
Or sont cil lié qui de moi ont anvie;
Et se g’i sui par aus riens empiriez,
Je lor pri
Et si lor di
Qu' il proient Deu por mi,
Car je sui trop de grant mesfait chargiez
S’en seroit m’ame perie
Puis q’a bon droit sui jugiez
Dieus praingne vos en pitiez.
Retour à l'index
haut de page
|