-
Amor, qui m'a tolu a moi
N’a li ne me vuelt retenir,
Me plaing issi qu’adés otroi
Que de moi face son plaisir;
E si ne me rapuis taisir
Que ne me plaing e di por qoi,
Qar cest qui ja traïssent voi
Sovent a lor joie venir,
E g'i faill por ma bone foi. -
S'amors por essaucier sa loi,
Velt ses anemis convertir,
De sens li vent, si con je croi,
Qu’a siueis ne puet elle faillir.
Je, qui ne me puis recoillir
De celui vers cui me soplei,
Sien cuer, qui mien fu, li envoi;
Mais de nient le cuit servir
Se ce li rent que jo li doi. -
Onqes del bevrage ne bui,
Dont Tristans fu enpoisonez,
Mais plus me fait amer que lui
Fins cuers e bone volentez.
Tos en doit estre miens li grez,
Qant de rien esforciez n’en sui,
Fors de tant, que mes del* en crui,
Par quoi sui en la voie entrez,
Dont ja n’istrai, n’ainc n’i recrui. -
Dame, di ce que vostre hom sui,
Dites moi, se gré m’en savez?
Nenil, se j’onques vos conui,
Ains vos poise, que vos m’avés.
E puis que vos ne me volez,
Donc sui jo vostre par anui;
Mais se vos devez de nului
Merci avoir, si me sofrés,
Qar je ne puis servir altrui. -
Cuers, se ma dame ne t’a chier,
Ja por ce ne t’en partiras;
Tos jors soies en son dangier,
Des qu’enpris e comencié l’as.
Ja, mon les, planté n'en feras,
Ne por cier tans ne t’esmaier.
Bien adolcist par delaier,
Et quant plus desiré l’avras,
Tant iert plus dols a l’acointier.
Edition: Marie-Claire Zai. Les Chansons courtoises de de Chrétien de Troies. Berne, Franfort: 1974
R1664: fol. 224ro
.xxxii.