Pierre de Molins

Edition: H. Petersen Dyggve. "Pierre de Molins" dans Neuphilologische Mitteilungen XLIII (1942): 62-91.

Suivent les chansons R14, R1429.

R14: fol. 228v^o
[LIV]

^{image du manuscrit}

1. Quant foillissent li boscage,
   Que pré sont vert et flori,
   Et cil oiseillon sauvage
   Chantent au doz tens seri,
   Las! et je plaing mon damage,
   Qant plus chant et joie et ri
   Mains ai joie en mon corage;
   Ensi me muir por celi
   Qui n’em puet avoir merci
   Si ne m’en tieng pas a sage.

2. Se ge connois mon folage;
   Moi que chaut? Bien sai de fi
   Qu'Amors a tel seignorage
   Qu'il le m'estuet fere ensi.
   Je sofferrai mon aage,
   Ne sai se ja m’iert meri
   La bele, la proz, la sage,
   Por [qui] j’ai solaz guerpi,
   Dont fine amors m'a traï
   Qui m'ocist en son homage.

3. Amors en vostre servise
   M’avez mis en nonchaloir.
   Si sai bien q'en nule guise
   Ne m'en porroie movoir;
   Faire m'estuet a devise
   Qanqe voet voz doz voloir.
   Mis sui en vostre servise
   Loiaument senz decevoir.
   Mais ne me puis perchevoir
   Qe joie mi soit tremise.

4. Molt ai en li pitié quise
   Onques ne la pou avoir,
   Dieus, s’en li ne l'avez mise
   Qui tout le mont doit valoir.
   Bien avez ma mort porquise,
   Et quant plus me desespoir
   Adonc m’assaut et atise.
   Sa biautez et mon voir [-1]
   [..................................]
   Qui m’on mis a mon juise.

retour à l'index

R1429: fol. 222r^o - v^o
.xxiiii.

^{image du manuscrit}

1. Chanter me fat ce dun crien morir,
   Loial amor et doce desiree,
   Si me mervoill coment puet avenir
   Que ma morz est la riens qui plus m'agree.
   Tant a dolor a me maus sostenir
   Qant plus m’ocit adés et plus i bee.
   Dieux! verai ja la premesse avoiree
   Dun fine amors mi deüst enrichir?

2. La premesse m’et tornee en faillir,
   Esperance s’en est de moi alee;
   S’ensi la pert, ne sai que devenir.
   Haï! dame, si dure destinee,
   Qant nul confort ne puis de vos oïr.
   Dunc est m’amorz esprise et alumee
   Repentanz sui qant vos dis ma pensee,
   Qant per ce pert dun deüsse joïr.

3. Et non porquant ne se doit esbaïr
   De mal avoir cil qui a servir bee.
   Q’assez am mⁱauz lunge paine soffrir
   Q’un tot soul jor l’eüsse obliee;
   Tant finement vos aim et vos desir,
   Qe ja sanz mort n’en sera mais ostee
   La doce amors qui ou cuer m'est entree;
   Ne sai se ja le me vodroiz merir.

4. Doce dame, por cui plang e sospir,
   La plus vaillant qui soit de mere nee,
   De vos ne puis nuit ne jor departir,
   Et por vos ai tote joie obliee.
   Por Dé vos pri s’il vos vient a plaisir
   Que vostre amors fine mi soit donee,
   Q’en la meillor doit bien estre trovee
   La grant pitiez dun merci doit venir. / fol. 222v^o

5. Unques ne soi amer a repentir,
   S’en ai portant mainte poine enduree;
   Qar j’ai un cuer a amors meintenir
   Fin et loial, doce dame ennoree.
   [ ..lacune de 4 vers marquée par un blanc ..]

6. Par Dé, Noblet, la merci conparee
   Vaut miauz asez et est plus desiree
   Que dons qui est donez senz deservir.

retour à l'index

haut de page