Moniot d'Arras et Moniot de Paris

Edition: Holger Petersen Dyggve. Moniot d'Arras et Moniot de Paris. Edition des chansons et étude historique.
MSNH XIII (1938).

Suivent les chansons R94, R490, R727, R739, R1087, R1135

^{image du manuscrit}

1.   L’autrier en mai,
        Au douz tens gai
   Que la saisons est bele,
        Main me levai,
        Joër m’alai
   A une fontenele.
        En un vergier
        Clos d’aigleintier
   Oï une vielle;
        La vi dancier
       Un chevalier
   Et une dam* [moiselle].

2.     Cors orent gent
        Et avenant,
   Et molt tres bien dançoient!
        En acolant
        Et en baisant
   Molt bel se deduieient.
        Au chief de tor,
        En un destor,
   Doi et doi s’en aloient;
        Le jeu d’amor
        Desus la flor,
   A lor plaisir faisoient.

3.     J’alai avant,
        Molt redotant
   Que ne d’aus ne me voie,
        Maz et pansant
        Et de[si]rant
   D’avoir ausi grant joie.
        Lors vi lever
        Un de lor per
   Di si loin g’i estoie
        Por apeler
        Et demander
   Qui sui ni que queroie.

4.     J’alai vers aus,
        Dis lor mes maus,
   Et c’une dame amoie,
        A cui leials
        Sanz estre faus
   Tot mon vivant seroie,
        Por cui plus trai
        Peine [et] esmai
   Que dire ne porroie.
        Et bien le sai
        Que ge morrai
   S’ele ne mi ravoie.

5.     Tot belement
        Et docement
   Chascuns d’aus me rapoie,
        Et dient tant
        Que Dueus briement
   M’envoit de celi joie
        Por [qui] je sent
        Paine et torment,
   E je lor en rendoie
        Merci molt grant
        Et en plorant
   A Dé les comandoie.

Retour à l'index

R490: fol. 220r^o
.xiiii.

^{image du manuscrit}

1. Li doz termines m’agree
   Do mois d’avri an pascor,
   Que voi le bois et la pree
   Chargiee de fuigle et de flor
         Et traire en verdor
   Et j’oi chanter nuit et jor
   Oisiaus par bruille ramee;
   Mais joie eüsse greignor
   Se je fusse en la contree
   Ou cele maint cui j’aor.

2. Pieça n’i fis demoree,
   Car j'avoie grant paor
   Qu'el ne fut por moi blasmee;
   Por ç'ai fait aiglors sejor
         Tant que gengleors
   Ont enquises ne*s amors
   Aillors face demoree.
   Mais qant li plairai ricor,
   Ma joie sera doblee,
   Si avra greignor savor.

3. Je ne l’ai pas meins amee
   Por ce s’a li ne sejor,
   Mais cent tanz plus desiree,
   Q'ele est plaine de doçor, 
         Ke autre senz ator,
   [.....................................],
   Chef blunc, face coloree,
   Bien li sit toz ses atorz;
   Bele cant fu acemee,
   Bele de nuiz et de jorz.

[suivi d'un blanc]

Retour à l'index

R727: fol. 228r^o (unicum)
[LI]

^{image du manuscrit}

1. Esbahiz ai chanté sovent
   Por ma grant dolor demostrer:
   Merveille est qant de tel torment
   Puet nus senz morir eschaper
   Com j'ai sosfert si longuement
   Por servir de cuer loiaument,
   Q'ainc por mal ne m'en pou torner,
   Que tant mi plaist a remirer
   Son gent cors et som bel semblant,
   Ses vairs ieus et son doz vis cler.

2. Ne se puet pas legierement
   Retraire qui bien set amer.
   Mes cuers qui aime loiaument
   S’i voet si toz abandoner
   Qu'il ne va pas en delaiant,
   Ainz [va] toz jorz en florissant
   L'amor et plus et plus doubler,
   Si ne se doit pas esfraer;
   Fins cuers ou loiautez s'espant
   Doit a grant joie recoivre*.

3. Dame, or m'esmaie durement
   Et maintes foiz me fet penser
   Amors a cui mes cuers s'atent,
   Dont j'ai tant com plus puis porter
   Portees les ai longuement
   Et porterai tot mon vivant;
   Et autrement ne savroie amer, [+1]
   Que li faut a lui amender
   Qui bien aime et a cuer joiant;
   Nus ne l'en devroit destorber.

4. Dame, morz fusse en desirrant,
   Mais mout me sout bien conforter
   Q’en vos vi derrïenement
   Ce dont je vos oï parler.
   Un lié cuer feïstes dolant.
   Ne me porroit perte si granz
   Nule riens fors vos restorer.
   Dame, s'il ne vos doit grever,
   Por Deu ne vos praingne talanz
   De vostre home sa mort haster.

5. Certes, dame, ne sai coment
   Je peüsse senz vos durer.
   Les dolors dont j'ai sosfert tant
   Plaise vos a gerrerdoner.
   Dame, ne savroie autrement
   Amer que par comandement
   De vos qui me poëz doner
   Bien et mal ou faire demorer [+1]
   En grant joie ou en esmaiant.
   Biau m'est de voz bons achever.

6. Chançons, or t'en va maintenant
   A ma dame et li di tant
   C'onques n'osai merci crier.
   Quant la voi, tant m'estuet douter,
   Toz li cors mi va fremisant,
   En tremblant m'estuet tressüer.

Retour à l'index

R739: fol. 221v^o
.xxi

^{image du manuscrit}

1. Ne mi donez pas talant 
   De chanter li mois de mai,
   Mais amors de cui [.....]
   Uns noveaus confort que j’ai,
   Quant cele qui lungement
   M’a tenu en tel esmai,
   Recort mon servise et prent,
   Et je plus ne li quier mie.

2. Cuer et cors entierement
   En sun servise metrai.
   Bel m’et s’ele mi reprant,
   Tantot con li me ferai.
   Et quant a mun ecïent
   Sun comant trespasserai,
   Ja puis n’aie ligement
   Des maus dun je quier aïe.

3. Ne sai a coi ne coment
   M’avint que si aut pensai
   No je pris le hardement,
   Qar en moi valoir ne sai
   Qe d’amer si hautement
   Me deüst metre en essai,
   Fors amors tant seulement,
   Qui seur moi unt seignorie.

4. Amor, s’en si griés torment
   Avez mun loial cuer mis,
   Bien sai tot a escïent:
   Ja n’en eschaperai vis,
   S’a celi pitiez n’en prant
   Cui je sui loiaus amis;
   De tot sui a sun comant,
   Deux doint que ne m'oblit mie.

5. Poi mi trova deffendant
   Bone amors qant m’asailli,
   Mais sorpris m’orant avant
   Li oill dun ma dame vi
   Si tres bel et si riant
   Que maintenant li rendi.
   Mun cuer s’en fit sun talant
   Q'amors l'ont en lor baillie.

6. Chascun*, va t’en droitement
   A Johan de Braine di,
   Que j’ai molt le cuer dolent
   De ce q’il na pas le cri
   Des dames aler gilant,
   Ainz es toz en lor merci
   Si con cil quant fit amanz
   C’amors unt en lor baillie.

Retour à l'index

R1087: fol. 218v^o - 219r^o
.viiii.

^{image du manuscrit}

1. A ma dame ai pris congié
   Et gerpirai le païs,
   Qar par cui unt lor amitié
   Felun, tant s’en sunt entremis.
   Mais se li cors s’en est partis / fol. 219r^o
   Mun cuer li ai tot laisié,
   Qar unques puis n’en fu sesui
   Qe je li oi otroié.

2. De totes parz sunt gerrié
   Amant, trop unt enemis.
   Por ce doivent estre ensegnié
   Qu’il n’ait en lor faitz n’en lor dis
   Chose dun soient entrepris
   Ne de la jent blatoingné,
   Qar li medisant sunt toz dis
   *(Chose dun soient entrepris)*
   A medire apareglié.

3. Molt eut Deux a droit jugié,
   Et fut raisuns, ce m’et vis,
   Que li felun mal ensengié
   Et de vilenie suerpris
   Fusient tuit a une part mis
   Et si come larrun seignié,
   Si c’adés pareot au vis
   Les maus dun il sunt enthechié.[+1]