Edition: Emil Winkler, Die Lieder Raouls von Soissons (Halle: Max Niemeyer Verlag, 1914).
Suivent les chansons R1267=1264, R2063.
R1267=1264: fol. 219ro
.x.
-
Chançonete m’estuet a comencier
Por cele rien del mont que plus voudroie
Et por mon cuer un petit alegier,
Qui bien avroit mestier de plus grant joie,
Mais la biauté, qu'est en lui simple et coie,
Dont ma dame me fait oltrecuidier
D’un halt penser et d’un dolz desirier,
A coi par droit atandre ne devroie
Se bone amor ou pitié ne l'en proie. -
Unques ne vi tant sage a l'acointier,
Ne tant plaisant, se je dire l'osoie,
Mais je ne l'os n'esgarder ne proier,
Car cuer me faut et la langue me loie.
Tel paor ai que refusez ne soie.
Car s'un petit me faisoit de dangier
E ses biaus euz vers de moi esloignier,
Je sai por voir que la mort sentiroie
Si pres del cuer que gerir n’en porroie. -
Des que por lui m’estuet la mort sofrir,
De la dolor dont la plaie me blece,
La puist Amors par mi le cors ferir,
Si iert conpaingne de ma tres grant destrece.
Las, q’ai je dit? Son sen et sa haltece
Ne degneroit a ma dolor partir,
Ainz me covient toz seus les mals sofrir
Dont fine amors done joie e leece
Cels qui de cuer l'ont servie en tristece. -
Mieuz voill ma dame en tristece servir
Q’ele en moi truist faintise ne perece.
Ainz l’amerai toz jorz sanz repentir,
Car fin' amors m'enseingne et adrece.
Unques ne vi dame de sa jovenece
Si sagement se seüst meintenir,
Dont sont doble mi amoros desir,
E quant regart sa tres doce simplece,
Autre joie ne quier, n’altre alegrece. -
Certes si faz, mais ele est si tres grant
Qe nus par droit ne la devroit atendre,
Car je sui si de s’amor desiranz,
Cent foiz le jor me fait palir e teindre.
Or me devroit ma douce dame esteindre
La grant ardor qe j'ai el cuer dedenz
D’un feu qui m’art si douz e si plaisanz
E qant plus m’art, meins puet l'amor remeindre,
S’en doit pitié ma joie faire grant graindre.
R2063: fol. 230ro
[LX]
-
Roi de Navarre et sires de Vertu,
Vos nos dites q'amors a grant puissance;
Certes, ce est voirs et je l'ai bien seü,
Ele en a plus que n'a li rois de France;
Que de toz maus puet doner alegence
Et de la mort confort et garison;
Ce ne porroit faire nus morteus hom,
Q'amors fait bien le riche doloser
Et le povre de joie queroler. -
Amors m'a fait som pooir esprover
Plus q'a nelui, ce sachiez senz doutance,
C'onques mon cuer ne pout a ce mener
Paors de mort, dont je sui en balance,
Que toute adés n'eüsse en remenbrance
Ma doce dame et sa clere façon;
Ou de biauté truis si tres grant foisson
Que li penser m'i faisoit oublier
Dolor de mort et ma santé cuidier. -
Dieus, q'em puis ge, s'ele a mon cuer entier,
Qant tuit li bon desirrent s'acointance?
Certes, ja nus ne m'en doit chastoier
Que ja por mort n'en avrai repentence
De recorder sa tres doce semblance.
Et quant j'avrai de ce confession,
Ne me doint Dieus santé, se la mort non.
Car quant mes cors la parole perdi,
Pensoit mes cuers: "Doce dame, merci!" -
Ha! je l'aim plus cent tens que ge ne di,
Si me doint Deus de mes maus alegence.
Q'ainc de mes ieus tant bele riens ne vi,
Ne je ne nus, ne de si grant vaillance,
Et s'a adés si sage contenance,
Q'el siecle n'a losangier ne felon
Qui de li puist dire se toz biens non.
Sire, qant j'aim dame de tel valor,
Loez la moi, si ferez vostre honor. -
Longues me sont les nuiz et lonc li jor,
Que do veoir faz trop grant demorance,
S'em plor souvent et soupir de paor
Que son ami ne met en obliance.
Or ai je dit et folie et enfance,
Q'onques ses cors ne pensa traïson,
Ainz est si bone et de si haut renom
Que ja si oeil ne m'avront angignié,
Ne ses frans cuers ne sera senz pitié.