Guillaume le Vinier

Edition: P. Ménard. Guillaume le Vinier, poésies publiées et commentées. Genève: 1970 P. 223.

R1350: fol. 219vo
.xii.

image du manuscrit

    1.   Quant les moissons sont ffailliés,
           Qe cil vallet font amies,
           Et baiseles sont vesties,
           Rabardiau font rabardies,
                Meint musart i va.
           Cil de Feugi et d’Aties
           Unt prises espringeries
           E tres granz renvoiseries
           De sons, de notes d’estrues
                Contre ceus de la.
                Mais vos oroiz ja
      Que Guioz i vint qui turelutea
        Vadeure vadeure vadeure 
       Deine vadeure vadeure va      .

    2.     Cil de Barvain les parties
           Vindrent a grant genz rengies.
           Entre beles praeries
           En loges et en foillies
                Chascun querola.
           Li ami et les amies
           Orent ceinz et sorquenies
           Et coteletes havies
           Et caifes a denz pincies.
                Chascuns s’atifa
                Si et ça et la;
      Qant Gioz i vint qui biau turelicta
        Vadeure va.

    3.     Li filz au mere d’Angrés
           Qui tant en a bargangnies
           Que cinc en a fiancies,
           Dont le fui* sont engroissies,
                Grant bruit demena
           De Guionet: granz envies
           Li prist; lors fist deablies,
           Il dance e balle a poignies
           En son chief chapel d’orties.
                Toz se debrisa,
                Mais toz les passa
      Buionetz li preuz tant biau turelicta
        Va.

    4.     O Deus toses renvoisiees
           Cointement apareilliee,
           Vint Poinçonet et Helies,
           Quant Folques, cil de Poingnies,
                Vers eus s’ovança;
           Des poinz lor a arrachies!
           Eles n’en sont mies liees,
           Ainz en sont molt esbaiadies
           Et s’en sont si corrocies
                Que l’une en plora.
                Tost la rapaia
      Guionez li proz tant biau turelicta
        Vadeure.

    5.     Antoines et Acaries
           Cosins Poinçonet d’Aties
           Jurent les saintes hasies
           Qe Folqes, cil de Poignees,
                Encor conparra.
           Qant Guiat *et les foiles*
           Lors comencent melodies,
           Notes et espringeries,
           Si que lor melanconies
                Totes rapaia,
                Tant biau turelicta [+1]
      Guionet de totz le pris enporta.
        Vaudeure vaudeure vaudeure 
        Deine vaudeure vaudeure va      .

retour à l'index

haut de page