Chansons anonymes

Suivent les chansons R227b, R752 et R1196.

R227b: fol. 139r^o - v^o
unicum (chanson incomplète)

Edition (transcription): M. Roques, "Le chansonnier français de Zagreb" dans 
Mélanges de linguistique et de littérature offerts à M. Alfred Jeanroy par ses élèves et ses amis. 
Paris: Editions Droz, 1938 (pp. 513-4).

^{image du manuscrit}

1. Hai! las, je cuidoie avoir laisé en France
   Les maus d'Amors e les dangiers morteus
   Q'eo hai sofert si logement tot seus,
   Mais je ne puis sofrir ma mescheance,
   C'or m'ont trové amaiors en homenie
   Qi m'ont repris e mis en tel prison
   Dont li çartiers est plus fort d'un lion.

2. Char li lions, qi envers lui s'umilie,
   Ne li deigne feire riens si bien non.
   Deus! qel exanple e qel recordoison
   A ceus qi ont sor autrui segnorie.
   Dame, or aiez del lion remenbrance
   Qi aus felons est fels e otrageus
   Et aus humels de bon aire e piteus.

3. Par Dieu, Amors, s'a ma dame n'oblie
   Le grant orgoil dot elle ha / tel foison, /139v^o/  image du manuscrit
   A paine puis venir a garison;
   Mais une riens me conforte et afie
   Qe son cler vis e sa simble semblance
   E si bel oil riant et amoreus
   Ne jugent pas qe li cuer soit crueus.

^{image du manuscrit}

1. Je ne chant pas por joie qe je sente,
   Mais en chantant voil ma dolor covrir,
   Car des or mais ne voil metre m'entente
   En joe avoir, mais en dolor sofrir,
   Tres c'a cel tens qe verrai reverdir
   En altre esté l’esglentier e la mente:
   Ne sai s'adonc m'osera resjoïr.

2. Je servirai, ne cuit pas qe me mente,
   Celle cui voill sanz gerredon servir,
   En cui n'ai mais ni sperance n'atente
   Qe ma dolor me doie ja merir;
   Assez sera se je la puis venir
   Qe me pardoint ce dont l'ai fait dolente;
   Adoncs voudrai ma grant dolor fenir.

3. En lui ne sai nulle desconvenanze,
   N'ainc nus en mal ne m'en oï parler;
   Mais cil qi sunt mis en si grant penser
   Vuelent autrui qe eus a lui meler;
   Mais s'a nul jor me puis a lui tenser,
   Sachiez de fi qe lor farai grevance
   Por moi aider et por lor agraver.

^{image du manuscrit}

1.  Amors me semont e prie
            Qe je chant,
   Mais ma dolor le me defant.
      Si me covient qe je die
            Son talant
   De ce dont j'ai le cuer dolant
      Por ce qeo hai gerpie;
      E si ne cuidoie mie
      Qe por nulle rien vi^vant
      Laissase sa conpaignie.

2.   Bien me font morir d’envie
           Li semblant
   Qe si bel oill, cler et riant,
      Me firent par gelosie
           D’un covant
   C’un autre mot hai? devant
      E dist qe grant truandie
      Fait cil qi ha belle amie
      Et autre vait esaiant,
      Mains en vaut sa cortoisie.

3. Grant mestier avroit d'aïe
            Qi ce sent
   Qeu hai senti si longement;
      Ne ^ancor ne m'en repent mie,
            Ainz atent
   Et atendrai tot mon vivant
      Por la fause profecie
      Qi dit, cil qi merci prie
      Et onqes ne s'en repent,
      Qe merciz ne li faut mie.

4.     Bien est merciz oblïee,
            S'a toz jorz
   Est vers moi sanz merci Amors
      Qi ja me fu si privee
            Qe d'ailors
   N'atendoie bien ne secors.
      Or m'est tollue et enblee
      Et a grant tort desevree
      La belle qi de plu / sors /138v^o/   image du manuscrit
      Est reqise et demandee.

5.   Dame, la plus honoree
            Des meillors,
   En cui est mise tot honors,
      Bien est raisons qe je hee
            Vos valors
   Por qoi de [.....] et sanz retors
      Departis de la contree
      O la riens qe plus m'agree
      Berrart les maus e les dolors
      E remaint desconfortee.

6.   Biaus Confors, mar la vi nee.
      Chierement l'ai conparee;
      Tost m'est tornee en plors
      La joie q'en ai menee.