Pierre de Molins

Edition: H. Petersen Dyggve, "Pierre de Molins" dans Neuphilologische Mitteilungen XLIII (1942): p.78.

R1429: fol. 143v^o

^{image du manuscrit}

1. Chanter me fet ce don je croi morir,
   Loiaus Amors e douce desiree;
   Si me merveill coment puet avenir
   Qe ma morz est la riens qi plus m’agree
   Tant hai douz cuer a mon mal sostenir
   Qant pis me fait adés e plus m'agree.
   Deus! verai je la promesse avree
   Dont fin’ Amors me devroit enrechir?

2. La promesse m'est tornee a faillir,
   Qe sperance s'en est de moi alee;
   Se insi la pert ne sai qe devenir;
   Haï! dame, cun dure desevree,
   Qant nul confort de vos ne puis avoir!
   Bien est m'amorz esprise et alumee;
   Molt me poise ma dure destinee,
   Qant je pert ce dont devroie joïr.

3. E noporqant ne se doit repentir
   Por mal sentir cil qi assez i bee.
   Q’assez vuel mieuz ceste paine sofrir
   Q'un tot sol jor l'eüse entrobliee;
   Qe si sovent recort et a loisir
   Sa grant biauté, fine, fresche meree,
   Qi si m'ocit coiement, a cellee,
   E geu e chant por mon pensé covrir.

4. Douce dame, por qoi plaing e sospir,
   La plus vailanz qi soit de mere nee,
   De vos ne voil ne qier ne doi partir,
   E por vos hai tote joie obliee.
   Tant finement vos aim e vos desir
   Qe ja sanz mort n'en serai mais ostee
   La granz amors qi m'est au cuer entree;
   Ne sai s’el me voudroiz merir.

5. Onqes ne soi amer ne repentir,
   Por ce n’avrai mainte pene enduree;
   Qeu hai un cuer a Amors mantenir
   Fin e loial, belle dame honoree!
   Or doigne Deus q'il vos viegne a pleisir
   Qe vostre amors fine me soit donee,
   Q'en la meillor doit bien estre trovee
   La grant mercis dont pitiez doit venir.

6. Par Dieu, Noblet, la mercis conparee
   Vaut mieuz assez e plus est savoree
   Qe dons qi est doné sanz deservir.

7. Par Dieu, Giles, dou mont la plus loee
   Anvers celli est vilanie provee
   Qe je donai mon cuer sanz repetir.