Conon de Betune

Edition: Wallensköld, A.  Les chansons de Conon de Béthune, trouvère artésien de la fin du XIIe siècle. 
Paris : H. Champion, 1921.

Suivent les chansons R303 et R1125.

R303: fol. 140r^o

^{image du manuscrit}

1. Si voirement, cun celle de cui chant,
   Valt mieuz qe totes les autres qi sunt,
   E qe je l’aim plus qe rien de ce mont;
   Si me dont Dieus s'amor sanz decevoir,
   Qe tel desir en hai e tel voloir
   D’eus, tanz e plus, Dieus en set la verté,
   Cun hom malades se desire santé, [+1]
   Desir je lui et s'amor a avoir.

2. E si sai bien riens ne ^me puet valoir,
   Tant cun fait celle de cui je hai chanté;
   Qe je hai bien veü si sa biauté,
   E si sai bien q’ele ha tant de valor,
   Qe je cuit faire outrage et follor;
   D'amer plus haut qe ne m'avroit mestier
   E neporqant maint povre chevaler
   Fait riche cuer poiar a haute honor.

3. Je pens assez ce qe je li dirai
   Mes qant je sui en present devant lui
   Je ne li puis rien dire ni n’osai
   Ne ni li os descovrir ma raison
   Q’il est de mi si cun del chanpion
   Qi longement ha apris a scremir,
   Mais qant il vient el chanp aus cous ferir,
   Il ne set riens d'escu, ni de baston.

4. Ainz qe je fusse de ceste amor espris,
   Savoie bien [.................................]
   [....................................................]
   [...............................del meillor joër.
   Ausi cun cil qi as eschés voit cler
   Qant il enseigne autrui a bien joer,
   E qant il gieue, si pert einsi le sen,
   Q’il ne se set defendre de mater.

1. Aï! Amors, cum dure departie
   Moi covendra sofrir por la meillor
   Qi onques fust amee ni servie
   Dieus me remaint a lui por sa douçor
   Si voirement cum j'en part a dolor
   Las! q'a je dit? Je ne m'en depart mie
   Se mes cors va servir Nostre Seingnor, /140v^o/  image du manuscrit
   Mi cuer remaint del tot en sa bailie.

2. Por lui m'en vois sospirant en Sorrie,
   Car je ne doi faillir mon Criator.
   Car qi li faut e ses besoing oblie,
   Bien croi qe Dieus li fraudra a greignor;
   E sachent bien li grant e li meinor
   Qe la doit l’en faire chevalarie
   O l’en conqiert paradis et honor
   E los e pris e l’amor de s'amie.

3. Dieus est assis en son saint heritage;
   Or i para coment li secorunt
   Cels q’il ha trait de la prison ombrage
   Dont il fu mis en la croiz qe tuit ont,
   Oni soient tuil cil qi remandront,
   Se vieuz ne sont o povre por malage;
   E tuit cil qi joinë et riche sunt
   Ne poënt pas remanoir sanz hontage.