I. De Gondree et comment Notre Dame se apela dame de Chartres

1. A l'entree de ma matire

2. Premierement vous vodroy dire

3. En quel leu et comment avint

4. Que dame de Chartres se tint

5. Cele qui seur toutes est dame.

6. Il avint jadis qu'une fame,

7. D'une ville lez Sessons nee,

8. Estoit qui avoit non Gondree

9. Et Theodorus son mari

10. Qui puis fu tristes et marri

11. Quant a sa fame mesavint

12. D'un vilein mal qui li avint,

13. Quer tele fu sa destinee

14. Que dou seint feu fut alumee

15. Dom li martir ardant alument

16. Qui a seint leu fort acoustument,

17. En la crote, a Chartres, venir,

18. La ou la dame fet fenir,

19. Dedenz nuef jorz, la maladie,

20. Ou soit a mort ou soit a vie.

21. Einsint par devine jostise

22. Fu Gondree de feu esprise,

23. Que si fort la fist ...*

24. Que le nes ovec le ...*

25. Li ardi, ice virent meint,

26. Si que cuir ne char n'i remeint,

27. Einz perdi tout par ce torment:

28. Le nes et la levre ensement,

29. Cele desus qui au nes touche,

30. Si qu'il apperoit de la bouche

31. Par dehors quant il ot dedens,

32. Et les gencives et les dens,

33. Et par devant et par desrierres,

34. Tretout dusque au dens messelieres,

35. Qui aparurent toutes nues,

36. De char et de cuir desvestues.

37. N'encor le feu pas ne cessoit

38. Qui nul hore ne la lessoit,

39. Einz li porprenoit ja le vis.

40. Si malade com vous devis,

41. A Sessons, a l'iglise ala:

42. Molt se porchace qui mal a.

43. La vint ou la dame est servie,

44. Por querre de son mal aïe.

45. Moult l'apela, moult la pria,

46. Merci tendrement li cria,

47. Que par pitié la visitast

48. Et de sa doleur la gitast

49. Et regardast cele chaitive

50. Qui ne vossist pas estre vive,

51. Ainzçois vossist melz estre morte.

52. La haute dame qui conforte

53. Les egarés, les esmaiez

54. Et avoie les desvoiez,

55. La dame de misericorde

56. Qui pecheurs a Dieu acorde,

57. La dame, la digne pucele

58. Oï les prieres de cele

59. Qui s'ert venue a lé compleindre,

60. Fist le feu morir et esteindre

61. Dom cele ert si griement ateinte.

62. La maladie fu esteinte,

63. Mes toutes vois remeint la trace,

64. Quar li feus li fist sus la face,

65. Dom leidement ert effacee

66. Et vileinement domachee.

67. Fet li ot le mal tel domage

68. Que deffeite fu dou visage,

69. Quar baulevre ne nes n'avoit

70. Ne estapir ne se savoit

71. Ne ne s'ousoit au gens monstrer;

72. Horrible estoit a encontrer,

73. Car tretuit cil qui l'encontraient

74. De sa voie se destornaient:

75. Meulz se voloient desvoier

76. De leur voie que la voier,

77. Tant ert leide et espoventable.

78. Et si sachés que fiens d'estable

79. Ne puest tant a desmesure

80. Com ele fesoit de l'arsure

81. Qui li avoit ars le viaire.

82. A nullui ne poeit mes pleire

83. Sa demorance ne son estre;

84. Nus ne poeit pres de lé estre,

85. Car l'esgarder et le sentir

86. Fesoit a tous les cuers mentir

87. Si qu'a vomir les convenoit

88. Du mal qui au cuer leur venoit.

89. Chacun la ccuilli en haïne:

90. El n'ot ne voisin ne voisine

91. Qui son voisiné ne despleust

92. Et qui pas souffrir la peüst.

93. Si se porpensa la dampnee

94. Qu'el s'en iret la dom est nee,

95. Entre ses gens et ses amis,

96. Savoir se nature eüst mis

97. En eus et amor et pitié

98. Qu'el trovast en eus amitié

99. Au moins par raison de lignage,

100. Que il amassent son estage

101. Et qu'il li feïssent servise.

102. Mes ne trova point de franchise

103. En euls quant elle i fu alee

104. Et un poy entr'eus demoree,

105. Ne quel s'i fussent gens estrange,

106. Chascun la dechace et estrange,

107. Chacun la fuit, chacun l'eschive.

108. Dolente le[l. se] claime et cheitive

109. Quant ses parens l'ont enhaïe

110. ou el cuidoit trover aïe;

111. Voirs est, plus sunt parens que amis.

112. Quant ses parens treve anemis,

113. Ne set mes a cui puisse pleire

114. Son estage ne son repeire.

115. Son cuer li a lors consoillé

116. Que prendroit d'un drapel moillé

117. Por couvrir le mal de son vis.

118. Einsint li estoit bien avis

119. Que des suens seroit melz sofferte

120. Quant sa face seroit couverte;

121. Ne lor feroit sa vision

122. Si grant abhominacion.

123. Quant ot ce fest, riens ne valut,

124. C'onques por ce riens[l. plus] ne chalut

125. Aus parens d'ele que devant.

126. Lors se vet elle apercevant

127. Qu'en parens n'a nulle fiance.

128. En Dieu doit l'en mestre s'esperance

129. Et en la tres douce raïne

130. La cui henor est enterigne,

131. Qui est de vray'amor fontaine.

132. Veine et fausse est amor humaine

133. Mes qui Dieu et sa mere apele

134. Son ami a et sa querele.

135. Dieu et sa mere apela

136. Gondree et sa querele a

137. A la douce dame mostree:

138. " Dame, trop vous ai obliee

139. De la bonté que m'avez fete,

140. Qui par tot doit estre retreite.

141. Por voir grant bonté me feïstes

142. Quant la maladie esteinsistes

143. Qui tot m'aloit le vis ardant,

144. Ou ge sui moult poy regardant

145. Quant puis ne vous ay feit servise

146. Ne en vostre moustier requise

147. Et pas ne vous ay merciee

148. Dou mal dom ge sui desliee

149. Et si dure oncore la plaie.

150. Mes parens en cui me fiaie

151. M'ont dechaciee et relenquie.

152. Dame, geu requier vostre aïe.

153. Dame, s'en vous conseil ne truis,

154. En nul autre trover nel puis.

155. Dame, en vostre conseil me met.

156. Demein matin, ce vous promet,

157. Iray, car il m'en est mestier,

158. A Soissons, en vostre moutier.

159. Illec vous iray aourer

160. Demein, plus n'i voill demorer,

161. Et une chandelle ferai

162. Qu'en l'enneur de vos offerrai,

163. Qu'a greigneur ne puis ge soffire

164. Qu'a une chandelle de cire.

165. Quant ainsi se fu dementee,

166. La nuit vint; si s'ala Gondree

167. Couchier et li autre si firent,

168. Par la maison tuit s'endormirent.

169. Quant un somme se fu dormie,

170. Lors s'esveilla tote estormie,

171. De sa promesse remembrable

172. Qu'elle pensoit a feire estable,

173. Et mist sa main de sus sa chere

174. Et tasta avant et arriere.

175. Le drapel senti avalé

176. Qui ert de leu en autre alé.

177. Arriere en son leu le vost mestre,

178. Mais tant ne s'en sot entremestre

179. Qu'el puest, en nulle maniere,

180. Mestre le drapelet arriere.

181. Les gens de leians appela

182. Que esveillez par son appel a

183. Et leur dist que il se levassent

184. Et chandelle li alumassent,

185. Que se hatassent de venir

186. Aidier a son drapel tenir.

187. Mes ja seit ce qu'el les eveille,

188. Il li ont feit la sorde oreille,

189. Car por ce nul ne se leva

190. Et celle, a qui moult greva,

191. Remist sa main dessus son vis.

192. Si senti, ce li fu avis,

193. Quant elle volt le drapel prendre,

194. De sous ses dois char mole et tendre,

195. Et en verité senti elle

196. Char neuve, freiche et novelle

197. En la levre et ou nes ensemble,

198. Qui toute a l'autre char resemble

199. Fors c'um petit plus reluiseit,

200. C'ert avis a cui l'avisoit.

201. Lors s'escria com esbahie:

202. " Aïde Dieu, sainte Marie !

203. A, douz Dieux, douce dame aïe !

204. Il m'est avis que sui garie. "

205. Treis fois la dame raclama.

206. La haute dame tant ama

207. Que devant lé vint en present.

208. Celle la vit apertement,

209. Si dist: " Dame que ge voi ci,

210. Ge vous rent et gré et merci

211. De ce que par vous sui sanee.

212. Ma tres douce dame honnoree,

213. Que porré ge a la gent dire

214. Qui m'a gité hors dou martire ? "

215. Et la dame li respondi:

216. " La dame de Chartres, ce di,

217. T'a garie, ce puez savoir. "

218. Par ce poez entendre, a voir,

219. Qu'elle a, si com nos lison,

220. A Chartres, sa mestre meson.

221. La douce mere Dieu, en terre,

222. A Chartres la doit l'en requerre

223. Comme en sa chambre especial

224. Et comme en son palés roial

225. Ou l'en la sert comme raïne

226. A cui tretot li mont encline.

227. A Chartres est sa metre iglise

228. Qui si noblement est assise

229. Que la dame tient souz sa main

230. Et tout Chartres et tout Chartein.

231. La dame lors se esvanoï

232. Et cele qui moult s'esjoï

233. De sa santé et de sa joie

234. Remeint en son lit toute coie.

235. Cil de leiens, qui oï orent

236. Les paroles, plus tout qu'i porent

237. Se leverent et alumerent,

238. Et droit au lit Gondree alerent,

239. Et virent le miracle apert

240. Et le nes de char recouvert.

241. Ainsint ot recouvree sa perte

242. Et com devant fu saine et esperte,

243. Et riens ne li failli por voir,

244. Ains ot quanque ele dut avoir.

245. Dou miracle se merveillerent,

246. Dieu et sa mere mercierent;

247. Ainsint grant joie i ot menee

248. Com c'elle fust resuscitee.

249. L'endemein matin, a grant joie,

250. ...*

251. Tot droit a Soissons, la cité,

252. Ou ell a son veu aquité,

253. Car elle offri une chandelle

254. Devant l'ymage a la pucelle

255. En qui le fiz Dieu descendi.

256. A la dame graces rendi

257. Qui sa santé li ot rendue.

258. Toutes les gens qui l'ont veüe

259. L'aviserent et la quenurent

260. Et de toutes pars acorurent,

261. Et nes et bouche li besoient

262. Ceulz qui eschever la soloient.

263. Oïe avés la verité,

264. Comment de Chartres, la cité,

265. La mere Dieu s'apela dame,

266. Qui d'autres dames est la gemme.

267. Cil qui le latin en treita

268. Dom Johan le romans treit a,

269. En son livre dit et testemoigne

270. Qu'a voire sot ceste bosoigne,

271. Avant et emprés l'aventure