X. C'est un miracle qui avint au gens de Chetiaulandum

1. Or convient que ge m'apareille,

2. C'un miracle de grant merveille

3. Que la haute dame fit die.

4. Cil miracle a seignorie,

5. Seur les autres a digneté

6. Et, por sa grant nobileté,

7. Deüst estre mis tout devant;

8. Mes ge vois tout l'ordre sevant

9. Si comme ou livre est ordenee.

10. Por ce l'é ge ci amenee

11. Qu'ou latin ai cest ordre pris,

12. Si n'en doi pas estre repris.

13. En cel tens que g'ei devant dit,

14. Que venoient grant et petit

15. A Chartres, en pelerinage,

16. Que l'en feisoit le mestre estage

17. A la dame et sa mestre iglise

18. Et que offrendes de meinte guise

19. I portoit chacun et gran don,

20. Le pueple de Chetiaulandon,

21. Ou terrouer de Gatinais,

22. Homes et fames demenais,

23. Pouvres et riches, s'asemblerent

24. Et tuit ensemble s'acorderent,

25. Comme gens pleins de charité

26. Et par sarmons amoneté,

27. C'un char de froment chargeroient

28. Qu'a Chartres, tot chargié, meinroient

29. A aïde a l'iglise feire.

30. Au char se pristrent tuit a treire:

31. Tant treirent et leur voie tindrent

32. Qu'en l'evesché de Chartres vindrent

33. A une vile, ou aisié furent;

34. Celle premier[l. premiere] nuit i jurent.

35. Pluseurs ot de cels qui traioient

36. Que, por ce que, por voir, craioient

37. Estre a Chartres, a l'endemein,

38. Ne se garnirent pas de pein

39. Ne de point d'autre garison.

40. Ce soir ne firent garnison

41. Ne de pein ne d'autre vitaille,

42. Por ce qu'il quidoient sans faille

43. L'endemein a Chartres venir.

44. Ne voudrent chouse retenir

45. Que l'endemein eüst mestier,

46. Dom plus les estut dehetier.

47. Autres i ot de porveance

48. Qui estoient en grant doutance,

49. Qu'il n'i pensent pas a ateindre;

50. Car celle jornee estoit greindre

51. Que entr'eus ne cuidoient assés

52. Et ill estoient moult lassés

53. Et moult grevé et travaillié.

54. Dou garnir furent eveillié:

55. Pein acheterent et viande

56. Tel com necessité commande.

57. Einsi ne furent pas commun,

58. Car desgarni furent li un,

59. Tretoute la greigneur partie,

60. Et l'autre part si fu garnie.

61. L'endemein matin se leverent,

62. Au cordes dou char atachierent

63. Lor colliers et lor couls enz mistrent

64. Et efforciement si pristrent

65. A tirer. Si trestrent forment.

66. Grant ert la charge de froment,

67. Si les convint moult ahenner,

68. A travaillier et a penner.

69. A grant suor et a grant peine

70. Vindrent, ce jour, a Chantereine,

71. A une ville desgarnie.

72. Il n'i a pas leue et demie

73. D'ilec a Chartres la cité;

74. Mes las erent, en verité,

75. Et estoit ja a l'anuitant,

76. Si ne porent aler qu'itant.

77. En celi leu se herbergerent.

78. Cil qui orent pein, si mengerent,

79. Et cil qui furent desgarni

80. Furent malement escharni,

81. Car il orent fein et mesese,

82. N'il ne troverent rien qui plese

83. Ne que il puissent acheter:

84. Geün les convit[l. convint] arrester.

85. Si en ont moult grant duel eü

86. De ce que erent desporveü.

87. Mes celle dame en qui servise

88. Il erent, par sa grant franchise,

89. Les porvit bien et soudement.

90. Li autre orent porvoiement

91. Par leur sen et par leur savoir,

92. Mes icist, ce devez savoir,

93. Par la grant debonneireté

94. A la dame de majeté,

95. Porveü et regardés furent.

96. Homes en celle ville esturent

97. Qui peins en sas repouz estoient

98. Que cinq souls acheté avoient

99. A garnison de leur mesnages.

100. Cil home, comme preus et sages

101. Et cortois et bien afeitié,

102. Orent des pelerins pitié

103. Qu'il virent de fein baaller

104. Et leur cors griement travaillier

105. En la bosoigne a la pucelle

106. Qui de Dieu fu mere et ancelle,

107. D'une moult haute cortaisie,

108. De douceur, de pitié garnie.

109. Se pristrent lors a porpenser,

110. Por guerir le pueple et tenser

111. Qui de viande se demente,

112. Qu'il metroient leur pein en vente

113. Ne ja plus ne l'enchererroient

114. For tant comme acheté l'avoient;

115. N'en queroient que leur chatel.

116. Le pein mistrent en vente, a tel

117. Feur com il acheté l'orent.

118. Greignor bonté fere ne porent:

119. S'autre foiz en dons leur donassent,

120. Ja si grant gré n'i gaaignassent.

121. Le filz de la Verge ennoree,

122. Qui la pitié et la penssee

123. Vit et quennut des vendeurs,

124. Et la fain des achateurs,

125. Qui erent las et travaillié,

126. Voult alegier par sa pitié,

127. Et voult par vertu demostree

128. Que sa mere fut ennoree

129. Et essauciee en tous leus,

130. Miracle monstra merveilleus,

131. Qui n'est en coustume venus.

132. Onques si noble ne vit nus

133. Puis le tens que Dex en terre ert

134. O ses deciples, qu'ou desert

135. Par sa vertu mouteplia

136. Les cinq peins et en apoia

137. Et saoula de genz cinq mille,

138. Si com l'en treuve en l'ivangille.

139. Miracle d'autelle demonstrance

140. Monstra Dex par sa grant poissance

141. A l'enneur de sa douce mere,

142. Quar es sacz fist le pein suffire

143. Que tuit en furent apaié.

144. Tant fu le pein mouteplaié

145. Par la vertu dou roi celestre

146. Qu'il suffist au pueple repeitre,

147. Qui grant besoig en ot eü.

148. Tuit furent dou pein repeü

149. Comme s'i venist a corbeilles.

150. Li vendeor orent merveilles

151. Ou il poaient ce pein prendre,

152. Car il ne finaient de vendre

153. Pein et de deniers recevoir;

154. Et que il seüssent le voir

155. Dou numbre, les deniers conterent:

156. Entor quarente souls troverent

157. Qu'il orent du pein receü,

158. Et ont, en leur sas, pein veü

159. Autant come avoient devant.

160. Lor furent il apercevant

161. Que c'ert miracle ausint espert

162. Comme Dex ot fet ou desert.

163. A tot le pueple ont raconté

164. Cest miracle, ceste bonté

165. Que la mere Dieu leur ot feite,

166. Qui en meint leu fu puis retreite.

167. Dou miracle tuit s'esjoïrent,

168. A Jhesu Crist graces rendirent,

169. Qui toz biens donne largement,

170. Et a sa mere ensement,

171. Qui son chier filz tant ot prié

172. Que par lui furent avoié.

173. Li pelerin, a l'endemein,

174. Repristrent leur oevre bien mein

175. Et leur besoigne si parfirent

176. Que blé et autres dons offrirent

177. A Chartres, a l'iglise fere,

178. Et puis se mistrent au repeire.

179. Par cest feit poez tuit savoir,

180. Et le devés tenir a voir,

181. Que la haute dame plus aime

182. L'iglise dom dame se cleimme

183. Qu'autres que l'en puisse trouver.

184. Par cest fet le poez prover,

185. Quant au bienfeteurs de s'eglise

186. Monstra amor de tele guise

187. Que son filz por eulz tant pria

188. Que les peins leur mouteplia

189. Et fist miracles por s'ennor,

190. Telx com au tens ancionnor.

191. Or sachiés donc certeinement

192. Que la dame especialement

193. Aimme, mes ce n'est pas des coutes,