UNIVERSITÉ D'OTTAWA Faculté des Arts

Laboratoire de français ancien

 

XIII. D'un vallet de Paleiseul que Nostre Dame resoucita de mort a vie

1. Un autre fet vos voill descrire,

2. Mes ce n'est pas de la matire

3. Ne de Rolens ne de Paris.

4. A Paleiseul, de lez Paris

5. La noble et la rëau cité,

6. Avint le fet, por verité,

7. Que ge voy ci amenteü;

8. Si ne doit pas estre teü:

9. Non sera il, se je onques puis.

10. Li sires de la ville un puis

11. Avoit dedens sa forteresce.

12. Li puis ert de grant parfondesce

13. Et d'amont dusqu'au fons perré,

14. Com se ce fust chemin ferré.

15. De pierres grouses et menues,

16. Quarrés, rondes et agües

17. Ert entor, dusqu'aval, muré.

18. Li sires voult qu'il fust curé,

19. Si le fist fere a un bacheler

20. - Guillaume se fist apeler.

21. Quant li vallet ou puis estoit

22. Aval et il le nesteoit,

23. Les pierres furent desjointes,

24. Com ses[l. se] fussent de meins enpointes,

25. Si que tot li puis desperra;

26. La matire se deserra

27. Aval cheï l'evre perrine.

28. Cil qui oïrent la ruine

29. Quiderent que ce fust tonnerre.

30. Vers le puis corent moult grant erre,

31. Enz regardent et ont veü

32. Grant monceau de pierre cheü,

33. Dom ill i ot moult grant plenté.

34. Bien quiderent qu'acraventé

35. Fust desouz le monciau de pierres

36. Cil qui estoit dou puis curierres,

37. Qui ens naitoier le devoit.

38. Nus n'ot le vallet ne ne voit,

39. Si quident por voir qu'i soit mort.

40. Si crïent tuit a grant effort:

41. " Sachiez de voir: mort est Guillaume!

42. S'il eüst hauberjon et hiaume,

43. Ne fust il de mort deffendu,

44. Tant est dessus lui descendu

45. Grant monciau de pierre a un fes.

46. Mestier est qu'a Dieu soit confés

47. O contricion pure et voire,

48. Quer, voir, a boche de provoire

49. Ne porra il jamés parler. "

50. A vos la mere au bacheler,

51. Pale, esbahie et effraée,

52. Qui ert venue a la criee.

53. Quant de son filz ot la novelle,

54. La dame de Chartres apelle;

55. Son filz en sa garde comande

56. Et dit: " Dame en cui commande

57. Se mestent tuit li besoigneus,

58. Mon filz en cest cas perilleus,

59. Dame de Chartres, secorez,

60. Qui en ce puis est demorés,

61. Soz les pierres acovoitez.

62. Dame, de perill le gitez,

63. Qu'il ne soit perillés ne mort!

64. Et li chevallier de la mort

65. Au vallet si dolent estoit

66. Que nulle cure ne mestoit

67. En son puis qui ert depecié:

68. Plus ert dou vallet corrocié

69. Que de son domage demoine.

70. Ouvriers feit quere, a quelque poine,

71. Et tost leur commande a ouvrer

72. Au puis des pierres delivrer,

73. Por le vallet hors dou puis treire.

74. Li ouvrier en ceste oevre fere,

75. Que il feïssent[l. Que qu'il foïssent] volentiers,

76. Mistrent trois jorz tretous entiers

77. Sans avoir guieres de sejor.

78. Et quant li ouvrier, au tiers jor,

79. Orent tant en parfont ouvré

80. Quanques[l. Qu'auques] fu li puis delivré,

81. Si prez dou fonz sont descendu

82. Que le vallet ont entendu

83. Au parler et l'ont escouté,

84. Qui sous les pierres ert couté.

85. Si en sont forment esbahi

86. Et dedenz lors sont esjoï

87. Quant il voient qu'il n'est pas mort.

88. La dame de Chartres de mort

89. L'ot par sa pitié defendu,

90. Qui de la mere ot entendu

91. Le cri et porté devan Dé,

92. Quant son filz li ot commandé

93. Et dou tout l'ot mis en sa garde.

94. La douce dame qui regarde

95. Les besoigneus la regarda:

96. Sous la ruine le garda

97. Et le sauva en tel maniere

98. Que au choair cheï premiere

99. Une pierre bien grant et lee.

100. Au lé dou puis fu arrestee,

101. Dusqu'au vallet ne puet descendre

102. Et retint l'autre pierre mendre

103. Que nulle au fonz n'en descendi.

104. Des menors pierres deffendi

105. Le vallet ou puis la grant pierre.

106. Dou plat estoit, non pas sor querre

107. Et porprenoit dom[l. dou] puis le lé.

108. Desous la grant pierre, celé,

109. S'estoit li vallez estapis,

110. Com se fust couvert d'un tapis,

111. C'onques pierre vers lui ne vint.

112. Einsint de par Dieu li avint

113. Que il n'i ot ne cop ne plaie.

114. Savoir poez que bien emplaie

115. Son servise, non pas ne pert,

116. Cil qui Dieu et sa mere sert.

 

117. Quant la grant pierre fu levee

118. Et hors dou puis treite et portee

119. Et li vallet fut amont treit,

120. A touz a conté et retreit

121. Que la dame de majeté,

122. Par trois jors qu'ot ou puis esté,

123. L'ot conforté et soutenu

124. Que mal ne li fu avenu,

125. Fein ne soif, ne chaut ne freidure,

126. Ne sus son cors n'ot bleceüre,

127. Car nul cop n'i pot recevoir.

128. Dom l'en doit croire tot por voir

129. Qu'ovec lui estoit en aïe

130. La tres douce seinte Marie

131. Qui le vrai filz Dieu enfanta,

132. Qui de perill le garanta.

133. Par trois jors fu ou puis sanz peine

134. Come Jonas en la baleine;

135. Car cil qui Jonas senefie,

136. Le filz de la Virge Marie,

137. Par la priere de sa mere,

138. Le sauva de la mort enmere.

139. Dou puis einsint hors s'en issi

140. Cum Jonas dou poisson s'eissi,

141. C'onque nul mal n'i ot eü.

142. De ces parens fu receü

143. A grant joie et de ces amis;

144. Chacun en joie ot son cuer mis:

145. Fu ausint grant, par verité,

146. Comme s'il fust resuscité.

 

147. Li bachelers, sans demorance,

148. Qui en son cuer ot remebrance[l. remenbrance]

149. De la bonté, pleine et parfeite,

150. Que la mere Dieu li ot feite,

151. A Chartres, ou el est servie,

152. La requist o grant compaignie

153. Des gens qui ovec lui alerent,

154. Qui la chouse ilec temoignerent

155. Einsi comme el ert avenue

156. Et a leur iauz l'orent veüe.

157. Li vallet pas ne s'oublia:

158. Dieu et sa mere mercia;

159. A la dame graces rendi

160. Qui de la mort le deffendi,

161. Et, quant il ot fet ses prieres,

162. A Palleiseul torna arrieres.


Page d'accueil


Dernière mise à jour : 09.11.1999
Pour toute question au sujet de ce site, veuillez vous adresser à :
E-maillabo@francaisancien.net