XIV. C'est le miracle de Guillaume que Nostre Dame gueri de routure

1. La memoire si me resveille

2. A conter un autre merveille

3. Qui avint a Chartres meïsmes.

4. Cil qui le latin en fist primes

5. Dit que il vit et quenut l'omme,

6. Et Guillaume ou latin le nomme,

7. A cui avint ceste aventure.

8. Cist Guillaume avoit eu routure

9. Dom il ert si rous et trenchiés

10. Qu'il aloit a caleforchiés

11. Pas avant autre et belement.

12. Povres ert et veulz ensement.

13. D'enfermeté et de feblesce

14. Ert corbes, non pas de veillesce.

15. Un baston en sa mein tenoit

16. Dom son feible cors soustenoit.

17. A poine se poet lever

18. Se moult ne se voussist grever.

19. Ja soit ce qu'il aloit a poine,

20. Soufrir li convenoit la poine

21. D'aler, chacun jor, a l'iglise,

22. No[l. Non] mie tant por le servise,

23. Mes por querre sa soustenance

24. Et de sa pouvreté legance

25. Par aumones qu'il demandoit,

26. Com necessité commandoit,

27. Qui ne puet nulle loi tenir.

28. Aler, toute jor, et venir

29. Li convenoit por querre aïe

30. De coi il soutenoit sa vie,

31. Ja ce qu'il fust feibles et veulz.

32. Chacun jor, voeit o ses eulz

33. Miracles apers avenir.

34. De plorer ne se pot tenir.

35. O pleur et o soupir amer

36. Commença lors a reclamer

37. La dame dou ciel et des anges:

38. Quant elle au pelerins estranges

39. Fesoit bonté et cortoisie,

40. Donc devoit el meulz fere aïe

41. A lui qui ert son queneü

42. Et son privé, qui ot veü

43. Meintes de ses oevres privees

44. Et des vertus qu'el ot montrees

45. A ceuls qui l'avoient requise

46. D'estranges terres en s'iglise.

47. Si ert bien droit, par quenoissance,

48. Qu'en celui feïst demonstrance,

49. Par vertu, que tant chier l'eüst

50. Que par lé santé receüst.

51. La douce dame debonneire,

52. Qui au povres hom[l. povre home] vouloit feire

53. Grace et bonté et cortoisie,

54. Sa requeste fist acomplie,

55. Car ses prieres entendi

56. Et pleine santé li rendi.

57. Par sa grant debonneireté,

58. De tretoute s'enfermeté

59. Le gari et de sa routure.

60. Aler le fist droite aleüre

61. Ja ce que corbe estoit pieça.

62. Tout le gari et redreça;

63. Seins et droit fu et sanz feiblesce,

64. Ainsint com s'il fust en genesce.

65. Quant cil miracles fu veü

66. Et parmi la cité seü,

67. Tuit furent de joie avivé

68. De ce qu'a leur voisin privé,

69. Qui estoit de leur norreture,

70. Avenue ert tele aventure

71. Com il virent en verité.

72. Toute s'esjoï la cité.

73. De lui disoient comunement

74. Ce qu'en dist anciennement

75. De celui la qui maladie

76. Fu jadis sanee et garie

77. Par seint Pere et par seint Johan:

78. " N'est ce cil qui seoit oan

79. En l'iglise et mendiest

80. Et queroit aumones, qui est

81. Tous seins et hetiez orendroit?

82. Il ert boçus, or est tout droit.

83. Il ert rouz, feibles et corbe,

84. Mes nul mal ore nou destorbe,

85. Einz est bien gari et sené:

86. Il a a bon mire assené! "

87. En celui tens, en cel termine

88. Que Guillaume ot tel medicine

89. Par la devine megerresse,

90. Avoit de malades grant presse

91. Qui en l'iglise demoraient,

92. A Chartres, et qui se gesaient

93. Parmi l'iglise les a les

94. Et en litierez et en les;

95. Chacun garison et aïe

96. Atendoit de sa maladie.

97. Guillaume, qui ert piteables

98. Et de la bonté remenbrables

99. Que la mere Dieu li ot feite,

100. Sa volonté a a ce treite

101. Que en l'iglise serviret

102. La dame ne ne partiret

103. Jamés nul jor de son servise.

104. Des malades qui en l'iglise

105. Demoroient reçut la cure

106. Et leur vie et leur norreture

107. Leur porchaça diligiaument

108. Et leur departi leiaument

109. Ce qu'i leur avoit porchacié.

110. Le fes qu'il avoit embracié

111. Soustint tant com il fu en vie,

112. De bon gré et sanz felonnie.

113. Toutens les malades servi

114. Tant que la grace deservi

115. De Dieu et de la douce dame