XVI. Un autre miracle qui avint a gens de Bailtilli en Gatinais

1. En cel tens ravint demenais

2. A Batilli, en Gatinais,

3. Autre mervoille, belle et voire,

4. Que l'en doit bien mestre en memoire.

5. Le prestre de la ville estoit

6. Sages hom; si amonestoit

7. Moult souvent ses parroissiens

8. Qu'a ces autres bons cretiens

9. Dou païs essample preïssent

10. Et que a servir empreïssent

11. La dame de Chartres de dons,

12. Si qu'el leur rendiest guerredons

13. Et les gardast de mesestance,

14. De meschief et de mescheance,

15. Et leur enfanz et leur meignee,

16. Que chouse n'en fust perillee

17. Ne n'i eüst mal ne domage.

18. Li parroissien, comme sage,

19. S'acorderent a leur provoire

20. Et promistrent por chouse voire

21. Que a la haute dame ennoree

22. Qui dame ert de Chartres clamee

23. Moinraient un riche present:

24. Un char tout chargié de froment,

25. Combien qu'il i eüst de coust.

26. Ja iert pres de la mi aoust;

27. Si mistrent jor, sans plus terme prendre,

28. Qu'iroient leur promesse rendre.

29. Entre itant une grant merveille

30. Avint tretout droit en la veille

31. De celle seinte Assumpcion

32. Dom ge vos ei fest mencion.

33. A ce jor, a celle vegille,

34. Fist une fame de la ville

35. Une soe genvre fillete

36. Qu'el avoit, belle pucellete,

37. Aler au puis de l'eive querre

38. En[l. Et] un vessiau, qui n'ert de terre,

39. Einz est, si com ge lui, d'arein,

40. Prist la meschineste en sa mein.

41. Au puis ala plus tost qu'el pot

42. Et portoit en sa mein son pot.

43. L'escrit ensuis tant com ge puis,

44. Qui descrit quelx esteit cil puis

45. Ou toute la ville puisot:

46. Set taises d'amont le puis ot

47. Dusqu'a l'eive, tant ert parfont,

48. Et trais de l'eive juqu'amont[l. au font]:

49. Ci avoit grant parfondeice!

50. La pucelle au puis s'adreice;

51. Sus le puis, por puiser, s'acline,

52. Mes tant par se fu la meschine

53. De desus le puis aclinee

54. Qu'el est dedenz le puis tumbee,

55. Les piez amont, le chief aval[l. aval le chief].

56. Tant i ot plus de meschief

57. Et plus griement li mescheï

58. Quant le chief avant i cheï.

59. Au fonz de l'eive ou l'efant ert

60. Feri son chief si que s'ahert

61. Le fanc et la boue a sa teste.

62. Ce fu bien chose manifeste,

63. Car la boue fu bien trovee

64. O ses chevelx entremeilee.

65. Moult fu ci cas espoentables,

66. Et ci fut il bien profitables,

67. Car la mere Dieu l'ot sauvee

68. Et desus l'eive ramenee.

69. A la vegile de la feste

70. Fu la haute dame bien preste

71. A feire a la pucelle aïe.

72. Entretant sa mere esbahie

73. Fu forment et espoentee

74. Comment tant estoit demoree

75. Sa fille a l'eive puiser,

76. S'elle eüst demoré puis ier;

77. Si s'est elle assez merveillee.

78. Vers le puis s'est lor adreciee

79. Por savoir que ce poet estre

80. Et regarda destre et senestre,

81. Savoir se sa fille veïst.

82. Quant ne la voit, si s'esbahist;

83. De poor le cuer li foï

84. Con s'el fust espaloï.

85. Lors s'escria comme angoisseuse:

86. " Dame de Chartres glorieuse,

87. Gardés, douce dame Marie,

88. Ma fille, que ne soit perie.

89. A vos, dame, comant ma fille:

90. Gardez la moy, qu'el ne perille. "

91. Lors s'aprocha do puis plus pres

92. Et regarda dedenz enprés:

93. Sa fille vit seur l'eive ester

94. Et ses drapiaus desus floter.

95. Lors s'aperçut qu'el ert vivant,

96. Si fu mains triste que devant

97. N'encore ne fu pas seüre.

98. En lé conforter mist grant cure;

99. Si la prist a aseürer

100. Por meilz s'aventure endurer,

101. Si qu'el ne fust enpoentie

102. Tant que li faillist cors et vie.

103. Si li promist que maintenant

104. El metreit conseil avenant

105. Et aïe porchaceroit

106. Par quai dou puis treite sereit.

107. Dou puis se departi atant

108. La mere dolente et hatant

109. Comment conseil et paine mestre[l. mete]

110. Que sa fille soit dou puis treite.

111. Tous ses voisins huche et escrie

112. Et si leur requiert que aïe

113. Il viennent hastivement feire

114. A sa fille hors dou puis treire,

115. Qui par meschief i est cheüe.

116. Quant ceste chose ont entendue,

117. Li voisin forment s'esbahirent.

118. Meintenant des ostex saillirent

119. Et o la fame au puis corurent;

120. Mes doutans lors et esbahi furent,

121. Car il virent la meschineite

122. Dou puis aval sus amont treite

123. Et au meins au truil se teneit.

124. De vertu a celle veneit

125. Qui mere est de misericorde,

126. Qui, sanz eschiele et sans corde,

127. L'ot d'aval amont amenee

128. Por ce qu'el li fu comandee.

129. Autre eschielle n'ot la meschine

130. Fors que celle eschielle devine:

131. C'est la dame d'ou Dex vost nestre;

132. Icelle est eschielle celestre

133. Par quei montent li pecheor

134. Ou ciel, a nostre sauveor,

135. Qui, par la priere a la dame,

136. Nos veille sauver, cors et ame.

137. Quant les gens ce miracle virent,

138. La pucelle en leur bras seisirent,

139. Si l'ont autretant conjoïe

140. Con s'el venist de mort a vie.

141. A Chartres l'ont o euls menee

142. A la dame qui l'ot sauvee.

143. Graces a la dame rendirent,

144. Leur dons et leur offrendes firent;

145. A toz conterent l'aventure.

146. Li prestres presens la figure

147. Dou puis conta et la façon:

148. Les pierres orent li maçon

149. Par dedenz le puis si murees

150. Et si jointes et si serrees,

151. Si com li escriz le devise,

152. Que ne peüst, en nulle guise,

153. Nus hom entre deus piece meitre,

154. Si com le tesmoigne la leitre

155. Dou latin que ensivre doi,

156. Plus espés que l'ongle dou doi.

157. Dou lé dou puis dist il la some,

158. Qui si est les qu'il n'est nul home,

159. Tant seüst enforcher son pas,

160. Qui enjamber le peüst pas,

161. Ne ses jambes peüst estendre,

162. Qui le lé dou puis poïst prendre.

163. Einsin ert le puis conpassés.

164. Li prestres et autres assez

165. Le tesmoingnerent tot por voir.

166. Par quoi vos devez tuit savoir

167. Que par sei dou puis n'eissi mie

168. La pucelle, ainz ot aïe

169. De la haute Virge raïne,