II. Dou valet qui avoit non Benoait

1. Autre miracle, au livre, lui

2. Qui concordant est a celui

3. Que je vos ai dit en romans.

4. Un valet fu d'entor seize anz;

5. Ja son non ne vos soit celés:

6. Benoit estoit apelés.

7. Cil Benoit, com preuz et sage,

8. D'un païsant d'un vilage

9. S'aloua a ses ovres feire.

10. Le vilein fel, de pute afeire,

11. Qui ert vuis de bien et de grace,

12. Un jor de feste seinte Agace,

13. Commanda au valet aler

14. Es chans le chaume arrasteller.

15. Li vallez pris son rastel a,

16. Es chans le chaume arastella,

17. Si comme il li ert commandé

18. Dou vilein qui n'avoit en Dé

19. N'en ses seinz point de reverance.

20. Dusques a midi avoit en ce

21. Li vallés toute jor ovré,

22. N'avoit pas repos recovré;

23. Lassez fu, si vost repos querre;

24. Si gita son rastel a terre

25. Dom longuement ot laboré.

26. N'ot guieres einsint demoré

27. Qu'il vit soudement nestre un feu;

28. Ne sot don vint ne de quel leu;

29. Mes le feu au rastel se prist,

30. D'ou le rastel forment esprist.

31. Quant cil voit son rastel espris

32. Dou feu, durement est surpris,

33. Car esbahiseur le surprent.

34. Son rastel arrere reprent;

35. O la main le prist a esteindre,

36. Qu'ainsint cuidoit le feu esteindre

37. En treiant sa main sus la flambe.

38. Mes mentenant la main efflambe,

39. Car le feu si pres le surprent

40. Que l'ardeur a la mein se prent.

41. La douleur sent, le rastel lesse

42. Et de crier en haut ne cesse.

43. Au primier mot qui li eissi

44. De la bouche, cria einsi:

45. " Haz ! Dame de Chartres, Marie,

46. Douce pucelle, aïe ! Aïe !

47. Aÿdiez moi, dame de Chartres !

48. Ne me vaut oignement ne platres

49. Se ne m'aïdiez, douce dame.

50. A vous commant mon cors et m'ame. "

51. En criant si se dementoit

52. Com cil qui grant douleur sentoit

53. De l'ardeur qui la mein li art,

54. Et vileins, de chacune part,

55. Qui le cri dou vallet oïrent,

56. Des chans et des villes saillirent;

57. Au cri dou vallet tretuit corent,

58. Entalentés qu'il le secorent.

59. Mes a noient se puet attendre.

60. En charbon torné et en cendre

61. Le rastel a la terre voient

62. Et la mein ardoir. Lor s'esmoient

63. Et se seignent de la merveille;

64. Chacun s'esbahi et merveille.

65. Li valés refu esbahi,

66. De la doulor s'esvanoï

67. Ainsint com fust en paumaison,

68. Perdi le sen et la reson

69. Et une pueur de l'arsure

70. Eisi si grant, a desmesure,

71. La vertu par meint jor perdirent

72. Meinz de ceuls qui la pueur sentirent,

73. Que par lonc tens mengier ne porent

74. Por la grant douleur qu'a cuer orent.

75. Li païsant qui au cri vindrent

76. Benoiet entre leur braz tindrent,

77. Si l'emportent en sa meson.

78. Por lui firent meinte oraison

79. Cil de la ville en leur iglise

80. Et meinte chandelle i ont mise,

81. Por lui, a l'autel Nostre Dame.

82. En toute la ville n'ot ame

83. Qui por lui ne feïst proiere.

84. En tel doleur, en tel maniere

85. Fu li vallez, dou semadi

86. Dusques il vint au mescredi.

87. Icelui jor, a l'ajornee,

88. Deus dames de grant renomee,

89. De grand biauté, si com ge lui,

90. Vit Benoit de devant lui,

91. Mes l'une ert greigneur et plus bele.

92. Benoit requenut bien celle,

93. Que c'estoit la dame de grace;

94. Et l'autre si ert sainte Agace,

95. Qui la haute dame priet

96. Por lui et moult li soupliet

97. Et si disoit: " Dame, c'est cist

98. Por qui ge vos pri, qui ci gist,

99. Que tel mal soeffre et tel tanpeste

100. Por ce qu'il ovroit a ma feste.

101. Dame, qui estes piteable,

102. Cil pechié dom se rent coupable

103. Li soit, ce vos pri, pardonnez

104. Et, sainte dame, li donnez,

105. Se il vos plest, par ma priere,

106. Aide li donnés, dame chiere,

107. Et li envoiés garison.

108. Aider li devés par reson,

109. Que en vous, dame, tant se fia

110. Qu'au premier cri que il cria

111. Reclama la dame de Chartres.

112. Les enchartrez gitez des chartres,

113. Les enfers, dame, visitez,

114. De ceste chartre le gitez. "

115. Et la dame pleinne de grace

116. Si respondi a sainte Esgace:

117. " Le vallet por qui me priés

118. Tantost com se senti bleciez,

119. Que doit qu'a m'iglise n'ala,

120. A Chartres, ou vet qui mal a

121. Por garir de sa maladie ?

122. Illec doin ge aus enfers aïe;

123. Illeque, en ma mestre iglise,

124. Me deüst il avoir requise;

125. Illec oi ge les pechieurs

126. Qui de leur pechiés font clameurs ".

127. Et sainte Esgace respondi:

128. " Ma douce dame, ge vous di

129. Que a Chartres vous requerra

130. Tantost com de son mal guerra. "

131. Tretouz ces dis ot entendu

132. Le vallet, si a respondu:

133. " - Dame, seur toutes autres dames

134. Garir me poez, si me amés,

135. Sou voulez, de ma maladie

136. Et me poez donner aïe.

137. - Valet, fet elle, voir as dit.

138. Mais or va tost, sanz contredit,

139. A Chartres ou sui ennoree.

140. Illec vieu ge estre aouree.

141. Et, par tens, si de toi jorras

142. Qu'aler seinement i porras.

143. - Dame, fet cil, en vos me met.

144. G'irei, ce vous veu et promet,

145. A l'ains que ge onques porrei.

146. De l'aler point ne demorrei.

147. Enprés ces dis s'esvanoïrent

148. Les dames et se departirent,

149. Et leur boneïçons lesserent

150. Au vallet et si le seignerent,

151. Et cil tantost se senti sein

152. Et de sa pensé et sa mein

153. Reçut il ensemble santé,

154. De son veu fere entalenté.

155. Un de ses voisins de sa rue,

156. Qui ceste aventure ot seüe

157. Et la chose qui li avint,

158. O toute sa charreste vint

159. La ou cil en son lit gesoit

160. Qui la demore despleisoit,

161. Et li a fet tele bonté

162. Qu'en sa charreste l'a monté

163. Et tout droit a Chartres le porte.

164. De la cité passa la porte,

165. Devant l'iglise descendi,

166. Enz entra et graces rendi

167. A Dieu et a sa douce mere

168. Qui de douleur aspre et amere,

169. Par sa grant douceur, le gita.