XXIII. Dou valet anglais qui dona son fermail a l'iglise de Chartres fere

1. En enprés je vous conterai

2. Autre conte bel et verai

3. Qui n'est pas reson que je tese.

4. Cest conte a escouter vous plese,

5. Car assez i porrés aprendre

6. Et enseignement de bien prendre.

7. La haute raïne de gloire

8. En cui ennor, en cui memoire

9. J'ai commencié ceste ouvreigne,

10. Nos doctrine ci et enseigne

11. Qu'eschivons touz maus et toz vices,

12. L'amor dou monde et les delices,

13. Qu'ou monde n'a que vanité,

14. Il n'i a riens de verité.

15. Mes icele haute raïne

16. Par cest essemple nos doctrine

17. Et nos semont et amonete

18. Que chacun en s'amor se mete

19. Qui est amor veraie et fine,

20. Seur toutes amors enterine.

21. Cil qui s'amor ont deservie

22. La trouvent tous jors bonne amie.

23. Cil qui l'eime y trove amitié,

24. Qu'el est fonteine de pitié.

25. S'amor n'est a nullui naée,

26. Ainz est a tous abandonnee,

27. A celz qui la volent amer

28. Et comme dame reclamer.

29. En cest conte porrois oïr

30. Com l'en puet de s'amor joïr.

31. Li livres ici nous devise

32. Quant arse ot esté l'iglise

33. De Chartres, dom fu grans domages,

34. Li chapistre envoia messages

35. Par meint païs, par meinte terre,

36. Por porchacier aïe et querre

37. A fere l'iglise de Chartres.

38. Pardon de Rome, lestres et chartres

39. Portoient et si sermonoient.

40. Les gens de doner semonoient

41. A l'iglise de Chartres fere.

42. Si avint en icel deteire

43. C'un clerc qui en France ot esté

44. Escoliers, yver et esté,

45. Nes de Londres, en Engleterre,

46. S'en raloit arriere en sa terre.

47. Cil clers englais, por verité,

48. Passa par Sessons la cité,

49. Si com son chemin le menoit

50. Devers Paris, dom il venoit,

51. Tant qu'il entra en une iglise,

52. Qu'il voloit oïr le servise.

53. Illec trova un quereur

54. De Chartres, un bon precheur,

55. Qui de bien fere semonoit

56. Les genz d'entor et sarmonoit

57. Dou feu de Chartres, de l'arsure

58. Et de la grant desconfiture

59. Qui avoit en l'iglise esté.

60. Le clerc s'ert illec aresté:

61. Celui oï qui preschoit

62. Et par sa loquence aechoit

63. Le pueple de mestre a la queste,

64. Et recontoit la grant moleste

65. Dou feu et de l'embrasement

66. Dom Chartres ardi soudement

67. Et l'iglise fu mise en cendre;

68. Moult convenoit mestre et desprendre[l. despendre]

69. En l'iglise rapareiller.

70. Li clerc se prist a merveillier,

71. Qui le preschement escoutoit

72. Que li preschieres recontoit,

73. Et vit cels qui entor estoient,

74. Qui de pitié forment ploraient:

75. Chacun sa borse desnoet,

76. Chacun offreit ce qu'il poet

77. Et les seintueres beisoit.

78. Li sarmons moult au clerc plesoit;

79. Si fu moult forment esmeü

80. De ce qu'ot oï et veü.

81. D'offrir le prist grant volenté,

82. Mes n'avoit pas d'argent plenté,

83. Car sa borse estoit desenflee.

84. N'avoit o soi chouse aportee

85. Qui fust a offrir convenable

86. Fors un fermail d'or agraable.

87. Celui por rien ne despendist

88. Ne ne donnast ne ne vendist

89. Por preschier ne por sarmoner,

90. Car pensé l'avoit a doner:

91. A une soe chiere amie

92. Le portoit, qui ot non Marie,

93. Qu'il avoit longuement amee

94. Et demoroit en sa contree.

95. Ne set qu'il face de l'offrir:

96. Vice de char nou pot souffrir,

97. Vertu le semont et apelle!

98. Entre vice et vertu chancele:

99. L'un le point, l'autre le destorne.

100. Angoesseus est, pensis et morne.

101. Vertu le semont et atise

102. Que le fermail d'or, qu'i tant prise,

103. Doigne a l'evre de charité.

104. Vice et pensé de vanité

105. Et amor de char, qui est vaine,

106. Par une autre voie le moine,

107. Qui de bien fere le desvoie

108. Et l'oste de la bone voie

109. Et son bon pensé enpeesche.

110. Quant que li preeschieres presche

111. Li destorne amor veine et fole,

112. Qui le tient a mauvese escole

113. Et li dit: " Qu'es ce que viauz fere?

114. Se tu viauz a t'amie pleire

115. Et tu viauz estre bons amis,

116. Se qu'en ton cuer li as promis

117. Li porte, ge le te conseil.

118. Se tu vialz croire mon conseil,

119. Tu n'iras pas a lé, mein vuie,

120. Car a fame forment ennuie,

121. Quant leur amor assez ne couste:

122. De vuie mein priere estouste;

123. Sans don est priere perdue. "

124. Son cuer, qui einsint se remue,

125. En deus parties se depart:

126. Vers fole amor vet l'une part,

127. L'autre vers bon'amor chemine,

128. Qui l'enseigne et qui le doctrine

129. Qu'il envoit le don qu'il tant aime

130. A cele qui dame se claime

131. De Chartres par grant seignorie.

132. Cele est touz jors leal amie:

133. S'amor ne se mue ne change,

134. Ne vers son ami n'est estrange;

135. Tous jors velt lëaument amer.

136. S'amor a douceur, sans amer,

137. Et por un don en done cent.

138. De lé vient tout bien et descent.

139. Ainsint sent cil son cuer contreire.

140. Ne set quel part il doie treire,

141. Car fole amor forment le pouse[l.l'opouse]:

142. " Amis, or soit pousee chouse

143. Que ta volenté a ce tende

144. Que dou fermail faces offrende,

145. Ja cil dons a preu ne vendra.

146. Car cil preeschierres le vendra

147. Por avoir de vin la gorge ointe

148. Ou a aucune soue acointe

149. Le donra ou le retendra

150. Ou autrement le despendra,

151. Que preu ne fera a l'iglise,

152. Si auras perdu ton servise. "

153. Vertu, d'autre part, l'amoneste

154. Que le fermail a l'uevre meste

155. De cele qui touz biens nous donne.

156. Reson le semont et sermonne

157. Et en sarmonant le chatie

158. Que il lest amor de folie,

159. Quar nul n'i peut rien gaeingnier,

160. Et si le prent a ensegnier

161. Et dist: " Lesse ta soupeçon

162. Et si entent a ta leçon

163. Que vertu te list et enseigne:

164. Quel que voie le fermail tiegne,

165. Des que por Dieu l'auras donné,

166. Ne seras puis achesonné.

167. Fei ce que a toi apartient!

168. Se li preeschierres le retient

169. Ou il le donne ou il le despent,

170. A toi de ce de rien n'apent.

171. Que qu'il devieigne ne te chaille!

172. Ja tu n'i perdras vaillant maille

173. De tes biens ne de tes merites

174. Se de ta debte a Dieu t'aquites,

175. Car bonne ovre et bonne pensee

176. A Dieu et a sa mere agree. "

177. Einsint est li clers trespensez,

178. Car il chiet en divers pensez.

179. Fole amor de rechief l'asaut

180. Et li resmuet un grant asaut:

181. De son bon pensé le reprent

182. Et par fol conseil li aprent

183. Que d'offrir le fermail se gart

184. Et a s'amie bien le gart,

185. Qui por s'amor le gardera.

186. Quant a son col pendu sera,

187. Sovent le verra toute vois

188. Et li ramentevra ses joies;

189. Mes s'i l'offre, ja n'en jorra,

190. Car jamés voir ne le porra,

191. Ençois sera chose perdue.

192. Ainsi mavese amor l'argue

193. Si qu'il ne set qu'il daie fere;

194. Car vertu li fet sovent treire

195. Le fermail d'or hors de sa borse;

196. Sovent arriere le renborse

197. Quant de s'amie li remenbre.

198. Si li fremissent tuit li menbre

199. Et dit: " Je cuit que fols seraie

200. Se ge huimés le fermail offraie;

201. Car tant l'é treit et remborsé

202. Et tant sui en vice acorsé

203. Que ge pens et puis bien savoir

204. Que n'en porroie huimés avoir

205. Gré ne de Dieu ne de sa mere,

206. Car trop convoiteuse et avere

207. Est envers eus ma pensee,

208. Dom m'oeuvre seroit avilee. "

209. Einsint fu grant desputaison

210. Entre fol pensé et raison

211. - Li un en bien, l'autre en mallice,

212. L'un en vertu, l'autre en vice -

213. Si qu'entre deus est entrepris.

214. Au darrenier a le melz pris,

215. Car ill a en son cuer pensé

216. Qu'il lessera son fol pensé

217. Et si pense que bien soeffre estre

218. Efforcié le regne celestre;

219. A soi meïsmes fera force!

220. Lors treit le fermail, tant s'esforce,

221. Et l'offre a icele Marie

222. Qui a soi ses amis marie;

223. L'autre Marie a oubliee

224. Et lessié sa fole pensee.

225. O pleur et o devocion,

226. Humblement fist s'oblacion

227. A la douce Marie ennoree.

228. De bon cuer, de bonne pensee,

229. Offri li clers son fermail d'or:

230. C'est tout son mueble et son tresor!

231. Quant d'offrir se fu aquité,

232. Li clers de Sessons la cité

233. Eissi et se mist a la voie,

234. Desierreus que son païs voie.

235. Vers la mer prist a cheminer,

236. Car se Dex le veust destiner,

237. Par la mer se fera nagier.

238. Ja ert hore de herbergier,

239. Car le jor aloit aserant.

240. Le clerc ala ostel querant:

241. Chiés un preuzdome, en un vilage,

242. Demanda por Dieu herbergage.

243. Cil preuzdom avoit filles belles

244. - Ne sei quantes genvres pucellez -

245. Et vit le clerc genvre d'aage,

246. Bien fet de cors et de visage.

247. De ses filles ot soupeçon

248. Que le clerc mauvese leçon

249. Leur apreïst et leur leüst

250. Se la nuit ostelé l'eust.

251. Si dist: " Dans clerc, je vos voi tel,

252. Bel et genvre, qu'en mon ostel

253. Ennuit pas ne vos recevraie:

254. De mes filles poor avroie

255. Qu'aucune d'eles, par parole,

256. Apreïssiés a vostre escole.

257. Mes s'i vos venoit a pleisir

258. Que vossissiez ennuit gesir

259. Ci pres en une moie granche,

260. Ou a estrein et paille blanche

261. A grant plenté et bon forrage,

262. Illec vous presterai l'estage. "

263. Li clers vit qu'i ne pot melz fere

264. Que que il li deüst despleire.

265. Ce qu'il pot fist, il n'i ot el!

266. A gré prist en la granche ostel,

267. En la granche se herberga.

268. Ce soir, poi a souper menga.

269. Quant ot soupé legierement,

270. La ou seul prit hebergement,

271. Sus le fuerre s'ala couchier.

272. Tel lit n'ot cil mie moult chier,

273. Mes de l'errer estoit lassés

274. Et tristes et dolent assés

275. Qu'en tel leu l'estut herbergier;

276. Si s'en dormi moult de legier.

277. Entor mie nuit s'esveilla,

278. Mes de ce moult se merveilla

279. Qu'il vit dever le ciel descendre

280. Unne grant clarté et porprendre

281. La granche en chacune partie,

282. Dom la granche fu esclardie

283. Et de clarté enluminee

284. Com s'el fust de feu esbrasee.

285. Le clerc garda par la clarté:

286. Trois dames de moult grant biauté

287. Vit de devant soi arrestees.

288. Richement erent aornees

289. D'apareil et de vesteüre,

290. Mes l'une est greindre de stature

291. Des autres et melz aornee

292. Et de greigneur biauté douee.

293. Le clerc vit plus pres de soi celle;

294. Mes el ert la greindre et plus belle

295. Et de plus bel acesmement.

296. Celle l'arrena doucement,

297. Par paroles moult agreables

298. Et benignes et confortables,

299. Et si dist au clerc qui veilleit

300. Et o poor se merveilleit:

301. " Men ami cher, par bon eür,

302. Soiez joieus et asseür,

303. Car feite as amie novelle:

304. Je sui Marie la pucelle,

305. Mere de Dieu et chanberiere,

306. Dom tu as feit t'amie chiere;

307. Car por m'amor querre et avoir

308. T'iés departi, par ton savoir,

309. De l'amor a l'autre Marie

310. Que tu tenoies a amie,

311. Car le fermail d'or afiné

312. Que tu avoies destiné

313. A l'autre Marie et promis

314. Me donas comme bons amis,

315. A[l. L'] autrier, a Sessons la cité.

316. Don ge te di, par verité,

317. Que tu as m'amor deservie

318. Don tu m'as si en gré servie.

319. Or te garde bien et porvoies

320. Que boens amis et leiaus soies.

321. Vers moi te contien leiaument

322. Et moine t'amor chatement.

323. Se vers moi es amis leiaus,

324. Tot sans lestres et sans seiaus

325. Te promest et mest en convent

326. Qu'a toi vendrei paller sovent

327. Et sovent te visiterei

328. Et conpaignie te ferei.

329. Quant seras venu en ta terre,

330. Garde de fole amor requerre

331. Et lesse ester tote folie,

332. Et ge t'envoierei aïe

333. Et touz jorz te donrei confort.

334. Si soies viguereus et fort

335. Et conbatables chanpions

336. Contre foles temptacions,

337. Et si te conseil bien et leu

338. Que quierges un segrei leu

339. Ou tu ailles seul habiter,

340. Que meulz te puisse visiter

341. Et mielz conpaignie porter,

342. A toi paller et conforter.

343. Et que tu ne cuides et doutes

344. Que ce que tu vois et escoutes

345. Soit vanité, fable ou mençonge,

346. Ausint com vision de songe,

347. Veoir puez enseignes veraies,

348. Que la verité mielz en craies.

349. Se tu en vialz le voir aprendre

350. Voiz le fermail a mon coul pendre

351. Qu'a Sessons l'autrier me donnas,

352. Dom si noble guerredon as.

353. A ami touz jors te tendrei

354. Sovent a toi paller vendrei;

355. Nostre amor, nostre compaignie

356. Ne sera jamés departie. "

357. Le clerc reçut lors hardement

358. Et regarda apertement

359. Se c'ert voirs ce qu'il entendoit:

360. Son fermail d'or vit qui pendoit

361. Au coul a la dame ennoree

362. Qui a Chartres est aouree.

363. Bien quenut que c'ert son fermail;

364. N'ert pas songes ne devinail,

365. Einz est verité pure et fine.

366. Son fermail vit en la poitrine

367. A la dame bien atachié.

368. Lors ne s'est mucié ne cachié

369. Le clerc qui est asseüré;

370. Moult se tient a beneüré

371. De ceste haute vision.

372. Joieus et o devocion,

373. La haute dame gracia

374. Et aoura et mercia

375. Quant, por sa grant humilité,

376. L'avoit doucement visité;

377. Si li promist qu'outreement

378. Dou tout a son commandement

379. D'ore en avant obeïreit

380. Et riens ne li contredireit.

381. Atant la dame s'en parti,

382. Mes au clerc avant departi

383. De sa beneïçon partie.

384. La rala dom el ert partie

385. Et le clerc a Dieu commanda;

386. Celle fois, plus n'i demanda.

387. Le clerc en si boen point lessa

388. Que des lores dou tout cessa

389. De fol pensé et de fole oevre.

390. Ainsint tost Dex, quant il veust, oevre.

391. Car le clerc, por sa boene amie,

392. Lessa toute amor de folie

393. Et fu en ferme proposement

394. Que des lors vivroit chatement.

395. Le clerc que Dex volt tant amer

396. Hativement passa la mer,

397. Sanz peril et sans encombrier.

398. En la voie n'ot destorbier,

399. Einz passa droit en son païs.

400. A Londres, dom il fu naïs,

401. Ala ses parens visiter,

402. Mes n'i vost pas moult arrester.

403. Quant visités ot ses amis,

404. Ce qu'a Nostre Dame ot promis

405. Ne mist mie en oubliance:

406. Sanz delei et sanz demorance,

407. En une ille de mer segraie,

408. Seul, de gent privee et quaie,

409. Entra et le monde et s'ordure

410. Eschiva et toute luxure.

411. En ce leu fu qui ert estranges;

412. Illeques mena vie d'anges,

413. Seinte vie et celestiau.

414. De viande esperituau

415. Vesqui plus que de terrienne.

416. Ausint com fist la Juscienne,

417. Son cors en penitence mist

418. Et sovent, si com li promist,

419. Nostre Dame le visita

420. Et par paler le delicta

421. Et li dona force et confort,

422. Et le fist contre touz maus fort.

423. Toz jors puis li tint compaignie

424. Et a la mort et la vie.

425. Quant li rois Richart d'Angleterre

426. Dou clerc qui estoit de sa terre

427. Les miracles a certes sot,

428. Vers l'iglise de Chartres ot

429. Des lores greigneur reverance,

430. Et enneur et obedience

431. Fist au mesages de l'iglise

432. Et les lessa, a leur devise,

433. Aler sarmoner par sa terre,

434. Ja soit ce que il eüst lor guerre

435. Vers le roi Phelipe de France.

436. Si leur dona asseürance

437. Et les reçut cortoisement

438. Et si les conduit sauvement.

439. Et un jor, par humilité,

440. Porta li rois, por verité,

441. Sus ses espaules, lui meïsmes,

442. Les hautes ...*[l. reliques] seintismes,

443. Qui dedens une chasse estoient

444. Que li message o eus portoient.

445. Cest miracle et ceste aventure,

446. Si comme le dit l'escripture,

447. Conta li rois en tel maniere

448. A une soe seror chiere,

449. Aalis, contesse de Blois,

450. Et la dame de grant noblais

451. Par sa contree le conta,

452. Si que le contes tant monta

453. Qu'il fu mis en autorité