XXV. D'une fame a cui il mesavint por ce qu'el filla au semadi au seir

1. Li livres conte ci emprés

2. Que de Bonneval est bien pres

3. Une ville; ou[l. con] l'en l'apelle

4. Ne dit pas, mes une chapelle

5. I a qui est d'un parroissiage

6. D'un autre ville, et, par usage,

7. Li prestre qui dou leu tenoit

8. La parroisse, chanter venoit

9. A celle chapelle preucheine,

10. A certain jour en la semeine.

11. Illec ou la chapelle estoit

12. Ert une fame qui metoit

13. En filler grant cure et grant peine.

14. Ne filloit mie lin, mes leine.

15. De sa quenoulle einsint vivoit,

16. De nulle autre oeuvre ne servoit.

17. Celle fame dom ge vos di,

18. Emprés vepres au semadi,

19. Regarda l'oevre de sa leinne

20. Qu'el avoit fillé la semeinne;

21. Si vit qu'el n'ot pas tant d'ouvraigne

22. Comme autrefois, dom sa besoigne

23. Li estoit forment dommageeuse.

24. Si ot elle assez leine oiseuse

25. Por son dommage recovrer,

26. Mes el n'ouse, ce seir, ouvrer

27. Por la feste a la haute dame,

28. Que garder doit et homme et fame

29. De toute oevre qui est humeine;

30. Et l'endemein, por le diemeinne,

31. Li lesoit il encore meins

32. A fere humeine oevre de meins;

33. Et au lundi n'ot point d'espace,

34. Qu'i li covenoit sa fillace,

35. Le lundi, bien matinet, vendre

36. Por sa vie ensevre et prendre.

37. Ainsi fu la dame entreprise,

38. Quar el ne set en quele guise

39. Puisse recovrer son dommage

40. Se elle ne met s'ame en gage.

41. Dou semadi au seir filler

42. ...*

43. Temptacion a ce la boute;

44. D'autre part le pechié redoute,

45. Si qu'el ne set qu'el daie feire.

46. A sei meïsmes est contreire:

47. D'une part la point covoitise,

48. Qui de filer la nuit l'atise

49. Et de parfeire sa quenoille,

50. ...*

51. L'ame d'autre part l'en chastie.

52. Or le velt, or ne le velt mie.

53. A la parfin fu tant temptee

54. Qu'a pechié est abandonee

55. Por covoitise de gaieng,

56. Dom el reçut puis grief mehaeng.

57. Quant toute gent fu endormiee[l. endormie]

58. Et la lune luiseit serie,

59. En son vergier ala filler,

60. Com celle qui vout Deu guiler;

61. Mes elle en fu por voir guilee.

62. Si avoit el bien en pensee

63. Que celle oevre qu'el fesoit

64. A Nostre Dame despleisoit

65. Et qu'el fesoit mal et pechié;

66. Mes son cors ert tant entechié

67. De covoitise dom ardoit

68. Qu'a pechié pas ne regardoit.

69. Si priveement ouvroit comme

70. Celle qui meins cremoit Dieu que homme.

71. Quant toute s'oevre ot achevee,

72. De la ou se sist s'est levee,

73. Car aler couchier se vouloit.

74. Ja ce que point ne se douloit

75. Ne ne sentoit mal n'autre chouse,

76. Une de ses meins vit si clouse

77. Et point ovrir ne la poet:

78. La mein si forment se cloet

79. Com se li doi s'entretenissent

80. Et a la paume se aerdissent.

81. O l'autre main forment s'efforce,

82. Mes ne por poine ne por force,

83. Car ne la pot n'ouvrir n'estendre

84. Tant i sache baer ne tendre,

85. Cum se li doi fusent gelé

86. Et a la paume saellé.

87. Quant ceste chouse ot regardee,

88. Moult fut forment espoentee

89. Et durement se merveilla.

90. Toute nuit sans dormir veilla,

91. Qu'el pensoit et ert en doutance,

92. Savoir se c'ert la Dieu venchance

93. Ou se c'estoit de maladie;

94. Ne set que face ne que die.

95. Le diemenche vint l'endemein;

96. El prist a regarder sa mein

97. Et essia se tant eüst

98. Force que ovrir la peüst,

99. Mes rien n'i vault enging ne force,

100. Moins li vaut quant el plus s'esforce.

101. Angoisse ne douleur ne sent

102. Ne d'enfermeté nuisement

103. Fors qu'el ne pot sa mein ouvrir.

104. A nul ne s'ouse descouvrir,

105. Car por honte de gent n'a cure

106. A dire a nullui s'aventure,

107. Qu'el cuidoit que Dieu y ovrast

108. Einsint que santé recouvrast

109. Et que einsint garison eüst

110. Que nus hons son cas ne seüst.

111. Le jor passa en tel maniere

112. Et la nuit ausint tote entiere

113. Tant que le lundi ajorna.

114. Celle en son ostel sejorna,

115. Et ses voisines se leverent;

116. Si com soloient l'apelerent

117. Qu'el alast o els ou marchié;

118. Mes a a une enchargié

119. De ses voisines sa besoigne,

120. Car de soi montrer ot vergoinne.

121. Por ce o els aler refusa

122. Et au melz qu'el pot s'escusa.

123. Lors se prit par soi a reprendre:

124. " Que faz ge? Que me vaut l'atendre?

125. Dei ge le miracle Dieu teire?

126. Se home ne set cel afeire,

127. Dex le set, qui voit toutes choses;

128. Les pensees qui sont enclouses

129. Ou cuer voit toutes en espert:

130. Ja nul segrei n'iert si couvert

131. Que Dex nel sache bien et voie.

132. Ge n'i voi ne fuite ne voie

133. Coment cest fet puisse celer.

134. Se de gré nel voil reveler,

135. Maugré mien le reveleré

136. Dex, qui le set; lors si seré

137. Pis que devant et greindre honte.

138. Le celer voir noient ne monte!

139. Dex m'a por mon pechié punie,

140. G'ei bien la poine deservie.

141. Dex veult qu'en moi soit sanz celee

142. Sa haut oevre manifestee.

143. Quant il veult que l'en sache s'oevre,

144. Se ge la tes et ge la cuevre,

145. Ne[l. En] sera le pechié creüz.

146. Dex veult que cest fet soit seüz

147. Et qu'on die au clerc ou au prestre.

148. Tous jors ne puis ge pas ci estre!

149. Ce qu'il veult ne puis contredire;

150. Donques le m'estuet il a dire:

151. Ge le diré a mon provoire,

152. Qui est sergent Dieu et vicaire.

153. S'a mon provoire le di primes,

154. Ge le diré a Dieu meïsmes,

155. Car Dex meismes li a preté

156. De l'ame et dou cors poeté;

157. L'un et l'autre a mestier de cure,

158. Mon cors dou mal que il endure

159. Et l'ame estuet qu'el soit curee

160. Dou pechié dom est encombree.

161. Mon mestre me doit conseillier,

162. En oroisons por moi veillier. "

163. Quant qu'elle se pleigneit einsi,

164. De son ostel la fame issi.

165. De toute pars vet regardant,

166. De loing vit le prestre venant:

167. " Dex, dist celle, merciés soies

168. Qui par ton menistre m'envoies

169. De m'enfermeté medicine,

170. Que j'ae par la vertu devine.

171. Se or ne li di ma pensee,

172. N'en puis estre mes escusee.

173. M'aventure voir li dirai;

174. A l'encontre de lui irai,

175. Si li direi meulz mon pleisir

176. Priveement et a leisir. "

177. De la ville eissi hors atant;

178. Contre le prestre meintenant

179. Ala et si le salua,

180. Et rendu son salu li a,

181. A la fame, et il li enquiert

182. Com el le feit et comment li ert.

183. Celle rougit et s'estuet

184. Ne ne dist pas com li estuet.

185. D'autre chose ensemble parlerent,

186. Em pallant en la ville entrerent.

187. Celle qui son cuer ot cellé

188. Parti de lui et il de lé.

189. Le prestre s'en ala en erre

190. Feire ce qu'i ert venu querre

191. Qu'il ala dire son servise:

192. Autre chose n'i ot aquise.

193. Celle remeint seule et pensive:

194. " Dex, dist elle, tant sui cheitive,

195. Qui avoie ore si grant leisir

196. De dire au prestre mon pleisir,

197. Non mie au prestre, mes a Dé.

198. Mon estat m'avoit demandé

199. Et ge me sui vers lui celee.

200. Et ne set Dex bien ma pensee

201. Et toute m'euvre et tot mon afeire?

202. Dex set tot quant qu'il est a feire,

203. Doncques set il ce qu'est ja fet.

204. N'est merveille se me deshet,

205. Qui a celui parler n'osei

206. Qui est ou leu de Deu, ce sei.

207. Desques a prestres ne dis le voir,

208. Diex le feré aus gens savoir;

209. Ce que ge n'ousei dire a un

210. Dex le monstrera en commun.

211. Por quoy voil ge mon feit teire?

212. Ge n'ei pas honte de meffeire

213. Et j'ei honte de l'amander!

214. Ne deüsse ge demander

215. Aïe et medecinement

216. De l'enfermeté que je sant?

217. A mon prestre iray ariere,

218. Dou fet li direi la menniere;

219. A lui confesse me feirei,

220. Qua[l. Que] ja rien ne l'en celerei.

221. Et se g'é honte dou dire,

222. Don di ge por voir que Dex ire

223. A vers moi, corrouz et haïne.

224. Quant ne veult qu'aie medicine

225. Ne que ma confession die,

226. Je di que Dex m'a enhaïe;

227. Digne ne sui qu'a lui m'acorde

228. Ne qu'aie sa misericorde;

229. Bien voi que Dex m'a oubliee

230. Et qu'au deable sui livree. "

231. Quant el se fu einsi conpleinte

232. Et a lé seule ot fet sa pleinte,

233. En la voie s'ala tenir

234. Par ou le prestre doit venir.

235. Li prestre vint, ceu est la voire.

236. El rougi quant vit le provoire;

237. A luy pas ne se confessa,

238. Car por la honte le lessa.

239. Li prestres einsint s'en ala,

240. Celle remeint, qui grant mal a;

241. Confuse et desesperee

242. S'en rest en sa meson alee.

243. Si com entroit en sa meson,

244. Si come ou livre le leison,

245. La douleur li fu agrevee

246. En la mein qu'elle tint serree,

247. Qui nulle hore ne li cessa.

248. Vers le vespre tant l'enpressa

249. Que por la douleur, qui ert greindre

250. Que devant, comença a geindre.

251. Emprés haut crier la covint

252. Si que touz le visinez vint.

253. Tuit lé voisin qui au cri vindrent

254. Celle chose a merveilles tindrent,

255. Car il ne savoient l'acheison.

256. Onc de lé n'en trestent reison

257. Fors que tant sa mein leur mostra;

258. Mes toutes vois treitot outre a

259. Au darien le fet conté,

260. Dom tout cil sont espoenté.

261. Ne sevent a cui conseil prendre,

262. Fors qu'a Dieu se voloit atendre.

263. Lors l'ont a l'iglise menee,

264. De l'eive benaite arrosee;

265. La crois ont a sa mein touchiee

266. Et la boiste ou est nostre salu,

267. Mes tot ce n'i a rien valu.

268. Une fame ert illec presente

269. Qui leur dist que sanz la consente

270. Dou provoire ne li devaient

271. Feire la chose qu'il feisaient;

272. S'atendissent a l'endemein,

273. Que li prestres vendreit bun mein;

274. Ausint ert ja de nuit bien pres

275. Et la feste de seint' Agnés

276. A l'endemein, por voir, sereit:

277. Le prestre messe chanteroit.

278. Si leur donna conseil leiau

279. De cest fet et de cest fleiau.

280. A cest conseil tuit s'acorderent,

281. A leur osteuls s'en retornerent.

282. La fame que douleur tormente,

283. Celle nuit, contriste et dolente,

284. Ne pot dormir ne someillier.

285. Toute la nuit la fist veillier

286. L'angoisse qu'el soeffre en la mein.

287. Li prestre vint a l'endemein,

288. Dom el desierreit la venue

289. Por estre par lé secorue.

290. Quant s'en entra en la chapelle,

291. O la cloche la gent apelle,

292. Qu'il venissent oïr la messe,

293. Et celle a cui douleur ne cesse,

294. Quant la cloche sonner oï,

295. Dedens son cuer moult s'esjoï.

296. Li voisin matin s'asemblerent,

297. La fame a l'iglise menerent

298. Et la mostrerent au provoire

299. Et conterent la chose voire.

300. Li prestre moult se merveilla

301. Et si leur dist et conseilla

302. Qu'a Deu aïe demandassent

303. Et por la malade priassent;

304. Il meïsmes en prieroit

305. Quant la messe celebrerroit.

306. Le chapelein chanta la messe

307. Et pria por la pecherresse;

308. Et elle por soi Dieu pria,

309. En soupirant merci cria

310. Et avoit en Dieu s'esperance

311. Qu'il i envoieroit alejance.

312. Quant le chapelein ot chanté,

313. Celle qui desierreit santé

314. Apella et li dist: " Amie,

315. C'est par pechié qu'iés si punie.

316. Le pechié qu'as fet a fin te moine,

317. Dou pechié te sera la poine.

318. Confesse toi, ton fet descuevre:

319. De bouche et de cuer et de evre

320. Convient que tu saies confesse

321. Se tu veulz que ti maus te lesse. "

322. Celle qui fu bien repentant,

323. Et d'avoir santé meintenant,

324. Li conta sa confession

325. O pleur et o devocion,

326. Des fes qu'el ot en remembrance.

327. Cil li enjoint sa penitance:

328. Qu'el alast, por le preu de s'ame,

329. A Chartres prier Nostre Dame

330. Chacum an, non pas a chacune

331. Des quatre festes, mes a une,

332. Laquelle qui plus li pleireit,

333. Mes or primes commenceroit

334. A la precheine Chandeleur,

335. Que Dex la gitast de douleur.

336. Quant qu'i li enjoint et loa

337. Promist celle a fere et voa

338. Que, o veu et devocion,

339. A la Purificacion,

340. Qui or sereit precheinement,

341. Iroit ore premierement

342. A Chartres en pelerinage

343. Et, tant com vivroit par aage,

344. La voie, chacun an, feroit

345. Quant une des festes seroit.

346. Enprés le veu et la promesse,

347. De ses pechiez la pecherresse,

348. Asoute l'a li chapeleins

349. Et qu'el meïst entre ses meins

350. Sa mein close li enseigna;

351. Puis l'asout et si la seigna

352. Et gita l'eive beneïe

353. Devant toute la compaignie.

354. Si commencierent en commun

355. Desjoindre les doiz, un et un.

356. Celle ovri la mein et la clout

357. Et clout et ovri quant el voust.

358. Joiant fu et esleesciee

359. Quant se senti seine et hetiee

360. Ainsi qu'onques n'eüst esté

361. Agregiee d'enfermeté.

362. Tuit cil qui ce miracle virent,

363. O leesce graces rendirent

364. A la haute Virge ennoree,

365. A cui la fame s'ert voee,

366. Et Dex loerent, o vois liee,

367. Qui de son mal l'ot desliee.

368. Enprés avint greigneur merveille,

369. Car deable, qui toz jors veille

370. Por le boens de leurs biens retreire,

371. Pensa le bienfeit a deffere,

372. Et apreuchoit forment la feste.

373. La fame fu de movoir preste

374. A Chartres et s'apareilla,

375. Mes deable li conseilla

376. Que elle porloignast sa voie;

377. Temptacion moult la desvoie

378. Que encore pas ne s'esmoeve;

379. Et qu'el doit remeindre li proeve,

380. Car il li dist: " Que fes? Que es ce?

381. O vielz aler par ceste apresce

382. D'iver, qui tant destreint et grieve?

383. La voie est trop longue et trop grieve

384. Et li jors cors por aler hors.

385. Tu greveroies trop ton corps

386. S'en celle seison cheminoies,

387. Car trop greveuse sont les voies.

388. Tu pues oncore bien atendre

389. Et autre terme plus lonc prendre.

390. Li termes t'encharga briement

391. Que une foiz tant seullement,

392. Chacun an, a Chartres allasses,

393. A l'une que tu mielz amasses

394. Des quatre festes Nostre Dame:

395. Einsi aquiteroies t'ame.

396. Se tu ores ne ves a ceste,

397. Si iras bien a l'autre feste

398. Que l'en appella la Marceiche

399. Et, se essoine te empeesche,

400. Si iras a la mi aoust,

401. A celle ou auras meins de coust

402. Et meins de travail et de peine. "

403. Einsi temptacion la meine

404. Par quoy deable l'a veincue.

405. El remeint ne ne se remue

406. Tant que la feste fu passee.

407. A l'endemein, a l'ajornee,

408. Vint le prestre a la chapelle,

409. La fame vit, a soi l'apelle.

410. Quant vint de Chartres demanda

411. Et s'el fist ce qu'il commanda,

412. S'el fut a Chartres, a l'iglise,

413. S'el rendi graces et servise

414. A la dame qui la gueri

415. Et se son bienfet li meri.

416. Celle rougi, si fu concluse

417. Et si se covre et si s'escuse

418. De son fet et de sa folie,

419. Et dit: " A Chartres ne fu mie

420. A la Purification,

421. Mes a l'Anunciacion

422. Iré, por voir, sans contredire. "

423. Et li prestre respont plein d'ire:

424. " Cheitive, com iés deceüe,

425. Inobediens, mescreüe !

426. Le cui conseil as tu creü?

427. Le Deable t'a mal plet meu

428. Par cui tu as ton veu enfreint,

429. Dom la mere Deu moult se pleint.

430. Toust as la bonté obliee

431. Que Dex t'avoit, por lé, mostree.

432. Ge crei tu le comparras chier:

433. Quant Dex velt bien, se set venchier.

434. Des qu'einsint est, Dex par sa grace

435. De tes pechiez pardon te face. "

436. Quant ot parlé en tel maniere,

437. Li prestre s'en rala arieire;

438. Celle en sa meson rest alee

439. Moult confuse et espoentee.

440. Quant en sa meson fu venue,

441. Soudement fu el cors ferue

442. D'une plaie horrible et moleste.

443. Des piés aval dusqu'ein la teste,

444. Li maus si griement l'envaï

445. Car toute paumee chaï.

446. Un cri gita espoontable

447. Com s'eüst ou cors deable.

448. Par sa bouche escume sailli.

449. La douleur si fort l'assailli

450. Que des menbres et des cinq sens

451. Perdi la vertu par lonc tens.

452. Son cors fu porpris d'enfleüre

453. Et son cuer noir, outre mesure,

454. Que si fu plus luisant que glace.

455. Il ne paroit pas en sa face

456. Qu'el eüst point de vie en cors,

457. Fors de sa bouche issoit hors

458. Une fort et puant aleine,

459. Qui n'est a sentir pas bien feine[l. seine].

460. Einsint deus jors et deus nuis fut

461. C'onques ne menja ne ne but.

462. Li prestres et cil qui la virent

463. De la merveille s'esbahirent;

464. De la fame pitié avoient

465. Et por lé, nuit et jor, prioient.

466. Au tiers jor revint ensement,

467. Non mie seul, mes o grant gent,

468. Visiter la fame li prestres

469. Et dist: " Sire, rois celestres,

470. Ge vos pri et tuit vos prion

471. Que morir sans confession

472. Ne soffrez ceste fame ci,

473. Dom Dex ait de l'ame merci. "

474. En enprés apela la fame

475. Et li dist qu'el pensast de s'ame,

476. Qu'elle parlat, si poeit estre,

477. A lui com l'en doit fere a prestre.

478. Celle soupira et se pleint

479. Et si cria, ç'oïre[l. oïrent] meint:

480. " Douz Dex, douce Virge Marie,

481. Merci vos requier et aïe. "

482. Quant li prestres parler l'oï,

483. Dedens son cuer moult s'esjoï;

484. Lors li dist qu'el se confessast,

485. Que rien a dire n'i lessast.

486. Dou tens passa moult poi d'espasce:

487. Celle devant toz, en la place

488. Trestoz ses pechiez resgeï

489. Et li prestre la beneï,

490. Que de toz ses pechiés l'asoust.

491. Merveille avint, car lors si toust

492. Come li prestre l'ot asousse,

493. Celle qui ert enflee et grosse

494. Qu'i sembleit qu'el deüst crever,

495. Sailli en piez sans sé grever,

496. Esbahie et esmervellee,

497. Com de dormir esveillee,

498. Que en un moment fu si seine

499. Comme poisson qui noe en Seine.

500. Ice virent meintes et meint

501. Que nul signe en lé ne remeint

502. Qu'elle eüst eü maladie.

503. Lors dist au prestre qu'il li die

504. Qu'el fera et qu'il li enseigne.

505. ...*

506. " Ge veil et comant que tu faces

507. Ce que ge t'enchargei, et graces

508. A Deu et a sa mere rendes

509. A Chartres ne plus n'i atendes;

510. En s'iglise la dame aeure

511. Qui t'a secorue en pou d'eure.

512. Gardes que chacun an i ailles

513. Ne a ce feire pas ne failles,

514. Car, se tu faus au meintenir,

515. Bien t'en porra mesavenir. "

516. Celle fist le commandement,

517. Qu'el se mut, sanz delaiement,

518. A feire son pelerinage.

519. Chacun an puis, tot son aage,

520. Le pelerinage meintint.

521. Einsint a ceste fame avint

522. Que chacun de vos oï a:

523. Li prestres le nous tesmoigna

524. Et li autres qui present erent,

525. Qui Dieu et sa mere aourerent.

526. Li prestres, cel an dom ge di,

527. En relegion se rendi.

528. En ceste fame sont trovez

529. Cinq miracles bien esprovez:

530. Li premiers quant la mein ot close

531. Por ce qu'a male euvre fust ose;

532. Le segont que par la celee

533. Fu la mein de douleur grevee;

534. Li tiers fu quant se confessa,

535. Que le mal de la mein cessa;

536. Li quars fu quant le veu froissa,

537. Que la grief plaie l'angoissa;

538. Le quint quant gueri de la plaie