XXVIII. Coment la cité de Chartres fut delivree de ses anemis par la seinte chemise de Chartres

1. Li livres ci emprés devise

2. Que par celle seinte chemise

3. Qui a Chartres est enchassee

4. Un miracle de renomee

5. Avint dom ferei mention,

6. En l'en de l'inquarnacion

7. Nocentiesme huit anz meins par conte.

8. Un Challes, si com l'escrit conte,

9. Ert rois de France et dou païs,

10. Qui ert filz au roi Loïs,

11. Qui baubes estoit seurnomés.

12. ...*

13. Avint au tens Challes, cel roi.

14. Un tirant lors de grant desroi

15. Vint en France, qui ot non Roul,

16. Dom l'en crie oncore: " Haroul! "

17. En France grans ouz amena

18. Cil tirant, que il aüna

19. De gent paienne et sarradine.

20. Tout destruit desus la marine,

21. France gasta et la contree:

22. Tout ocist et mist a l'espee

23. Que nus ne li pot contrester.

24. Onques ne se vost arrester

25. Dusqu'a Estampes la rëau,

26. Ou il refist moult grant fleiau.

27. D'illeques a Chartres ala

28. Et l'asist de ça et de la.

29. Chartres asistrent li paien.

30. Poor orent li citeien

31. Qui furent dedenz asegié,

32. Car il furent forment gregié

33. De mangonniaus et de perrieres

34. Qui, par devant et par derrieres,

35. Gitaient pierres a leur murs.

36. Ne se tindrent pas asseürs

37. Quant virent les pierres descendre.

38. Pooir n'avoient d'aus deffendre

39. Ne d'eissir hors ne de combattre.

40. Cels dehors voient qui d'abatre

41. Les murs se painent et travaillent

42. Et a grant effors les assaillent;

43. Si en ont eu grant esmaance.

44. N'ont en nulle aïe fiance

45. Fors ou secors de la pucelle

46. Qui dame de Chartres s'apelle;

47. De celle requierent aïe

48. Qui de Chartres a seignorie.

49. Lor prindrent la seinte chemise

50. A la mere Dé, qui fu prise

51. Jadis dedenz Constentinoble.

52. Precieus don en fist et noble

53. A Chartres un grant roi de France:

54. Challes le Chauf ot non d'enfance.

55. Cil rois a Chartres la dona,

56. Dom l'en croit que guerredon a

57. De la dame qui la vestoit

58. Quant le filz Dieu en lé estoit,

59. Car celle penseit qu'el fust mise

60. A Chartres, en sa mestre iglise,

61. Et qu'el soit oncore gardee

62. O leu dom est dame clamee.

63. Li Chartrin la chemise pristrent,

64. Sus les murs au quarneaus la mistrent

65. En leu d'enseigne et de benniere.

66. Quant la virent la gent aversiere,

67. Si la pristrent moult a despire

68. Et entr'elx a chufler et rire.

69. Quarreaus i trestrent et saetes

70. Et d'ars turquois et d'arbalestes.

71. Mes Dex, qui vit lor mescreance,

72. I mostra devine venchance;

73. Si les avougla qu'il perdirent

74. La veüe, qui point ne virent

75. Si qu'il ne porent reculer

76. Ne ne porent avant aler.

77. Quant li Chartein aperceü

78. Orent le miracle et veü

79. Que leur fist la dame charteine,

80. Mentenant fu la joie pleine.

81. Si s'apareillent d'eissir hors

82. Et garnissent d'armes leur cors,

83. Vestent haubers et lacent hiaumes.

84. Ovec leur evesque Gousseaumes,

85. Qui portoit la seinte chemise,

86. Por deffense et por garantise,

87. Avecques une autre banniere,

88. Qui du voile de la Virge yere,

89. De Chartres s'en issirent tuit

90. O grant effors et o grant bruit.

91. En l'ost des paiens tot se mirent,

92. Si grant occision en firent

93. Com il leur vint a volenté:

94. Des ocis i ot tel plenté

95. Que la terre en fu joinchiee;

96. Tant i ot de gent detrenchiee

97. Que li Chartein ont leur espees

98. Dou sanc au paiens saoulees.

99. Quant qu'estoient en la champaigne,

100. Si leur vint, o grant compaigne,

101. Richart, li dus des Borgueignons;

102. Cil ameneit fiers conpaignons

103. Qu'o sei avoit. L'ost des François

104. Si grant occision ençais

105. I ot feite, or fu doublee!

106. Bien fierent de glaive et d'espee

107. Charteins, François et Borgueignons:

108. Tuit de ferir sont conpaignons

109. Sus la pute gent mescreüe.

110. Et quant Rou voit qu'ainsi creüe

111. Est la force a ses anemis,

112. En fuie s'est meintenant mis,

113. Quant il voit ses gens detrenchier

114. N'il n'a poeir de soi venchier.

115. Si s'en foui o poi de gent,

116. O dis chevalliers seulement.

117. De chevauchier tant esploita

118. Qu'a Lisees se receita,

119. Et de son ost une partie

120. Fu remese es chans esbahie,

121. Que li cretien ensevoient.

122. Cil qui de seigneur point n'avoient

123. En un mont en haut s'en foïrent.

124. Illec un jor se garantirent,

125. Quant a l'estor vint darreniers

126. Ebaltis, li cuens de Poitiers,

127. O de chevalliers grant compaigne.

128. Les paiens vit en la montaigne,

129. Si les enclust tretout entor.

130. Mes cil, qui savoient meint tor,

131. A mie nuit s'en eschaperent;

132. Par l'oust au François s'en passerent.

133. Quant il fu jor et François virent

134. Paiens eschapés, si saillirent

135. Sur les chevaus et les ensurent.

136. Les chevaus frais et igniaus furent,

137. Qui ensivant si les ateindrent;

138. Mes li paien les pas aceindrent

139. Des bestes mortes, de sanc teintes,

140. Dom entor eus firent ateintes[l. aceintes],

141. Que nus ne leur pot rien meffere.

142. François se mistrent au repaire,

143. Qui longuement orent chacié,

144. Chacun li hiaume ou chief lacié,

145. S'en repererent en leur tentes,

146. Et li paien, com gent dolentes,

147. Alerent de mort des espees

148. A leur seigneur, droit a Lisees.

149. La dame de Chartres, Marie,

150. Au Chartains fist einsi aïe

151. Par sa glorieuse chemise

152. Et son voile dom je devise;

153. Moult chier doyvent estre gardees