XXIX. Dou chancelier de Chartres qui saluet volentiers Nostre Dame

1. En escrit trovons et en chartres

2. Que Fubert, esvesques de Chartres,

3. Fu bon clerc de haute clergie;

4. Maint biaus ditiez fist en sa vie,

5. Meinte legende et meinte estoire,

6. Dom touz jors sera en memoire.

7. Moult ama Dieu et sainte iglise

8. Et acrut le devin servise;

9. L'iglise de Chartres ama

10. Especiaument et clama

11. Dame et amie especiau,

12. Sus totes iglise reiau.

13. Quant dou siecle fu trespassés,

14. De ses clers remeindrent assés

15. Qui furent de sa decepline

16. Et qui ensurent sa doctrine.

17. Entre cels fu un chanceliers

18. Qui ot esté si escoliers;

19. Bon clerc fu, de grant science,

20. Mes moult byen poira son sen ce

21. Qu'il ne meneit pas bonne vie:

22. Joliveté, envoiserie

23. Et richece, qui maus atreit

24. Et homme ou puis de vice treit

25. Et qui les vertus desracine,

26. Si trest ce clerc en sa santine

27. Et en la pueur de luxure.

28. Et oncore ert de tel nature

29. De l'autrui volentiers prenoit,

30. Riens ne rendoit, ainz retenoit

31. Quanque de l'autrui avoit pris.

32. De ce fere ert tozjorz apris

33. Et oncore, dom plus folx ert,

34. Son pichié feiseit en apert,

35. Qu'au monde pas nel reponneit;

36. De mauvés essamples donneit.

37. Mes ja ce qu'il ert entechié

38. De mavestiez et de pechié,

39. Volentiers servoit Nostre Dame,

40. Ses hores disoit, car de s'ame

41. Avoit mise en lé s'esperance

42. Et qu'auroit par lé acordance

43. Vers son chier filz de ses meffez

44. Qu'il fesoit et qu'il avoit fez.

45. Vers la dame ert si cors entiers

46. Et la saluet volentiers,

47. Mes ce bien ne sot pas la gent,

48. Qu'i le fesoit priveement;

49. Mes son pechié tretuit savoient,

50. Car apertement le veoient.

51. Autre gent le font autrement:

52. Leur pechié font celeement

53. Et les biens que il font puplient;

54. C'est ce que il s'i glorefient.

55. Mes nus por soi gloirefier

56. Ne doit son bienfet puplier;

57. Ne por orguel ne por ventance

58. Ne doit il fere demonstrance

59. Fors tant que son preme le voie

60. Por luy mostrer de bien la voie.

61. Mes chacun doit son mal celer;

62. Nel doit fors a Deu reveler,

63. Que dou monde ne soit repris

64. Ne mal essample n'i seit pris.

65. Cil chanceliers fist autrement:

66. Son mal fesoit apertement,

67. Com home en vice avivé,

68. Et son bien fesoit en privé,

69. En priant chacune jornee

70. A la mere Dieu ennoree

71. Qu'ele par sa misericorde

72. Vers son filz li feist acorde.

73. Un jor avint par destinee

74. - Ne sei en guerre ou en mellee

75. Ou cil chancelier s'estoit mis -

76. Qu'ocis fu de ses anemis.

77. Si ami le cors enporterent,

78. Mes li chanoine, qui penserent

79. Que il fu mors mauveisement

80. Com cil qui vivoit folement,

81. Ne voudrent pas ne n'orent cure

82. Qu'ovec els eüst sepulture.

83. Metre le firent, com par ire,

84. En une angle dou cemetire

85. Ou n'i avoit pas leu honeste.

86. Procession ne autre feste

87. A enterrer le cors ne firent.

88. D'un pou de terre le couvrirent,

89. Qu'il n'ot ne tonbe ne sarqueu.

90. Trente jors fu en itel leu.

91. La dame que il ot servie

92. Courrouciee fu et marrie

93. Dou fet et de la mesprison.

94. Si apparut par avison

95. Au greigneur seigneur de l'iglise;

96. Le livre prince le devise.

97. Si li dist com en courrouçant,

98. En blasmant et en manascent,

99. Qu'il alassent son chancelier

100. De la ou il gesoit drecier.

101. Cil enquist, qui doutant aloit,

102. De quel chancelier el palloit.

103. " Ge di, dit elle, de celui

104. Que a mon chancelier eslui,

105. Que avez geté de vostre estre,

106. Et melz que vos i deüst estre;

107. Si l'avez danné sanz reison,

108. Dom ge vos preing a acheison.

109. Or alés tout, le cors levez

110. Et l'enterrés, com le devez,

111. En ennorable sepulture.

112. Sachiés que m'avez fet injure,

113. Car mon clerc ert quant il vivoit

114. Et devotement me servoit. "

115. Li princiers tantout s'esveilla

116. Et moult forment se merveilla

117. De la vision qu'a veüe.

118. Au matin l'a amenteüe

119. A toz les seigneurs de l'iglise,

120. Qui d'un consent et d'une emprise

121. Vindrent la ou mestre le firent

122. Et de terre le deffoïrent.

123. Une grant merveille avint lors,

124. Que dou mort troverent le cors

125. Sans pueur, sans entechement,

126. ...*

127. Et virent la langue movoir

128. Einsint com il vossist por voir

129. Loer Dieu et sa douce mere,

130. Et une fleur luisant et clere

131. Virent qui nessoit de sa bouche;

132. De sa langue come d'une souche

133. Essi un rein plein de fleurestes

134. Agraables et nouvellestes

135. Et cil reins s'esforceit de querre

136. Voie par quoi essit de terre.

137. La langue ert eissint ennoree

138. Por ce qu'il avoit saluee

139. Souvent la glorieuse dame.

140. Bien sorent qu'ennoree ert l'ame

141. Quant le cors ert si ennoré.

142. De leur meffez ont tuit ploré;

143. Ce que ert meffeit amenderent,

144. Car tantost le cors enterrerent

145. En ennorable sepulture

146. Et cest miracle en escriture

147. Firent mettre por voire estoire